شكولينا

الجزء الثامن والثلاثين""القسم التاني ""

#شكولينا
#الجزء_الثامن_والثلاثين"القسم الثاني"
#الجمان_الفريد

عماد حياة المسلم..واكسيرها الصلاة..
واول شي يتحاسب عليه..لاخير في عمل يلهي عنها..
صلوا صلاتكم...بعدين ديروا اللي وراكم...
وقولوا لاإله إلا الله بقلب سليم طاهر تفلحوا❤
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
الساعه 5:15فجرا..
"هي تعال معاي ماما نعدوا ندبروا رضاعه"
خدي ولدها في حضنها وخدي رضاعته ولعبته وطلعت من الدار للكوجينه...
خشت للكوجينه حطت ولدها لوطا مع لعبته بش يلهى بيها وهي اديرله الحليب..
💎فهالوقت..
هو فاق من النوم ع صوت الحركه في الكوجينه..
قعد يشبح حواليه وهو يحاول يوعى ويستوعب هو وين..
بعدين غمض عيونه ومسحهم..بعد مسحهم شاف للساعه في يده..
تنهد وحول الغطا وناض قعمز..
"ايه ياماما بووا"
بلهفه شبح للكوجينه...بعدين ناض ومشالها..
وقف في الباب..
قعد يشبحلها كيف تخض في الرضاعه بعدين حطت منها قطرة ع يدها تشوف حرارتها..
بعدين التفتت لولدها وقالت:هي خود ماما..
طلق اللعبه وخدي الرضاعه وبدي يرضع..
هي ابتسمت وخدت اللعبه بعدين قامت ولدها بتطلع بيه..
جو عيونها ع الباب وشافاته..
هو ماقدرش يحول عيونه من عليها..
لكن هي طول غيرتهم بعد انقلبوا نظراتها للحده..ومشت طلعت من الكوجينه..فاتت من جنبه ولدها مد يده لعمه..
هي شدت يد ولدها ومشت بسرعه والولد بعيون مع عمه..
وعمه بعيون اللي نظراتهم كلها حزن معاهم...لين خشوا للدار..
تنهد بحزن..بعدين مشي طلع من الحوش..
🌺اما هي اول ماخشت للدار..
حطت ولدها جنبها وقعدت تذرف في الدموع غصبا عنها وهي تمسح فيهم بعنف..
وتحاول تتحكم في ملامح وجهها ماتبيش تبين  حتى قدام نفسها ضعفها اتجاهه..
قاعده تقاوم في شي في داخلها مش هاين عليه هو برغم اللي داره..لدرجه انها كرهت نفسها اللي كانت تبي قربه...
🏵🏵🏵🏵🏵
الساعه 8:00صباحا..
قدام الحوش..
سفيان:خودي يام هدا تليفونها نساته فوق..
خداته وجيهه وقالت:امتى مروح اليوم..
سفيان؛بنروح ماخر هلبه اليوم يابعد المغرب يابعد العشي...
وجيهه:واختك نوريه اللي جايه ع خاطركم انت ومرتك..
سفيان:جيتها للينا مش ليا اني كان رضت لينا معناها اني راضي..
وجيهه بتهكم:اممم..
ضحك ولبس نظاراته ومشي لسيارته..
وامه مشت خشت داخل..
توجهت للدار وخشتلها..
لقت لينا تلبس في بنتها...
وجيهه:اهو تليفونك نستيه فوق..
لينا خداته وحطاته ع مسند المندار بدون ماتعلق..
وجيهه؛هاتيها خل نلبسها اني وانتي بري ديري الفطور..
لينا هزت راسها وقالت:باهي..
مدت بنتها لعزوزتها ومشت بتطلع شافت ولدها شاد في الحيط ويوقف معاه..
لينا بدهشة:اللاي شوفي..
وجيهه شبحت لبحر وقالت بضحكه:الزين وقف الزين وقف الزين وقف...
طلع بحر الحيط وقعد واقف لمدة ثانيه بعدين قعمز..
لينا:ياروحي حبيبي..
وجيهه:لكن ياسمينه لتوا مش قادرة توقف مع الحاجه .
لينا:ياسمينه نحس فيها تبي طب عرب..
وجيهه:قصدك تكويلها؟
لينا:لالا كوي لا..حجامه...
وجيهه؛عاينيها قبل..
لينا:خل نحجملها قبل ولو مااستفدنا شي نعاينها..
وجيهه؛حتى هدا راي كويس..
هزت لينا راسها ومشت للكوجينه..
وين خشت لقت رنده فيها تخلط في مية وعسل..
تجاهلتها ومشت  للثلاجه..
رنده:صبح....
ومشت طلعت بالطاسه متاعها..
تنهدت لينا بملل وطلعت الحاجات اللي تبيهم من الثلاجه...
وبدت ادير في الفطور...
🏵🏵🏵🏵
الساعه 10:15صباحا..
الجامعه..كلية العلوم..
في مكتب من مكاتب قسم الفيزياء..
ابوبكر:باهي شن نظامك الفصل الجاي مادامك مش حتعطي..
سفيان:في فبالي شي وممكن يوقف عليه المستقبل ياصاحبي.
ابوبكر عقد حواجبه وقال:شن هو؟
سفيان؛توبعدين نهدرزلكم عليه انتم والشباب ان شاء الله..
ابوبكر:قصدك بتخليني نراجي لين نعرف معاهم..
سفيان هز راسه بإيجاب..بعدين لبس نظاراته الطبيه وشبح للاب توب..
شبحله ابوبكر بإمتعاض بعدين شبح للاب توبه حتى هو ...
🏵🏵🏵🏵
الساعه 5:00عصرا..
كانت لينا تبخر في الحوش...
ومنى تحط في الشاهي الأخضر ع النار..
وزبيده ووجيهه في دار التقعميز وحداهم الصغار..
ورنده مع رتيل في دارها..
رنده:رتوله شوفي الساعه..
رتيل شافت ساعة تليفونها وقالت:خلاص فاتت العشرين دقيقه..
رنده:خلاص خل نوض نغسلها..
وناضت طلعت من دارها..
ورتيل لاهيه بتليفونها الجديد اللي جاها هديه من سفيان..
وكانت منزله فيه برامج..واهمهم السناب اللي كان لمبشر فيه حساب..
كانت تتفرج ع سناباته وهي تضحك..
كان مع مجموعه من صحابه يحتفلوا بنجاحهم اليوم طلعت نتيجتهم..
شويه ورن تليفون اختها..قربت منه وشافت المتصل بعدين قالت؛يعع..عار ع الرجاله البنادم هدا شن مازال تبي فيه مش عارفه..
ع خشة رنده وهي تنشف في شعرها المصبوغ:سمعت تليفوني..
رتيل:ايه محمد..
ابتسمت بغرور ومشت شبحت للمرايه وقالت؛باينه ولا؟
رتيل:ايه بس مازال تبان اكثر..
رنده؛امم..وقعدت تمشط في شعرها..
رجع رن تليفونها...تأففت ومشت خداته..
وفتحت الخط..
"وينك رنودتي خيرك ماترديش"
رنده:ماكانتش فاضيه..خيرك شن تبي؟
"نبي نبشرك حبي وقعت عقد خدمه برا البلاد لمدة عامين"
رنده ابتسمت بفرح وقعدت ساكته..
