شكولينا

الجزء الرابع والثلاثين

#شكولينا
#الجزء_الرابع_والثلاثين
#الجمان_الفريد

لاخير في عمل يلهي عن الصلاة..
الصلاة اولا ❤
قولوا لاإله إلا الله تفلحوا❤
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
الساعه7:00مساءا
الحوش فضي عليها من جديد بعد ماسقدتهم للحفله..
ولهت بالعشي..
دارت البيتزا....اليوم في مباراة محليه وراجلها وسلفها وصحابهم جايين يحضروها عندهم..
وهي توتي  في العشي كانوا بحر وياسيمين يلعبوا حداها بالماعين وممرغدين بالدقيق..
ع خشته هو لما شافهم قعد يضحك..
سفيان:تي شن صاير فيهم هادم؟
لينا وهي تحط الطاجين في الكوشه:بيش يلهوا شوي ويخلوني نخدم ع حالي..
قعمز حداهم ع روس صوابعه وبدي يلعب معاهم ويضحك فيهم وهي تضحك معاهم..
سفيان وهو شاد خشمه ومغمض عيونه بألم بعد ماخبطه عليه بحر بالكاشيك؛ياقرد يامعفن....
لينا بضحكه:ضربك ع خشمك.
سفيان:نفتح عيوني نلقاك تضحكي تشوفي..اقسم بالله خبطه زي السم معاش حسيت بخشمي..
لينا قعدت تشبح للكوشة وهي تضحك بكتمان..
وهو وقف ع حيله وفتح عيونه المعبيات دموع شافها كيف عاطيه بالظهر وتهز كلها من الضحك..
ابتسم وقال:رني عليا بعد توتي العشي..
لينا بضحكه:حاضر..
طلعت معاها كلمه حاضر بشكل غريب لما تخلطت بالضحكه..
هو قلدها وقال:حاضر..بنفس الطريقه..
هي انفجرت ضحك ..وهو طلع من حداها وابتسامته ع وجهه..
لينا بضحكه:اااه..ياربي...فضيع..مسحت دموعها وقالت...فضيع هالبني آدم..
بعدين شبحت صغارها لقتهم يشبحولها..
لينا:قطاطيسي الحلوين...وقعمزت حداهم تلعب..
🏵🏵🏵🏵
وفي مكان تاني..
في احدى قاعات الأفراح في العاصمه طرابلس..
كانت عيلة الشريف وبناويته ابرز الحضور..
بجمالهم واناقتهم...
وكانت اكثر وحده مبهرة رنده كعادتها..
رنده اللي كانت العيون المعجبه والحاسده عليها...
كانت تخفي ورا ابتسامتها المغرورة وملامح وجهها المتكبرة..
انسانه محطمه بكل معنى الكلمه فاقده الثقه بنفسها..
على اعتبار ان الثقة بالنفس حاجه والغرور والتكبر حاجه تانيه...
كانت رنده وين تسرح شويه تذكر الصور اللي وصلوها..
كانوا صور لزوجها مع وحده قريبته تعرفه كويس...
صور سلفي في الجامعه واماكن عامه..وكانت صور خاليه من الحياء والإحترام...
رنده كانت حاسه ان راجلها يخون فيها..بس انصدمت في المدى اللي وصلتله هالخيانه..لا ومع مني ..مع وحده من اقاربه...
تأكدت هني ان خواته ليهم يد في الموضوع...
ولأنها من الناس اللي صعب تتعظ مافكرتش ان المكر السيء اللي مكراته لمرت خوها الأولى..ومرت خوها الحاله...حاق بيها هي...يعني رجع عليها...
وربك لايغفل ولايهمل...بس كل شي ليه وقت مناسب...
السؤال هني..
كيف رنده قدرت تبرد روحها عادي وتحضر الحفله وكأن ماصار شي..!؟
هل ناويه تتغاضى وتمشي وتكمل حياتها مع راجل مريض نفسي وخاين فوقها!؟
لاطبعا مش حتكمل معاه...
وردة فعلها هادي لأنها كانت ناويه تسيبه بس بدون مادير دوشه تخليه هو يتصرف كعادته..ياخدها ويحبسها ومعاش يخليها تشوف ضي الشمس..
فأختارت تتصرف بذكاء...
برغم انها من داخل كانت مدمرة...كانت تبكي وتصرخ وتتوجع بكتمان...
🍁سبحان الله حني النساء عند قدرة عجيبه ع اخفاء مشاعرنا لو اردنا اخفائها...
ولو جينا نبوا نطلعوها تطلع بزياده عن حقيقتها وحجمها...🍁
واستمرت الحفله لعند ماجي وقت خشة العروسه بعد مامشوا جابوها حمواتها..
خشت العروسه وكانت صغيرة في السن وآيه من الجمال..
انزفت لين وصلت للكوشه وقعمزت بمساعده حمواتها ووحده من خواتها..
بعد قعمزت ع الكوشه قعدت ادور بعيونها لين طاحوا ع مبتغاهم...ابتسمت واشرت بيدها ليها بش تجي..
شويه وجتها...وهي كانت تشبحلها بإبتسامة حب..
مها "العروسه":ابله نوريه خيرك ماجتيش روحتي بيا معاهم..
نوريه وهي مطبسه عليها:لهيت حبيبتي في الصاله ومع المشرفه..الله يبارك عليك مهوش طالعه زي الغزاله..
مها:بعض ماعندك ابله نوريه...
نوريه بضحكه:سلمها ياربي..
••في وحده من الطاولات..
رمضانه:هي اللي جابتها..
وجيهه:ايه من زمان عاجبتها كانت تبيها لحياة عدنان الله يرحمه..
رمضانه:الله يرحمه..سلفها منين قال نبي نتزوج لاقال تختارلي امي ولااختي قال نبي نوريه تختارلي وحده زيها..
قتله وليدي تختارلك نوريه لكن زيها ماظني تلاقي..
وجيهه بإبتسامه:سلمك ياربي والله لأنكم ناس باهيه مايطيح فيكم كان الباهي..
رمضانه؛الباهي يدور في بعضه..
زبيده:ايه والله عز الناس انتم يارمضانه..
رمضانه:يطول في عمرك ويحفظك ياحاجه...
••في طاوله تانيه..
رنده:خسارتها قبل هادي اللي تبيها نوريه لعدنان..
منى قعدت مركزة في العروسه..
عفاف:نصيبات..
