شكولينا

الجزء الواحد والاربعون "" القسم الرابع ""

#شكولينا
#الجزء_41"القسم الرابع"
#الجمان_الفريد

عماد حياة المسلم..واكسيرها الصلاة..
واول شي يتحاسب عليه..لاخير في عمل يلهي عنها..
صلوا صلاتكم...بعدين ديروا اللي وراكم...
وقولوا لاإله إلا الله بقلب سليم طاهر تفلحوا❤
🌾صلوا على غيث القلوب وريها
     خير الخلائق رحمة الرحمن🌾
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
الساعه الثانيه بعد منتصف الليل..
المطر كانت واقفه..وصوت الميه اللي تصب من المزرايب ومن القراميد تنزل ع هيئة قطرات متتاليه هو الصوت الوحيد المسموع...
وهي كانت فايقه تسمع فيه وعيونها مغمضات..
فجأة سمعت صوت تليفونها هز..
فتحت عيونها وخداته من تحت المخده..
لقت رساله جتها عليه ..
فتحتها..
(لو فايقه اطلعي للكوجينه الخارجيه والبسي كويس)
هي ناضت قعمزت..
مررت نظرها ع الصغار لقتهم غارقين في النوم..
ناضت بهدوء ومشت للشماعه..
خدت منها البالطو والوشاح وهي تشوف لزبيده ووجيهه كيف راقدات...
لبست بالطوها..
ومشت بإتجاه المدخل..لبست وشاحها وساوته كويس..
بعدين خدت بوتها ومشت بيه جهة الكوجينه..
وصلت في باب الكوجينه لبست في رجليها..
بعدين فتحاته بهدوء وطلعت..
وصوت فتحت الباب سمعاته رنده وهي طالعه من دار رتيل..
مشت طول شافتها وهي طالعه وردت الباب..
استغربت هادي وين طالعه فهالوقت وفهالجو!
مشت بسرعة لبست بالطو وشال ع راسها..
ولبست بوت شتوي ومشت بتطلع بيه..بش تشوف لينا وين ماشيه..
🌺وصلت لينا في الكوجينه الخارجيه..
لقت الباب المردود..
خشت وسكرت الباب وهي تقول:سفيان..
هو كان مقعمز ع الكرسي حدا الطاوله الموجوده غادي ورافع راسه فوق ومغمض عيونه..ولان المكان كان مظلم ماشافتاش..
هو لما سمع صوتها نزل راسه وفتح فلاش التليفون..
هي شافاته ومشت خدت الكرسي قرباته منه وقعمزت مقابلاته بالزبط..
هو حط التليفون وفلاشه مفتوح ع الطاوله...
لينا؛شن جو..
سفيان ابتسم ع جنب وقال:ماتوقعتش انك قاعده فايقه قلت نجرب حظي وخلاص..
لينا:متوقع النوم يجيني..
سفيان:ليش في غيرك حد ساهر؟!
لينا حركت راسها باالنفي..
سفيان:وعلاش انتي بتقعدي ساهره؟!
ابتسمت وقالت؛عقلي قعد عندك...قلت في نفسي اكيد مش واكل شي..والجو صقع ونفسيته تاعبه والحاجات هدين يخلنك تمرض وانت مرضك شين..ع اكثر من مرة جيت بنرقالك بس قلت خليه ع راحته لو يبيك يناديك..
سفيان ابتسم بعدين شبك صوابعه في بعض وقال:ماارتحتش بكل..لأول مرة حسيت روحي نبي نفضفض لحد غير ابوبكر..في حاجات صعب تطلع للصديق لازم تقعد اسرار خاصه..بس بين الراجل ومرته غالبا مايكونش في خصوصيات..وهدا اني قدامك بمشاكلي ومشاكل عيلتي كل شي تعرفيه...
لينا بإبتسامه وهي مضيقه عيونها:خليك من هدى كله وقولي توا انا كيف ابوبكر عندك؟!
ضحك ضحكه خفيفه بعدين قال؛انتي عندي ماكيفك حد..
ابتسمت بخجل بعدين قالت؛باهي..خدت يده وشدتها بعدين قالت...احكي..قول كل شي في قلبك...
هو خفت ابتسامته غير عيونه عنها وقعد يشبح لروشن الكوجينه..
قعدت تشوفله وهي حاسه انه يحاول يتماسك...
شويه والعيون تعبوا دموع..بعدين تنهد..وخدي يدها..
وحطها ع وجهه ودرقه بيها مع ايديه وقعد يبكي..
وهي تشبحله بألم ودموعها بدوا ينزلوا..
هو ماقالش ولا كلمه كان يبكي وخلاص وهي خلاته ع راحته مابتش توقفه عارفه ان البكي راحه للي عايش حالة تشبه حالته..
