شكولينا

الجزء التاسع والاربعين

#شكولينا
#الجزء_التاسع_والاربعون
#الجمان_الفريد
كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫🍫
مقعمزة ع سريرها وحاطه ع رجليها اللاب توب حاطه ع تطبيق اليوتيوب..وتحديدا مقاطع تخص قرايتها
وتسمع وتحاول تركز وماتفكر في شي تاني..
حداها اختها تسمع قالتلها..
رتيل:تفهمي فيهم من غير ترجمه؟
رنده وهي مركزة في اللاب توب؛طبعا..
رتيل:حتى اني خاطري نتعلم لغه..
رنده:تو نحاول نفضي نفسي ونقريك..
رتيل بضحكه:غير نفضى اني الأول.
رنده:مالا اقري ومعاش تلهيني..
ضحكت رتيل وقالت:باهي..
فجأة رن تليفون رنده...كان قدامها..
شافت الشاشه لقاته رقم غريب مابتش ترد...
وقعد يرن لين فصل...
ورتيل تشوفلها...
عاود اتصل مرة تانيه...
رنده قعدت تشبحله..ورتيل تشبحلها..
ومابتش ترد لين فصل..
رتيل:خيرك ماترديش؟
رنده ماردتش عليها...ورجعت لهت باللاب توب لما وقف اتصال...
اقل من 5ثواني..رجع اتصل مرة تانيه..
خداته وناضت مشت طلعت من الدار وسكرت وراها الباب..
وقعدت تمرر في نظرها على أرجاء الحوش..كان هادي ومظلم ..الساعه كانت 11....
خشت للكوجينه وسكرت عليها...
بعدين فتحت الخط وحطت التليفون ع وذنها..
ماسمعت شي...رجعت شافت للشاشه ايه فاتحه الخط وعداد الوقت متاع المكالمه يمشي..رجعت حطاته ع وذنها من غير ماتتكلم...وماسمعت شي..
سكرت طول وجت بتطلع رن مرة تانيه..
فتحت الخط وحطاته ع وذنها..
لكن هالمرة سمعت...
"بابا نبي نني"
"حاضر يابابا حاضر...شن تبي نحكوا اليوم"
" ميمي ميمي.."
"اها قصة ميمي الحلوة المسكينه اللي امها الشريرة خلتها بروحها"
"ايه ايه"
"تمام...كان ياما كان...كان في بنت صغيره حلوة زيك توا كانت عايشه مع بوها وامها..بوها كان يحبها هلبه طيب وحلو...لكن امها شريرة شكلها زي الأفعى..شن تقول الأفعى ميرو"
"تسسس"
هو ضحك وقال"ايه تسسسس...وهكي امها كانت زيها تكرهها وماتحبهاش هي وبوها الحلو الطيب"
كاد نفسها ينقطع من كثر ماانطبق صدرها...سكرت عليها  ودموعها ينزلوا زي السيل وهي مصدومه....
كان يحرض في طفله قاعده ماسكرتش تلاته سنوات ع امها
وفي المقابل خلاها تتعلق بيه هو..
وكأنه يقوللها حتى لو كسبتي حضانة البنت مش حتستفيدي شي لأنك خسرتي البنت نفسها..
الاطفال في العمر هدا يتعلقوا بقوة وصعب ينسوا الشخص اللي يتعلقوا بيه وياخدوا وقت على ماينسوه..
احيانا تصدر منهم تصرفات عدائيه خطيره تجاه اقرانهم  لما يلقوا عندهم الشخص الشبيه باللي هما فقدوه وكانوا متعلقين.
وتصرفاته العدائيه هادي ماتكونش محصورة بأقرانه بل اتجاه كل شي..
يعني رنده لو كسبت حضانة البنت وخدتها حتتعب معاها هلبه هلبه...
ولت رنده شبه مدركة لصعوبة الأمر..ومع هدا مش حتسلم في بنتها هادي بنتها..كيف بتسلم فيها..كيف تنسى ضناها اللي كبرت داخلها وكانت تحبها حب لامثيل له من قبل ماتشوفها ومن بعد ماشافتها....! هادي الأم...
🍁مشت قعمزت ع الطاوله بهدة..
حطت تليفونها على الطاوله...
وغطت بيدها نص جبهتها وهي متكيه بمرفقها ع الطاوله وهي تبكي بصدمه...وكل مافيها يرجف...عذاب نفسي مابعده عذاب اللي عايشاته رنده...
في لحظات زي هادي الانسان اللي فيه شويه خير...يسأل نفسه..اني شن درت بش يصير فيا هدا كله..
يبدا يراجع نفسه.....وعقله يجيبله الاجابه على طول...
جي بين عيونها الموقف اللي صار بينها وبين زهور واساور..
فهداكا اليوم..زهور خسرت الجنين اللي كانت تستنى فيه بالريق اليابس ع قولتنا...
وخسرت من بعده راجلها وخرب حوشها..
صح كله مقدر ومكتوب..وكان هالشي حيصير حتما..
بس...السبب هو اللي اختلف..فعل رنده كان كله شر والنتيجه اللي ترتبت عليه كلها ضرر...
ظلم..وطغيان...هي ماحستش انها غالطه بعد اللي داراته..
بل استمرت فيه مع زوجة خوها التانيه...