رتيل:وخيرها لينا والله احلا منها..هي بيضاء وعيونها ملونات بس..اما لينا هدوكا العيون والخشم والفم غزاله  والشعر يضرب لوين وطول وقد حتى عند العارضات ماتلقيشي..
رنده:سكري فمك انتي خير مانفش غلي فيك.
منى قعدت تمرر في نظرها عليهم..
عفاف:خلاص اسكتوا انتي وياها من غير عار...
قلبت رتيل عيونها ورجعت تشبح للعروسه..
ورنده تهز في رجلها من الغضب ودموعها محبوسات في عيونها ومنى مركزة معاها...
🌺🌺🌺🌺🌺
خش عليها الكوجينه وهي تغسل في الماعين..
سفيان:خلتيلي طرحتين ع تركينه..
لينا التفتت وهي مبتسمه قالت:في الكوشه..
سفيان ابتسم برفعة حاجب وقال:نكسد عليهم بعدين.
لينا:ايه شن صار في المباراه..
اتكى بيده ع عالباب وقال بغرور مصطنع:وهو هدا ينسأل!!؟متوقعه اني نشجع فريق ومايفوزش..ضحك بسخريه وقال..ياوالله عليك #شكولينا وخلاص..
لينا عقدت حواجبه وهي مبتسمه وقالت:خلاص خلاص نسحب سؤالي...ياريتني ماسألت غير ليش نسأل بس..
هو نزل يده وضحك بعدين قال:رقدوا الخرابيش..
لينا بضحكه:لا خليتهم يلعبوا في حباسهم في الدار..
سفيان:تمام..وكيف جي بيمشي..
وقفاته هي لما قالت...روحوا خلاص..
سفيان:ايه روحوا كلهم..
لينا:خلاص خل بعد مانكمل نعدي نضم المربوعه..
عقد حواجبه وقال:لا..اني تو نتصرف..
ومشي طلع..
هي ابتسمت بعدم فهم بعدين قالت بضحكه:ماغيور ياكبدي هدى شني!!؟
ولت تغسل في الماعين وهي تضحك وتحرك في راسها يمين ويسار..
🏵🏵🏵🏵🏵
"ايوه محمد"
"هاه رنده اني برا اطلعي"
رندة وهي تتكلم بالتليفون في ممر الصاله:لا محمد روح انت اني بنروح مع ماليا بس نمشي معاهم غدوة للصاله اللي فيها المحضر..
سكت شويه بعدين قال..
"تمام..تبي تجيبه غدوة"
رنده:ايه قفطاني العنابي الكبير....وحوايج ليا ولميرال..
"علاش ناويه تقعدي في حوش ماليك"
رنده:ايه يومين تلاته نغير جو..
سكت شويه كذلك بعدين قال..
"تمام اللي يريحك...تصبحي ع خير"
رنده"ان شاء الله مايصبح عليك صبح":وانت من اهله...
ونزلت التليفون وسكرت وهي تقول بحقد..وسخ..
🏵وروحت رنده مع اهلها هديكا الليله وعقلها مابطلش تفكير في اللي حيصير معاها بعدين...
🍁🍁
وعدت هالليله وجي اليوم اللي بعده..
لينا مابتش تنزل في وجود رنده خافت تفتح معاها نفس الموضوع وتحججت لسفيان بأنها ماتبيش ادير الزحمه بصغارها..وهو مامشتش عليه بس لان حس لينا مضايقه ماباش يضعط عليها..
جي محمد وجاب لرنده ماتبي واستقبلوه خوتها استقبال حلو وشدوه الغدي..
وهي كان تلقى تسممه بيه..
بعد تغدا روح طول....وهي حالفه ان هادي اخر مرة يجيها للحوش ويستقبلوه استقبال محترم ويكرموه..
وعدا باقي اليوم عادي زي الايام اللي فاتت ع الجميع..
وتم عرس سلف نوريه اللي قعد شاغل العيله اسبوع كامل...
🌺🌺🌺🌺
تاني يوم..
الساعه 2:13بعد الظهر..
خش للشقه..
سمع دوشة صغار كبار استغرب..
وين وصل للصاله شاف بنات عفاف مقعمزات مع لينا ويساعدوا فيها في تغليف الشكولاته وهي تهدرز عليهم..
لينا:ماشاء الله..صار تعلمتي اديري كيكه بروحه..
رفيده بحماس:ايه وجبت منها بعدين تعالي باش تاكلي منها..
لينا بإبتسامه:باهي..
سمعت صوت رنا تقول"سوفي"
قامت عيونها شافاته يضحك وهو يشوف لرنا جاياته تجري..
هو طبس خداها ورفعها فوق وقال:رنوش..
هي باساته من خده..هو قعد يضحك..
لينا:ياهلا ومرحبا.
شبحلها وقال:وين لامه القوم عندك..
لينا:يعاونوا فيا..
سفيان قربلهم وقال:كان نعرف امتى تبدي تخدمي في المحل..
لينا؛مش قتلك ندور في وحده ثقه نحطها تبيع..
سفيان؛تبي ندورلك اني؟
لينا شبحتله بنظرة مافهمهاش الا بعد ماقالت متسائله:ادور ع وحده؟!
هو بدت تكبر ابتسامه الجانبيه وحاجبه ارتفع وهو يقول:ايه وين المشكله!؟
هي استاقظت لروحها ارتبكت ونزلت عيونها للشكولاته وقالت بإحراج:دور..
هو قعد يشبحلها بنفس الإبتسامه..
وهي كانت حاسه ان قاعد يشبحلها معاش قدرت ترفع عيونها..
شويه رن تليفونها..
خداته من ع الأرض وردت..
لينا بخجل؛ايوه عفاف..
"بالله لينا قولي للبنات ينزلوا يتغدوا"
لينا:باهي هي شويه بس..
وسكرت وشبحتله لقاته مازال يشبحلها غيرت عيونها طول بتوتر وقالت:رفيده حبيبتي قالت ماما انزلي تغدي انتي وخواتك..
رفيده سيبت اللي فيدها وناضت وهي تقول:هيا غيداء هيا رنا..
غيداء:تو نجوك بعدين باهي..
لينا بإبتسامه؛انا جايتكم بعدين..
هو قال؛هي تعالوا نوصلكم..
ومشي هو وياهم طلعوا من الشقه..
رفعت باكوات الشكولاته بالسفره اللي كانوا عليها وقالت بغضب؛ماترفسي وتلبزي يالينا..