"في الكويت تصدقي"
رنده؛فرصه مليحه شكلها..
"ايه وفيها امتيازات..وهكي حبي نعيشوا براحتنا بعيد ع الدوشه والنكد"
رنده قعدت ساكته وهي تفكر..
"هاه شن قلتي رنده امتى نجيك نروح بيك"
رنده:امتى السفرة هي؟!
"الاثنين الجاي كان سخر الله"
رنده:خلاص معناها تعالى روح بيا الاحد لكن مش لهديكا الشقة المعفنه..
اختها قعدت تشبحلها..
"لالا حبي اني قبل بنأجر شقه لكن لما صارت حكاية السفرة هادي قلت نقعدوا في فندق.."
رنده:تمام بكل..يوم مش اكثر هو..
"تمام ياعمري تمام انتي غير جهزي جوازك بس"
رنده:ايه قاعد عن ماما هو...
"اااه ياقلبي مش مصدق انك واخيرا رضيتي رنودتي..والله تقول كنت غارق وطلعوني.."
ابتسمت وقالت:تمام يوم الاحد نشوفك..
"من توا بنعد الدقايق"..
ضحكت وقالت :تمام باي..
"باي ياعمري باي"..
هي سكرت وقالت بضحكه؛واخيرا بنطلع من بلاد الفقر..
رتيل؛كيف؟!..
رنده:وقع عقد خدمة في الكويت..في النفط غادي تخيلي في الكويت...
رتيل:ماشاء الله!
رنده؛وهكي نفتكوا من ماليه فكة وحده..
رتيل؛ماتفرحيش هلبه صاحبتي اختها متزوجه وعايشه برا قالت متاعين راجلها لاحقينها لغادي ومنكدين عليها...
رنده فنصت فيها وقالت:سكري فمك يابومه..
ورتيل قعدت تضحك..
"بنته"
رنده بضحكه؛نويرة جت..
رتيل نزلت من سريرها ومشت طلعت لأختها..
ورنده بلمت شعرها ولحقتها..
نويرة:وينكن يابنته وينكن..
رنده بضحكه:شكلها عمة راجلك كان عندكم اليوم..
ضحكت نوريه وهزت راسها بإيجاب..
وسلمت ع خواتها..
وجيهه؛شن حالها..
نوريه وهي تسلم ع رنده:خيرمن قبل يام..
وجيهه:خشي خشي..
رتيل؛ماجبتيش الولاد...
نوريه:بوهم لما يروح بيهم من الجامع يجيبهم..
وخشوا كلهم لدار التقعميز..
نوريه شافت بحر وياسمين قالت:عساسيلي استاحشتكم..
وطبست عليهم خدتهم وهي تحضن فيهم وتغرق فيهم بالقبل..
وولد مروان يشبحلها...
••في الكوجينه..
منى:قالوا الجية ليك انتي..
لينا وهي ترش في السكر البودرة ع الكعك المخمر هزت راسها بإيجاب..
منى:شكله سفيان معاركها..
لينا مطت شواربها للأسفل بعدم معرفه..
منى:نحس فيك ماخاطركش تشوفيها..
لينا:الله غالب..
منى:معليشي..الواحد لازم يساير بش المركب تمشي..
لينا؛قداش منها المركب..عارفه بيجي يوم وتغرق بينا كلنا..
منى بضحكه:فال الله ولافالك..
ضحكت لينا نص ضحكه وقعدت ساكته..
منى:هي تعالي خل نسلموا..
لينا؛اوامر اللاي ولا؟
منى:طبعا..
هزت لينا راسها وغطت الكعكات ومشت طلعت هي ومنى من الكوجينه..
خشوا للدار وطلقوا السلام..
ردوا السلام ونوريه ناضت وقفت للينا وسلمت عليها بالخد..
ولينا تسلم وهي مستغربه فيها..
بعد ماسلمت قالت؛شن حالك لينا...
لينا وهي مستغربه فيها هلبه وبدون ماتبين:الحمد لله..كيف حالك انتي؟
نوريه:الحمد لله..
جتها منى مدت يدها وقالت؛شن حالك نوريه..
صافحتها نوريه بروس صباعها وهي ترد بالسيف:الحمد لله..
وقعمزت وهي تقول:لاباس عليك قالت امي مريضه.
مشت منى قعمزت وهي مضايقه..
ولينا قعمزت وهي تقول:لايوريك باس حالي باهي توا وان شاء الله تسامحني اللاي في تعبها..
وجيهه:لاتعب لاسو بنتي..
ورنده تشبح للينا من فوق لتحت..
لينا:ربي يحفظك ويطول في عمرك..
زبيده؛شن حال عزوزك يانوريه..
نوريه:في خيار الخير ياحناي..
رنده:وشن دايرة مع سلفتك؟
نوريه بضحكه؛زي قبل ماتبي منها شي وكله تقول نبي نوريه ديرهولي..لكن هي صحة ليها كيف مش مستسلمه بكل تبي تكسب عزوزتي بأي طريقه..
رنده:غير راهو ديرلك جو خبث الأناثي..
نوريه:لاالا ماهيش هكي..وحتى لو فكرت اديره مايطلعلهاش معاي..حطت يدها ع صدرها وقالت ومعاها رنده تقلد فيها...
دانا نوريه والأجر على الله..
ضحكوا امها وحناها واختها رتيل..
ومنى ولينا يشبحولها وخلاص..
بعدين قالت لينا:وينها نور؟!
نوريه:مع جدها برا تشوف فيه كيف يسقي...بعدين يما الجنان خيره هكي اللطف وانتم اربعه!؟
وجيهه:تعب يابنتي والله مانقدر عليه..
نوريه:اكيد يام الكلام مش عليك..
رنده؛تعرفيني نتحسس من الغبرة وحتى كناينا الفالحات يعرفوا..
لينا طنشتها..
منى:الريح تتحرك كل يوم مش كل يوم بنقعدوا نكنسوا تعب الحق...
لينا: توا ينضم س..وبعد يهفت العجاج تو نسيقوه..
وجيهه؛ايه هو هدا..
سكتوا شويه ونوريه تتفرج ع صغار خوها..
ع خشة نور مشت سلمت ع حناها بعدين زبيده وخالاتها ومنى سلام عادي..
لين جت للينا ضمتها وقالت:استاحشتك دنيا.
لينا بضحكه:وانا توحشتك هلبه....
نوريه:من لما عرفت اني جايه وهي تقولي امتى بنمشوا للينا..
باست لينا نور من خدها..
رنده:صار هكي يانور بري حرجت منك..
طلقت نور لينا ومشت لخالتها ضمتها..
رنده ضمتها وقالت بضحكه:تحبيني اني اكثر وحده ولا؟
نور:لا نحب ياسمين اكثر .
ضحكوا..
ووجيهه قالت:سلم بنية عمتها..
ابتسموا نوريه ولينا..
ومنى تسمع وتشوف بس..
شويه وجيهه شبحتلها وقالت؛ترا بري وتي العاله يامنى..
منى هزت راسها وقالت:حاضر..
وناضت مشت طلعت من حداهم..
نوريه شبحت للينا وقالت؛لينا..عارفتيني اليوم جايتك انتي نبي نستمسح منك ع اللي جاك مني..ياريت تسامحيني..