وهو قعد يبكي قدامها زي الطفل الصغير اللي يبكي قدام امه لما توجعه حاجه وجي لأمه يبكي ويشكي..
بس هو اذكر انه رجل..ومهما كان لازم يتماسك قدامها ويقعد صلب..
هدى بكي شويه شويه..بعد ايديه وقعد شاد يدها..
ورجع شاف للروشن وهو يرشف ويمسح في دموعه بيده اليسار..بعدين قال بصوت مبحوح:آسف..
لينا وهي تمسح في دموعها؛ليش الأسف؟!
سفيان وعيونه مازالوا ع الروشن:مش عارف..نحس روحي مفروض مانبانش قدامك ضعيف..
لينا:وليش البنادم اللي يبكي ضعيف!؟ مافيش راجل فالدنيا هدي مابكاش يكذب عليك اللي يقول غير هكي..
سفيان؛دمعة الراجل عزيزة..واني والله مانزلتها الا من ضعف..
لينا:تعب مش ضعف والبنادم يتعب عادي..
سفيان شبحلها وقال:من قال حني يصير فيا هكي من قال!؟
حني عيلة الشريف بن عامر انتي جربي تطلعي وتسألي المنطقه حوش حوش علينا واسمعي شن يقولولك..طول عمرنا عايشين بين الناس براس مرفوع اللي يرافقنا ينعز...
عمرنا ماشافوا الغلط ولاسمعوه علينا...
واليوم...اللي مايسواش وصل في عرضنا...اللي مايسواش وسخ سمعتنا اللي مايسواش خلانا نخشوا مراكز وحبوس..
حني هكي يصير فينا حني؟! شن درنا!؟ في من وصلنا !؟ بش يصير فينا هكي...ماوصلنا في عرض حد..ماتعدينا ع حق حد..مادرنا شي يخلينا نستاهلوا اللي قاعد يصير فينا...
ونزلت منه دمعه مسحها وغير عيونه عنها وتنهد بألم وقال...استغفر الله..استغفر الله العظيم...
وبعدين قعد ساكت..
هي لما شافاته سكت مسحت ع يده وقالت:الرسول في يوم من الايام صارله زي اللي صاير توا معاكم...يعني ربي لما نزل عليه هالمصيبه كان يعاقب فيه!؟!..اكيد لا هو قاله لاتحسبوه شر لكم...منين روحت عائشه رضي الله عنها ومعاها واحد يسوق في الهودج متاعها وكانت ليله كامله مفقودة ومش
لاقيينها بعد عدت عنها القافله وخلتها..
الناس اللي شافوا هالمشهد في حكمهم عليه انقسموا لثلاته..
ناس ظنوا خير ومافسروش اللي شافوه تفسير غلط بكل لانهم يعرفوها هي من وبنت من وراجلها من...
وناس لعب بعقلهم الشيطان وفسروا اللي شافوه تفسير يطعن فيها ويحطها في موضع اتهام..
وناس...ماصدقوا طبعا..وهديم المنافقين واليهود..وعاد الفوا قصص وروايات فوق اللي شافوه..
ووسط هدا كله...كان الرسول..اللي كيفه كيفنا كيف كل البشر طاح في حيره ومعاش عرف يصدق الصوت الداخلي متاعه اللي يقوله ماديرهاش..ولاكلام الناس...
يعني هو حتى انه سأل الصحابه وقال شن تقولوا في اللي صار وكل حد عطي رأيه..وهدا اللي زاد طيحه في حيره وخلاه مش عارف شن يدير...
تعرف من اللي كان موفقه اصعب من الكل...هي..
هي اللي كانت بريئة براءة الذئب من دم يوسف من هالتهم لكن ماعرفت كيف تثبت هالشي وادافع عن روحها....بس كانت عارفه ان لو خذلوها كل البشر ربها وربهم حينصفها وهدى ليش هي وكلت الامر لله وقالت هو اللي حيبرأني..
انا نبيك بس تتخيل وضعها هي ووضع الرسول ووضع باتها وامها وهلها....الرسول بالذات فوق مكانته اللي هو فيها يتعرض لأمتحان صعب كيف هالإمتحان في وسط ناس واجد منهم يراجي زلته مراجاة.....
وين الخير في اللي صارله؟
بينله من اللي ليه واللي عليه....فرق بين الخبيث والطيب..
وعلم ناس واجده الكف عن الكلام في اعراض غيرهم حتى لو كانوا مش قاصدين شر...وربي قال...وتحسبونه هين وهو عند الله عظيم..
الشاهد من هدا كله ان اللي صار توا مش بشرط يكون عقاب..