ومشت خشت للكوجينه..
ع خشه..جاها وهو يقول؛علاش ماتغدتيش لوطا حتى عمتي ربيعه موجوده تو بتقعد تقصقص وتسأل وينها لينا..
لينا:بننزل العشيه ان شاء الله..انت بتغدا هنى ولا لوطا..
سفيان:شن درتي الغدي..
لينا؛مكرونه بالبيشاميل..
سفيان؛مالا اعذريني ياشكولينا مش حنخلي رشدة امي وناكل بيشاملك..
لينا وهي لاهيه ادس في الشكولاته:براحتك..
واستمرت تحط في علب الشكلاطه في وسط صندوق.
بعدين دست الصندوق في الفريز..
والتفتت بتطلع وقفت في مكانها من الخلعه..
لينا:نحسابك نزلت..
سفيان وهو مقعمز ع الكرسي قال بإبتسامه:ماهانش عليا تعبك هيا وينه البيشاميل..
ضحكت وقالت:شويه خل نعدي نشوف المشاغبين ونجي.
سفيان:قصدك فايقين هما؟
لينا:ايه وحاطتهم في حباسهم في الدار يلعبوا بيش مايلبزوا عليا..
سفيان ناض وقال:خليك اني تو نمشي نشوفهم انتي وتي الغدي..
لينا ابتسمت وقالت:باهي..
مشي هو طلع من حداها..وتوجه للدار خشلها..
لقي بحر يحاول يطلع من الحباس واخته تشبحله..
سفيان:شن دير ياخربوشه..
وخداه وطلعه..
قعد يلعب عليه شويه..بعدين مرر نظره ع الدار..
شبح للكامدينو شويه...بعدين قدمله وقعمز السرير..
كان بحر يبي يقربج نزله لوطا..
وهو فتح الدرج بالشويه وكان خايف من اللي بيشوفه فيه..
لقي مصحف...وخاتم تسبيح....وبكله شعر...ومذكرة..
خدي المذكرة من الفضول وفتحها...لقاها كلها حسابات..
وتفاجئ لما شافها تحسب في حق احتياجتها الخاصه..
ولقاها تخلي في فلوس ع تركينه لاختها امال..
اضايق هلبه..
فهمه لسبب تمسكها بالخدمه ضايقه ع الآخر.
كل شي حواليه يثبت انهم زوجين بالإسم....
ويثبت ان هي مش حتتقبل هالحقيقه الا بعد وقت طويل..
وهو معاش قادر يتحمل هالوضع اكثر من هكي..
هو زوجها..ويحبها لدرجة العشق..ويشوف انها بكل شي يخصها تخصه..
كان يلقى يخدمها برموش العين زي مايقولوا..بس هي ماتبيش تعطيه الفرصه الكافيه بش يدير هكي..ويثبتلها نفسه كزوج محب..
استاقظ لما سمع صوت حاجه طاحت.
دس المفكرة في الدرج..ومشي بسرعه لبحر اللي طيح خمرة امه من ع الزيانه..
ع خشة لينا:شن دار..
سفيان:هادي طاحت لكن ماصارلها شي..
لينا:مشاغب المشاغبين..
قامه سفيان وفيده التانيه الخمره وهو يقول:هادي عطر!؟
لينا:لا..
سفيان:كيف لا ريحة عطر واضحه..
لينا:هي حاجه عطريه بس مش عطر..
سفيان:معاش اديريها بكل ارجوك..
لينا:مانقدر لازم نديرها هكي تعودت..
سفيان:ريحتها قويه يابنتي..تعرفي حكم المراة اللي تطلع متعطره..
لينا:نخفف فيها انا لو درتها في النهار..واصلا بديت معاش ندير فيها وانا طالعه للعمل.
سفيان مشي ردها لمكانها وقال:بنشم عليك وانتي ماشيه للخدمه بناخدها منك..
لينا بإبتسامه:ياودي باهي حاضر..اطلع تغدا البيشاميل صقع.
ومشت طلعت ..
وهو تنهد بضيق..بعدين مشي طلع وراها...
🏵🏵🏵🏵🏵
"والله جاهم عرس الله يبارك "
ربيعه:ماشاء الله ماشاء الله..
وجيهه:وكل شي واقفه عليه نوريه تجري وتعول..
ربيعه:مال شنو الكنه الكبيره حتى هي..
رنده:مش كل كنه كبيره زي نوريه اهو شوفي امي ماتتقارنش بمرت عمي السايح..
ربيعه:كلهم خير وبركه مافيش وحده فيهم خير من التانيه عندي واني مانحبش المقارنات بكل..
عفاف ورنده شبحوا لبعض..
وجيهه:تغدي ربيعه تغدي..خودي اللحمه هادي..
ربيعه:اهو نتغدا مريت خوي..امالا وين السميرة السمحه..
وجيهه؛مشغوله ادير في طلبيات شكلاطه لنفيسه تبيهم للمة بنتها..
ربيعه:واكيده بالبلاش..
وجيهه:محلانا وحني واخدين منها فلوس..
ربيعه:قفاصة القفاصات هادي كل شي في اللمه طالباته من حد عليك طيحه طاحها وخيي المبروك.
زبيده:المراة حريصه مش مبذرة..
ربيعه:قفاصه يام مش حريضه قرقاضة ع قولت الشراقه..اخر مرة خطمت عليهم ع قرب الظهر ماقالت حتى بالكذب نشدها ع الغدي..وكان نندري راني جبتلها البضاعه وخليتها اطيب غصبن عن خنفورتها هالخنفورة..
قعدوا يضحكوا..
ع خشت الشريف عليهم قال:عطيك الصحه ياوجيهه..
شبحوله ومرته قالت:سلمك ياربي..صحيحتين..
ربيعه:تغديت كويس وخيي..مش عاجبني راك ضاعف...
وجيهه:من هالخدمه ودوشتها.
ربيعه:لوح عليك وتعاليلي الحوازة اقعدي عندي شهر والله نخليك توزن 180..
الشريف بضحكه:وينهم العظام اللي بيقيموا 180ياربيعه ربي يهديك.
ربيعه:تعبير مزاجي وخيي..المهم اسم كلامي وتعالى..وخليك ولادك يشدوا عليك شويه..
ابتسم بتهكم وهز راسه ومشي..وهما معاه بعيونهم...