لينا قعدت ساكته وعيونها  ع صغارها..
وجيهه:خلاص بنتي اللي فات مات وعفا الله عما سلف..
لينا كان استغرابها كل ماله يزيد شن اللي غير نوريه بسرعه هكي!؟
استبعدت كون سفيان ليه علاقه بالموضوع...
ومع هدا احسنت الظن فيها وقالت:خلاص صار خير..ربي يسامحك دنيا وآخره..
نوريه:وانتي!؟
لينا:مادام دعيت ربي يسامح معناها انا مسامحه..
وجيهه:من اليوم افتحوا صفحة جديده..وكل وحده تتعامل مع الثانيه بقدر واحترام..هي الحمي كبيره وانتي مرت خوها الكبير..
نوريه ولينا:إن شاء الله..
ع خشة منى بالمفرش حطاته قدام وجيهه.
ونوريه تشبحلها من فوق لتحت..
ورنده تشوف لنوريه..
🏵🏵🏵🏵🏵
"وشن اللي خلاك تاخد هالقرار"
سفيان:مازال ماخديتاش قاعد نفكر فيه..
:وشن اللي خلاك تفكر فيه.
سفيان:صحة بوي ياناصر معاش زي قبل..
ابوبكر:قصدي كان انت سيبت الكليه حتى اني بنسيب..
سفيان؛بالسيف يبينا توامه..
ضحكوا الشباب..
ابوبكر بضحكه:غير جديات تفكر تسيب ؟
سفيان:مش عارف لعند توا..قاعد نفكر..والفصل الخريفي هدا ان شاء الله بما اني حنكون فاضي فيه قلت نعاون بوي شويه ونزيد نخالط البيئة متاع خدمته ونشوف كان نقدر ناخد عليها ولالا..
:تبي الحق سفيان حتى احسن قرار..بوك يبي من يساعده ولو انت وخوك ماساعدتوشي في من حيعرض خدماته عليه ومع الوقت ماتندروش شن يديرفيكم...
ابوبكر:مع مصطفى في كلامه ياسفيان..
سفيان هز راسه وقال:ان شاء الله خير..
:سمعتوا بفوزي انزاد عليه وليد..
سفيان بضحكه:بيدير فريق كورة الله يبارك..
ابوبكر:ماعنداش الروح مع الصغار..
:الفال لسيفو اللي شكله ماخاطراش يجرب الأبوة..
حاول يحافظ ع ابتسامته بقوة وهو يقول:مازال ربك مانزلش المقسوم..
:ان شاء الله في اقرب وقت.
سفيان:ان شاء الله..
وابوبكر يشبحله وهو مضايق عليه وعارف باللي بيحس بيه حاليا..
🏵🏵🏵🏵🏵
"درنا رب تمر ورب كرموس وفرقنا ع العيله وجبتلكم حصتكم"
زبيده:جو في وقتهم..
وجيهه:والله صحة ليها الحاجه رمضانه ماتسيب عاداتها بكل..
نوريه؛مستحيل..
لينا؛وليش نحنا مانديروا رب بالتمر متاع النخل اللي هنا..
وجيهه بضحكه:بروحي مانعرفش عمك قبل يرفع فيه لناس يديرولنا فيه والسنين الاخيره معاش درناه..
لينا:انا نعرف كان تخلوني نديره..
وجيهه بضحكه:مانقولش لا...
زبيده:عاد الرب انتم اللي تعرفوه..
ابتسمت لينا..
نوريه:ماشاء الله الكعك حاجه ماصارتش..
لينا:صحتين..
نوريه:عطيني الطريقه متاعه الولاد ديما يطلبوا فيه..
لينا:طريقها متعبه شويه بس النتيجه سمحه..
وبدت تعطي فيها الطريقه ونوريه مركزه معاهم..
ومنى مركزة معاهم وهي مستغربه في نوريه هلبه ..
نوريه:تمام تو نجربه..
رتيل:شوفوا بحوري شوفوا..
كلهم شبحلوه لقوه يحاول يوقف..
حناه بدت تغني وتصفق:الزين وقف الزين وقف..
وهما بدوا يغنوا معاها ويصفقوا لين وقف بحر الدين..
كلهم صفقوا وصاحوا..
ولينا تضحك..
اما الشريف ولد مروان اللي كان واقف يشوفلهم تحركت غيرته الطفوليه...بس بدافع قوي..
جي لولد دفه...وغاز الشاهي حداه..
كلهم يعيطوا...ولولا لطف الله ثم عمته نوريه اللي خداته طول قيل يطيح عليه راهو الولد انحرق..
لينا كانت مقعمزة مفجوعه وايديها الزوز ع صدرها قريب ماتت من الرعب..
نوريه:خير دعوتك بيكلب هالفرخ..
ومنى اللي جمد الدم في عروقها ماقدرتش ادير اي ردة فعل..
شافوا وجيهه وهي تمسح ع وجهه بعدين تنفست بقوة ودموعها نزلوا وقالت  لنوريه:جيبيه جيبي..
ناضت نوريه وعطاته لأمها..
خداته وجيهه وضامته وقعدت تبكي..
وبناتها يشبحولها ودموعهم في عيونهم..
فهاللحظه جبدت منى ولدها وضرباته كف..
زبيده:ليه عليك!..
ناضت لينا وخداته منها وقالت:ليش يامنى ليش عيل هدى وين يعرف..
والشريف قعد يبكي وهو شاد في لينا بقوة..
منى:يبيها شيطان بيكلب..
رنده:بدال ماتضربيه تعلمي كيف تتحكمي فيه..
منى:صعب يارنده هلبه الشريف حركي ..
نوريه بعصبيه:عليك سبله تتسبلوا فيها..اني صغاري كانوا زيه وعلمتهم كيف يسمعوا الكلام غير نفنص فيهم يموتوا في مكانهم..العيل مايبيش اللي يرخيله ويدلعه..
لينا:خلاص ماصار شي توا ربي لطف..وقعدت تشبح لولدها وحناها ضاماته لحضنها وهي تمسح في دموعها بطرف محرمتها..
سمعت صوت الريح اللي برا..واذكرت شن صار فهالوقت من العام اللي فات...
بعد اسبوعين حيسكروا بحر وياسمين العام..
وحيفوت ع وفاة بوهم عام...
تنهدت لينا بحزن وقالت:خل نمشي نجيب ميه وسكر..
ومشت طلعت من حداهم والشريف في حضنها..
وجيهه:حداك ياسمين يانوريه..
خدت نوريه ياسمين وضمتها وباستها بعدين قالت:نجيها غزالة عمتها..
🏵🏵🏵🏵🏵
في الطريق..
يسوق وهو يفكر..
يفكر كيف بقدر يصلح غلطته الفادحه في حقها..
عارف ان الموضوع صعب جدا بل يكاد يستحيل من صعوبته..
بس هو مؤمن ان المستحيل مش موجودع الا في عقول العاجزين..
وهو مايحبش يكون عاجز..
بالذات والأمر متعلق بحب حياته..الحب اللي ماصدق لقاه..
وفي عز تفكير..
اذكر حديث دار بينه وبينها في ليله من الليالي في شقتهم.
🔺️في وقت سابق...
في الصاله مقعمزين يهدرزوا..
سفيان؛باهي شن هي اكثر حاجه تتمني تجيك هديه..حاجه ماجابهلكش حد من قبل..
