شكولينا

الجزء التاسع" "القسم الاول"

#شكولينا 🍫
#الجزء_التاسع"القسم الأول"
#الجمان_الفريد

💕💕💕💕بعد التصحيح
اللي فايتاته صلاة او خش عليه وقت صلاة يصلي الأول بعدين يقرا...اول ماتتحاسب عليه الصلاة يوم غدوة...💕
《تنويه...في كلام حيكون مؤذي وغير مقبول نعتذر عنه مسبقا بس هو ع لسان الشخصيات اللي في منهم هلبه في مجتمعنا ومايعبرش ابدا عن وجهة نظري...نتمنى انكم تحاولوا تتقبلوا لان كل شي حنكتبه حيخدم قصة الروايه والرساله متاعها》
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
يوم الثلاثاء...
طرابلس....الساعه 12:15قبل الظهر..
في احد اسواق العاصمة الكبيره...
كان الحاج الشريف واقف ع العمال اللي يدخلوا في البضاعه الجديده...
الشريف:بالشوي انت وياه مايجري وراكم حد..
"ربي يعاون ياحاج"
التفت لمصدر الصوت..ارتسمت ع وجهه ابتسامه وهو يقول:اوو افندي..
ضحك عدنان وسلم ع بوه بالخد بعدين قال:كيف حالك بوي..
الشريف:الحمد لله رب العالمين..شن جابك انت توا مش تروح اخر الاسبوع..
عدنان شبح للعمال وهما يدخلوا في البضاعه بعدين شبح لبوه وقال:خديت اجازة وجيت ع خاطر موضوع مهم بنفتح معاك انت الاول ومتعشم فيك خير ياحاج..
عقد الشريف حواجبه بإستغراب وقال:ان شاء الله خير!
عدنان ابتسم وقال:خير خير بإذن الله خير..
🍀🍀🍀🍀🍀
"وليش تبي تترهبن!؟"
الحازة؛وين نعلم عليها..قات لانبيه ولانبي غيره..
عبدالله:خلوها ع راحتها..
عبدالسلام:شن تقول انت ياراجل!كيف نخلوها ع راحتها مش ع كيفها راهو..خلاص كبرت وفي سن زواج تزوج وتهني روحها..
عبدالله:كل شي بالغصب الا الزواج ياعبالسلام..
الحازة:نا مانبيها تكمل عمرها تخدم فهدا وهداك نبيها تزوج وتشوف حياتها..
عبدالله تنهد وقال:لاحول ولاقوة الا بالله..
عبد السلام:انتي يما ادوي معاه في موضوع خو المراة حاولي باك توافق..
الحازة:لا ياولدي خو مراتك لا هلها واعرين ..
عبدالله:وخوتها مش تمام..
عبدالسلام ولع وشد خوه من ياقته وهويقول:ادوي زين احسنلك..
فكتهم امهم من بعض وهي تقول؛حول انت وياه حولوا..نا مش حنعطي بنتي لشراقه ايوه ..
عبدالسلام:وخيرهم الشراقه يما..
الحازة:واعرين والبرانيه عندهم تقعد غريبه..
عبدالسلام:مش صح كلامك يما..
عبدالله:ياراجل مش بالسيف..
عبدالسلام بغضب:لا بالسيف وغصب عنك وعنها وعن الكل..
ع جية بوه وهو يقول:لما نموت اغصبها..
سكتوا كلهم وقعدوا يشبحلوه..
عبدالودود:لينا ماحد يدخل فيها غيري نا..ونا مخليها ع راحتها امتى تبي تزوج تزوج لاانت ولاغيرك يقرر عنها حاجه..سمعت ولا!؟..
عبدالسلام مرر نظراته الغاضبه عليهم بعدين مشي طلع من حداهم..
وعبدالله شبحلهم بعدين لفت ومشي بيركب لشقته..
عبدالودود:منك العوض ياالله...ومشي للمربوعه..
الحازة بصوت منخفض:ونا مش متريحه لين نخليها تتزوج.
🌺🌺🌺🌺
"خلاص لينا معاش دخلي حالات"
لينا :تمام دكتورة..
الدكتورة هاله:خيرك لينا اليوم مش ع بعضك..
لينا ابتسمت مجامله وقالت:لاعادي غير شوية ارهاق..
الدكتورة ابتسمت وقالت:اطلعي ارتاحي ساعه وبعدين تعالي..
لينا بإبتسامه:مشكورة دكتورة...عن اذنك..
الدكتورة:اذنك معاك..
ومشت لينا طلعت من حجرة الدكتورة..
والحالات برا قعدوا يسألوا فيها كان يقدروا يخشوا وهي تقوللهم "وقت الاستراحه بعد ساعه نولوا..."
طلعت للباحه..
وقعمزت وقعدت تاخد في نفس ..بعدين رفعت عيونها فوق وهي تقول:يارب ماينكسرلي خاطر...نزلت عيونها وشبحت ليدها اليمين وبدت تستغفر عليها...
🍀🍀🍀🍀🍀🍀
"واك ظهري ياربي ادقدق"
زهور:مش عارفه كيف مش خايفه ع روحك بكل يامنى..