هي شبحت لأمها وقالت:حاله مش عاجبني بكل..وولاده قلوبهم ميته معقوله مايشوفوش في بوهم ومش حاسين.
منى:مروان ديما يدوي ع صحته ويقول موليه بالهون.
ربيعه:ايه هدا علاش سيب تمزريط المستشفيات وقعد يخدم معاه..
منى شبحت لوجيهه..
وجيهه:مابتغصبيهم ع شي مايبوشي..
ربيعه حطت الشوكه في الرشده وقعدت تلف فيها وهي تقول:ايه..يقولوا عنده ولاد...عنده الفري..وحطت الشوكه في فمها بغيظ..
وهما ساكتين مش قادرين يناقشوها مادام امها ماعارضتش كلامها.
وفعلا زبيده كانت مؤيده لكلام ربيعه...
🌺🌺🌺🌺
الساعه 4:15قبل العصر.
طلع من داره وتوجه للباب وهو يقول:اني نازل لوطا .
جاه صوتها من دارها وهي تقول..
"تمام بعد العصر ننزل"
هو كمل طريقه للباب لبس في رجليه بلغه..وفتح الباب.
تفاجئ وين شاف عمته قدامه..
ربيعه؛كيف جيت بنطق...خشت وقال..كيف حالك سويفه توا..
سفيان وهي يشبحلها كيف خاشه قال:الحمدلله..
ربيعه:تغديت..
سفيان:الحمد لله..
ربيعه؛بتنزل..
سفيان:ايه..
ربيعه:لالا خليك شويه نبيك في موضوع...وسكرت الباب...ومشت خشت داخل..
هو حرك راسه يمين ويسار..رمي اللي فرجليه ولحقها..
مشت طول للصاله وقعمزت وهي تقول:السميرة السمحه وينها.
ع طلعة لينا من الدار وهي لابسه قفطان حوش وع راسها وشاح..لما شافت ربيعه تفاجئت.
لكن مش زي ماتفاجئت ربيعه وين لقتها بهالهيئة في الحوش..
لينا:مرحبا عمتي ربيعه..ومشتلها سلمت عليها وربيعه مازال مش مستوعبه اللي تشوف فيه..
في عز النو لابسه هكي وحجاب فوقها..!
عرفت اللي فيها كان كل شي واضح..
بعدت لينا وهي تقول:شنو حال العيله..
ربيعه وتمرر في نظرها عليها قالت:الحمدلله..
هي انتبهت لنظرات ربيعه..وفهمتها طول.
شبحت لسفيان لقاته مقعمزة ويشبح لساعته..
هي اضايقت ع خاطره..شبحت لربيعه وقالت:نعدي نرضع العويله ونجي..
هزت ربيعه راسها وهي مازالت تشوفلها..
ولينا لفت ومشت للدار..
ربيعه بعد ماكانت تبع فيها بعيونها قالت:حالكم باهي انت ومرتك...
شبحلها بعدين شبك صوابع ايديه في بعض وهز راسه بإيجاب وهو يقول:اممم.. الحمد لله..
هي قعدت تشبحله بشك وتهز في راسه مسايرة...
وهو توا بس حس وفهم وانتبه للي صار وحس روحه انحط في موقف بايخ مع عمته ربيعه بالذات...
🌺🌺🌺🌺
وهي لأنها تعرف ربيعه كويس وتعرف شكل علاقتها بسفيان..
مارضتلاش اللي انحط فيه قدامها..
مشت طلعت من دولابها فقطان مغربي خفيف بش تلبسه لانها حتنزل لوطا مع ربيعه وين تجي نازله...
حولت الوشاح وحطاته ع السرير..
بعدين غيرت حوايجها..
وبعد غيرت مشت وقفت ع المرايه..
قعدت تشبح لروحها في المرايه وهي تفكر....
《"لينا بنتي اول شي بنقولك ع حاجه مهمه..حاجتين توا اديري فيهم يكسبوا فيك الذنوب...اولهم وضعك انتي وراجلك...تانيهم وهو الاهم تفكيرك في راجل تاني وانتي ع ذمة راجل"》
خدت نفس عميق..
بعدين فتحت شعرها...
سرحاته وقاماته بطريقه حلوه...ماكانش مفرود وهو مقيوم بسب سخونه الجو...
وخلت خصلات من شعرها المموج الكيرلي نازلات ع وجهه وحده مدرقه شويه من جبهتها ونازله لخدها..وتانيه نازله ع خد طول..
شبحت للزيانه مالقتش عليها ادوات زينه بكل..تنهدت..
ومشت لدولاب..
طلعت شنطة المكياج...فتحتها وطلعت منها رسمه وكحل ومسكره..
وردت الشنطه لمكانها..
بعدين مشت وقفت ع الزيانه..
هادي كانت اول مرة تحط فيها زينه ع وجهها بعد موت عدنان..
غمضت عيونها...خدت نفس عميق...بعدين زفرت بقوة..
وفتحت عيونها...وبدت تحط.في الزينه لعيونها..
بعد كملت قعدت تشبح لروحها تلقائيا ابتسمت..
بعدين جت بتطلع..خدت الوشاح..قعدت تشبحله وهي تفكر ..
قعدت لحظات تفكر...بعدين هزت راسها وكأنها تخاطب في نفسها..
شدت الوشاح بيدها..ومشت للباب فتحاته..
خدت نفس للمرة التالته وزفرت بعدين طلعت..
••في الصاله
ربيعه؛اني نبيك تسمعني كويس وتفهم عليا سلم وليدي..
عقد حواجبه وحط سبابته ع صدغ راسه وابهامه اسفل خده وقال:ان شاء الله..
ربيعه:هدا ياولدي...سكتت وين شافت لينا وهي جايه..ابتسمت تقائيا وقالت..الله يبارك..
هو استغرب وشبح وين ماتشبح....
واللي شافه خلا قلبه المتيم يذوب بين ضلوعه..
وملامح الانبهار ارتسمت ع وجهه...
قعدت يتبع فيها بعيونه المغرمات وهي ماشيه لين قعمزت حدا ربيعه وهي عاطياته بالجنب..
لينا كانت حاسه ان الجو صقع فجأة.....
كانت مرتبكه ومتوترة مابتش تلمح سفيان حتى بلمحه بوحده عيونها في ربيعه وخلاص..
ربيعه؛الله يبارك عليك...ربي يحفظك ويحميك انتي من غير شي زي الغزاله..