ممكن يكون تأديب لناس....ويكون تقريب لناس اخرى...ويكون بداية مرحلة جديده لحياة جديده احسن من اللي عدت...ممكن يقرب منكم اللي فيه خير ليكم ويبعد اللي فيهم شر...
هي تتكلم وهو منصت بكل مافيه..
اسلوبها في الكلام..نبرة صوتها الهاديه المريحه..صوتها بحد ذاته كان حلو هلبه وهي تتكلم...والكلام اللي تقول فيه..
مش بس نساه همه...بل خلاه يزيد اعجاب بيها..يزيد حب ليها..يزيد ينبهر ويندهش فيها...
ويزيد يشمئز من نفسه لما يذكر نظرته ليها ولأهلها وحكمه عليهم بالدونيه بس لأنهم سمر واصولهم بدويه..وجايين من مكان في نظره اقل بهلبه من المكان اللي انولد وتربى وعاش فيه وينتميله..
سفيان ع قد ماقري وتعلم...ماقدرش شي من اللي قراه يغير شي من تفكيره وعقليته...بس لما خشت هي حياته غيرت فيها كل شي..بالتدريج لين خلاته شخص تاني هو نفسه مايعرفاش..
وفي الحقيقه لينا...حولت الغطا للي كان مغطي بيه سفيان الجانب الجميل فيه...
لينا كانت زي النحات اللي خدي صخره وقعد ينحت فيها ودار شكل جميل يبهر كل من يشوفه..
كانت زي الجنايني لما يقلع الاعشاب الضارة من حوالين الورد اللي مدرق وراها..وخلاته يبرز بجماله....
🍁يقولوا الراجل ع المراة..
بنسبة خمسين في الميه المثل هدا صحيح..
لان مش كل رجاله تقدر تغيرهم مراة..
ولاكل مراة تقدر تغير الراجل..
مش كل الرجاله زي سفيان...ولاكل النساوين زي لينا...🍁
سفيان:كل اللي قلتيه توا حلو..وهون عليا شويه اللي اني فيه..لكن...تنهد وكمل يقول...ماخلانيش نطلع منه حل للمشاكل اللي طحنا فيها..
لينا:تبي تقول انه مجرد كلام انشائي مايغير شي..ابتسمت وقالت..واجد هكي يقولوا....بس تغيب عنهم حاجه مهمه..
الانسان بش يتخطى الازمات اللي يطيح فيها..لازم نفسيا من داخل يكون مرتاح..والإيمان والثقه وحسن الظن بالله هالحاجات التلاته هادين يخلن نفسية الانسان في راحه تامه..ويشيلن عنه حمل ويهونن عليه وينهدى بيهن للحل شويه شويه...انا في كل شي تعرضتله في حياتي كنت ع قد مانقدر متمسكه بيهن..كنت مانسيبش في الذكر ولا الأستغفار ولا القرآن..لأن الحاجات هدين كانن يقون فيا واجد ويخلن فيا بفضل ربي نكمل ونتخطى كل مشكله طحت فيها وربي ديما يعطيني فوق ظني بيه اضعاف مضاعفه...بالمختصر..تبي تواجه مشاكل الحياة هدي ومصايبها وانت متأكد انك المنتصر في اخرها خليك قريب من ربي هدي اول واهم خطوة ياسفيان....
ضم شورابه لداخل وهو مبتسم..
لينا:القرب من ربي يخليك هادي وبعيد ع العصبيه اللي مودرتك..
ضحك ضحكه خفيفه..
لينا بإبتسامه:ويخليك تفكر بهدوء في حل مشاكلك لين يخليك تنهدى لحلهن وحده ورا التانيه يعني يخلي المصيبه تبدا كبيرة وبعدين تصغر تصغر تصغر لين تختفي..
ابتسم ابتسامه حلوة..
لينا؛بس تعرف شن اهم شي توا...
هو بإبتسامة حب:شني؟!
لينا؛رنده..
امتزجت بإبتسامته ملامح الحزن .
لينا:لازم تقعدوا مصبيين معاها لانها مادارت شي يوطي روسكم ولايعيبكم...وقفتكم مع اختكم هي اللي حتخلي الفام اللي تتكلم تخرس وتخلي الناس غصب عنهم يقتنعوا ان الحق معاها هي....صبوا معاها مهما صار فيها ماليها غيركم حد من بعد ربي..كسرتها جت من راجلها من الراجل اللي مفروض يصونها ويحميها حتى من نفسه..ماتكملوش عليها انتم بالله عليكم...
وهي تقول في كلامها الاخير خطروا عليها خوتها دموعها نزلوا طول...
هو قرب منها ومسح دموعها وقال:اكيد هادي اختي حنوقف معاها ع كل حال
هي شدت ايديه وقالت
انت بالذات مانتوقعش منك غير هكي..
ابتسم من قلبه وقال؛ والله العظيم...نحبك...