وهددت زوجة خوها التاني بالزواج بغيرها...
الافعال الظالمه كان ولابد ينحطلها حد وحد قاسي جدا بش يكون رادع...
وهني رنده قدرت تفهم وتستوعب ان هي السبب الاول وممكن الوحيد في اللي صار معاها..
تجازت ع افعالها والجزاء من جنس العمل..واقسى منه بس يذوق الظالم من نفس الكاس اللي ذاق منه بل وأمر...
حطت يدها ع عيونها وبدت تبكي..تبكي بقهر وأسف وندم ع اللي مضى..ع اللي داراته في روحها بيدها..
🍁وياريت كل ظالم يفهم ويتعظ...زي رنده...🍁
فجأة...رن تليفونها بنغمة رسائل ماسنجر..
حولت يدها وشبحتله..وقعدت تمسح في دموعها وهي تشوف للشاشه...
حولت يدها وقعدت تمسح في دموعها بعدين خداته وفتحتهم بيدها اللي كانت ترجف...
كانوا صور...وكلهم لميرال...
لما شافتهم نست اللي هي فيه..وقعدت بلهفه تتفرج عليهم..
وع وجهها ابتسامه حب...ودموعها ينهمروا انهمار...
وتوقد شعور الشوق في قلبها لبنتها...قربت ليها الصورة وقعدت تبوس فيها بلهفه...وهي تقول:ياعمري ياماما كبرتي واحلويتي ياماما
رشفت وقالت...اصلا انتي من قبل حلوة ياعمري من لما جبتك..
قعدت ترشف وهي تمسح في دموعها وتتأمل في الصور...
فجأة...رن تليفونها...
كان نفس الرقم..
تلاشت ابتسامتها وحلت محلها ملامح الحده الممزوجه بالحقد وفتحت الخط وردت..
رنده:شن تبي ياحقير...شن تبي..
"هدي ياحلوة هدي..خلينا ناخدوا ونعطوا زي الناس الكبار والعاقلين وبلاش منه اسلوب الشلافطيه هدا'
رنده:من وين جبت رقمي وايميلي ياتافه..
"اللي يسأل مايتوهش ياقلبي بس مع هدا حنقولك...من وحده تعرفيها وتعرفك كويس..صاحبتك..."
عقدت حواجبها وهي تفكر...
من صاحبتها!!؟وتعرفها كويس!!؟
"خلينا منها توا...المهم...شفتي اليوم كيف فتت الجلسه ومامشيتش..لسبب واحد..بش نعطيك فرصه"
رنده:انت اللي تعطيني فرصة ياحقير!
"ايه اني اللي نعطيك فرصه..كان بقدري مشيت اليوم وطلعت اللي عندك وضيعتك لكن مارضيتهاش عليك حبيبتي مازال نبي نكمل معاك عمري "
رنده: الموت اشرفلي يانجس ياكلب..نموت ولانولي لواحد وسخ زيك...وبنتي حناخدها غصب عنك ياواطي..
وسكرت عليه وحطت الرقم في الحظر..
وهي تاخد في انفاسها بسرعه من العصبيه...حطت التليفون ع الطاوله..وناضت خدت طاسة عبتها ميه..وبدت تشرب فيها..
بعد شربت منها..خدت نفس وحاولت تهدي نفسها...بعدين خدت تليفونها من ع الطاوله ومشت طلعت من الكوجينه...
🌺🌺🌺🌺🌺
في دار التقعميز..
كانت لينا مقعمزة وحداها صغارها وعزوزتها راقدين..
لاهيه بتليفونها..
خاشة ع المحادثات بينها وبين سفيان...
كان نشط...ومع هدا ماكلمهاش بكل..
وهي لتوا قاعده محتارة ومش فاهمه شن اللي بدل حالها معاها هكي من اسبوع فات...
كل مرة تحاول ديرله مبرر...بس مافيش مبرر واحد اقنعها وهب تحاول تقنع في روحها بيهم بالسيف..
بعدين قالت لنفسها قبل هو ديما اللي يبدا عليا..
شن يصير لو اني اللي بديت عليه هالمرة...
قررت تبدا عليه...
(مرحبا)...
وقعدت تستنى يشوفها...شافها ورد..
(اهلا)
زادت اضايقت..وبعتت
(شن جو)
هو رد..
(تمام)
مابعتتش وهو مابعت شي..
حاسه روحها بتبكي..بعتتله لأخر مرة..
(تعشيت)
هو شافها بس ماردش..
نزلوا دموعها طول...
شويه وبعت..
(ايه)
مسحت دموعها وبدت تكتب بعدين بعتت
(شكلك مشغول مانبيش نزعجك اكثر..تصبح على خير)
وهو شافها الرساله..وبعتلها علامه اللايك..
حطت راسها ع المخده ودموعها ينزلوا وحطت التليفون تحت المخده...
🍁عنده هو..
اللي كان مقعمز وحاط اللاب توب ع رجليه وهو يقول بضيق...
سفيان:ماتبيش تزعجني..ابتسم بتهكم..بعدين سكر اللاب توب وحطه ع الكامدينو اللي جنبه واتكى ع السرير وهو يفكر فيها...
🍁🍁وهديكا الليله هما الزوز رقدوا بصعوبه من بعدهم عن بعض...بعد...وزعل...وجفاء...