لينا انحرجت وقالت:تسلمي..عقدت حواجبها وهي تحاول تغير الموضوع:اساور جت.
ربيعه:لالا سويرة اليوم في حوش خالتها..
لينا بإبتسامه مرتبكه:اها.
ربيعه شبحت لسفيان لقاته مسهم في مرته..تنحنحت وقالت:ايه سويفه اشبحلي هني..
سفيان غير عيونه عن لينا بالسيف وقال:نعم!
ربيعه:خلينا نرجعوا لموضوعنا قتلك..
سفيان هز راسه ومازال مش طالع من الحاله اللي هو فيها قال:تكلمي نسمع فيك..
لينا شبحتله...وهو شبحلها بطرف عينه..
غيرت عيونها وشبحت لإيديها اللي مشبكتهم في بعض ومن توتر عرقانات..
ربيعه:حال بوك ياولدي مش عاجبني بكل..
هو ولينا ركزوا معاها بقلق..
سفيان:خيره!؟نشوف فيه عادي..
ربيعه:عادي شن بس ياسفيات بوكم كبر وجاه الضغط والخدمه اللي هو يخدم فيها زاداته ومعاش يقدر عليها..
سفيان قعد ساكت وهو يفكر في كلامها بقلق..
ربيعه؛بوكم توا لازم يتريح بعد سنين شقى وتعب وانتم مفروض تشدوا بعده..
سفيان:نشدوا بعده؟!من تعرفيه فينا يفهم في التجاره!؟
ربيعه؛اني علاش جيتك انت مش لأنك الكبير بس راهو
جيتك لان سمعتهم يمدحوا فيك ويشكروا عمك مسعود قال كان يشد سفيان بعد بوه يهنيه..حتى سمعته بين التجار ماشاء الله وعنده كلمه معاهم..
لينا قعدت تشبحله وعمته تتكلم..
سفيان:تمام لكن مع هدا اني مانفهمش في التجارة ومانقدرش ع مسؤولية زي هادي..ربي يعطي لبوي الصحه وطول العمر يكمل مشواره فيها ومافيش باس لو ساعدناه اما باش نشدوا بعده هدا صعبه هلبه عليا..
ربيعه؛التجارة اسهل من الفيزياء راهو ماتاخدش منك هلبه بس تولي راس فيها بالذات انت حادق ودماغك ماشاء الله وولد تاجر شهرين تلاته بالكثير ويولي لإسمك شنة ورنه..
سفيان؛شكرا ع المدايح المعرمه..ومع هدا معليشي مانقدرش..
ربيعه بإصرار:سفيان ولدي انت الكبير ولازم اضحي ع خاطر وبيك اللي ياما ضحى ع خاطرهم..
ضحك بتهكم وقال:سبحان الله!لازم سفيان يضحي لازم لانه الكبير لازم يجي ع روحه بش يرضي الكل اما رضاه مضروب في الحيط..مليت واني نضحي عييت لهني وساد..
ربيعه تنهدت بضيق وقالت:اني واجبي اتجاه خوي ودرته ماعندي غير اني ندعيله ربي يقويه ويديرله طريق..
وناضت..
لينا ناضت معاها وقالت:خليك ماضيفناك شي..
ربيعه:ساد ماضيفني راجلك..
سفيان ناض ومشي للدار وهو معصب..
وربيعه مشت للباب وهي تقول:ربي  يعوض وخيي خير..
لينا:ماتقولي هكي ياعمتي قدري وضعه وراك تنسي اللي صاير معاه..
هي شدت في يد الباب وشبحت للينا من فوق للوطا وقالت: عندك حق...واضح انه مش متريح..
وفتحت الباب طلعت وسكراته وراها..
وخلت لينا واقفه تشوف للباب وهي مضايقه ع الاخر..
غمضت عيونها وهي تحاول تتمالك اعصابها بعدين.فتحتهم ومشت للكوجينه..
اما هو بعد ماسكت عنه الغضب..
طلع من الدار ومشي بش يطلع من الحوش العصر قريب وهو عنده موعده ضروري بعده..
وهو ماشي بانت عليه من الكوجينه واقفه ع الفريز بطلع منه الباكو اللي حطت فيه الشكولاته..
غير طريقه ومشي للكوجينه ودار روحه بيشرب ميه..
فتح الثلاجه وقال:بتنزليها توا..
لينا هزت راسها بإيجاب من غير ماتشوفله..
سكت شويه وهو يشوفلها بعدين قال:كلامي اللي قلته فيه حاجه غلط؟!
هو ماسألش لأنه يبي يعرف رايها في كلامه هو عارف انها مش معاه...
لكن سألها يبي تلتفت تشبحله وتكلمه..
هي قالت بدون ماتشوفله؛عندك حق..
هو بتعجب:عندي حق!..
التفتت وشبحتله وهي تقول:انت ضحيت واجد وديما ضحي وتجي ع روحك...من حقك تفكر في راحتك..
سفيان حس بأنها تتكلم وهي مضايقه قعد يذكر في الكلام اللي قاله...بعدين فهم وضحك وقال...لا لينا مش ناقص انك تفهميني غلط توا..!
لينا:لا انا مافهمتك غلط..بالعكس وجعني حالك..حالك يوجع واجد..
رفع حواجبه وقال:وجعتك!.
لينا؛ايه..ومشت بتطلع من الكوجينه..
هو سبقها وجي قدامها..
هي توترت هلبه..
اما هو فكان في حالة انفعال حس الكلمه اللي وقتها داسها لازم تطلع توا..
لينا بدون ماتشوفله؛ترا شويه..
سفيان؛لا لين تسمعيني...لينا اني..
فجأة الثلاجه دارت صوت تنبيه فجعهم هما الزوز..
لينا:عدي سكرها نسيتها مفتوحه..وتخطاته ومشت للدار طول..
اما هو غمض عيونه وتنفس بغضب وجي للباب سكره بقوة وخلا الثلاجه تهز مع بعضها..
بعدين مشي وطلع من الحوش..
🌺🌺🌺🌺🌺
الساعه 6:25مساءا..
في الصاله اللي كان روشنها العريض مفتوح كله..
مقعمزين حدا عالة الشاهي اللي دايرتها وجيهه..
وريحة العطر والورد تخش عليهم من برا تجيب فيها النسمه البارده..
كان من غير ربيعه موجوده نفيسه سلفة وجيهه وبنتها مرام....
