#شكولينا
#الجزء_التاسع_والثلاتين"القسم الأول"
#الجمان_الفريد
عماد حياة المسلم..واكسيرها الصلاة..
واول شي يتحاسب عليه..لاخير في عمل يلهي عنها..
صلوا صلاتكم...بعدين ديروا اللي وراكم...
وقولوا لاإله إلا الله بقلب سليم طاهر تفلحوا❤
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
داين تدان..
اللي تسلفه اليوم تلقاه غدوة خير أوشر..
غدوة هادي يمكن يكون بعد شهر او بعد سنه..ممكن يكون بعد20سنه...ممكن يكون يوم القيامه ووقتها من يعمل سوءا يجزا به...أو ماجزاء الإحسان إلا الإحسان..
كله متوقف عليك..كله بيدك انت..انت اللي تحدد مصيرك وتكمل باقي قدرك بنتائج افعالك...
وهدا اللي ماحسبتش رنده حسابه...او اي ظالم متجبر لما ينعمى ع عيونه من ظلمه..معاش يشوف روحه ظالم..
وهني هو وصل للمرحله اللي لازم يتعاقب بيها عقاب قوي..
لعله يردعه...
••طلعت من الحمام...
وهي لابسه ديشمبر ولافة شعرها بالفوطه..
استغربت..ماتسمعش في حس..
وبعدين معاش شافت حد...الدار فاضيه..
رنده؛زعمه نزل بيها لحديقة الفندق؟!مرات..
ومشت بإتجاه الساكو اللي فيه حوايجها..
عقدت حواجبها بإستغراب لما لقت مكانه فاضي..
التفت...ومشت قعدت ادور في الغرفه كلها وهي ترعش...
مالفت شي..مافي شي..مافي حد...
مشت تجري وين مافي شنطة يدها...بش تاخد تليفونها..
مالقتش التليفون...
كان واخده من الليل هو واثبات االهويه والجواز...
طاحت من يدها الشنطه وقعدت تشبح في الفراغ وهي ترجف بكل شي فيها..
حست روحها بتموت...لابل تمنت الموت لما بدت تربط في الاحداث ببعضها..من اول ماطلعت من الحوش امس..لليوم...
جت بين عيونها بنتها....
حطت ايديها ع خدودها..بعدين بدت تخبط وتبكي..تخبط وتخبط وتخبط وتزيد تبكي...لين وجهها انخدش ونزف...
قعمزت ع السرير بهده وحطت ايديها ع ركابها وهي تتخيل في اللي بيصير بعد هكي..
حطت ايديها ع فمها وقعدت تعيط في عيطة مكتومه وبين عيونها..بوها امها خواتها وخوتها...كيف بيصير في هادم كلهم..
خبطت بإيديها ع وجهها وقعدت شداته وغمضت عيونها بشده والدموع منهم ينزلوا وهي تقول بصوت يرجف..
"ياربي شن ندير..ياربي شن ندير..ياربي شن ندير"..
وقعدت تحاول تفكر..
ومالقتش قدامها غير انها تتصل بخوها سفيان..
فتحت عيونها ونزلت ايديها وناضت ومشت طول لتليفون الغرفه..
ودارت اتصالها...
🍁🍁🍁🍁🍁
واقف يمرر في نظره ع المحل متاع بوه..
كان الحاج الشريف يملك سلسله محلات..
اثات عصريه...محلات جلسات عربيه..
ومحل مواد كهرومنزليه..
اللي دار عليهم جوله ولده الكبير امس....
ونقطه البدايه للشريف كانت محل كبير اشبه بالسوق لمواد البناء...
هدا اللي فيه سفيان توا يطلع ع وضعه ويشوف في حركة البيع فيه..
وبوه يشوفله وهو مبتسم قال:تذكر امتى اخر مرة جيت هني .
سفيان شبحله وابتسم وقال:لما نجحت في الشهاده الثانويه وجيت نبشرك..
هز راسه الشريف وهو يضحك قال:وقتها قتلك خلاص توا بتبدا تخدم معاي..قتلي لايابوي قلبي غاوي شي تاني..
ابتسم سفيان وهز راسه وهو يذكر...
شويه رن تليفونه قامه وقال:شويه بوي..شاف الرقم استغرب ..
فتح الخط وحطه ع وذنه بدون مايتكلم..