🍁🍁🍁🍁
تاني يوم..
الساعه 11:00صباحا..
"بنتي نوريه"
نوريه وهي ضم في دار الخزين:نعم عمتي..
رمضانه:وين مها ماتجيش تعاونك..
نوريه:مها تغسل في الستاير بعد قضتهم ياعمتي..
رمضانه:باهي ربي يعاونك...بنقولك بنتي الغدي اليوم ديريه رشيدة مبكبكه بالقديد..
نوريه:وانتي تقدريها ياعمتي..
رمضانه؛حسين قال خاطره فيه...
نورية هزت راسها وقالت:حاضر اللاي..
رمضانه؛يحضرلك وجه محمد يابنتي..
ومشت رمضانه..
ونوريه كملت شغلها...شويه خشت عليها مها وقالت:عمتي كانت هني.
نوريه؛ايه..
مها:ترا شن قالتلك؟
نوريه بإستغراب:قالت تبي الغدي رشدة ..
مها:وانتي بديريها عادي..
نوريه:كيف بنديرها عادي مافهمتش؟
مها:هديكا الجرادة قالتلها خاطرها فيها ولولا الوحم راهو دارتها بروحها .
نوريه سكتت وهي تفكر بعدين رفعت حاجبها وقالت:نديريها..علاش مانديرهاش تو نديرها..وكملت شغلها وهي معصبيه..
ومها تشبحلها وهي تحاول تخمن نوريه على شن ناويه...
وكملت نوريه شغلها وخشت ع الغدي وحطاته ع النار..
واكرام مقعمزة هي وعزوزتها في الصالة وع هدرزة وضحك وهما يتفرجوا  ع التلفزيون...
وتمر الساعات..
ويروحوا حسين وخوه من اعمالهم ويحطولهم الغدي..
بعدين  حطوا غداهم النساوين وقعمزوا ياكلوا..
ورمضانه بروحها دارتلها نوريه برودو ورز..
اكرام وهي مفنصه عيونها:اممم...هدا شنو..انحرقت..
مها شبحت لنوريه اللي كانت تشوف لإكرام ببرود..
رمضانه:خيرك خيرك..
اكرام ناضت وقفت وهي قريب اطير:عندي حساسيه من الحار ياعمتي مانتحملاش..ووك عليا..وحطت يدها ع رقبتها حست روحها بتموت..
مها بخوف:هادي خيرها!؟
رمضانه وهي تنادي بفجعه:حسين تعالى لمرتك ياحسين...
نوريه قعدت تشبح لإكرام بصدمه ماتوقعتش يصير هكي بكل..
واكرام تفرفش وكأن والعين تحتها نار..
ع خشة حسين يجري:اكرام...كليتي منها...حاره الزفت علاش تاكلي منها..
اكرام:زودلي ياحسين بنموت...
حسين شبح لنوريه بحده...بعدين قال..بالله مرت خوي خليك حداها لين.نجي..
مها بتوتر:حاضر..
ومشي حسين طلع من حداهم بسرعه..
ومها مشت لإكرام اللي كانت تتوجع وتبكي..
رمضانه بإستياء؛ليه عليك يانوريه يابنتي ليه..
نوريه ماقدرتش تتحمل ناضت ومشت بسرعه لدارها..
خشتها وسكرت عليها وهي خايفه ودموعها ينزلوا...
🍁وحسين خدي اكرام رفعها للمستشفى...
دارولها غادي اللازم..
وشافت وضع حملها كانت الأمور كلها تمام..
بعد طلعوا من المستشفى دار بيها حسين دورة غير جوها..
بعدين روح بيها للحوش .
حطها في الحوش ومشي لنوريه يجري..
🍁انفتح عليها باب الدار بقوة...
هي كانت مقعمزة ع السرير اخفت فزعتها منه وخوفها وقعدت تتظاهر بالقوة والبرود..
حسين بعصبيه:شن اللي درتيه هدا!؟ كنتي تبي ترتكبي جريمه!
نوريه؛جريمة شني! شن يعرفني ان عندها حساسيه من الحار!؟
حسين: اطلعي منه الجو هدا انب نعرفك كويس..تو لو ماكنتيش تعرفي ان عندها حساسية من الحار علاش درتي الغدي حار وانتي تعرفي ان ماكلتنا اساسا مش حاره..
نوريه؛قسما بالله العظيم ماكنت نعرف.ان عندها حساسيه..ايه صح درتها بالقصد لكن والله ماكنت نعرف ان عندها حساسيه..
حسين؛وعلاش ديرها بالقصد..علاش تحطي راسك براسها..تو مش انتي اللي تبي هكي..مش انتي اللي قعدت وراي لين خلتيني نتزوج...شن خطر عليك توا شن تغير!؟
نوريه قعدت تشبحله وهي ساكته.
اشرلها بسبابته وقال:اسمعي خليك في حالك وخلي المراة في حالها ماتخلنيش نتعامل معاك بأسلوب تاني يانوريه واني حذرتك...
ومشي طلع من حداها وسكر وراه الباب بقوة...
وبعد طلع خلت دموعها ينزلوا وهي مصدومه فيه وقلبها موجوع ع الأخر...