منى؛خايفه على روحي لكن الخوف من وجيهه اكبر..
زهور:والله لو منك مانقرب حاجه اضرني واضر العيل..
منى"لو مني راك تلهدي هني وبطنك قدامك بش ترضيهم وتحصلي الشكرانيه":عادي ياما امهاتنا تحركوا وهما حوامل قاموا ورفعوا وحطوا وماصارهم شي..
زهور:باهي على راحتك..
وقعدوا الزوز يكدوا في البساط..
داخل الحوش..
"اليوم جايين في الليل جماعة تجار صحاب بوك بنلهى بعشاهم"
هادي وجيهه تكلم في بنتها نوريه ع الهاتف..
"وهدوكا وين؟"
وجيهه:بوك طالبه مني قالي نبي العشي رشدة كسكاس وانتي اللي ديريها..
"عنده حق مش حيجيبوه زيك"
وجيهه:باهي قوليلي شن جو العرس..
"شن بنحكيلك لانحكيلك هو مهرجان مش عرس يام"
وجيهه:ماشاء الله...وانتي كيف طلعتي..
"اسكتي لبست امس شرقاوي للكسوة قريب هبلوا عليا يام"
وجيهه بإبتسامه:الله يبارك على بنتي..رقيتي روحك امي ولا
"ايه حبيبي رقيت روحي ورقيت نونو والولاد"
وجيهه:ايوه ردبالك سلم بنتي ديما اقروا ع ارواحكم بالذات انتي ديما عيون الناس عليك..
"ايه والله ياميمتي..ماتخافيش ماسيبتش الأذكار بكل"
وجيهه:كويس..باهي وشن عزوز عجبتها حنتك؟
"ايه وتشكر فيها هلبه هي وحنة نور خفت منها ماتعجبهاش لكن الحمد لله قريب هبلت فيها"
وجيهه بإبتسامه:كويس كويس..
"ايه حقه يما شفت كذا بنيه عجبوني لعدنان وبنات عيلة ومتسميين.."
وجيهه:وشن لونهم وزولهم؟
"زي الروسيات يام عيلة عم حسين عند جمال مش عادي..اكثر وحده عجبتني شعرها زي الذهب واصل لفخدها..وعيونها كبار لونهم صفر تقول عسل حقاني يام وعليك طول وقد عندها الايام اللي فاتوا عيوني
عليها هي بس."
وجيهه:خلاص افتحي معاه الموضوع كلميه بالتليفون..
"ان شاء الله يام غير نطلع من حوسة العرس"
🍀🍀🍀🍀🍀🍀
"يومك وتاليك ينزل ياخد خضرا ياخد دحي..ياخد الدقيق ماخلا علينا شي"
الحازة تشكي لبنتها امال عن طريق مكالمه هاتفيه..
"كملت عليه الفلوس الشنعب اللي واخدها"
الحازة:ولينا كيف الدرويشه اللي يخش عليها من هنى تعطيهله من هنى"
"تمرض بنتك هدي تمرض"
الحازة:هدى ليش نبيها تزوج ياأمال الواحد مايعلم ع عمره يابنتي نا وباتها مانا دايميلها والله لو ندرقوا عبدالله هدا يسلبها سلب ويخليها خدامه له ولمراته..
"بعد عمر طويل ع الطاعه يما..ربي مايوصلها لهالحال ان شاء الله"
الحازة:ان شاء الله يابنتي ان شاء الله...
🍀🍀🍀🍀🍀🍀
قعمزت ع الكرسي في الكوجينه وهي تقول..
منى بتعب:اه ياظهري اه..
زهور:كان تخشي ترقدي يامنى..
ع خشة عزوزتهم عليهم الكوجينه شبحت لحالة منى وقالت؛خيرك..
منى:ظهري يااللاي يوجع فيا شويه..
وجيهه:باهي نوضي نوضي..نوضي خشي للدار اتكي شويه..
ناضت منى وهي تقول :حاضر..
وجيهه شبحت لزهور وقالت؛ديري الغدي رز بالخلطه وشربه عربيه وسلاطه كفتاجي وطاجين..
زهور؛حاضر اللاي..
طلعت وجيهه وهي طالعه سمعت باب الحوش ينفتح شبحتله خشت رتيل..
وجيهه:روحتي رتوله..
رتيل وهي تحول في كندرتها:مامتي..شن جو..
وجيهه ابتسمت وقالت:مليح..ومشت بطريقها لدار التقعميز..
اما رتيل وهي خاشه وقفت فم باب الكوجينه وقالت:شن جو زهيرة..
زهور شبحتلها وابتسمت:تمام..
رتيل:شن غدانا؟
زهور:رز بالخلطه وشربه وكفتاجي وطاجين..
رتيل؛ووه جعت..بالله ديريلي نص دحي لبين مابدلت حوايجي ومشت من حداها.
زهور بهمس:سم ان شاء الله..
شويه سمعت باب الحوش انفتح مرة تانيه قالت بإستغراب:زعمه منو؟!
قعدت تشبح لباب الكوجينه...لين جي فايت من قدامه عدنان..