هي ضحكت من بين دموعها وقالت:والله العظيم عارفه..
وخلاته يضحك حتى هو في عز حزنه
وشويه..
وطلعوا هما الزوز من الكوجينه وتوجهوا لشقتهم وايديهم في بعض..
لين وصلوا لشقتهم...
هو كان يبي يرقد...
رقد ع السرير...وطلب منها تقعد جنبه وتقرا جنبه القرآن..
وهي قعمزت جنبه وخدت المصحف وبدت تقرا وبيدها التانيه تمسح ع شعره لين خداه النوم ورقد..
بعد مارقد..سكرت المصحف وحطاته في مكانه..
بعدين جاته غطاته كويس وطبست عليه طبعت قبله ع راسه..
ورفعت راسه وقعدت تشبحله كيف راقد..
ابتسمت بحب..بعدين طلعت من حداه بهدوء ونزلت من الشقه للدور الأول...
توضت ومشت للصاله وبدت تصلي القيام...ومابطلتش دعاء في كل سجده لين كملت صلاتها....
🍁🍁🍁🍁🍁
الساعه 7:00فجرا..
خش عليها الحجره لقاها تتكلم بالتليفون..
مشي قعمز وقعد يسمع في المكالمه..
منى:الحمد لله ماما كويسه خير من امس..............نراجي فيكم..........تمام حبيبتي......سلام...وسكرت وقعدت تشبح لتليفونها وخشن ع الفيس تشوف فيه المهم تتجاهل وجوده..
مروان:شويه ويجيبوا الفطور..
ماردتش عليه حتى بالنظر..
مروان؛لو خاطرك في شي تاني حبيبتي قوليلي وتو نجيبه..
ولا كلمه ولااي ردة فعل كأن مافي حد حداها..
عقد حواجبه بعصبيه وقال:شن قصتك قوليلي من امس لليوم وانتي قالبه وجهك وماتبيش تشبحيلي فاهم وضعك ومقدره لكن مش لهالدرجه تعاملي فيا تقول اني اللي تسببتلك فيه..
شبحتله بإمتعاض وقالت:مال منو..
رفع حواجبه وهو متفاجئ...
هي غيرت عيونها عنه ورجعت شافت للتليفون..
رخي حواجبه وابتسم بعدم فهم وقال:كيف يعني!؟مافهمتش..
رفعت عيونها للباب لما انفتح وخشت العامله بوجبة الفطور..
هو شبحلها وقعد ساكت ع النار يراجي امتى تطلع..
العامله؛صحة وعافيه..
منى:شكرا...
مشت العامله طلعت..
وهو شبح لمنى وقال:ايه قولي شن قصدك باللي قلتيه..
منى:اني مريضه وتاعبه وماعنديش جهد للنقاش لو سمحت اطلع من حداي..
قعد يشبحلها شويه بعدين هز راسه وقال؛تمام ..ناض وقال..بعدين ساهل..
ومشي طلع من حداها..
وهي قالت بغضب:ان شاء الله تمشي معاش تجي..
🌺🌺🌺🌺🌺
فهالوقت..
بسبب المطر باص رتيل تعذر عن الجيه بسبب البحيرات اللي خلفتها والموجوده في الشارع اللي يطلع منه..
فاضطر سفيان يرفعها..
وسفيان كان ناوي يرفع لينا تزور منى...
في الجنان..
رتيل مقعمزة ع الكرسي تراجي وهي تقول:وينه هدا بنعطل ع الامتحان..
لينا:سلامته ديما هكي يعطل في اللبس..
رتيل:ع خاطر اناقته...وطاح في مراة انيقه زيه..حلوة طالعه بطرحتك..
ضحكت لينا وقالت؛عيونك الحلوة ياحنه...
كانت لينا لابسه بالطو شتوي طويل لعند رجلها..ولابسه فوق حجابها طاقيه صوف لونها موف غامق..وشال من لون الطاقيه حوالين رقبتها...
شويه وشافوا للدروج لقوه نازل وهو لابس اللبسه اللي شرتهاله لينا بالطاقيه متاعه ولابس نظارات سود..
رتيل:ياوخيتي سلم خوي الطرف لو منك نحبسه في الحوش..
ابتسمت لينا وهي تشبحله..
بعدين قالت؛هي صبي اركبي..
ناضت رتيل وهي مبتسمه ومشت ركبت السيارة من الخلف..
اما هي مشتله وقفت قدامه وقال:ها شن جو توا..
سفيان؛تمام الحمد لله..وبدي يلفلها في الشال ع رقبتها كويس وهو يقول..قداش مهمله ومش دايرة حساب للمرض بكل..
وهي تتأمل فيه بعيونها اللي كانت نظراتهم كلها حب..