🍁🍁🍁🍁
حطت قدامه سفرة الغدي...
وهو بدي يتغدا...قعدت واقفه تشبحله..كانت تبي تقعمز معاه بس تراجعت وجت بتمشي..لين هو وقفها..
سفيان؛شوفي المراة هديكا اللي كانت توصل فيك لو يناسبها تعرفك وتجيبك للمحل كان هدا اني تو نشوفلك غيرها..
قعدت تشبحله وهي ساكته بعدين قالت:باهي..
ومشت طلعت من حداه..
قعد معاها بعيونه لين ادرقت عنه..شبح لسفرة الغدي وهو معصب ع الآخر منها...دف السفرة وناض ومشي طلع...
في الكوجينه..
لينا كانت اضم مع منى وهي مضايقه وشاده دمعتها بقوة..
ومنى ملاحظه وضعها هي وسفيان بس مابتش تطفل عليها وتسألها ...
ع خشة رتيل بالسفره:خيره سفيان ماتغداش..
شبحوا لينا ومنى للسفره..بعدين شبحت منى للينا..
لينا بلعت ريقها وقالت:مش عارفه..
رتيل حطت السفرة وقالت:كنت خاطمه من قدام الصاله شفتها وسمعت باب الحوش البراني حسبت بابا ورنده روحوا..لكن شكله هو طلع..
هزت لينا راسها ومشت تلم في الغدي..
رتيل:بتمشي اليوم للمحل..
لينا:اليوم لا..بكرا ان شاء الله..
رتيل:خسارة..بنقعد مكسده..ولفت ومشت طلعت..
ولينا كملت حوستها ومنى مرة مرة تشبحلها..
🍁🍁🍁🍁
"قال صاحبتك وتعرفيها وتعرفك كويس"
اساور بإبتسامه متهكمه:وانتي طول قلتي هادي اساور!
رنده بجديه:اساور قولي الحق انتي اللي عطيتي محمد رقمي وايميلي ع الفيس..
اساور:وعلاش اني اللي بنعطيه! شن اللي يربط بيني وبينه هو كان راجل بنت خالي حتى وهو راجلك شكله مانحفظاش كويس مش نكلمه ونعطيه رقمك وايميلك!.
رنده:عادي ديريها بش تنتقمي مني بعد فضلت حور عليك بش تكون مرت خوي..
اساور وهي مبتسمه بثقه:ايه صح اني انتقمت منك لكن مش هكي..انتقمت منك لما عرفت ان محمد كان يخون من قبل ماتعرفي وسمعته بوذني وهو يكلم فيها..
رنده:امتى!؟
اساور:لما مشينا لغنيمه..وعرفت حتى من هي اللي قاللها اهلها عزموني واني غصب عني جيت ع خاطرهم..واني مش نبيها واعطيني وقت وكلام زي هدا...واليوم اللي بعده شفت نظرات وحركات بينه وبينها...حور...
رنده قعدت تشبحلها بعدم استيعاب....
اساور:ايه حور يارنده..صاحبتك..
رنده بصدمه؛محمد خاني مع بنت خاله واخته هي اللي قربت بيناتهم شفتلهم صور ومحادثات..بنت خاله مش حور وعيلته كلها تعرف..
اساور:قصدك ماسمعتيش قبل بنساوين رجالتهم خانوهم مع اتنين وتلاته وحتى عشرة..مع صاحبتها..مع قريبته..مع بنت جيرانهم..مع زميلته في العمل تلقيه ع علاقه بيهم كلهم في وقت واحد..
رنده بصدمه؛حور! مستحيل نصدق..علاش دير هكي شن في بيني وبينها!؟..
اساور؛يعني ماتعرفيش يارنده ان حور وحده محسديه حتى لو كانت من تحت لتحت..ماتفوتكش الحاجات هادي تحب الحاجه الباهيه ليها هي بس..اكثر وحده كان حاسداتك في قصتك مع محمد...حور..
ورنده تسمع وهي مش قادرة تصدق..
اذكرت لما طلبت من حد يهكرلها حساب محمد بش تشوف محادثاته...هالحد كان حور...
رنده:حور..حور هي اللي هكرتلي حسابه وشفت محادثاته شفت كل شي ماعنده شي مع حور!
اساور ضحكت وقالت:بسيطه حبيبتي حذفت كل شي...
رنده غمضت عيونها بشده وغطت وجهها بإيديها وهي تقول:ياربي...!
واساور تشبحلها بضيق..
نزلت رنده ايديها وقالت:الحقيرة...وشبحت لأساور وقالت..وانتي مش خير منها..
اساور:ولاإنتي خير منا يارنده ماتنسيش اللي كنتي ديري فيه..
تعبوا عيون رنده بالدموع وفاضوا وهي تشوف لأساور ..
اساور:هدا الحق مش شماته يارنده...واللي يدير يلقى خير ولاشر...
نزلت عيونها والدموع ينهمروا منهم..
واساور تشوفلها بأسف....
🍁فكروا الف مرة في الكلمه قبل تقولولها والفعل قبل تفعلوه...الدنيا في حساب وعقاب..واللي تسلفه اليوم.