مطت شورابها للأسفل بإستغراب..
"السلام عليكم"
وجيهه بضحكه:وليدي..
خشلها وجاها كب ع راسها ..
وجيهه:حمد لله ع سلامتك ولدي..
عدنان:الله يسلمك يام...قعد يدور بعيونه وهو يقول..وينها حناي..
وجيهه:اول امس مشت لحوش عمتك هنيه بايته عندها..
عدنان:اها..
وجيهه:خيرك مروح اليوم؟
قعمز عدنان حدا امه وقال؛استاحشتك قلت ناخد اجازة نجي نشوفك..
ضحكت وقالت:غير قول الحق..فرحني وقول حولوك هنايا..
عدنان بإبتسامه؛للاسف لا..
وجيهه:مال شنو؟
عدنان؛تو بعدين نهدرزوا اني توا جعان بنموت نوضي ديريلي حاجه من ايديك..
ابتسمت وجيهه وقالت:من عيوني..
عدنان:يسلمولي يارب..
ناضت وجيهه ومشت طلعت من الدار..
وهو بعيونه معاها...اختفت ابتسامته وتنهد وهو يقول..استغفر الله العظيم..
ع خشة رتيل اللي تفاجئت لما شافاته وقالت:عدنانو..
ابتسم وقال:اووو شفشه...
🏵🏵🏵🏵🏵
"والله ياراجل اثقل ساعتين مروا عليا في حياتي"
سفيان بإزدراء:بني آدم ممل ومتحذلق وثقيل دم..شبح فوق وقال....اوه ياإلهي..
ابوبكر:مش عارف علاش مايبوش يحولوه.
وصلوا لسياراتهم ..
سفيان ع باب سيارته:عنده ظهر البدوي هدا..
ابوبكر:واضح..
سفيان:صدق الله العظيم لما قال..الأعراب اشد كفرا ونفاقا..
ابوبكر ابتسم وقال:وقال ومنهم من يؤمن بالله واليوم الآخر..
سفيان:ذكرها مرة بخير ومرتين بسوء..
ابوبكر ضحك وقال:مش حنخش معاك في جدال ياحضري..هي نتلاقوا العشيه..
سفيان لبس نظاراته وحياه بحركة اليد وركب السيارة..
🏵🏵🏵🏵
"عطيهم لمرت سفيان وصاني عليها"
خدتهم رتيل وقالت:وحني جبتلنا منها عجبتني هلبه..
عدنان بإبتسامه:ايه..
ع خشة امه بالصفره شافت علب الشكولاته في يد رتيل حطت الصفرة وقالت:شن مالا مايبيعوش في غيرها!؟
عدنان بإبتسامه:لايبيعوا لكن مش زيها..
قعمزت جنبه وهي تقول:باهي كول ولدي كول..
عدنان بإبتسامه:عطيك الصحه ياقلبي..
ورتيل ناضت ومشت طلعت من الدار متوجهه للكوجينه..
وصلت فيها وخشت..
رتيل؛زهيرة هاك..
التفتت زهور وشبحت شن في فيد رتيل وقالت:هدا شنو..
رتيل:عدنان قال طلبها منه سفيان..
اذكرت علبة الشكولاته اللي شافت سفيان ياكل منها قبل..
مسحت ايديها في المرقه وجت خدتهم منها وهي تقول:نصك ع الطاوله..
رتيل:ثانكس..
وخدت نصها وطلعت بيه..
وزهور مشت طلعت بالشكولاته من الكوجينه ومنها من الحوش كله..
ركبت لشقتها...حطت باكوات الشكولاته في الثلاجه..وبعدها ولت نزلت لوطا...
🍀🍀🍀🍀🍀
"متوترة واجد..وخايفه"
امل:خليها ع الله..
لينا:اكيد كله ع الله بس نا خايفه واجد..قصة رابحه قاعده قي عقلي من امس لتوا..
امل؛مالقينا مانحكوا حتى حني..
تنهدت لينا بضيق..
وهما ماشيات فات من حداهم ياسين اللي دار روحه متجاهل لينا..
لينا بكره؛التافه بسببه امي قاعده منافستني لليوم..
امل بضحكه:خالتي الحازة تبيك تزوجي تحت الضغط..
لينا تأففت وقالت:استغفر الله..
مسحت امل ع ظهرها وقالت؛ربي يسهلها ان شاء الله ويفرح قلبك..
لينا تنهدت بقلق وقالت:آمين..
🍀🍀🍀🍀🍀
الساعه 4:00بعد الظهر..
خش هو وياها للدار وهو يقول..
سفيان:حددلي اللبسه اللي خديتها اخر مرة..
زهور:حاضر..ومشت للدولاب..
وهو حول الجاكيت متاعه وحطه ع كرسي
الطاوله ومشي خدي التوته من ع السرير وطلع للحمام..
هي بعد ماطلعت اللبسه اللي قال عليها خطرت عليها الشكولاته..
مشت بسرعه طلعت من الدار للكوجينه..طلعتها ومن التلاجه وولت بيها للدار..وحطتها جنب اللاب توب بعدين مشت خدت اللبسه وطول لطاولة الكوي بش تحددها..