جاه صوته اخته المرتعش
"سفيان تعاليلي ياوخي بالله عليك"
سفيان شبح لبوه حافظ ع ملامح وجهه العاديه ع قد مايقدر وقال؛لبوه...شويه وجاي..ولف ومشي طلع..
وبوه تنهد وناض بيدير لفه ع المحل..
اما هو..
طلع برا وقال:رنده!
"تعاليلي سفيان تعالى"
سفيان:وينك انتي..
":في فندق..في ********"
عقد حواجبه وقال:فندق!!؟
"ايه هيا وخيي بالله عليك " وانهارت بالبكي..
هو قال بقلق وحواجبه معقودات:تمام تمام جاي..
وسكر عليها وحاول يدير روحه خش لبوه..
سفيان:ماشي مشوار وجاي..
بوه التفت شبحله وهز راسه بالموافقه..
وهو ابتسمله بالغصب..ولف ومشي لسيارته طول..
🍁🍁🍁
بعد طول مسافه وصل للفندق..
خش للآستعلامات وجي بيسأل..فكر يسألهم اول شي عن..
سفيان:نبي نعرف رقم الغرفه اللي باسم محمد الفاسي..
الموظفه قعدت ادور عن طريق اللاب توب..بعدين شبحتله وقالت:مافي حد حاجز هني بهالاسم..
سفيان:كيف!؟ ماجاكمش واحد ومعاه مراة وبنت صغيره وحجزوا عندكم غرفه هني؟!
الموظفه:هو اكيد في بس لازم نعرفوا باسم مني محجوزة..
سفيان حس عقله بيوقف مش قادر يفهم شي..قعد يفكر شويه..
بعدين قام تليفونه وخش ع الصور..
طلع صورة بنت اخته ومده للموظفه وقال:البنت هادي ماشفتيهاش..
الموظفه ركزت فيها بعدين نادت ع زميلها وقالت:شفت البنت هادي؟.
زميلها ركز في الصورة وقال:ايه جت مع بوها وامها هني..
سفيان:تمام الغرفه متاعهم رقم كم..
الموظف قال:مذكر الحجز متاعهم باسم واحد ..
ومشي للجهاز وقعد يدور...بعدين قال...ايوه...سامي الطرابلسي..
سفيان معاش فهم شي بكل..
من سامي هدا..وشن جابه اخته وبنتها ليه؟!
بلع ريقه وقال:رقم الغرفه..
الموظف:الدور الخامس الغرفه رقم304...
سفيان هز راسه ومشي..
وهما معاه بعيونهم..
•••ركب الاصنصير وهو يفكر ويحاول يستوعب اللي صاير..
كل اللي يعرفه ان موعد سفر اخته اليوم...
اما قصة وجودهم في فندق معنداش بيها علم..
وصل للدور الخامس...ومشي وقعد يدور في ارقام الغرف لين وصل الغرفه المقصوده...
وقف قدامها ودق الباب..
🍁داخل..
رنده سمعت دق الباب نست نفسها ومشت طول للباب فتحاته..
لقت خوها قدامها..وهو شبحلها بصدمه بعدين خش وسكر الباب وقال..شن هدا!؟
رنده انتبهت لنفسها..ضمت روحها وقعدت تبكي وتقول...لعب بيا ياسفيان ضيعني..
سفيان بغضب شدها من ذراعها بالقوة وقال:من هو ياحيوانه!!؟
هي شبحتله بصدمه وقالت:كيف من هو..محمد..
سفيان:كيف محمد...والغرفه محجوزة باسم واحد اسمه سامي..
رنده شهقت بصدمه..
شدها سفيان بقوة اكثر وقال:تكلمي قولي الحق يارنده خير ماورب الكون نقتلك في مكانك..
رنده بصدمه:كيف تتكلم هكي كيف!!اني اختك سفيان معاش تعرف اختك ورباية اختك..هالكلب لعب بيا هالحقير دارلي فخ وطيحني فيه..هرب ببنتي وخدي معاه شنطة حوايجي وجوازي وبطاقتي الشخصيه وحتى تليفوني...
سفيان متأكد من صدق اخته بس اللي سمعه واللي راه شي يحط العقل بالكف..
طلقها وقال:ماعندك شي تستري بيه روحك؟!
هي نزلت راسها راسها وحركاته بالنفي..
هو قال:خليك هني ماتتحركيش ماديري شي لين نجيك..
رنده هزت راسها بإيجاب وهي تبكي.....
وهو طلع من الغرفه..
ودار اتصال...