كمل بعدين شبحلها وقال..مرة تانيه بنهزبك ع الاهمال مش تحرجي..
هي ابتسمت وقعدت تلفله في الشال متاعه حوالين رقبته وهي تقول؛قولها لروحك يامغرور افندي..
هو قعد يتأمل فيها بإبتسامه وقال:واخده عني فكره غلط والله..اني راجل طيب وبسيط هلبه ومش حتلقي اطيب مني..اطيب حتى منك....
لينا:الله ع التواضع يحسدوك عليه..
سفيان؛جديات راهو متواضع هلبه بري انشدي عليا اللي يعرفوني.
لينا:اللي يعرفوك قالوا متكبر ومتعجرف وماعاجبه حد..
سفيان؛جهل منهم والله جهل...اني زي بيت الشعر اللي يقول...
ويظن بعض الجاهلين انتي
متكبر...متغطرس..كذاب
تبا لهم ولجهلهم ولحقدهم..
او مثل شخصي في الحياة يعاب!؟
لينا قعدت تضحك وهي تقول:لله در تواضعك ياشيخ..
هو ابتسم ع جنب وقال:بري اركبي..
التفتوا بيمشوا للسيارة ولينا تضحك..
جت عيونهم ع رتيل وهي متكيه ع روشن السيارة وهي مبتسمه ابتسامه عريضه..
اختفت ضحكة لينا وقالت؛ووك عليك مواقف..
ومشت بتركب وهو بعيونه مع لينا وع وجهه ملامح ابتسامه..بعدين مشي ركب السيارة...
شبح للحوش وهو يشغل في السيارة تلاشت ابتسامته وحل محلها ملامح الضيق...
لينا شافاته وقلبها وجعها مهما تحاول اطلعه من الهم اللي هو فيه ماتقدرش تخليه ينساه....
تنهد وقال؛بسم الله توكلت ع الله ولاحول ولاقوة الا بالله..
🌺🌺🌺🌺
في الطريق صبت المطر..
وكانت السواقه صعبه في وضع زي هدا مع طرق البلاد المنتهيه..
وصلوا رتيل لمدرستها بعدين كملوا طريقهم للمستشفى..
سفيان؛خاطر ع بالي نهرب بيك توا لمكان مايعرفنا فيه حد..
ضحكت وقالت؛انظر شن يدير لعقلك المطر منين يصب..
سفيان:مش اكثر من اللي دايرتيه انتي..
ابتسمت بخجل وقعدت ساكته..
وهو كذلك..
شويه ولقوا ارواحهم قدام  المستشفى..
خش بالسيارة لداخل بعدين نزلوا هو وياها وخشوا لداخل..
هو اول ماخشوا حول نظاراته..
وهي شبحتله بعدين شبحت حواليها كان اللي يفوت من زميلاتها يصبح عليها وعيونهم فيه هو..
حتى طبيبات قبل كانوا متكبرات حتى في السلام عليها توا صبحوا عليها وعيونهم فيه هو..
قعدت تشبحله لقاته يمشي ومش مركز ع شي..
وهي تفور وتغلي مش متحمله نظراتهم ليه وتهامسهم عليه..
لينا؛سفيان..
شبحلها وقال:امم.
لينا:نشد يدك عادي ؟!.
هو شبح القدام خدي يدها وشبك صوابعه في صوابعها وقعد يمشي وهي تمشي وع وجهها ابتسامة غرور طلعت منها تلقائيا..
وقعدوا ع هالحاله لين وصلوا للممر اللي فيه حجرة منى..
سفيان؛هادي..بري طقي ترا..
لينا:باهي..طلقت يده ومشت دقت ع باب الحجره..
سمعت صوت وحده تقول"تفضل"
فتحت لينا الباب لقت امها واختها عندها ..
ابتسمت متى لما شافتها..
ولينا ردت الابتسامه وقالت:السلام عليكم..
ردوا عليها بعدين هي شبحت لسفيان وقالت:اهلها عندها..
هو هز راسه وقال:تو نمشي نشوف مروان...ولف ومشي ولينا خشت للحجرة....
مشت سلمت ع هند وام منى..بعدين منى...
لينا:حالك اليوم احسن ان شاء الله..
منى:الحمد لله..
لينا:ربي يعوضكم خير..
منى؛تسلمي حبيبتي..شن داير شيرو..
لينا:خليته مع عويل عمه وحناه يفطر ويلعب..
منى شدت دموعها وهي ساكته..
لينا:تو تروحيله العشيه ان شاء الله..
منى هزت راسها وقعدت ساكته..
ام منى:شن اخبارك لينا؟
لينا:الحمد لله..شنوحالك انتي خالتي وحال عويلتك...
ام منى:الحمد لله رب العالمين في خيار الخير..