ع طلعته هو من الحمام..وهو يسرح في شعره المبلول للخلف ..
خش للدار ومشي للزيانه...
خدي المشط وقعد يمشط في شعره...
وزهور عيونها يسرقوله في النظر..
خدي العطر وبخ منه وهي تتفرج عليه وابتسامه حلوة مرسومه ع وجهها..
حط عطره ع الزيانه ومشي قعمز ورا اللاب توب..
جي بياخد نظاراته الطبيه من جنب اللاب توب شاف علب
#شكولينا عقد حواجبه وابتسم وهو يقول:يااهلا اهلا..
شافتله زهور وهو يفتح في الباكو ويتفرج ع الشكولاته بنظرات عيون فيهم لمعه شغف واضحه..
فهديكا اللحظه انتابها شعور كره اتجاه الشكولاته اللي حضت منه بنظرة عمرها ماشافتها في عينه..
طلع طرف وحطه في فم واحد..بعدين خدي النظارات لبسهم وشبح للاب توب وفتحه..
زهور:سفيان...
سفيان؛اممم..
زهور:انت مواليد كم..
سفيان:ماتعرفيش مواليدي يافالحه..
زهور بضحكه:لاقصدي نبي باليوم والتاريخ..
سفيان:14\4..
زهور ابتسمت وقال..واني 24\4 .
سفيان:لاتخرج قبل ان تقول سبحان الله..
زهور بضحكه:ياحبك للتسهويك..
سفيان تنهد وقعد ساكت..
زهور:شن رايك في الرز اليوم ماحسيتش فيه بنة زايده..
حك شعر شاربه وقال:تس عادي زي قبل..
زهور تنهدت بعدين ابتسمت وقالت:ايه حقه شن رايك في البيتزا امس تقول من برا ولا..
سفيان:زهور..
زهور:نعم..
سفيان:اسكتي..
ارتسمت ع وجهها ملامح الحزن وهي تقول:حاضر..
ورجعت لهت بالكوي..
بعد كملت علقت اللبسه..
ومشت طلعت من الدار وهي تشوفله كيف ياكل من الشكولاته وتركيزة كله في اللاب توب.
خشت للكوجينه وهي تفكر بعدين قالت؛خل نديرله قهوة..
وبسرعه دارتله فنجان قهوة وخشتله بيه الدار وحطاته ع الطاوله..
شبحله بعدين شبح للاب وقال:شكرا..
زهور؛العفو..ومشت قعمزت ع السرير وهي تشبحله..
وماتملش وهي تتفرج عليه كيف يشرب في القهوة وياكل في الشكولاته ويخدم ع اللاب توب..
فجأة..
التفتلها..
هي ارتبكت..
سفيان؛ماعندك شي اديريه لوطا؟
زهور:توا لا..
رجع شاف للاب توب..
زهور:سفيان..
سفيان:اممم..
زهور وهي تفرك في صوابعها ببعض:كلمتني اختي امس اقترحت عليا حاجه..
سفيان:اللي هي..
زهور:كيف مانتعرف اني فالحه في الحار هلبه ..
قاطعها وقال:لالالا الجو هدا فوتيه مانبيشي بكل الهي بحوشك وفكك من الافكار الشلافطيه هادي...مش بحاجه للخدمه اساسا..
زهور شبكت صوابعها في بعض وبلعت ريقها وقالت:تمام..
علي صوت المؤذن لصلاة العصر..
سيب سفيان اللي فيده وناض وهو يقول:صلي وانزلي لوطا..
زهور:ننزل بعد ماتطلع..
هو تنهد وقال:باهي..
ومشي بيخش للحمام...
🏵🏵🏵🏵
طلعوا الزوز من الحوش متوجهين للجامع..
الشريف:امتى بتفتح معاها الموضوع..
عدنان؛في الليل بعد العزومه..بوي نبيك معاي..
الشريف طبطب ع ظهره وقال:معاك ولدي معاك الكلمه كلمتك والقرار قرارك والحياة حياتك انت ماحد ليه دخل بيك..
ابتسم عدنان وقال:ربي يحفظك ياحاج..
الشريف:ويحفظك وييسر امرك...
🍀🍀🍀🍀🍀🍀
"وليش هدى وين تحكي"
لينا بصوت منخفض:القصه مالهاش يومين صايره..
امال:الكلام اللي قتيه توا مالاش يومين صاير لكن القصه ليها وقت..
لينا بقلق:المهم توا هدى اللي صار..
امال:وانتي ماليه يدك منه؟.
لينا؛مافيش بينه معرفه عميقه بيش نملا يدي منه..بس قلبي يقولي انه صادق..
امال:يقولوا المية تكذب الغطاش مش هو قال مش مولي الا وهله معاه خلاص نرجو ونشوفوا..
لينا:ادعي معايا ياأموله يصير منه..
امال بإبتسامه:لهالدرجة عاجبك؟
ابتسمت لينا بخجل وعقدت حواجبها وقعدت ساكته..
امال ضحكت وقال:ربي ينولك ماتبي لونا..