🌺🌺🌺🌺
"لا يوم الخميس ان شاء الله نبدوا فيهم"..
لينا:ان شاء الله...
منى:الشتي السنه هادي شكله بيجي قوي..
وجيهه:ايه باين من الخريف...
شويه ورن تليفون لينا..
طلعاته من جيب الماليه وشافت المتصل..
مش متعوده بيه يتصل بيها بعد المشكله...وهالمرة اتصل والاتصال جي في وقت مريب..
بعدت وردت...
لينا؛ايوه..
"بروحك انتي"
لينا:اها ان شاء الله خير..
"اسمعي خودي حوايج من عندك وعبايه حطيهم في شنطه وانتي البسي شويه وجايك"
لينا:باهي فهمني شن في؟!
"تو نجي ونحكيلك ماتخلي حد يحس بشي"...وسكر.
لينا نزلت التليفون وهي خايفه..بعدين مشت خشت داخل..
ووجيهه ومنى يشبحولها بإستغراب..
🌺خشت للدار وطلعت من من حوايجها لبسه وعبايه حطتهم في ساكو صغير..بعدين هي لبست عبايه ووشاح..
ع خشة وجيهه ومنى..
وجيهه:كلمك سفيان..
لينا:ايه بنعدوا مشوار لمركز الحجامه..
وجيهه:اها..
وقعمزوا الزوز..
قعدوا يهدرزوا شويه ولينا مرة معاهم ومرة لا...
لين رن تليفونها ردت..
"اطلعي".
لينا ناضت وخدت الساكو ومشت طلعت..
ووجيهه ومنى مستغربين..
🌺طلعت برا الحوش لقت السيارة قدامها..
مشت ركبت وحطت الشنطه في حجرها وقالت؛ان شاء الله خير..
سفيان:مش خير بكل..مصيبه كبيره..
لينا بقلق:يالطيف ياربي..
سفيان تحرك طول..ولقي روحه يحكي للينا كل شي صار...
لينا:الواطي انتقم منها..
سفيان:ريتي يالينا ريتي..
لينا:والله ماني عارفه شن نقول انا خفت من استفزازها ليهم قت كان ولت تو يوروها ع اللي داراته معاهم..وبعد عرفت انها بتسافر..قت مرات هو يستفرد بيها غادي وينتقم منها..بس ماتوقعت يدير هكي والله ولاخطرلي انه واحد دنيء لهالدرجه...
سفيان خبط بيده بقوة ع الدومان واطلق صرخة غضب مكتومه..
ولينا تشبحله بخوف...
قعد يسوق وهو معصب ع الآخر..ودموعه في عيونه بعدين قال..اقسم بالله مافي يوم تجرأنا فيه ع اعراض غيرنا علاش يصير فينا هكي مش عارف..
نزلت منه مسحها طول..وحاول يشد روحه ع قد مايقدر..
ولينا تشبحله بحزن قلبها تقطع عليه..
مدت وخدت يدها وضمتها بيهم وقعدت تمسح عليها..
هو شبح لايديها بعدين شبح للطريق وشد يدها بقوة..
لينا:الرسول عليه الصلاة والسلام ابتلي في عرضه ياسفيان هدا الرسول اقرب الخلق لربي..وربي قاله لاتحسبوه شر لكم..
تنهد وقال:لا إله إلا الله..
لينا:ايوه..اذكر ربي..واستغفر...ردد الاستغفار في سرك وانا معاك..هي ..
هو هز راسه وبدي يستغفر وهي تستغفر معاه..
بعدين طلقت يده بش ياخد راحته في السواق..
وقعدت مركزة معاها وتستغفر...وهو كذلك مابطلش لأنه حس بنفسه سكنت وهدت شويه..
وبعد شويه وقت..
وصلوا للفندق..
سفيان:انزلي..
لينا؛لالا موقف مش كويس ليها يزيد يكسرها..انا بنقعد هنى لين تنزل انت وياها..
هو قعد يفكر شويه بعدين خدي منها الشنطة ونزل...
وهي معاه بعيونها لين خش للفندق...
🍁ركب للغرفه...عطاها الساكو وقعد برا يستنى فيها..
لحظات وطلعت معاه...
وكانت تبكي بصمت..
لين ركبوا للأصنصير..وخوها يشوفلها وقلبه والعه فيه النار ع خاطرها..كان يشوف محمد قدامه يقتله ويشرب من دمه..
وصلوا لوطا..وطلعوا من الفندق ...