لينا قعدت تفكر..
سفيان:ماجاتكش من قبل حتى انتي ماجبتيهاش لروحك..
لينا شبحتله وقالت:نوعين من الورد..
سفيان بإبتسامه:اللي هما؟!.
لينا:الورد البلدي كاميليا وزهر اسمه الأقحوان ابيض وصغير قريب من الياسمين..
سفيان:ايه عرفته..بس نحسك تحبي الياسمين اكثر شي..
لينا بضحكه:صح..بس جاتي منه واجد من قبل..
سفيان ابتسم وقال؛امممم..
لينا:امتى تفكر تهديهن ليا؟!
سفيان:لما تقولي باهي..
ضحكت لينا بخجل وهو يتأمل فيها بحب..
🔺️الوقت الحاضر..
ابتسم..وقعد يدور بعيونه حواليه ع محل ورد..
ومش بالساهل لقاه...
ولحسن الحظ كان موجود زهر الأقحوان..
ومع مجموعه منه انحطوا في باقه هما وورد الكاميليا..
خدي الباقه ومشي بيها لأخر مكان توقع يخشله..
••سفيان:ديرلهم لقطه هكي بمعرفتك بس نبيها تكون مميزة..وتاخد كرت وتكتب عليه..وقعد يفكر شويه..بعدين قال...آسف.
الشاب:حاضر..
وبدي يجهزله في بوكس حلو..وحط فيه الكرت..
وجي وراهوله..
شافه سفيان تنهد تلقائيا وقال:لوين وصلتني..
ضحك الشاب وقال:تبي تاخدها معاك ولا نوصلهالك لمكان معين..
سفيان: لابناخدها معاي..
🏵🏵🏵🏵
في حوش الحاج الشريف..
وكالعاده الكناين يحوسوا ع العشي والحموات حداهم يهدرزوا..
نوريه:لا اللون هدا ماشي معاك تهبلي طالعه..
رنده:انتي اهبل نويرتي..حتى انتي موليه ماشاء الله ماتفكريش تقصي مرة تانيه..
نوريه:نو نو نو...ندمت اللي قصيته حسيت القصه كبرتني..
رنده:نية سفيان..
نوريه ضحكت وقعدت ساكته..
بعدين شبحت لمنى واشرت عليها بعيونها..شدت وجهها بيدها وحولتها وعليه ملامح الازدراء..
فهمت عليها رنده وقالت؛تعرفي منى ضعفتي وليتي زي البوبلال..
لينا مطت شواربها بقرف..
منى:من الوحم..وحمي المرة هادي واعر مانقدر نخلي شي في بطني..
رنده؛مش هكي بس نحس فيك هامله روحك مش عارفه كيف مروان ماقالك شي.
منى:شن بيقولي عارف ظرفي ومقدره..
نوريه؛رنده مافيش راجل يقدر ظرف مرته تلقيه يساير فيها..وبرا طالق عيونه وواخد راحته..
شدت منى ع قبضة يدها بقوة..
ولينا كانت حاسه روحها تغلي من داخل..
رنده؛والله حق..ردي بالك منى..مروان خوي يحب الجمال هلبه..كان قعدتي مرات يجيبها ع راسك..
منى :من هي!؟
شدت نوريه ضحكتها..
رنده بضحكه:اللي بيحط عينه عليها ..عاد الشرع حلله ياخد 3غيرك ومعاه عذره..
لينا كانت خايفه تنفلت وتقول كلمه..هي بروحها وضعها حساس تمشي جنب الحيط وان شاء الله تسلم..
منى:والله كان يبي يتزوج سلامته لكن يطلقني قبل..
ع خشة ولدها جاها وقال:ماما..همام..
منى وهي شادة دموعها ؛تعالى ماما..ومشت طلعت هي وياه..
نوريه؛تطلق وهي ماخداها لين قريب هبلت..
رنده ضحكت بعدين قالت؛تمشي للدار عييت من التقعميز ع الكرسي..
نوريه:بري ولحقاتك..
رنده شبحتلها شويه بعدين ناضت ومشت طلعت..
نوريه:لينا..
لينا تنهدت وقالت؛نعم..
نوريه؛قالت امي صايرة بينك وبين سفيان مشكله.
لينا قعدت تشبحلها بدون ماتعلق..
نوريه:شن صاير احكي بالك نخشوا بيناتكم بالخير
لينا؛مشكورة بس هدي مواضيع خاصه بيني وبينه الافضل تقعد بيناتنا..
نوريه:عندك حق لكن قلت بالك نقدر ندير شي راهو اني ياما خشيت في مشاكل وانحلت..
لينا ابتسمت مجامله وقالت:ربي يكتبلك الاجر..
نوريه هزت راسها وقالت:تمام ع راحتك..
وناضت مشت بتطلع..جت قدامها منى خبطتها بكتفها وطلعت...
ومنى قعدت تشبح للينا وهي رافعه حواجبها..
لينا حركت راسها يمين ويسار بعدم رضا..
خشت منى وقالت بغضب مكتوم:ماعندي مانقول غير حسبي الله ونعم الوكيل..
وعرت الطنجره وقعدت تحرك فيها..
ولينا تشبحلها بضيق..
شويه خشت نور وقالت؛مرت خالو سفيان..
شبحتلها لينا..
نور:تعالي نوريك حاجه في الجنان..
وجتها خدتها من يدها وطلعت بيها..
لينا:حاجه شنو؟!
نور اشرتلها وقالت؛هديكا غادي..
لينا شبحت جهة المظله..
بعدين قدمتلها لين وصلت في الطاوله..
شافت الورد اللي عليها..ولاحظت الكرت..خداته وقرت شن فيه..
ابتسمت بتهكم..وردتها في مكانها ومشت خشت ونور تشبحلها..
بعدين غير عيونها وهي ادور في خالها..لقاته واقف حدا الشجره..
ابتسملها واشرلها تخش..
نور مشت خشت طول...
وهو مشي للمظله..خدي البوكس وهو مضايق..
اساسا كان عارف انها مش حتعبر اللي داره ولاحتقيمه من ارضه..
بس هو المهم عنده انه حاول...
🏵🏵🏵🏵
وقبل ماتروح نوريه بربع ساعه كان عندها معاه قعده..
سفيان:سبحان الذي يغير!
نوريه بضحكه:تتسهوك..
سفيان:مستغرب..
نوريه؛لا ماتستغربش ياغالي كان انت تبيها خلاص..
سفيان قعد ساكت وهو يشوفلها بشك..
نوريه بضحكه؛خلاص عاد حوله الخنس هدا..
سفيان:نحاول..
نوريه؛باهي قولي شن صاير بيناتكم بالك نخش بيناتكم واسطه..
سفيان:تس..هادي امور خاصه بيني وبينها هي بس..
نوريه؛تقول متفقين ع الاجابه..
سفيان؛هي هكي قالت؟
نوريه:امم..
ابتسم ع جنب وقال:حتى انتي بطلي قصقصه..
نوريه:مافيش فايده فيك مهما ندير معاك..
سفيان:انتي كان ماديري معاي شي نحطه فوق راسي..
نوريه؛لسان بشوكه..
سفيان تنهد وقال:صدقتي..
نوريه:معناها انت الغالط؟!