لينا:آمين..هي سقدي خل نبدوا خدمه معاد في وقت..
امال بإستعجال:هيا هي..
🍀🍀🍀🍀🍀🍀
بعد صلاة العصر..
واقف قدام المرايه يلبس في ساعته وهي تشبحله..
بعادته يكون انيق بس هالمرة حست الاناقه زايده..
ويرجع شعور الغيره يحركها ويخليها تتكلم بتلقائيه بدون تفكير..وتقول:فيه بنات الملتقى هدا.؟
شبحلها بطرف عينه شويه بعدين شبح للعطر متاعه خداه وقعد يبخ منه وهو يقول:فيه واحلى منك..
زهور بضيق؛زيد تسهوك زيد..
حط العطر وقال:تجيبي فيه لروحك..
خدي تليفونه وشبحلها وهويقول:هي بري انزلي..
زهور غيرت عيونها عنه وقالت؛باهي..
ولفت ومشت..
هو ارتسمت ع وجهه ملامح الانزعاج وقال بهمس:مش معقول دمها قداش ثقيل صبرك ياربي..صبرني على مابليتني..
والتفت بياخد نظارته طبيه من ع طاوله المكتب..
شبح لعلب الشوكلاته..مشي خدي وحده مسكره وخدي النظارات وتوجه للباب...وطلع...
••وصل لوطا ومشي لسيارته...
وزهور واقفه في الباب تشبحله..
شافاته كيف لبس نظاراته الشمسيه وركب السيارة..
شبحها..
هي ادرقت.
حرك راسه يمين ويسار...بعدين شغل السيارة وتحرك...
🏵وهي بعد طلع مشت خشت داخل..
تلقت عزوزتها وهي تقول:طيب فينا اللي نزلتي ياست الحسن..
زهور:سقدت سفيان اللاي..
وجيهه:باهي بري خشي عاوني سلفتك بسرعه..
مشت زهور بسرعه خشت للكوجينه وعزوزتها لحقتها..
🏵وبدوا مع بعض يد بيد يتعاونوا مع وجيهه ع العزومه..
وبعد ماولت الماكله جاهزة..
طلعت زهور تكد الحمام الخارجي..ومنى للمربوعه بش اضمها وتكنسها وتعطرها..
والزوز ..وحده من روشن الحمام والتانيه من روشن المربوعه واقفات يتفرجوا ع حماتهم الصغيره وهي تدهور في الجنان والسماعات في وذانها وتصور سليفي في كل تركينه في الجنان..
منى "عليك حيوانه هالفرخه مستفزة"
زهور"سحيقة تسحقك انتي واللي جاباتك.."
🏵🏵🏵🏵
وبعد صلاة العشاء..
توافدو ضيوف الحاج الشريف ع الحوش..
والمربوعه زحمه..
ووجيهة وكناينها حاصلات في الكوجينه..
وصفرة تطلع وصفرة تخش ..
وبعد العشي..جي دور الماعين اللي يهدوا الحيل..
وحيل منى وزهور انهد هد..ع جوع..مالحقوش ياكلوا ولاحصلوا شي..
وجيهه تهنت ع روحها وع بنتها ساد..
•••وبعد مشوار هالعناء..
قعمزوا الزوز ع كراسي طاولة الكوجينه بتعب..
منى:جعانه بنموت..
زهور:نقليلك دحي..
منى بقهر:ااه ياربي وخلاص سقينا الرشده ببصلتها ولحمها المغطي الصونيه وماذقنا منها حتى حبة حمص..بنموت يازهور بنموت الريحه في خشمي والبنه في فمي..وقعدت تمص في ريقها..
زهور؛قصدك لتوا قاعده تتوحمي
منى:مانعرفش بس جت في خاطري الرشده..
وبدت تبكي..
زهور:منى..
"منى"..
زهور:نوضي اطلعي لراجلك..
تأففت وهي تمسح في دموعها وناضت طلعت من الباب الخارجي..
لقاته واقف يشوف لتليفونه..
هي قالت بنبرة حاده متخللها البكاء؛شن تبي..
قام عيونه شافها لقاها تبكي عقد حواجبه بخوف وقال:خيرك..
منى جاته وشدت يده وبدت تبكي..
مروان؛خير بلاك تكلمي..
منى ببكي:جعانه مروان جعانه..ماذقتش حتى حبه حمصه من الرشده بنموت عليها خاطري فيها..
مروان بضحكه؛وخيرك ماكلتيش ياحمصه..
منى ببكي:مافضلش..
مسح دموعها وهو يضحك بعدين قال:مايقعدش في خاطر حبيبتي وام ولدي تو نكلم مطعم مليح يدير فيها رشده مش عاديه..همس وهو يقول..خير من رشده امي..
ضحكت منى من بين دموعها..
قعد يشبح لتليفونه وهو يقول بإبتسامه:عجباتك هاه ماصدقتي..
ومنى تضحك..
هو بعد عنها وبدي يتكلم في التليفون.
ومنى تشبحلها بآبتسامه وهي تمسح في دموعها..