اللي كانت تشبح للينا طول الوقت..
لدرجة لينا تعقدت من نظراتها..
نفيسه؛صحيتي يالينا وياريت تجي للمه..هي لمه عاديه هدرزة لافيها غني ولازغاريط..
وجيهه:معليشي بنيتي كان مشيتي ع الأقل توسعي خاطرك ..
لينا تنهدت وقالت؛تو نشوف..
نفيسه :والله نفرح بيك كان جيتي..
لينا:تسلمي بارك الله فيك..
ورنده تشبحلها من فوق لتحت..
وجيهه؛ترا نوضي لوينه اغسلي الطواسي..
منى:خليني نوض اني اللاي هي جابتها..
وجيهه:لاانتي خليك مقعمزة راجلك ياخد ويوصي عليك..
مرام؛حامل؟
منى بآبتسامه:ايه..
مرام؛مبروك..
نفيسه:تشوفيه على خير ان شاء الله..
منى؛ان شاء الله..
مشت لينا خدت الصفره وطلعت بيها من الصاله..
ومرام ناضت ولحقتها بطاسة الشاهي..
••في الكوجينه..
حطت مرام الطاسه جنب لينا وقالت:شن جو..
لينا ابتسمت مجامله وقالت:الحمد لله..
مرام ابتسمت وقالت:الله يبارك عليك وع عيونك مش عاديات..
لينا:تسلمي..
مرام؛زي ماتعرفي اني نخدم ميكب ارتست وواخدات دورات في لبنان..والخدمه متاعنا تبي حس فني..واني تقدري تقولي عليا فنان وين شد وجه وحده ونخدم عليه نحس في روحي نرسم في لوحه..وبصراحه وجهك مغري هلبه للمكياج..
ضحكت لينا وقالت:هدى ليش كنتي تشبحيلي طول الوقت..
مرام بضحكه؛ركزتي.. وقعدت تضحك..
بعدين هدت ضحك وقالت...اني عندي سوسه في خدمتي..تعرفي كان روحت ومادرتلكش مكياج احتمال نكمل الليله بكي..
لينا:سامحني انا اللب فعيوني ودرته بالسيف..
مرام:تمام نمسحوا اللي درتيه ونديرلك غيره والله ماحتندمي الله..
ابتسمت لينا بإستسلام وقالت:باهي..
قرصتها مرام من خدها وقالت:نجيها العسل.
ضحكت لينا..
🌺🌺🌺🌺🌺
في دار رتيل..
مرام وهي تمكيج في عيون لينا:اني نحب الرسم بس حسيت روحي مايله لعالم الميكب اكثر من واني صغيره..
لينا:قاعده تقري ولا؟
مرام:ايه..سنة تانيه لغات..
لينا:ايه واضح انك صغيرونه..
مرام:بس والله في الميكب بديت نافس في كبار..مش سامعه بيا مرام بن عامر..
لينا:لا مانتبعش في الجو هدى واجد..
مرام:خلاص تبعيه من اليوم وبرا غادي..ترا سكري عيونك..
لينا سكرت عيونها..
مرام وهي تشتغل:الله يبارك كبار وواسعات والرموش مسكرة طبيعيه من ربي..الله يبارك..
لينا:تسلمي..
مرام قعدت ساكته وهي تخدم لين كملت رسمة العيون الزوز وقالت:افتحي عيونك ترا..
فتحت لينا عيونها..
مرام؛الله يبارك الله يبارك..انتم السمر فتنه...اي ميكب ارتست حلمها تتفنن وهي تخدم ع وجوهكم..
ابتسمت لينا..
مرام خدت المسكرة وقالت:كيف دايره مع سفيان..
لينا؛عادي...
مرام:كان نقولك قداش ليا ماريته ولاهدرزت معاه ممكن من الاعدادي..بنات العيله كلهم هكي اللي من جيلي  وهما صغار يبصر معاهم ويهدرز عليهم واول ماكبرنا خلاص قطع العلاقات كلها..عكسه مروان وحياة عدنان الله يرحمهم كان في بينا سلام وهدرزة..لكن سفيان..نوووو..
لينا:هوشخصية شديده...
مرام:ومايحبش العوج...عندك علم كان فارس احلامنا كلنا راهو..وضحكت..
لينا ابتسمت مجامله...ومن داخل كانت حاسه بشعور مزعج..
مرام:بس توا خلاص كبرنا..لكن في بنات في العيله قعدت متاملات بالذات بعد عطل في الزواج ولما تزوج تحطموا..
لينا قاعده ساكته وماتبيش تعلق...
مرام بضحكه:والله لما ندوخهولك اليوم..
لينا بانت ع وجهها ملامح الخجل ومرام قعدت تضحك..
شويه وقالت:خلاص كملت..
طلعت المرايه ووجهتها للينا وقال:هاه شن رايك..
بانت ع وجه لينا ملامح الذهول وقالت:ماشاء الله عليك والله فنانه جد..
مرام بضحكه:تسلمي حتى عيونك ساعدوني هلبه..وبالله عليك يوم تفكري تمكيجي وجهك كله كلميني طول واني نديرهولك بلاش المهم نشبع شغفي...
لينا ابتسمت بعدين قعدت تتأمل في عيونها ولأول مرة تحسهم جميلات لهالحد بالذات بلونهم البني الفاتح...
🌺🌺🌺🌺
شويه وطلعتلهم..
كلهم عجبتهم هلبه بالذات عزوزتها...
اما رنده فمن كثر ماعجبتها كان خاطرها تبزع مالقي الميه ع وجهها بش يخرب المكياج..
الحسد..وماادراك مالحسد...!
🏵مع المغرب روحت سلفة وجيهه وبنتها..
وبعدهم بربع ساعه لحقتهم ربيعه اللي روحت وهي واخده ع خاطرها من ولد خوها..
عفاف:مش عارفه حسيتها انطفت فجأة..
رنده:بالك ع خاطر نفيسه تعرفوها ماتحبهاش..
وجيهه:لالا صار بينها وبين سفيان شي..
لينا وهي تلبس في بنتها شبحت لعزوزتها ووجيهه شبحتلها وقالت:صارت حاجه..
لينا:ايه صار بيناتهم نقاش لكن مش عارفه على شن ماحضرتهم..
هزت وجيهه راسها وقعدت ساكته وهي تفكر..
عفاف:الله يبارك على عيونك لينا..