سفيان تأفف بتذمر وقال؛خيره معاش جي حسين.
نوريه قعدت تضحك...
شويه سمعوا سيارة درست قدام الباب..
نوريه:ولد الحلال عند ذكره..
ابتسم سفيان وناض بيفتحله الباب..
🏵وفوقهم في شقة مروان..
كانت منى ترقد في ولدها وهي تبكي بصمت..
وحداها مروان راقد بالنوم مروح من خدمته تعبان..
قعدت تشبحله وتفكر في كلام خواته وحست بالخوف والشك..
لأن كلامهم عن خوهم صح وهي تعرف مروان راجل متطلب..
بس في فترة وحمها حاليا تشبح فيه كيف مراعيها في الاول كانت فرحانه...بس توا تبدل هالفرح بالخوف والشك..
غيرت عيونها عنه وشبحت لتليفونه..
حطت ولدها ع تركينه بهدوء بعدين ناضت  ومشتله..
خداته من الزيانه وفتحاته كانت حافظه الرمز..
خشت ع مكالماته وع رسايله وصفحاته مالقت شي غلط..
التفتت وشبحتله شويه..بعدين ردت التليفون لمكانه وولت للسرير...
ومسكينه هديكا الليله كملتها تخميم ومارقدت الا بالسيف..
🌺🌺🌺🌺🌺
الساعه 4:30قبل الفجر.
في الصاله كانت مقعمزة تقرا في القرآن بعد صلت الوتر..
كملت قرايه....رن تليفونها بنغمة رساله.
شبحتله شويه بعدين خداته من ع المندار...
وفتحت الرساله..
(الحزب 50)
فتحت المصحف وشافت روحها وين وصلت كان نفس رقم الحزب..
عيونها تعبوا دموع...بس شدتهم بكل قوة..
لوحت تليفونها ع المندار..وحطت المصحف ع تركينه وناضت تشوف صغارها...
☘ومن بعد هداكا اليوم..
معاش خلاته يلمحها حتى...
وهو كان يدور الحجج من تحت الأرض بش يحظى بلمحه...
تفننت في تأديبه وتعذيبه وخلاته يجافي حتى الزاد...
مابطلش يبعتلها رسايل كل مايكمل حزب من القران ولايكمل قراية سورة البقرة..
ومرة بعتلها مع رتيل يبي منها شي تعود عليه وراح لما خلاته..
لينا:قوليله ياخد شيشه ميه ويحطلها ريحة زهر ويقرا عليها سور وآيات الرقيه ويشرب..احسن رقيه في رقية الشخص لنفسه..
.............
رتيل:وهدا اللي قالاته
سفيان هز راسه وهو مضايق بعدين قال:باهي جيبيلي الصغار استاحشتهم امس ماشفتهمش بكل..
رتيل:ترقد فيهم..
سفيان عقد حواجبه وهو يفكر...حس الموضوع مقصود..
لانه كذا مرة يطلب يشوفهم ييلقاهم راقدين ياترقد فيهم...
يعني هي تبي تحرمه حتى من شوفتهم هما..
لف ومشي طلع وهو مضايق ع الآخر..
ورتيل مشت خشت داخل وقلبها موجوع ع خوها...
🏵🏵🏵🏵🏵
يوم الخميس..
الساعه 5:00عصرا..
خش للحوش بعد ماروح من الصلاه...
طلع تليفونه من جيبه بيغير وضعه للعام...
شافت مكالمات من صاحبه..
استغرب واتصل بيه...نادى مرتين وانفتح الخط..
"تي وينك ياراجل"
سفيان:توا كيف روحت من الجامع..شن في ان شاء الله خير..
"لاخير..غير بنقولك تقول للمدام ترد ع الرقم اللي يتصل بيها توا رقم زوجتي هي عطتهولها ونست شكلها..."
سفيان؛تمام..
"غير تبي تعزمها غدوة ع العشي وكان انت تبي تجي معاها مش مشكله"
سفيان بضحكه؛ياتافه ليش هدا وين تقول..
"اليوم تأكدت..راهو بتجو مافيش اعذار"
سفيان قعد يفكر شويه بعدين ابتسم ع جنب وقال:لالا جايين بإذن الله جايين...
••داخل..
في دار التقعميز..
"هكي هكي هكي يام امم..الناس زي النمل..مهرجان مش عرس"
زبيده:معروفين ناسهم هلبه..
اساور؛الزحمه اللي هكي ضيع بنة العرس الصراحه ابيخ عرس نحضره..
رنده:صح هردميسه العراس اللي هكي..
ربيعه:لكن والله العروسه اللي يبارك عليها سميرة وين ريتها خطرت عليها السبهاويه متاعنا قتلهم حتى حني عندنا كنة سمرا زي الغزاله..
لينا بإبتسامه؛تسلمي ياعمتي..
ربيعه:كان غير يهديك ربي..
انحرجت لينا من تلميحها وكلهم قعدوا يشبحولها..
"رتيل"
وجيهه:تعالى ولدي مافي حد...خش..
لينا شبحت لأساور كيف قعدت تساوي في وشاحها..
بلعت ريقها اللي نزل لجوفها زي النار..
خش عليهم وقال؛السلام عليكم..
لينا شبحت للتلفزيون وقلبها يدق بقوة...
تسمع فيه كيف يسلم ع عمته بنت عمته...
بعدين ماحستش بيه  الا وهو يدوي حداها..
انخلعت شبحتله لقاته مقعمز جنبها..
سفيان؛يبارك فيك الحمد لله..شن حال عمي مسعود..
ربيعه؛يسلم عليكم. .
سفيان؛يسلم.
ولينا تبي تنوض من جنبه ومش عارفه كيف..
هو شبح لياسمين وبحر كيف يلعبوا بالمكعبات..
سفيان؛بحر.
شبحله..
سفيان؛تعالى..
سيب اللي في يده وقعد يمرد ولما قرب يوصله جي بيوقف.
سفيان ضحك بفرح وقال:بيوقف قصده!
وجيهه:قصدك ماريتاش قبل!
سفيان:لا والله هادي اول مرة..
وقف بحر وقعد يشبح لعمه..
ولينا تشوف لولدها..
شويه قدم خطوه..
لينا بفرحه:مشي خطوة..
وجيهه:والله حق!
سفيان؛هي وحده تانيه..
لينا:ديدش...ديدش...
مشي خطوه تانيه..
ضحكوا ..
سفيان:الله يبارك..قولوا الله يبارك..هي وحده تانيه..
لينا:هي ديدش ..
مشي خطوة تالته..
صفقت لينا بحماس وهما قعدوا يبركوا عليه..
بعدين جي بيطيح عمه تلقاه..
سفيان:اسد اسد..
ولينا تشوف لولدها وتضحك بفرح...
وهو يشبح لأمه ويضحكلها..
لينا:ياقلب قلبي ياروح روحي.
وسفيان يشبحلها..
هدا كله كان ع عيون ياسمينه..
سيبت اللي فيدها..وخدت وضعية المرد"الزحف"..
بعدين بدت تنوض..
رتيل:شوفوا ياسمينه..
شبحولها..
لينا:ياروحي..
شويه ووقفت..
وجداها غنت:الزين وقف الزين وقف..
وقعدوا يصفقولها ..
ياسمينه كانت تضحك بفرحه وضحكتها دارت صوت حلو..