شويه جاها وهو يقول:نص ساعه وتجيك احلى قصعة..
وقرب باس ع راسها..
وهي تقول:ربي مايحرمني منك..
🏵وهدا كله زهور تشوف فيه من روشن الكوجينه بعيون معبيات دموع حسرة وحرمان..
مروان؛هي بري قلبي ديرولنا شاهي..
منى:حاضر...ولفت ومشت بسرعه للكوجينه..
🍁كم كلمه حلوة وطبطبه واخد بخاطر نسوا منى التعب اللي تعباته وكأنه ماكان..
هي هكي المراة..مخلوق حساس غايه في رقة كلمه حلوة طالعه من القلب كفيله انها تمسح تعبها واوجاعها وكل هم انهمت بيه..كلمه من حد يقدرها ويعطي ولو شويه اهتمام واحتواء دير في الأنثى المعجزات...
هدا علاش قال اعظم من وطئت اقدامه الثرى..
"رفقا بالقوارير"...وكلمة رفق اضم تحتها معنى اللطف والحن مجتمعات مع بعض...
رجل بس هو اللي يعرف معنى هالكلام ويطبقه..
وان كان لمروان بعض من العيوب فعنده بعض الميزات وان قلت ولكنها ليست بالشي البسيط...🍁
🏵🏵🏵🏵🏵
بعد نص ساعه..
روحوا ضيوف الحاج الشريف..
وجي وقت المهمه الصعبه ع عدنان اللي بنسبه ليه اصعب من المهمات العسكريه اللي دارها في حياته..
خلا بوه في المربوعه ومشي خش للحوش...
زهور وهي مقعمزه تتعشى في نص الدحي شافاته خاطم من قدام الكوجينه بعدين سمعت باب دار التقعميز تسكر..
بلعت لقمتها وقالت:يستر الله..
شويه سمعت صوت ضحك منى ومروان المقعمزين ياكلوا برا في رشدة الكسكاس..
ارتسمت ع وجهها ملامح الغيظ وهي تقول بهمس؛باهي فهمنا انكم تحبوا بعض وعين الله عليكم...
وقضمت من النص بعصبيه ودموعها معبيات عيونها..
🍀🍀🍀🍀🍀
فهالوقت..
كانت لينا تحط في الشكولاته في علبها وهي تستغفر وصدرها ضايق من القلق...
"استغفر الله العظيم واتوب اليه...استغفر الله العظيم واتوب اليه"
وبين الاستغفار والاستغفار تطلع تنهيدةخوف...
🍀🍀🍀🍀🍀🍀
خشت بصونية الرشده وحطتها قدام زهور وهي تقول:اهو خليتلك حصتك..
ابتسمت زهور وقالت:تسلميلي حبيبتي...
"طلعه من راسك وانساه"
اانخلعوا منى وزهور لما سمعوا صوت وجيهه العالي..
سمعوا بعدها باب الدار انفتح وصوت هي قرب وهي تقول بصوت عالي:لالا والله ماهي صايره..
وخشت للصاله..
وعدنان لحقها وهويقول:يام استهدي بالله واسمعيني ربي..
وجيهة بإنفعال شديد:ربي قاعد هاديني لتوا ماتخلنيش نهبل مزبوط قتلك الموضوع هدا انساه يعني انساه..
عدنان شبحلها بحده وقال:مش ناسيه مش ناسيه اني عطيت كلمه والبنت نبيها تم الكلام..
وجيهه:ياولدي خيرك خير دعوتك معاش لقيت خلاص سيبت الزين والبهي بنات العايلات المتسميه وحطيت عينك على وحده لاهي ليك ولاهي من توبك ولامن لونك..
عدنان:اهيا اللي تتكلمي عليها ظفرها ببنات العايلات المتسميه اللي تحكي عليهم..بنت محترمه اخلاقها عاليه بنت ناس..واني هدا اللي نبيه مانبيش غيرهكي..
وجيهه وهي تحرك في سبابتها بسرعه نافيه وتقول:لالالا انت مش بلاش والله ماك بلاش مدايرتلك حاجه اليهوديه هادي..
عدنان:اتقي الله يام اتقي الله حرام عليك..
وجيهه مسحت ع شعرها بإيديها الزوز وبلعت ريقها وقالت:اسمع والله ماصايرة والله مانك واخدها..
عدنان شبحلها بتحدي وقال:واني نقولك والله لما ناخدها ومش مقايلك ياهي ياماناخدش بكل لا...بنقولك ياهي يالموت يام..ياهي يالموت..
•• وهالنقاش الحاد..
يسمعوا فيه زهور ومنى فالكوجينه وهما مصدومات وخايفات..
وفم باب الكوجينه من برا كان واقف مروان يسمع وهو مستاء وعارف ان هدا اللي بيصير من البدايه..
وكذلك رتيل في دارها اللي فاقت من النوم مفجوعه وهي تسمع..
والحاج الشريف اللي كان شاد روحه في المربوعه وهو يسمع في النقاش المستفز...