لينا:دوم ان شاء الله..
هند وامها:يدوم عزك وهناك...
شويه رن تليفون ام منى شافاته وقالت:هدا خوك مستعجل عنده خدمه حاولي تخلي مروان يروح بيك لحوشنا..
منى؛تونشوف..
ام طبست عليها باستها من خدها بعدين قالت:كان ماروحتيش عليك تو نقول لبوك يحطني عندك..
منى هزت راسها بإيجاب وهي ساكته..
ام منى:هي بالسلامه توا..بالسلامه لينا..
لينا:بالسلامه..
هند:هي ماما خل نوصلك..
ام منى:هي...ومشت طلعت وبنتها معاها.
بعد طلعوا قالت لينا لمنى.
لينا:قوليلي منى...شن صاير..
منى دموعها نزلوا وقعدت تمسح فيهم..
لين قعمزت مقابلتها ع السرير وقالت:شن سامعه شن ريتي؟
منى رشفت وقالت؛سمعت مايخليني نتأكد اني وصلت لنهاية الطريق مع مروان .
لينا بصدمه؛كيف!؟
منى:صبرت هلبه وتحملت هلبه وماحصدت كان كل شر..
لينا:منى استهدي بالله راك تنسي العيل اللي بيناتكم..
منى:مش ناسياته وع خاطره كنت حنتحمل كل شي الا اللي عرفته مانقدرش نتحمله بكل ولدي يقعد معاي معزز مكرم في حوش خواله غادي الكل يحبه ومش حيلقى الفرق في المعامله من حد فيهم..
لينا اضايقت من تلميحها..
منى:ماتزعليش مني لينا اساسا الغلط مش غلطك انتي وانتي بالعكس والله ماريت منك كان كل خير ويعلم ربي بمعزتك في قلبي انتي وصغارك..لكن اني خلاص معاش نقدر نتحمل وصلت حدي...
لينا تنهدت وهزت راسها بإيجاب وقالت؛انت اليوم روحي لحوش اهلك اقعدي فترة غادي وزيدي فكري بهدوء وخودي قرارك بعدها..
منى:مليت منه التفكير وعييت...وقراري خديته ومش حنرجع فيه..
لينا قعدت تشبحلها بضيق ومعاش عرفت شن تقوللها بس كانت تبي تعرف شن اللي عرفاته منى وخلاها وصلت لهالمرحله من الغضب..
🍁🍁🍁🍁🍁
طلعت من حجرة منى واتصلت براجلها قاللها تجي حدا حجرة خوه...
مشت لينا وين ماموجوده حجرة مروان..
قعمزت ع واحد من الكراسي وهي تستنى في راجلها..
وهي تتفرج ع اللي حواليها..
لفتت نظرها مراة طالعة تعبانه يدوب قادره تمشي وحاطه يدها ع صدرها..
وراجلها ماشي قدامها بمسافه هو شاد الوصفه متاعها ...
التفت شافلها وقال؛هييه خفي روحك..
وهي حاولت تسرع في مشيتها وكان واضح عليها التعب...وهو فايت قدامها ومخليها وراه..
وجعلها قلبها الموقف..مش اول مرة تشوف زيه..
وكل ماتشوف هالمواقف تتوجع وتنقم ع الرجاله..
"#شكولينا "
شبحتله..
سفيان؛هي نوضي..
تنهدت وناضت وقفت وهو خدي يدهاوقال: هي..
ومشي وهي مشت معاه و شاده ضحكتها..
سفيان؛شن جوها مرت مروان..
لينا؛شن قالك مروان..
سفيان تنهد وقال:نفسيتها تاعبه ومتاثرة باللي صار..
لينا؛ممكن مش عارفه الحق بس نفسيتها تاعبه واجد..
سفيان:ربي يعوضهم خير ان شاء الله..
لينا:ان شاء الله..
طلعوا من المستشفى...
وصلوا في السيارة ركبوا وهو قال:بنحطك وبنتسهل للخدمه...
لينا:راك تنسى اللي متفقين عليه...
ابتسم وقال؛ خوديه وعد مني مش حننسى شي وصتيني عليه من اليوم.
ابتسمت لينا..
شغل السيارة وتحرك بعدين قال:لينا..
لينا؛امم..
سفيان:تحبيني؟
دق قلبها بقوة وقالت:عليك سؤال..اجابته مافيش اوضح منها وواصلاتك قبل اكثر من مرة...
سفيان:يهمني نسمعها يهمني هلبه..
لينا تنهدت وسكتت..
سفيان:اني نقول فيها ديما مانبيش نحرمك منها ومن الشعور الحلو اللي تحسيه لما تسمعيها الكلمه هادي وقعها قوي هلبه لما تبدا طالعه من القلب..الكلمه هادي بالذات ماتنشدش يالينا..حتى الافصاح عنها
فيه اجر لأنها كلمة طيبه...