تلقاه غدوة ..دنيا وآخرة🍁
🍁🍁🍁🍁🍁
"نستنى فيها تسأل تقول خيرك شن غيرك شن بدل حالك معاي...شي شي"
ابوبكر؛وعلاش انت ماتسألهاش علاش ماتقوللهاش ع اللي سمعته وتفهم منها؟!
سفيان؛الكلام واضح مايبيش تفسير..تخيل روحك دير كل شي ع خاطر شخص تبي تكسب رضاه وقلبه وهالشخص يحسسك انك فعلا وصلت للي تبيه..ويقعد معيشك في حلم وردي تفيق منه ع صدمه...صدمة انه طلع اللي يدير فيه معاك كله مسايرة بش يمشي حياته يساير فيك لأن مافيش قدامه غير هالحل بش يوصل للي هو يبيه..يعني هي قعدت تساير فيا الوقت هدا كله بش تعيش حياة مستقره مع صغارها!!؟ مجبورة لان ماعندها حد يوقف معاها ويسندها...
تخيلت ياابوبكر!
ابوبكر بضيق:هو صعب هلبه عندك حق..لكن..لكن مااقتنعتش الحق...مافيش مراة تساير الراجل لدرجة تخليه يحس باللي حسيته انت معاها....ياراجل انت تغيرت 180درجه حتى على وجهك باين الهني حتى وانت في عز الهم...المراة تحبك بجديات..
سفيان بضيق:تتعامل معاي زي ماتتعامل مع الناس كلها..هي هكي اصلا...سكت بعدين قال...شن تبيني نحكيلك توا..
ابوبكر بضحكه:الغيره اللي عندك مالهاش حل..
سفيان؛نحكي جد..
ابوبكر بإبتسامه:تمام...انت لازم تفسر سكوتها وكلامها بطريقه تانيه غير انها ماتحبكش هادي..
سفيان:كيف تبيني نفسرها ياأبوبكر..الكلام اللي قالاته قالاته لخوها..اللي مفروض مايسمعش عني منها الا كل خير..الله اعلم توا شن شكل نظرته ليا...
ابوبكر؛انت شن حسيت خوها بعد طلع من عندها موطي عليك العين ولاعادي..
سفيان ؛والله وقتها ماكنت مركز ع حاجه ولاشايف حاجه..
ابوبكر:تمام..مع هدا نصيحتي ليك انت تفتح معاها الموضوع وتسألها..
سفيان ماأقتنعش بكلام صاحبه وهز راسه مسايرة..
وابوبكر كان عارف انه مااقتنعش لكن ماباش يناقشه اكثر من هكي..عارفه كان سكر راسه ع حاجه معاش يقتنع بغيرها...
وهالشي اكيد مش في صالحه...
🍁🍁🍁🍁
وروح للحوش في الليل وطول ركب للشقة ومانزلش بكل..
وهي لما ركبت فوق مع صغارها شبحت جهة دار النوم لقتها مظلمه..
قلبها وجعها...وفضلت فهالليله تخليه بروحه في الدار....
وهي بهكي زادت ازمت الموضوع وخلاته يزيد يتأكد تفسيره للي سمعه وكأنها ماصدقت حصلت فرصه تبعد فيها عنه..
فهداكا اليوم ماباش يكلمها ولايشبحلها حتى الشبح..
وطلع من الصبح...وفالعشيه للمحل رفعتها منى بسيارة عمهم الشريف...
🌺في محل #شكولينا
في الغرفه الداخليه..
لينا بدموع:مانيش عارفه يامنى خيره...انا في الأول قلت في عقلي ضغط الظروف ضغط الوضع اللي انحط فيه حاليا يبي يعوض الخسارة بأي شكل..وانا نعرف ان الراجل لما يكون مضغوط يولي عصبي بزايد ويحب الانعزال ومايحبش المراة تنق عليه ومادابيها تكون بعيده عنه وماتكلماش الا لو هو جاها وكلمها..هدى اللي ربتني عليه امي الله يرحمها وشفتها ادير فيه مع باتي...بس..انا نحس ان سفيان تغير واجد واجد...
منى تنهدت وقالت:باهي ماراجعتيش نفسك..بالك مدايرة حاجه وجعاته منك..بالك قلتي كلمه هو فهمها غلط..
لينا؛راجعت نفسي الف مرة يامنى والله...والله مادرت حاجه ولاقلت حاجه توجعه...
منى؛باهي بالك في حد موصله كلام..
لينا:زي مني..وشن بيوصله!؟
منى؛مش عارفه اني قاعده نتوقع..
لينا حركت راسها بالنفي وقالت؛لالا ماأعتقدش..
منى؛باهي..انتي اليوم تكلمي معاه وأسأليه هدا احسن حل..
لينا مسحت دموعها وقالت:هدا اللي بيصير..
🍁🍁🍁🍁🍁
في الكوجينه..
ادير لصغارها في غداهم بعد روحوا من المدرسه يقروا في الفترة المسائية...
شويه وخشت عليها ضرتها وهي تتكلم بالتليفون..
اكرام:شويه بس...
مشت فتحت الدولاب وطلعت منه باكو عصير عنب طبيعي وهي تقول؛اهو بنصب منه توا..وفتحت المايك وحطت التليفون ع الدولاب..
اكرام؛اهو ماشيه بناخد طاسه..
"كلميني فيديو نبي نشوفك"..