••وجيهه:انت هكي! خلاص برا اخطبها بروحك وكانهم ع قولتك ناس شوف كان يستقبلوك من غير امك
ارتسمت ع وجه عدنان ملامح الرجاء وهو يقول:يام انتي مراة تعرفي ربي يرضي ربي الكلام اللي تقولي فيه هدا..
وجيهه:قولي انت يرضي ربي معاندتك لأمك وتعلاية صوتك عليها ع خاطر وحده ماتسواش..
عدنان؛منين تعرفيها انتي بش تقولي هكي!
وجيهه:مدام ع خاطرها درت هكي مش محتاج نتعرف عليها بش نعرف هي شني..اني مش عارفه انت وين عقلك وينه...كيف ماتفكرش في الناس شن بيقولوا علينا لما يلقوك انت دون اخت انت اللي مخلا ربي ماعطاك اخرتك تاخد وحده عبده وديرها كنتي..
عدنان بإنفعال:يام اتقي الله كلامك يدخل النار راهو..
وجيهه بعدم استيعاب:انت تبي تشمت فيا اللي يسوى واللي مايسواش انت ياعدنان..
عدنان:يام حرام عليك..اللي سمعك يقول هدا ارتد ولاكفار ولادار حرام!
وجيهه:شوف من الاخير بتسكر راسك عليها وتاخدها تطلع من حوشي ومعاش تخشله برا انت انتفلوا عيشوا غادي..
••فهاللحظه..
انفتح باب الحوش وخشت سيارة سفيان..
مروان غمض عيونه وقال:كملت..
منى بصوت منخفض:راجلك روح..
زهور بنفس نبرة الصوت؛هدا وين بتتقربع حق..
••درس سفيان السيارة ونزل..
سكر الباب ومشي بإتجاه باب الحوش..لما قرب يوصل فيه سمع صوت عياط امه مختلط بصوت عدنان ..
ضيق عيونه وقعد يسمع..
.........
عدنان اشر ع روحه وقال؛تلزي فيا يام!
وجيهه:ايه نلزك ونتبرا منك..
هني الشريف معاش قدر يقعد ساكت طلع من المربوعه وجاهم..
الشريف:وجيهه..شن متت اني !!؟ تلزي ولدي من حوش بوه وبوه حي!..
زهور حطت يدها ع خدها ومنى عضت ع شاربها..
وجيهه دموعها نزلوا وهي تقول؛قصدك عاجبك كلام ولدك معاه انت في اللي بيديره..
الشريف بحزم؛ولدي لابيدير عيب ولاحرام وهدا حياته وهو حر فيها يتزوج اللي يبيها ماحد ليه علاقه..
وجيهه؛مالا دوروا من يخطبله...
الشريف:شن تحساب روحك تلوي في ذراعي انتي الحكومه حكومة نساوين ولاتريس فهالحوش!
غيرت عيونها عنه ودموعها مازال ينزلوا.
الشريف:ماتبيش انتي تمشي تخطبيهاله عنده خمسه عمات كان نقوللهم الخمسه يمشوا..وولدي يجيبها ويعيش هني زيه زي خوته وكلامي هدا هو اللي حيمشي..
خدي الشريف عدنان من ذراعه وقال:تعال ولدي تعال.
خبطت وجيهه ع رجليها وهي تبكي بعياط وتقول:والله ياخدها ثديي اللي رضعته منه نقصه والله..
انصدم عدنان..
الشريف:ماتعدلش عليها تعالى..
بالسيف عدنان مشي بوها وقلبه يتقطع وهو يسمع في بكي امه..
🍁عدنان موضوعه مش لينا بس..الحكايه ولت عنده مسألة مبدأ..مايبي حد يمشيله حياته مايبي حد ياخد عن قرارات مفروض ماياخدهم حد غيره هو...مايبيش يكرر اخطاء خوته ويعيش حياته تعيس زيهم..بي هو صاحب الكلمه الأخيره في حياته هو وبس🍁
••لف مروان ع الحوش لين وصل في واجهته..
لقي سفيان واقف فم الباب ويسمع..
فجأة انفتح...
وطلعوا عدنان وبوهم..
سفيان بحده؛خيرها امي تبكي هكي..
الشريف:خلاص موضوع وفض..
وفاتوا من قدامه الزوز..
وهو شبح داخل الحوش لقي امه ماشيه وهي تبكي بطريقها للدار..
شبحلهم وقال بعصبيه؛تي شن في الزفت تكلموا خيرها امي!؟
وقف عدنان والتفت شبح لسفيان بحده وهو ساكت.
الشريف:وطي صوتك في الشارع راك..
هو جاهم وقال:امي خيرها شن صار بينها وبينك انت..
وعدنان ساكت مايبيش يتكلم..
الشريف بإنزعاج:ياودي خوك يبي يخطب بنيه امك ماتبيهاش..
سفيان:فوتها..
شبحله عدنان بنظرة غضب..
سفيان:ماتبيهاش امك فوتها..ولاتخلي امك يصير فيها ع خاطر مراة...
الشريف؛خلاص ياسفيان انهي..
عدنان:خوي الكبير ع عيني وع راسي لكن مش من حقك تفرض عليا ندير شي مش مقتنع بيه..