لينا قعدت ساكته وقلبها يدق بقوة..وكل نبضه فيه كانت تقوله نحبك..بس هي مش عارفه مستحيه تقولها ومافيش يدعي للحياء بين المراة وراجلها في حاجه زي هادي..
سفيان تنهد وقال:باهي مش حنضعط عليك..برغم اني عارف انك تحبيني وهلبه..
ضحكت وقالت؛عطيني شويه من الثقه اللي عنده ياربي..
ابتسم ولبس نظاراته الشمسيه وقال...
احبك في سروري واكتئابي
ندى عمري ع مر العصور...
هواك بخاطري في كل وقت..
فداك الروح ياعمر الزهور.
على بحر الحنين نظمت شعري
ولن تكفيك اوزان البحور..
لينا:اوالله خليتني نحب الشعر فصيح وبديت ندور ونحفظ حتى انا..
سفيان؛حلو..قريتي الروايه الجديده؟
لينا:لا لعند توا مازلت ماطلعت من جو هديك الروايه خل نطلع منه قبل بعدين نبدا فيها...
هز راسه بإيجاب وهو مبتسم..
وكملوا طريقهم وهما يهدرزوا وكانت هدرزتهم حلوة كالعاده..
مجرد ماحطها سفيان في الحوش ومشي حس بشوق شديد اتجاهها وتمنى ماتفارقاش ولايفارقها لحظه...
ومن غيرها حس روحه بروحه...
بس وين اذكر وصيتها ليه عن الإستغفار بدي يستغفر لين وصل لمكان الخدمه...
وطبعا غادي كان واصل خبر حبسه واللي هدا يجيه يسأل وهو برغم ضيقه كان يجاوب عليهم اجابات هاديه ومقنعه..
والهدوء متاعه استغرب فيه هلبه بس سرعان مازال هالاستغراب لما اذكر السبب...
🏵من لزم الإستغفار جعل الله له من كل هم فرجا ومن كل ضيق مخرجا..ورزقه الله من حيث لايحتسب🏵
🏵🏵🏵🏵🏵
الساعه 5:00عصرا...
ركبت للسيارة..
وهو بعد ركبت سكر باب السيارة..ومشي ركب..
بعدين شغلها وتحرك..
مروان؛بنخليك غادي اسبوعين تستريحي وتشدي صحتك بعدين نجي نروح بيك..
منى:مش مروحه..
هو قعد ساكت وهو يسوق..
شويه ووقف السيارةع تركينه وقال..
مروان؛انتي لشن تبي توصلي بالزبط؟
منى:للنهايه..نبي نطلق..
قعد يشبحلها وهو عاقد حواجبه بصدمه وهي تشبح القدام وع وجهها ملامح الامتعاض..
مسح ع لحيته ورشف بعدين قال:قولي في حد قايلك شي!؟ شن سامعه؟!
منى:سمعت اللي تعرفه كويس..
ابتسم بتهكم وشبح القدام وقال؛عارفها والله عارفها الا ماحيجي يوم وتقول واهي قالت....وانتي زي االغبيه تصدقي في كلامها ماتعرفيشي جو السلفات اني راجل ونعرفه اكثر منك...
منى شبحتله بدهشه وقالت:قصدك حتى لينا تعرف!؟
هو شبحلها بإستغراب وقال:مالا انتي على من كنتي تحكي..
منى ضحكت بصدمه وقالت؛هدا علاش هي قعدت تساعد فيا بش....سكتت وضحك تاني وقالت..حتى سلفتي تعرف واني زي الغبيه حق مانندري ع شي..ياقداش نكتوا وضحكوا عليا خواتك واني غافله..
مروان؛خواتي!
منى:ايه خواتك..اني سمعت من خواتك وبدون قصد ع فكره يعني اللي سمعتها طلعت فضايحك ماكانتش تعرف اني نسمع فيها..
مروان غير عيونه عنها وشبح القدام وقلبه مغموم ماقدرش يقول شي..
منى ابتسمت بتهكم وقالت:تذكر اول مرة شفتك فيها...
كنت جاي مع صاحبك لخطيبته صاحبتي في الكليه..
لما شفتك عجبتني هلبه...عجبني شكلك وشخصيتك واناقتك كنت مميز هلبه وابهرتني هلبه..
وقتها كنت مراهقه اللي يلفتني في الراجل قشوره وبس..
وكنت حاسه من نظراتك ليا اني عجببتك وتأكدت لما كلمتني صاحبتي عليك وقال خطيبها انك معجب بيا وتبي تتعرف عليا ونيتك صافيه..