كانت رنده طول ماهي ماشيه راسها لوطا...برغم انها مستورة بس حست روحها تمشي وسط الناس عريانه وهما يتفرجوا عليها..
بس في الحقيقه ماكان في حد يشبحلها لان مافي حد عارف باللي صار معاها..
وصلوا للسيارة فتح الباب لأخته ركبت وهي تبكي..
وهو مشي ركب وشغل السيارة وتحرك...
سفيان:احكيلي اللي صار بالتفصيل من لما طلعت من حوشنا الامس للي صار اليوم الصبح..
بلعت عبرتها وبدت تحكي..وسفيان ولينا يسمعوا..
سفيان قريب ينجن ماخلا ماقال عليه..
وقف السيارة ع تركينه لانه معاش قدر يسوق وهو في هالحاله..
رنده ببكي:بنتي وين مشي بيها شن بيدير فيها!؟
لينا:ماتخافيش بنته حتي هو مايضرها..
رنده ببكي؛سفيان نكلم فيك انت
لينا رفعت حواجبها وهي مصدومه اما سفيان قال بدون مايركز ع ردة فعل لينا:زي ماقالت بنته ومش حيضرها..بس توا اني مش عارف شن ندير كان نولي بيك للحوش...تأفف وقال..استغفر الله العظيم..
لينا شبحتله وقالت:لازم تروح بيها مافي غير هكي ياسفيان في الاول والاخر هادوم هلها وحيعرفوا..
سفيان؛تمام لكن مش حيعرفوا القصه زي ماهي..
لينا:تمام نوافقك في كلامك..
سفيان:مالا اسمعوني..
••••••••
"عطيه ضربه ع افاده ياربي...عطيه ماياخده ياربي احرق قلبه ياربي"
هادي وجيهه تدعي ع محمد وهي ضامه بنتها لحضنها وبنتها تبكي بالعبرة..
وحداهم سفيان واقف يشبحلهم وقلبه محروق..
ماقدرش يتحمل طلع..
ولينا شافاته وهي في الكوجينه كيف فات من قدامها خافت عليه يسوق السيارة وهو معصب..
مشت لحقاته..
لينا:سفيان..
وقف وشبحلها..
لينا بقلق:بالله عليك حاول تهدا حاول...ولا نقولك خل سيارة تاكسي توصلك وين ماتبي..
سفيان؛ماتخافيش مايصيرلي شي...ومشي من حداها ركب السيارة وشغلها..وهي واقفه تشبحله بقلق ..
لين طلع من حداها...
🏵🏵🏵🏵🏵
في نفس الوقت
في المستشفى اللي يخدم فيها مروان...
كان يجري ع الباريلا اللي عليها بوه وهو يبكي...
لين دخلوه لغرفة العنايه..
وزملاء مروان حداه يحاولوا يهدوه ويقووا من عزمه...
بس لحظه!
شن صار للحاج الشريف...وجابه فهالحالة للمستشفى!؟
اللي صار..
انه بعد ماطلع من حداه سفيان..
جاه اتصال من واحد بلغه...
بأن بنته شدها راجلها في فندق مع واحد وبنتها معاها...
الراجل هرب..وهو خدي بنتها منها وخلاها فالفندق بروحها..
الشخص المجهول هدا بكلامه..
صدمته كانت قويه..بس مع هدا كان يبي يفهم ويتأكد..
اتصل بمحمد كان يفصل عليه بإستمرار..
اتصل برنده كان يرن ومافي حد يرد..
الراجل معاش قدر يتحمل وطاح من طوله..
والدكاترة بعد المعاينه والفحص اتضحلهم انه انصاب بجلطه قلبيه...وحالته صعبه..
مروان طول اتصل بخوه بش يبلغه لكن سفيان ماكانش حدا التليفون اللي نساه في السيارة..
وهو في حوش اهل محمد..
في المربوعه..
سفيان:شن تقول ياحاج!؟ولدك امس جي وروح بأختي وقال حصل عقد خدمه في الخليج وبيسافر بيهم...
اب محمد:ياولدي بعد روحوا منكم اخر مرة العيله ونقولوله كلام اختك قال خلاص اني معاد نبيها وبنطلقها..وهو صح سافر لكن مش للخليج لبلاد اخرى...
خو محمد قال؛لكندا عقد الخدمه جاه غادي..واختك وكلني اني في موضوع طلاقها وعطاني مبلغ المؤخر متاعها..