بعدين ولت قعمزت...
جتها امها ضمتها وقعدت تبوس فيها.
زبيده:الصغار يحبوك هلبه ياسفيان شوفوا خشته عليهم شن دارت
ابتسم..
وجيهه:سفيان قلبه ع الصغار وحنين هلبه عليهم مافيش عيل يشوفه وما يحباش..
اساور:صح حنون هلبه سفيان..
لينا شبحتلها بحده...
سفيان:باهي ياعيله استاكو ارحجتونا راهو .
ضحكوا...
ربيعه:نشوفوهم عندك يارب..
تعكرت ملامح وجهه وهو يقول:ان شاء الله..
ولينا مشت قعمزت ببنتها جنب رتيل...
واساور وامها ركزوا ع الحركه..
هو من كثر مااضايق..حط بحر وناض وهو يقول:ردي ع الرقم اللي يتصل بيك مرت بوبكر..
لينا هزت راسها بإيجاب..
وهو مشي بيطلع...
وجيهه:خليك اشرب طاسة شاهي.
سفيان :لالا يام ماعنديش ليه جو توا .
ومشي طلع...وأساور ناضت وطلعت وراه..
ولينا تبعتها بعيونها وهي حاسه بالدم في عروقها يغلي..
••اساور:سفيان استنى..
وقف بدون مايشبحلها.
اساور؛سفيان بنسألك.
سفيان:اسألي بسرعه..
اساور:نعرفوا بااللي صار بين رنده وراجلها وهي توا تبي توليله عندكم عادي..
سفيان:هادي حياة رنده وهي حرة فيها..
اساور:لكن راجلها ماينفعش اني بروحي شفته وهو يتكلم مع وحده بالتليفون ويقول في كلام اخي عليها..
سفيان قعد ساكت شويه بعدين قال؛معاش نبي نعيد نزيد فيها الحكايه هادي خلاص توا اللي صار صار وهي بتوليله وتطلع برا البلاد مرة وحده...وان شاء الله خيرتها فيها..
ومشي من حداها..
وهي تشوفله بضيق..بعدين لفت ومشت ولت للدار.
ولينا مازالوا عيونها ع الباب لين خشت..
جو عيونها في عيون اساور..
ابتسمت اساور وقلبت عيونها وقعمزت حدا رنده..
وقرنوا الروس ببعض..
ولينا غيرت عيونها عنهم وهي تحرق من داخل..
🌺🌺🌺🌺
"والله شن بنقولك انتي فاجئتيني"
"لافاجئتك لاسو..تعالي وسعي خاطرك وخلينا نزيدوا نتعرفوا ع بعض"
لينا:مش عارفه شن بنقولك..
"بتقولي باهي وغدوة نراجي فيك ع العشي وتم"
لينا ابتسمت بإستسلام وقالت:خلاص..
"مرحبتين بيك تآنسي وتشرفي"
لينا:تسلمي...
🌺وكملت لينا باقي يومها وهي تفكر كيف حدير معاه في السيارة متأكده انه يبي يتكلم وهي ماتبي تسمع منه شي ولاطايقه تشوفه..
اما هو فكان يرتب في كلام  اعتذار ومبررات يحاول ع قد مايقدر يخليها مقنعه بالنسبه ليها..
وبرغم عدم تأمله في نجاح التجربه بس زي قبل المهم عنده المحاوله...
علاش مهمه عنده المحاوله..لأن تكرار المحاوله حيوصله للنتيجه اللي يبيها..
تكرار المحاوله حيبين للينا قداش هو يحبها...
تكرار المحاوله..حيكون اشبه بقطرات المية اللي تنزل وحده ورا التانيه ع صخر اصم ومع الوقت تشقه..
☘وجي تاني يوم..
الجمعه...بعد العصر..
واقف ع السيارة...بسوريه بيضاء طويله عليها فرمله سودا عليهم كشابيه مفتوحه سودا...
وفيده تليفونه لاهي بيه..
هي كانت ورا الباب...تاخد في استعداداتها..
تماسك...ثبات..ملامح وجه بارده لامباليه...
خدت نفس وقالت بهمس...يارب..
بعدين فتحت الباب..
هو ماباش يشبح للباب..
حول نظاراته الطبيه وركب للسيارة حطهم في االدرج وخدي نظاراته السود ولبسهم..
هي فتحت الباب وركبت بدون ماتقول حتى السلام..
وعيونها القدام بس..
شبحلها وسكروا الباب مع بعض..
بعدين شبح القدام وتنهد...
وشغل السيارة وتحرك....
🌺اول ماطلعوا من الحوش..هي فتحت تليفونها...
وخشت ع برنامج PDF وقعدت تقرا في كتاب منزلاته...
وهو لما شافها هكي فهم انها لاتبي تكلمه ولاتسمعه..
قعد ساكت وماباش يكلمها..بس عيونها مرة مرة عليها..
لعند ماوصلوا لحوش ابو بكر..
وقف بالسيارة وقال:انزلي..
هي حطت تليفونها في الشنطه ونزلت من السيارة..
وهو نزل بعدها..مشي قدامها وقال..خليك وراي..
وقفت وراه وهي تشبحله بإمتعاض..
ع غفله التفت شبحلها..هي طول لفت وجهها عنه..
ابتسم بعدين شبح القدام ورن جرس الحوش..
انفتح الباب..
ابوبكر بإبتسامه:اهلا اهلا..تفضلوا..
وبعد عن الباب..
خش سفيان ووراه لينا قاللها..كملي القدام..
مشت لينا...
وهو جي لصاحبه وسلموا ع بعض كويس..
بعدين دخله ابوبكر للمربوعه الخارجيه..
🌺اما لينا لما خشت داخل..
لاقتها سهيله..
سهيله وهي ترحب:مرحبتين مرحبا آنستي..
لينا بإبتسامه:تسلمي..
وسلموا ع بعض..بعدين دخلتها سهيله داخل..
سهيله:علاش ماجبتيش السنافر معاك..
لينا:مشاغبين بسلامتهم وان سمعت ان بيتك جديد مانبيك تخسرها من اولها..
سهيله بضحكه:مش حيكونوا مشاغبين اكثر من ولدي ومع هدا حتى هو بعته لحوش خواله..
ضحكت لينا..
سهيله:هاتي عبايتك ووشاحك..
حولت لينا عبايتها ووشاحها وعطتهم لسهيله..
سهيله:الله يبارك الله يبارك عليك جسم ماتقولش جبت قبل بكل..الله يبارك..
لينا بإبتسامه:تسلمي..
سهيله:لا مادخليش بيك لازم تعطيني خصوصا اني حامل تاني معناها بنتهشكل..
لينا:الله يبارك.. تشوفيه ع خير ان شاء الله...
سهيله بإبتسامه:آمين..هي تفضلي خل نوريك الحوش..
لينا هزت راسها بإبتسامه..
وورتها سهيله الحوش كله بكل شبر فيه وشرحتلها عنه بالتفاصيل
وبعد كملوا دورتهم قعمزتها في الصاله هدرزوا شويه بعدين جي دور الضيافه...
لينا:فيها مشكله لو خشيت معاك ساعدتك ..
سهيله بضحكه:ابدا تعالي..
ناضت لينا ومشوا مع بعض للكوجينه..
•••••••
في الكوجينه..