واني ماقدرتش نقول لا..من الغبيه اللي تقول لواحد بمواصفاتك لا..ابتسمت بتهكم وقالت..
كنت مراهقه...
تعرفنا ع بعض..وشفت من كل شي حلو خلاني نزيد نتعلق بيك اكثر واكثر..وقعدت نتخيل كل يوم شكل حياتي معاك كيف حيكون بعد نتزوجوا..كنت متأكده اني حنعيش معاك في جنه اسعد بنادمه في الدنيا..
كنت نقول حنعيش احلى قصة حب احلى من اللي نقرا عنها في الروايات ونشوف فيها فالمسلسلات...ابتسمت بتهكم وقالت..
كنت مراهقه..
يااه ع السعاده اللي عشتها لما جبت اهلك وخطبتني..
فترة المخطوبه كنت ملهوفه نعيش معاك اكثر منك غير ماكنتش مبينه..
قعدت سنه كامله..واني نجهز في نفسي..ونشري ونجيب ونحط..ليا وليك ولحوشنا..
كنت نقول للكل اني حنعيش احلى حياة..
حياة ننحسد عليها..لأني عرفت نختار شريك حياتي...
ومرت السنه وتزوجنا...
ومن اول يوم من فقت من الحلم ع كابوس..
وقعدت نتلقى في الصدمات وحده ورا التانيه..
اتاري اللي كنت نتخيل فيه كانت مجرد احلام ورديه لبنت مراهقه مالهاش علاقه بالواقع...
الواقع كان اسود بكل معنى الكلمه...
ومع هدا تقبلته وتحملت...وقلت خلاص الفاس طاحت بالراس معاش فيها..
وبعدين حملت..وكل مالي نزيد ننصدم اكثر ونتحطم اكثر..
ونقول تحملي يامراة توا حملي خلاص ماعندك غير انك ترضي بنصيبك وتسكتي...وقعدت منى تتحمل من جهة انت ومن جهة ماليك وماشفتش الاحترام ولاالقدر لامنك ولامنهم...
مروان قاطعها وقال:حرام عليك يامنى مش لهالدرجة!!؟
منى بشي من الانفعال:اني وصلت لهالدرجه لدرجة اني معاش نذكرلك فولا حاجه باهيه درتها معاي..
لأنك بكل بساطه قابلتي تضحياتي بالغدر والخيانه وواحد زيك ماينعاشش معاه..طلقني مروان بالحسنى ارجوك ومافيش داعي نخشوا محاكم..
مروان؛وعلاش نطلقك واني مازال نحبك ونبيك وشاريك..
حرك راسه بالرفض وقال:مستحيل الطلاق مش مطلقك ع جثتي يامنى..
منى:واني معاش نبيك كارهاتك عايفاتك..معاش يشرفني نعيش معاك..
مروان حاول يضبط اعصابه ع قد مايقدر..
وهي كانت تبي تستفزه بش اطلعها منه:والله لو كنت مكانك واني راجل مانرضها ع نفسي..خليك راجل وطلقني..
شبحلها بغضب..
وهي قعدت تشبحله بتحدي برغم انها من داخل كانت خايفه..
هز راسه وشبح القدام وقال؛نولي مش راجل لوطلقتك يامنى..
شغل السيارة وقال:اقعدي في حوش ماليك شهر كان تبي وبعده بنجي بنروح بيك غصب عنك..
هي هزت راسها وقالت:تو نشوفوا..
هدا كله وولدهم راقد في الكرسي الخلفي ومايندري ع شي..
حطها في حوش ماليها وخش قعمز هدرز ع بوها شويه بعدين طلع وهو مخلي عقله وقلبه عندهم...
🍁🍁🍁🍁
فهالوقت..
في حوش الشريف..
نوريه جت بعد اتصلت بيها امها وخبرتها باللي صار..
جت بروحها وماجابتش صغارها بش مايشهدوا ع شي..
واول ماجت خشت لرنده تشوفها لأنها كانت مريضه..
محصله برده..
نوريه؛هاك خودي اشربي زنجبيل بالعسل والليم ضربه ضربه..
رنده بتعب:مانقدراش..
نوريه؛اشربي عاد يارنده من غير دلع زايد اشربي..
رنده؛مانقدرش قتلك..
نوريه؛يارنده ربي يهديك امي قالت مابيتي تاخدي شي شن تبي تموتي..
رنده؛ياريت..
نوريه بألم؛معاش تقولي هكي بالله عليك ماتوجعيش قلبي عليك..كلب وراح لجعله ولا وبنتك حتوليلك بالقانون حتولي بعون الله..
نزلوا دموع رندة وهي تقول:نوريه...اني حامل..
فتحت نوريه عيونها ع وسعهم من الصدمه...
ورنده بدت تبكي....

يتبع …
الفصول الاربعة