وجيهه شبحت للينا وابتسمت..
رنده:حتى هي مرام..القرده تطلع من تحت ايديها غزاله..
لينا شبحت لرنده من فوق لتحت..
ورنده تشبح لعفاف وهي شاده ضحكتها..
وامهم تفنص فيها..
ع خشة رفيده.
رفيده:لينا يبيك خالو برا بحدا المظله..
وجيهه:نوضيله بنتي نوضي..
ناضت لينا وقالت:حداكم بالله راهي تعدي لخوها تضربه وهو راقد..
وجيهه:باهي غير بري..
مشت لينا طلعت وهي تساوي في وشاحها..
خشت للكوجينه لقت منى تغطي ع طنجره العشي..
طلعت من حداها..
منى:حي على سفيان حي..وضحكت..
💎هو كان واقف حدا المظله..
لما جاته وقفت قدامه وقالت:نعم؟
هو قعد يشبح لعيونها وخلاص..
وهي برغم ارتباكها قعدت تشبحله كيف يشبحلها..
سفيان:ماشاء الله ماشاء الله...الله يبارك..
هي نزلت عيونها بخجل..
هو ضحك وقال:والله حتى نسيت علاش ناديتك..
شدت ابتسامتها وهي في قمة الخجل..
وهو شبحلها بعدين تنهد وقال:لاإله الا الله...محمد رسول الله...ايه..ع الكلام اللي بكري قلته..انا كان قصدي.
بدون ماتشبحله قاطعاته وقالت:مافي داعي تبرر والله ماني واخده ع خاطري ولااني زعلانه والله..
سفيان:واني مانبيكش تفهميني غلط والله والله...وقلد صوتها  لما حلفت..
ضحكت وقالت:صامت..
سفيان:من كثر ماتقوليلي فيها قريب نمشي ناخد سكريه الملح نصبها ع روحي..
قعدت تضحك...
سفيان بضحكه:شن عشانا..
لينا:كمونيه تقريبا..
سفيان؛نموت فيها..تعلميها..
لينا بضحكه؛باهي..خل نخش لياسمينه نبي نوكلها.
سفيان:تمام....بري..
مشت لينا خشت وهو معاها بعيونه...
تنهد بإبتسامه...بعدين مشي..
🏵🏵🏵🏵
بعد العشي..
روحت عفاف...
ووجيهه اتكت حدا عزوزتها في دار التقعميز حدا المكيف..
ولينا ومنى ومعاهم رتيل يضموا في الحوش..
اما رنده..فكانت في دار اختها مقعمزة وشاده تليفونها تكلم في وحده ع الماسنجر..
(بالطريقة هادي تقدري تهكريه)
(تمام حبيبتي صحيتي)
طلعت من الماسنجر وخشت ع الفيس...
وطول ع صفحة راجلها وبدت تهكر فيها..
بعد مشقة...قدرت تهكره وخشت طول الخاص..
لقت المحادثات بينه وبين نفس البنت..
وكان اخر كلام بيناتهم الحاحها عليه انه يجي يخطبها وهو من كلامه معاها يبان يماطل فيها..
زادت شافت باقي المحادثات وانصدمت باللي شافاته..
كلام يستحي منه الشيطان..
زادت تقززت منه وكرهاته..
وزياده لقاته متكلم عليها..
عايب حتى في شكلها ومامخلي ماقايل عليها..
حتى طلعها مش نظيفه..
رنده وهي تقرا كانت حاسه روحها بتموت ماكانتش متوقعه انه يكون انسان دنيء لهالدرجه..
واكثر شي كان قاهرها كيف وحده زيها يكون هكي نصيبها!..
🌺🌺🌺🌺
منى: هي تصبحوا ع خير ..
لينا ورتيل:قدامك كل خير.
مشت منى وهي قايمه ولدها في غمرها..
طلعت من الحوش..
لقت راجلها قدامها خدي منها ولدهم ومشوا مع بعض للدروج..
سفيان كان في سيارتهم شافهم لما طلعوا مع بعض..
وتخيل لو جاه يوم وقام بين ايديه عيل ليه من صلبه...وتكون لينا امه... غمض عيونه وقال..يارب..
بعدين نزل من السيارة سكرها..
ومشي لباب الحوش وقف قدامه وقعد ينادي...
"لينا"..
لينا:بالله رتوله طلعي معاي ياسمين..
رتيل:باهي..
رفعت لينا بحر ورتيل ياسمين..
ومشوا الزوز للباب..
وطلعوا برا..
قدم سفيان خدي البنيه من رتيل..
رتيل:تصبحوا ع خير...
سفيان ولينا:قدامك كل خير..وانتي من اهله..
بعد ماطلعوا سكرت رتيل الباب.
وهو وياها مشوا ركبوا بالصغار لشقتهم..
🌺في الشقه..
حطوا الصغار في سريرهم وسفيان قال..
سفيان:تذكري الروايه اللي قتلك عليها..
لينا:ايه..
سفيان:راجي في الصاله تو نجيبهالك..
لينا هزت راسها يإيجاب..
هو ابتسم ومشي طلع..
وهي شبحت للمرايه...حطت يدها ع الوشاح...
شويه...بعدين خدت نفس..وحولاته ولوحاته ع السرير ومشت طلعت من الدار...
وصلت في الصاله ومشت قعمزت وهي متوتره هلبه..
ع جيته هو ابتسم لما شافها..
ومشي قعمز مقابلها...
مدلها الروايه وقال:هي هادي..
هي خدتها وشافت العنوان حستها روايه عاطفيه..
سفيان:اقريها واعطيني رايك..
لينا شبحتله وقالت:مرات نطول ع مانكملها مش حنكون فاضيتلها واجد..
سفيان وهو يشوف لعيونها قال:نتستنى..وين شن قاعد ندير غير اني نستنى..
هي نزلت عيونها للروايه حياءا..
هو اتكى بمرفقه ع يد االكرسي وحط سبابته ع صدفه وابهامه اسفل خده وقال:في العيون ياما انكتبت اشعار قريت منها وحفظت هلبه..بس ولامرة حسيت بالكلام..
كنت نشوف زي الخيال العلمي..فكر سرح بيه الشاعر بعيد عن الواقع..لان الشاعر غالبا كذاب..
لعند ماجي اليوم اللي خلاني نتأكد.انهم ع قد ماوصفوا في العيون وجمالها..كانوا مقصرين..