ضحكت وقالت؛شن بنكذب عليك حسونه والله توا بنشرب منه..
ومشت بالطاسه للعصير...
"قتلك كلميني فيديو..استاحشتك ياستي"
ضحكت وسكر المايك ورجعت الهاتف لوذنها وقالت:تستاحشك مكه حسونه..وصبت من العصير..وخدت الطاسه مشت بتطلع..
اكرام بضحكه:عليك حسونه وخلاص...وطلعت من حداها..
وهدا كله ونوريه دايره روحها مشغوله بغدي صغارها...
ومن داخل مايعلم بيها كان ربي...من حرقة قلبها..
تلخبطت اكتر من مرة وهي تحط في الطواشي والكواشيك ونست الغدي في المكرويف..ولما اذكراته وجت بطلعه ومن ذهاب الشيرة مالبستش القفاز وشدتها بيدها طول انحرقوا صوابعها..
نوريه بألم؛آااه..ومشت تجري للاونيدينو فتحت الشيشمه وحطت صوابعها تحتها...ودموعها بدوا ينزلوا..بعدين قعدت تبكي...تبكي بألم...وتمنت لو كان.تقدر اطفي حريق قلبه بصب المية عليه...
مهما حاولت تظاهر بالقوة وتتجاهل ماقدرتش..صعبه..صعبه هلبه...راجلها...وتحبه...هو مرات مايبداش في حب وتحرق..يابال لو كانت تحبه..
هني نوريه حست بندم شديد من اللي داراته كيف سلمت في راجلها وحب حياتها بالساهل وقدماته ع طبق من ذهب لمراة تانيه..
غرها حبه ليها..وانغرت بقوتها...واللي صار كسر غرورها وخلاها تعرف انها مهما كانت قويه في حاجات حتتعرضلها في حياتها تخليها أضعف من اضعف مخلوق ع وجه الأرض...
"ماما"
نوريه سكرت الشيشمه ومسحت دموعها  وقالت:هيا ماما غداكم واتي..
وخدت القفار لبساته فيدها اللي صوابعها محروقات من الارتباك..وطلعت بيها الصونيه وهي تتألم وحطتها في السفرة وخدتها وقالت:هيا نونو ماما...
ونور طلعت وراها وهي زعلانه لزعل أمها..
🍁🍁🍁🍁🍁
الساعه 10:45ليلا..
حطت صغارها في أسرتهم ومشت لدار النوم..
لقاته يتكلم بالتليفون..
سفيان؛تمام ياحاج غدوة بإذن الله نكون عندك. ونزيدوا نتفاهموا العشيه بعون الله..............إن شاء الله إن شاء الله.....تصبح ع خير.....وعليكم السلام ....وسكر..
ومشي للسرير..
لينا:نبي نحكي معاك..
خش للسرير وهو يقول؛كلامك اجليه وقت تاني تاعب وراسي مصدع ونبي نرقد ماعنديش راس للنفخ..
رفعت حواجبها وقالت:نفخ!..
شبحلها وقال:ايه...
نزلت حواجبها وقالت؛اسفه اسفه واجد..وعد مني لاعاد نزعجك ولاننفخلك راسك..تصبح ع خير..ومشت طفت الضي وطلعت وسكرت وراها الباب..
هو بعد طلعت غمض عيونه بشده من الندم..
بعدين.خبط بيده ع جبهته اكثر من مرة...فتح عيونه وخدي نفس وزفر بضيق.
بعدين خط راسها ع المخده وحط ذراعه ع عيونه وحاول يرقد...وقلبه واجعه ع الآخر..
🌺اما هي..
خشت لدار صغارها وسكرت عليها الباب وقعدت تبكي بدون.صوت...تبكي بألم وهي موجوعه منه ع الآخر...
🍁ونفس دموع الألم..
كانت تذرف فيهم نوريه وهي في جنان المطبخ بروحها..مقعمزة قدام سطل حديد حاطه فيه كل الصور اللي جمعتها بحسين بأحلى الذكريات وولعت فيهم النار...
هي من غضبها الشديد وحرقة قلبها دارت هكي...
بس هي في هديكا اللحظه كانت تبي تنهي حسين بالنسبه ليها نهائيا...معاش تتوجع بسببه تبي تكون باردة اتجاهه ظاهريا وداخليا..
تبي حسين يطلع منها...يطلع من دمها...تبيه ينتهي بالنسبه ليها للموت...
🍁🍁🍁🍁
وطلع اليوم التاني..
ونوريه بعد ماأدت حق الله عليها...
وقبل ماتطلع من دارها..قعدت تخاطب في نفسها وهي مغمضه عيونها وتقول...
"انتي قويه..تقدري تنسيه..تقدري تكمل حياتك من غيره..انتي قويه مايكسرك شي..مايكسرك شي يانوريه..اطيحي وترجعي توقفي يانوريه..انتي قويه..قويه عليه"..
وفتحت عيونها..ومشت للباب فتحاته وطلعت..
ومشت للكوجينه...
حطت القهوة ع النار وطلعت تشوف عزوزتها لقتها تقرا في ولت مرة تانيه للكوجينه..
بعد طيب قهوتها عجنت فطاير...
وبعدين دارت كيكه شوفان...
وخلطت فروبي تمر وموز ولوز...