مروان:خلاص عدنان برا اركب لشقتي..
سفيان وهو مبتسم بأسف؛والله مافي وحده تستاهل نكدر امي ع خاطرها مش نبكيها ونقهرها...اللي يبكي امه ع مراة مايجيش راجل..
مروان شبح لعدنان..
والشريف فنص في سفيان..
عدنان ابتسم بتهكم وهو رافع حواجبه فوق قال:مايجيش راجل..
قدمله خطوتين وقال:تعرف من هو اللي مايجيش راجل اللي يخلي امه تمشيله حياته زي ماتبي...
سفيان بدون بتردد صفع عدنان صفعه من قوتها انجرحت وذنه...
عدنان ابتسم بتهكم وهز راسه بعدين لف ومشي بإتجاه الدروج اللي على برا اللي يوصلوا لشقته..
الشريف:كيف تضربه هكي قدامي!؟
سفيان؛ماسمعتاش شن قال التافه الوقح..
الشريف:سفيان!.
سفيان حاول يكتم غضبه قدام بوه..انسحب ومشي خش للحوش..
تنهد الشريف وقال:لاحول ولاقوة الابالله..
مروان؛توقعت يصير هكي من البدايه..
الشريف:عندك علم من الاول انت؟
هز مروان راسه بإيجاب وهو مضايق..
🏵🏵🏵🏵
خش سفيان لأمه في الدار...
سفيان؛امي..
وجيهه ببكي:ريت خوك ياسفيان ريته..
جاها قعمز جنبه وضمها لحضنه وهو يقول:خلاص يام خلاص اهدي..
باس ع راسها وقعد يمسح ع شعرها وهي تبكي في حضنه بحرقه وقلبه يتقطع تقطيع عليها..
••في الكوجينه
زهور؛عليك ليلة سودا..
منى:لكن عدنان صدمني الصراحه هما اسبوعين قعد فيهم في سبها قلبوه هالقلبه..
زهور:غير كان نشوفها هادي اللي دار ع خاطرها هالحرب..
منى؛تلقيها لالون ولاعون يقولوا فيها حظ القبايح في السمي لايح..
زهور:حظ ولابسبوسه..
منى بضحكه:كله وارد..
"منى هيا اركبي"
منى:حاضر...تصبحي ع خير..
زهور:قدامك كل خير..
ومشت منى طلعت من الكوجينه وزهور قعدت تراجي في سفيان...
بعد حوالي ربع ساعه..بعد مارقد امه واطمن عليها طلع من الدار وجي لمرته في الكوجينه..
سفيان:اسمعي باتي حدا امي الليله..
زهور وهي تحاول تخفي ضيقها هزت راسها بإيجاب..
سفيان؛يصير اي شي اتصلي بيا..
زهور:حاضر..
هو تنهد بضيق بعدين مشي طلع من الحوش..
وزهور تأففت بتذمر بعدين ضمت الكوجينه وطفت ضيها ومشت طلعت منها للدار...
🏵🏵🏵
وسفيان اللي كان في قمة الغضب..
اول ماخش شقته توجه للدار يطلع حوايج بش يدوش دوش سخون يهدي اعصابه شويه..
وهو ماشي للدولاب..عيونه لمحوا باكو الشكولاته..
قعد يشبحله وهو يفكر بغضب..
ومركز بنظره ع الأسم..واذكر كلام عدنان عنها...
عقله توقع ان الشكولاته ليها علاقه بنفس البنت اللي يبيها خوه..
تدفق في قلبه كميه هائله من مشاعر الكره تجاه هالبنت هادي كره يكاد يصبح حقد خلاه بغضب يندفع ناحيتها..
ويخبطها بيده خبطه تخلي العلبه تنفتح ويطيحوا باقي الطروف اللي فيها ع الأرض..
بعدين مشي لدولابه..طلع منه دشمبر نظيف ومشي بغضب للحمام...
🍀🍀🍀🍀🍀🍀
"وشن صار في الاخير خالتي"
لينا وهي راقده في فراشها ومرقده حداها بنات اختها تحكيلهم في قصه؛ في الاخير انتصرت البنيه الطيبه لان نيتها صافيه وتحب الخير لغيرها كيف ماتحبه لروحها وخداها الامير السمح  وعاشوا سعداء..
خوله "بنت امال":ديما الطيبين يعيشوا سعداء خالتي ولا..
تنهدت لينا وهي تفكر شويه بعدين قالت:اها حتى كان تعبوا شويه في حياتهم كيف البنيه اللي فالقصه فالأخير يعيشوا سعداء ويخشوا الجنه لان الجنه يخشولها الناس الطيبين بس..
خوله:باهي احكيلنا قصة تانيه خالتي..
لينا بإبتسامه؛لاتوا خلاص وقت النوم..هي تغطوا وارقدوا..
غطتهم الزوز وهما خشوا لحضنها ...
ضحكت وضمتهم بعدين سرحت بتفكيرها في نفس الموضوع اللي مابطلتش تفكير فيه من ايام..
تنهدت من قلبها...بعدين قالت...يارب...

يتبع
الفصول الاربعة