لينا كانت تسمع في كلامه وهي بتتبخر من الخجل تبي تنوض لكن مش عارفه كيف..
وهو كان يراقب فيها بإبتسامه بعدين قال...
لعينيك..مايلقى الفؤاد ومالقي..
وللحب..مالم يبقى مني ولابقي..
🌺قامت عيونها فيه وشبحتله..
هو توسعت ابتسامه ولمعوا عيونه وكمل يقول..
وماكنت ممن يدخل العشق قلبه
ولكن من يبصر جفونك يعشق..."بكسر القاف"
قلبها بدي يدق بقوة....وشعور غريب بدي يجتاحها اجتياح وهي تسمعله..
سفيان تنهد وقال...
رمتني عيون السمر دون جناية
ودعتني من دون الأناس طريح
لمن اشتكي علتي..ياناس..لمن اتظلم..
اذا كان قاضي الحب...
اشر ع نفسه وكمل يقول....مثلي جريح..
لينا كانت حاسه فقدت الجاذبيه الأرضيه وقاعده تسبح في عالم اول مرة تخشه...
هو تنهد وقال...
ثملت عيوني مذ رأتك بشالك
ان العيون مع المقالم تسكر
يامبسم الدنيا وشهد رحيقها
اسرفت في عشقي وعينك تغفر..
حرك راسه يمين ويسار وهو يقول بإبتسامه
لاتخجلي مما اقول تغزلا
فالأجل عينيك البريئة اشعر..
وتنهد وهو يشوف لعيونها..
وهي من قوة الشعور اللي كانت تحس بيه عيونها تعبوا دموع..
هو حس انها متجاوبه معاه..
وحس ان هادي هي اللحظه المناسبه بش يعترفلها بصريح العبارة..
سفيان بلع ريقه وقال:لينا...اني...
قاطعاته وقالت:نعسني النوم وبكرا الصبح خدمه..تصبح ع خير..
وناضت بسرعه ومشت للدار وخشت وسكرت الباب..
هو كان برغم قوة الصدة...بس كانت عنده اهون من انه يسمع صوت لفة المفتاح..
وللأسف سمعها..
غمض عيونه بألم..بعدين فتحهم وناض ومشي للدار وكان حاس ان نفسه مكسورة..بعدين ماكان حاس روحه خلاص وصل...هوي من السماء للأرض...في مكان سحيق...
🌺اما هي..
بعد ماسكرت الباب مشت قعمزت ع السرير وهي حاطه يدها ع قلبها اللي كان حيفر من مكانه..وع وجهها ابتسامه خجوله...
تنهدت من قلبها بعدين تمددت ع السرير ع جنبها اليمين وهي تشوف للروايه بإبتسامه..شويه وحطتها ع الكامدينو..
وغمضت عيونها وهي مبتسمه..وبدت تقرا في اذكار النوم..
وماان كملتهم الا والنوم غلبها ورقدت...
اما هو.....
••تاني يوم...
الساعه 11:00صباحا..
بحدا الكافتيريا..
سفيان؛اقسم بالله ماقدرت نرقد لحظه لتوا تشوف فيا..
الوضع زاد تأزم ياصاحبي...صاحبك تعبان لين خلاص..
ابوبكر بإبتسامه؛هدا الحب اللي كنت هازي عليه تحسابه ساهل...ياما منهم التاريخ ذكرهم صناديد الحب مرمدهم مرمده..
سفيان تنهد وقعد ساكت..
ابوبكر:شوف..هي المراة تعرف ادرق مشاعرها كويس تمام..لكن حاجه لو حركتها اطلع اللي فقلبها كله..
سفيان عقد حواجبه وقال:اللي هي؟!
ابوبكر:الغيرة..
سفيان:وشن.تبيني ندير جو المفرخ نوقف نكلم بنت قدامها ولاندير روحي ندوي مع وحده في التليفون!!؟ كان هكي بلاش منها...ان شاء الله عمرها ماتحركت..
ابوبكر بضحكه:تي لا مش هكي..اسمعني قبل..هي مش قالت انك.نهار تبي تتزوج هي مش حتوقف في وجهك...
سفيان؛ايه!
ابوبكر:خلاص قوللها نبي نتزوج..
سفيان؛مستحيل...عارفها زي مانشبح فيك بتقولي برا زينه..
ابوبكر:هداكا قبل مش توا وفي فرق بين قبل وتوا..
سفيان وهو يفكر في كلامه قال:برضو لا...مش ضامن ردت الفعل...كان تقولي باهي احتمال تجيني الجلطه..
ابوبكر ضحك وقال؛صدقني النساوين في الوسع ياما يقولوا..
سفيان قعد ساكت وهو يفكر في كلامه..بعدين حرك راسه بالنفي وقال:لا...
🏵🏵🏵🏵🏵
"ياعليك مشورى سودا"
ابوبكر:علاش!!؟
سهيله؛هادم الوضع متاعهم حساس كان مشالها وقاللها انه يبي يتزوج هي حتفهم انه مل منها ومعاش متحملها..وهكي يوجعها خاطرها وعزة نفسها حتخليها تقول باهي..
ابوبكر:لالا ماظنيش..
سهيله:والله ان شاء الله يطلع كلامك صح ومايتودر الراجل اكثي ماهو متودر..
ابوبكر بشي من الربكه:اصلا هو قال لا...
سهيله:ان شاء الله يقعد بعقله...
🌺🌺🌺🌺
مقعمزة في الصاله..
تقرا في وردها من القرآن قبل لتنزل لحوش العيله.
وهو واقف من بعيد يشبحله وكلام ابوبكر يلعب في راسه..
شويه شافها سكرت المصحف للدار..
جاها بإندفاع وقال؛لينا..
وقفت وشبحتله..
سفيان تصنع الجديه والحزم وقال:نبيك في موضوع..
لينا صابها القلق قالت:ان شاء الله خير..
سفيان:تعالي قعمزي..
هي مشت قعمزت..
وهو مشي قعمز مقابلها..
لينا قعدت تشبحله وتراجي فيه يتكلم..
سفيان:احمم..الموضوع اللي نبي نكلمك فيه فكرت فيه كويس وبصراحه مالقيتش مفر من اني نفذه خلاص...العمر يجري..
هي بلعت ريقها بخوف..
سفيان خدي نفس وقال....
"نبي نتزوج"

"سبحان الله وبحمده"

يتبع …
الفصول الاربعة