سفيان غمض عيونه وهو يحاول يمسك اعصابه بعدين فتحهم وقال:ولدك يا حاج دبر دبارة حتى الشيطان مايدبرها..لكن ماعنده وين يمشي من ربي كان فلت من ايدينا...وناض..
؛تي غير ياولدي استهدي بالله وقعمز وفهمنا شن قصدك من كلامك..
سفيان مشي طلع من غير مايرد بكلمه..
اب محمد ناض ومشي خش داخل وولده معاه..
قابلاته مرته قاللها بغضب:راك طالق كانك تعرفي شي وماقلتيه..
مرته؛والله العظيم لااني ولاخواته نعرفوا اكثر من اللي انت تعرفه..بروحك حضرت اللي داره اللي نهارتها والله من بعدها لاعاد هو تكلم معانا عليها ولاحني كلمناه..
شبح لولده وقال:اول مايتصل بيك قوله بوك يبي يكلمك جيبهلي طول..
:حاضر مش مروح اليوم لين نفهموا اللي صاير...
💎💎💎💎
وسفيان بعد ماطلع من الحوش..
ركب سيارته..
وخدي تليفونه بيتصل بلينا يسألها عن حال امه واخته..
شاف اكثر من عشر مكالمات فائته جوه من مروان..
قال في نفسه ان عرف باللي صار..
اتصل بيه...وفيسع مروان رد..
سفيان:ايوه..
"سفيان وينك انت توا"
سفيان بخوف:خيره صوتك!؟
"بوي ياسفيان..جابوه للمستشفى اللي نخدم فيه جاياته جلطه قلبيه"
سفيان انصعق لما سمع اللي قاله خوه ومعاش قدر يتفوه بكلمه.
"سفيان تعالى للمستشفى طول مانبي حد توا يعرف بالذات حناي".
سفيان هز وقال بصوت مخنوق:تمام..وسكر عليهم وحط التليفون قدامه.
وشغل السيارة وتحرك ودموعه يطيحوا وحده ورا التانيه..
🍁🍁🍁🍁🍁
وصل للمستشفى..
لاقاه خوه مروان وفهم منه حالة بوه كويس وقاله انه في العناية المشدده..
هو سأل خوه لو فيه داعي نطلعوا بيه برا البلاد..
لكن خوه طمنه لما قاله ان المستشفى فيها اكفأ الاطباء وبعون حيتعدا مرحلة خطر...
ماقدرش سفيان يحكي لمروان شي..كان يبيه يقعد بعقله مع بوهم..وبعد يتعدا مرحلة الخطر يخبره..
🍁وفي حوش اهله..
عفاف ونوريه اللي سمعوا باللي صار من رتيل جو يجروا بطولهم من غير صغارهم..
شافوا حالة اختهم قلوبهم قريب تقطعت عليها..
كانت تبكي بقهرة طول الوقت وتتسأل ع حال بنتها وهي قريب تنجن..
الحاجه زبيده من اللي صار مع بنت ولدها ارتفع عليها السكر وقعدت لينا تعاني فيها وهي خايفه لو تندري بحالة ولدها اللي قاعده تسأل وخايفه يعرف باللي صار لبنته عارفه ولدها مش حيتحمل..
••في الكوجينه..
"حي عليا وبيي!!"
لينا بدموع:لا نوريه بالله عليك شدي حيلك لازم تقعدي قويه بش امك وجداك وخواتك..
نوريه حطت يدها ع فمها ودموعها ينزلوا...
لينا:نبي نجيب اللاي هنى ونبلغها ونبيك معايا تهديها يانوريه..
نوريه مسحت دموعها وهزت راسها بإيجاب..
ولينا فتحت باب الكوجينه ومشت طلعت للدار نادت
عزوزتها بدون ماتحسس الحاجه زبيده بحاجه..
طلعوا الزوز من الدار..
وعيون منى معاهم..
خشوا للكوجينه..
وجيهه؛قلبي مش متحمل راهو..
خدتها نوريه من يدها وقعمزتها ع الكرسي وقالت:غير قعمزي يام وصلي ع النبي..
وجيهه؛عليه الصلاة والسلام.
نوريه؛امي..بوي تعب شويه ورفعوه المستشفى..
خبطت بإيديها ع وجهها وقالت:ياحليلي!
لينا:اهدي يااللاي الحمد لله تعدا مرحلة الخطر لكن قاعد في الملاحظه بش يطمنوا ع حالته..