لينا:لعند توا مابديت ندور في وحده ثقه نحطها تبيع في المحل..
سهيله:اها...اني عندي وحده نعرفها ثقه وفي نفس الوقت بأمس الحاجه للخدمه ..
لينا؛شن تعرفي عنها؟
سهيله؛كنت نتعامل مع محل حلويات نحب نشري منه هلبه وهي تخدم فيه غادي تبيع..حبيتها وحبيت اسلوبها وخدمتها..بس بعد فترة سيبت فيه الخدمه..وين كلمتها نبي نعرف السبب قالتلي مش مرتاحه في الخدمه غادي...
هي ارمله عندها 5صغار..تخدم الصبح مدرسه والعشيه كانت تخدم في الخدمه اللي قتلك عليها لين سيبتها وبدت ادير في فطيرة وتبيع..مسكينه تسكن في حوش اجار..رغم انها ع ايام راجلها كانت عايشه في حوش سياح نياح..
لينا:وليش ماقعدت فيه عندها 5صغار!؟
سهيله:هو مش كاتب الحوش لصغاره...الحوش ورث..نطوا بوه وخوته قالوا نبوا حقنا..
لينا بصدمه:حتى باته!؟
سهيله:ايه..تصدقي لزوها منه وباعوه وعطوها حقهم اللي هو فتافيت مايدير شي..وكلت امرها لله وقعدت في حوش بوها...وطبعا هي بوها كان متوفي وامها عايشه..قعدت معاهم ومع خوتها العزارة وعانت الامرين غادي كانوا مش متحملين صغارها وديما يضربوا فيهم ويعاركوا وهي تبلع وتسكت المهم تقعد في حوش آويها..ممكن بعد عامين حسب ماحكتلي..خوتها تزوجوا وسكنوا بنساوينهم في الحوش وبدت المشاكل....وبسبب مشاكل قرروا خوتها يطلعوا في حوش ايجار..
لينا حطت يدها ع خدها وهي مصدومه..
سهيله وطلعت مسكينه لحوش ايجار..دفعولها ايجار 6شهور مقدم بعدين قالولها دبري راسك..
لينا:وعمامهم وجدودهم معقوله هكي نسوا عويلتهم!؟
سهيله:سالتها نفس السؤال..قالتلي كان انتي ريتيهم اني ريتهم..مسكينه قعدت عايشه متمرده وهي تخدم بش توكل صغار وتدفع حق ايجار الحوش قالت مرات ماناكلوش بش نوفروا حق الايجار..
لينا:لا إله الا الله..ماعندهاش خوات..
سهيله:لا عندها قالت بعد وين ووين بش يجوا يشوفوها شن بيديرولها مسكينات ماعندهم مايديروا..كثر الله خير خوتها كان في الشهر مرة خشوا عليها بشيشتين زيت وحكه طماطم وشويه خضرى..
لينا:كيف خوتها يرضوا لاختهم مرة تقعد بروحها كيف!؟
سهيله:في وقتنا هدا معاش تستغربي شي..تصدقي قالت عندي صاحبات كلهم قطعوني بعد ترملت قالت خافوا ع رجلاتهم..برغم انها مش قنينه هلبه والعيشه اللي عايشتها كبرتها سنين يعني مافيها مايغري الراجل ع قولتها..ومع هدا كلهم قطعوها حتى بالتليفون مايسألوش..
لينا؛خيي ع الدنيا خيي وع الناس خيي..
سهيله؛ومازال ياما مدسوس مآسي احرف من هكي..وخدت الصفرة وطلعت بيها بتمدها لراجلها..
وخلت لينا تحت تأثير القصه اللي سمعتها واسقطتها ع وضعها...وطلعت معاها تلقائيا بهمس كلمه...
الحمد لله...
بعدين خدت السفرة اللي قدامها وطلعت بيها من الكوجينه...
🌺🌺🌺🌺🌺
الساعه 9:30ليلا..
فم الباب..
سهيله:عاوديها..
لينا:لا المرة الجايه انتي تعالي..
سهيله بضحكه:إن شاء الله..
لينا:هي تصبحي ع خير..
سهيله:قدامك كل خير..
ومشت لينا نزلت من الدروج وطلعت برا..
ابوبكر شافها طالعه وخر عن السيارة وحيا صاحبه ومشي..
وهي مشت طول ركبت السيارة..
دار سفيان كلاكس لصاحبه وحياه بحركة اليد وتحرك..
وابوبكر ردله التحيه وخش سكر الباب...
ورجعت لينا فتحت تليفونها من جديد ودارت نفس الشي..
وهو قعد يشبح للطريق ويسوق...
وبعد شويه..درس ع اليمين ووقف...
هي قلبها بدي يدق بسرعه..
هو شد الدومان بإيديه الزوز..بعدين طلقه وربع ايديه وقال:عارف الغلطه اللي غلطها كبيرة مش صغيره وشن ماديري معاي شويه فيا..شبحلها وفك ايديه وقعد يتكلم بيه..
لكن انتي تعرفيني وتعرفي طباعي..طباعي الزفته ونعترف..خنايسي مغيار بزياده عقليتي صعبه شن بندير اني هكي..وبعدين انتي حتى انتي غلطتي مفروض من البدايه حكتيلي كل شي انتي حتى عن خدمته معاك زمان ماقلتليش..وتجيني رساله فيها دوة اطلع الواحد من طوره وين نمشيلك بش نفهم منك ويعلم الله اني حالتي كيف كان شكلها نجي نلقاك واقفه عليه..شن تبيني نفهم!؟
رفعت عيونها للطريق وعقدت حواجبها وقعدت ساكته..
تنهد وقال..تمام اني غالط اني بس اللي غالط والغلط راكبني من رجليا لقبوعة راسي..شن تبيني ندير بش ترضي قولي..
ولا كلمه ولا اي ردة فعل ولاكأنه في حد حداها يدوي..
شد ع قبضة يده اليسار وقال بنبرة حنونه:لينا اني نحبك ونموت فيك وانتي تعرفي...مش متحمل العيشه وانتي بعيده عليا افهمي وحسي وقدري ارجوك..
ع نفس وضعها ظاهريا...لكن من داخل.. قلبها يرفرف بين ضلوعها....والمشاعر تحركت بقوة...
سفيان:اني راجل نعرف نتعلم من غلطي كويس وثقي وتأكدي ان تعلمت درس عمري ماننساه...
وللأسف ماتجاوبتش معاه حتى بالنظر..
ضم شواربه لداخل بضيق..بعدين تنهد من وسط قلبه..شبح للطريق وشغل السيارة وتحرك..
وهي رجعت تشوف لتليفونها ع اساس تقرا..بس اللي صايره فيها حاليا مخليها مش قادره تركز..
برغم اللي تحس بيه..الا انها مابتش تضعف بكل وتتجاوز اللي داره بسهوله...لان الراجل لما تتفوت اخطائه بدون تأديب مستقبلا حيتمادي بأكبر منها..ولينا لتوا شايفه ان سفيان يلزم تأديب اكثر من هكي يش يقدر حجم الغلط اللي غلطه في حقها..ومايتجرأش يفكر يعاوده مرة تانيه...
واستمر الصمت سائد في الطريق..
وهو مايبيش يبطل محاولات...
درس السيارة ووقف قدام محل ونزل منه..