وبدت تحشي في الفطاير بعد خمروا حطتهم في الكوشه مع الكيكه..وهدا كله بإيديها الزوز حتى يدها اللي امس حرقت صوابعها...
وين طاب كل شي دارت سفرة فطور حلوة...
صورتها ونزلتها ستوري وحطت عليها مقطع لوحده من الأغاني..
وبعدين خدت السفرة ومشت قعمزت بيها في الصاله مع عزوزتها وصغار..
والستوري متاعها تفاعلوا معاه الاحباب والاصحاب..
وتفرج عليه حسين وهو يشرب في قهوته بروحه لأن اكرام راقده..
وين يشوف نوريه عايشه جوها وبالها رايق ينقهر هلبه...
يبي يشوفها ديما نادمه ع انها فرطت فيه وفي حبهم لكن نوريه كانت اشد واقوى من انها تبين ضعفها لحد..وهو عارف هالشي كويس...
🍁🍁🍁🍁
طلعت من الحوش وركبت الباص اللي يخطم عليها هي قبل صاحبتها..
وخداها لحوش صاحبتها قعدوا يستنوا فيها..
طلع خوها...جو عيونه طول في عيونها وهي غيرتهم عنه وشبحت القدام.. وهو قعد واقف يشبحلها..
لين طلعت صاحبتها وركبت للباص...والباص تحرك طول وهو قعد معاه بعيونه لين اختفي..
••••••••
"نحساب روحي بنقدر ننساها لقيتها عششت في راسي بزياده"
رياض:لأنها متربيه وبنت ناس وغبي اللي يضيع وحده زي هادي من يده..
مبشر سكت شويه وهو يفكر بعدين قال؛نفكر نخطبها بعد اتم السنه..اصلا عايلاتنا معارف واكيد الموضوع حيمشي بسلاسه..بنعطي فيها كلمه توا وبعد التخرج الزواج ان شاء الله..
رياض بضحكه وحاوط بذراعه كتافه وقاله:ايوه هدا الصح انت توا هكي صاحبي حق..
ضربه مبشر ع صدره وقاله:وقبل شن كنت..
رياض بضحكه؛كنت صاحبي حق ..
ضحك مبشر بعدين قال؛تعال نديروا دورة بالسيارة لين يجي وقت المحاضرة
رياض:تمام..
مبشر:لكن هاه الطلعه في سيارته وكل ع حسابك..
رياض:لا اليوم اطلب وتمنى بس..
مبشر:انت قلت هاه مش تنسى..
رياض بضحكه:كل ساعه وعلمها...
مبشر:نعرفك توقف عندك كلمتك..
رياض بضحكه:لا ماتعرفنيش..
وكملوا طريقهم للسيارة وهما يتناقروا....
🍁🍁🍁🍁🍁
"شن رايك استاذ"
سفيان وهو يشوف في البحث:ممتاز ياجيداء..
عفراء بضحكه:عفراء استاذ عفراء.
سفيان:اسف..المهم توا نبيك تفصلي في الموضوع هدا اكثر وتذكر كلام العلماء وتنابؤاتهم ونظرياتهم عن الاحتباس الحراري..وحرايق الغابات وعلاقة بهالظاهره..يعني تبحثي عن الاماكن اللي صارت في الحرائق لأول مرة وتعرفي شن اللي صار بالزبط..
عفراء:نقدر نستعين بأفلام وثائقيه؟
سفيان:مافيش مشكله..ولو قدرتي تمشي مع حد من عيلتك للشرق وتشوفي اللي صار غادي من حرايق في الصيف اللي فات وتزيدي تدرسي الموضوع عن.قريب..حيكون بحث تخرجك فوق المثالي..
عفراء بإبتسامة حماس:اكيد نقدر بجديات خاطري ندير بحث.تخرج يرقى لمستوى رسالة الماجستير..
سفيان؛حلو الطموح..لكن.الاحلى انك تخليه واقع مش مجرد.امنيه وخلاص..
عفراء:بإذن الله حيصير..
سفيان:ان شاء الله..
عفراء؛طلب بيسط استاذ نبي وسيلة تواصل معاك..
سفيان:ايه اكيد..سجلي عندك رقمي..
وقعد يمل فيه عليها..وهي تكتب..
سفيان:عندك واتساب..
عفراء:ايه.
سفيان:التواصل حيكون عليه هو بس عند الضرورة..ولو في شي ضروري جدا..كلميني..
عفراء بإبتسامه:ان شاء الله استاذ..وقفت وقالت...نستأذن..
سفيان؛اذنك معاك..موفقه ياعلياء..
ضحكت وقالت؛عفراء استاذ والله عفراء..
ابتسم بجديه وقالت:اسف...
هي ابتسمت ومشت طلعت..
سفيان؛اول نشوف اسم دمه ثقيل..
سكر اللاب توب متاعه وحطه في الشنطه وناض خدي البحث ونظاراته وتليفونها ومشي طلع من المكتب..
🍁🍁🍁🍁🍁
الساعه 12:55ظهرا..
طلعوا من المدرسه لقوا الباص يستنى..
الهام بضحكه:جي جي..
هي يدوب شبحتله بعدين مشت ركبت للباص وهي مبتسمه..
وتحرك للباص وهو لحقهم كالعاده لين وصلهم لحوشهم..