مسحت وجيهه بإيديها ع وجهها وقالت:غير وين كان مدسوس هدا كله بس وين..
لينا؛وحدي الله يااللاي المؤمن مبتلى..والحمد لله ع كل حال..
وجيهه درقت عيونها بيدها وقعدت تبكي..
ونوريه خدتها في حضنها..
ولينا تشبحلهم بحزن..
🍁وفي دار رتيل..
رتيل وعفاف كانوا حدا اختهم اللي كانت وهي راقده عبراتها تطلع ودموعها تنزل..وخواتها الزوز يبكوا ع حالها اللي يقطع القلب...
🍁🍁🍁🍁
مرت الساعات..
وروح سفيان للحوش ..
وين خش داخل سمع اخته تعيط..
وهي تقول..
"نبي بنتي نبيها..نبي بنتي...تبكي توا تبكي تبيني..واني بنتي..جيبولي بنتي يام جيبوهالي"
وقف في مكانه ودموعها معبيات عيونه وشعور الغضب مع الحزن متمكنين منه...
سمع صوت نوريه تقرا عليها في القرآن...وامها تقوللها..
"حاضر يما حاضر والله نجيبوهالك"..
وماهي الا لحظات وهدت شويه ورقدت في حضن اختها اللي كانت تقرا عليها وهي تبكي..
سفيان مش قادر يتحمل حاس بقلة الحيله والعجز..
مش قادر يطول الشخص اللي ناوي يتسبب لهم في فضيحه كبيره واللي وصل اخته لهالمرحله..
ومش عارف شن اللي وصل بوه لهالحاله مادام ماسمعش منهم من وين سمع..!؟
ومرات يطمن في نفسه ويقول مش شرط اللي صارله يكون ليه علاقه بموضوع اخته..
باهي لو مالاش علاقه لما ينوض من هالجلطه مش لازم.يعرف..
باهي كان عرف شن يصير فيه!..
من حالة العجز اللي هو فيها وصل لأقصى مراحل الغضب..
كانت في مرش المكتبه اللي كان واقف حداها انكسر..
ومشي طلع من الحوش..
••في دار التقعميز.
منى:هدا شنو!؟
شبحت هي ولينا للصغار لقوهم كلهم حداهم راقدين..
ناضوا الزوز وطلعوا.
شافوا حالة المكتبه..
منى:من دار هكي!؟
لينا:راجلك ماروحش ولا؟
منى:قال بيقعد مع عمي في المستشفى..
لينا لبست وشاحها زين..
ومشت طلعت من الحوش..
ومنى تنهدت بحزن وولت للدار..
🌺لينا بعد طلعت برا..
لقت سفيان واقف حدا النخله اللي يحبها بوه وعاطي بظهره.
هي مشتله...ولما قربت منه حساته يبكي..
شافت ليده لقتها تنزل...
لما وصلت فيه بقلق شدتها وقالت؛يدك تنزف..
هو مسح دموعه ولف وجهه عنها...هي شبحتله وقالت..مفروض ادرقهن من العالم كله الا انا..
شبحلها بحزن..
وهي قعدت تشوفله بإبتسامة حزن..
ماقدرش يشد روحه ولايدرق ضعفها عنها..
ولقي روحه زي الطفل الصغير لما يعجز ويحزن ويزعل يمشي لأمه طول يرتمي في حضنها...
وهي احتواته..
احتواته...بألمه..وعجزه وضعفه...وخوفه..
دارت زي مادارت السيده خديجه لزوجها لما نزل من غار حراء يجري خايف...لقي في حضنها الملجأ اللي هداه واستكان بيه...
....لتسكنوا اليها...
🌺🌺🌺🌺🌺
في الشقه...
في داره...
راقد ع السرير...وهي مقعمزه حداه...
حاطه يدها ع راسه وتقرا عليه في القرآن..
وهو كان مغمض عيونه ومسترخي...
بعد ماشافاته هدي...مسحت ع شعره..بعدين وخرت عنه وجت بتنوض..
هو شد يدها وقعد شادها بقوة...
شبحتله لقاته مازال مغمض عيونه وهو يقول بصوت متعب..ماتخلنيش..
ابتسمت بألم وعطف..وشدت يده..
وقعدت تشبحله وهي مقعمزة...لين خداها النوم...
وهو خداه النوم...
نوم بعد يوم صعب...ثقيل...حزين...
ويامصعبها من نومه....
#أذكروا_الله
يتبع …
الفصول الاربعة