🍁وفي الجامعه...
اختها تلاحق فيها العيون وهي مقعمزة تراجي في خوهم..
لين جاها وقف عليها..
:مرحبا..
شبحتله بعدين ناضت ومشت قعمزت بعيد..
هو قعمز جنبها بمسافه:نبي نقولك كلمه بس..
هي ناضت ومشت وهو ناض ولحقها..
:تي غير شويه ياسمحه كلمتين بس ونعدي في حالي..
في سيارة كيا بيضا كان في واحد ماتحملش اللي شافه فتح الباب وجي بينزل..
شبح واحد.تاني جاه..دفه بقوة..
:تي خير....واطلق لفظ نابي..
محمد؛نوريك من هو...واطلق حتى هو نفس اللفظ النابي وبدوا يضاربوا..
ورنده واقفه في مكانها تتفرج وهي مصدومه..
والجامعه كلها التمت..
"رنده"..
التفتت لما سمعت اسمها وتفاجئت وين شافت اللي ناداها..
انس؛بسرعه بري خشي داخل...بسرعه...
هي طول نفدت كلامه ومشت تجري خشت داخل الكليه..
وهو رجع ركب مرة تانيه ولبس نظاراته وقعد يتفرج..
لين انحزت العركه..
والكل شاف وجه محمد...وهو قعد يدور ع رنده زي المجنون..مالقهاش..
خطر في باله انها..مشي ركب سيارته وتحرك طلع من الكليه..
شويه وانس خدي تليفونه وكتب رساله وبعتها...
لحظات وطلعت رنده ومشت قعمزت في مكان مستخطي بعيد ع العيون..بس انس كان يشبح فيها..
لين جي خوها...ومشت روحت معاها...وانس طلع وراهم..
🍁🍁🍁🍁🍁
الجو اليوم...
كان لطيف ومعتدل...خلاص الربيع قرب يخش..
وهي خطر بالها ادير الغدي مكرونه ع الحطب..
وتت عوالتها..وقعدت تراجي في عزوزتها تطلع..
شويه جت ضرتها...
اكرام:بكبوكي ع الحطب اليوم...الله جي خاطري فيها...
ومشت قعمزت ع الكرسي وقالت..غير ردي بالك تحطيلي فيها سم المرة هادي..
نوريه تجاهل تام..
اكرام؛تعرفي قبل كنت ناويه نديرلك مصيبه كبيرة كنتي ناويه تقتلي عيلي..لكن احمدي ربك اللي خلا حسونه يحنن قلبي عليك..قالي هي خاطرها مازال ادير الصغار لكن العمر حكم ومعاش تقدر تجيبهم توا..حطي روحك في مكانها..
الحق ولا صخفتيني وعذرتك...كلها تلاقت عليك في مرة باهي اللي قاعده واقفه رجليك ابله...نوريه..
شبحتلها وقالت:قالوا عندك وليد مخليتيه مع ماليك كيف هان عليك ياكبدي...
اكرام رفعت حاجبها وعيونها تعبوا دموع..
نوريه:اني ع خاطر صغاري مستعده نتحملك عادي ونتحمل كل شي...لكن انتي...الله يحنن قلبك عليه ويصخفك كيف ماحن عليا وصخفتك ومشت خشت داخل....
وخلت اكرام تشبح للفراغ بملامح وجه حاده..والدموع تنزل..
🍁🍁🍁
بعد تلاته ساعات.
"لشن.تبي توصلي فهميني"
نوريه:ولاحاجه..هي جت تبخ في سمها واني رديت عليها قوللها تشد الحوش اللي هي فيه وتخليني في حالي..
حسين:انتي اللي خليها في حالها مش هي..
نوريه بشي من الانفعال:ماعندي علاش نحط راسي براسها..كان عليك لوحت رشادتك خلاص ومعاش تعنيلي شي بكل بكل..وكان مش مصدق..هاه..شوف..ومشت طلعت الالبومات من الادراج..وجاته بيهم وفتحتهم وقعدت تتصفح وتقول..هاه شوف..شوف..شوف..كل صورة تجمعني بيك حرقتها..حتى ذكريات لينا مع بعض ماخليتش..انت انهيت بالنسبه ليا ياحسين..انت توا عندي بو صغاري..وبس..
كان يشبحلها بعيونه الغارقات بالدموع.
بصدمه...وألم...غضب...وحب...
يشبح لعيونها المليانات حقد...
هز راسه وقال:بوصغارك وبس...تمام....
ومشي للباب حط يده ع مقبض متاعه والتفت قاللها:من اليوم حنقسم بيناتكم ايامي بالدور..يوم بيوم..وانتي تلمي حاجتك وحاجة صغارك وتمشي تقعدي في حوشك وهي بنجيبها هني...وكلامي مش حنعاوده ومش حيمشي غيره حتى على امي..
وفتح الباب وطلع لقي امه واقفه قدامه..
حسين:كلمتي مش حتولي اتنين يام..ولو تبي تخاصميني خاصمي..
رمضانه:ماعندي ليش بنخاصم.مادام بتعدل كلامك كله مواقفه عليه..
سكر الباب ومشي...وأمه تنهدت ولحقاته....

#تاج_الذكر
يتبع
الفصول الاربعة