هي شبحتله وهو خاش للمحل..بعدين ردت عيونها للتليفون..
وشويه وهو طلع..
ركب سيارة وفي يده كيسه فيها بوكس كيكات مغلفه يحبوه الصغار وهي تحبه اكثر منهم وتحب تاكله معاهم..
هو حط البوكس قريب منها وقال:للصغار قالت امي متاعهم تم اليوم..
وهو لاتم ولاشي يألف من راسه وهي عارفه..
هي دفت الكيسه شويه لين جت بينها وبينه ورجعت كملت قرايه في تليفونها..
هو كان حيفقد اعصابه..بس شدهم بقوة لأنه مالاش اي حق يتذمر من الوضع اللي جابه لروحه..
وقعد ساكت طول طريق..
لين وصلوا للحوش..
لما درس السيارة...نزلت وخلت الكيسه فيها ومشت خشت للحوش..
هو غمض عيونه يحاول يهدي نفسه..بعدين خدي الكيسه ونزل...ومشي خش داخل...
🌺وبعد ساعات..
لما حل السكون..ونامت العيون..
قعدت عيونه هو سهرانه يتفرج ع شيشة الخمرة "بضم الخاء" متاعها وخاتم الزواج..اللي كانوا محطوطات ع الكامدينو...والتنهيدات تطلع منه تنهيده بعدها تنهيده...
بعدين خدي تليفونه وبدي يكتب في الرساله...
🌺لوطا..
هي كانت اطبطب ع بنتها ترقد فيها..وعقله سارح بتفكيره..
تفكر في المراة اللي سمعت قصتها وعندها رغبه تشوف ظروفها عن قرب وتعرف مدى معناتها..
شويه رن تليفونه بنغمه رساله..
تأففت وقالت؛مايملش..
خدت التليفون وفتحت الرساله..
قل لي يا كل كلي..
من لي؟ ان لم تكن نوري وظلي..
اذا هجرت من لي ومن يجمل كلي..
ومن لروحي وراحي يااكثري وأقلي..
احبك البعض مني فقد ذهبت بكلي..
ياكل كلي كن لي إن لم تكن لي فمن لي؟
ياكل كلي واهلي عند انقطاعي وذلي
مالي سوى الروح خذها..والروج جهد المقلي
🌺تلقائيا وبدون ماتحس ارتسمت ع وجهها ابتسامه وعيونها تعبوا دموع...وقلبها من قوة النبض كان مسموع..
بعد ماكملت قرايتها انتبهت لروحها..فيسع خفت ابتسامتها وبدلتها بملامح القسوة وقالت في نفسها..
"ردي بالك تضعفي يالينا..اللي قاله مايخليك تنسيه كم بيت شعر واعتذار..."..
حطت تليفونها تحت المخده وغمضت عيونها وبدت تقرا في الأذكار...
💎💎💎💎💎
ولن تتوقف المحاولات..بل تتوالى..
تاني يوم..
سفيان؛انت قول انه منك انت وانت اقترحت عليا الفكره..
الشريف؛نكذب ع اخر عمري..!
سفيان تنهد وقال:حاشاك بوي..خلاص مش لازم تقول انها فكرتك قول ان المحل منك وقوللها لو رداته عليك انت حتزعل..رفع حواجبه وقال..حتزعل اكيد؟!..
ابتسم بوه وهز راسه وقال:باهي..لكن حالك انت وياها لامتى بيقعد هكي؟!..تبيني نخش بيناتكم.
سفيان:لا بوي ربي يحفظك نبي الموضوع يقعد بيني وبينها وسامحني اللي دخلتك في مواضيع زي هادي..
الشريف:مشكله..كان بترطب بيناتكم نخش فيها..
سفيان ابتسم وقال:ربي يطول في عمرك ع طاعته..
••••••••••
الشريف؛وهدا المفتاح متاعه يابنتي تقدري في اي وقت تمشي تشوفيه..
خدت لينا المفتاح وقالت بإحراج؛بارك الله فيك عمي وربي مايحرمنا منك..
ابتسم الشريف وقال:عندي بقدر بناويتي..ولو عندك حق مع سفيان ناخده..
لينا:لا ياعمي مشكله عاديه انت اكبر من انك تخش فيها نحلوها بين بعضنا..
الشريف؛حتى هو قال هكي..مادام هدا قولكم ماعندي مانقول غير ربي يهدي سركم..
ابتسمت مجامله وهزت راسها بإيجاب..
🏵🏵🏵🏵🏵
تاني يوم..
من الصبح...
رنده ودعت بوها وخوها سفيان..بس مروان كان مازال مقاطعها ورافض يشوفها..
ودعتهم الصبح لأنهم مش حيكونوا موجودين لما بتروح..
وجت الساعه 11 واتصل بيها راجلها وقال انه مستنيها بداية الشارع..
رنده؛وعلاش في أول الشارع؟!
"مانبيش نحتك بخوتك"
رنده:مافي حد في الحوش..
"معليشي حبيبتي سايريني هالمرة بالله عليك"
تنهدت رنده وقالت:غير بنرفع معاي شنطة حوايج  صغيرة كان هدا مستحيل نجيك بدايه الشارع..باي..
وسكرت..
بعدين طلعت ببنتها من دار اختها والشنطه فيدها..
سلمت ع اهلها بحراره..
امها واختها وحناها..ومابتش تعبر نساوين خوتها..
بس منى جت سلمت عليها..
بعدين طلعت من الحوش..
وقعدت تمشي مسافه وبنتها في حضنها وشنطتها في يدها..
وفي من شافها وهي طالعه..
لين وصلت اول الشارع شافت سيارة اول مرة تشوفها وسمعت صوت الكلاكس متاعها..
قدمتلها وهي مستغربه علاش مانزلش منها..
طقت المرش..هو نزله وقال:حطي الشنطه لتالي وتعالي اركبي..
هي :وعلاش ماتنزلش..
محمد:رنده حبيبتي من اولها مشاكل!
رنده؛باهي خلاص..ومشت فتحت الباب الخلفي حطت الشنطه..
بعدين مشت ركبت جنبه .
محمد بإبتسامه:واخيرا حبيبتي..
ميرال قالت؛بابا..
هو قال :ياروح بابا...وخداها وحطها ع رجليه وبدي يسوق وهي ع رجليه..
وطول الطريق يتغزل في رنده ويرضي في غرورها..
لين وصلوا للفندق....
قعدوا في الغرفه متاعهم وماطلعوش منها...لتاني يوم...
🏵🏵🏵🏵
رنده:امتى الطيارة هي..
هو لبس ساعته وقال؛لا مازال ساعتين انتي خشي دوشي وخودي راحتك..
رنده:تمام..ومشت خشت للحمام..
حوالي دقيقه...
هو طول مشي خدي بنته..وخدي شنطه رنده ومشي بيطلع من الغرفه..
من الحمام..
"محمد قوللهم يجيبوا الفطور"
محمد؛حاضر حبي..حاضر..
ومشي بهدوء للباب نزل الشنطه وفتح الباب بهدوء..ومشي طلع بالشنطه بعدين وسكره..
ومشي بسرعه ركب الأصانصير ونزل لوطا..
وطلع من الفندق..بدون مايوقفوه لان الحساب مدفوع..
كانت في سيارة تاكسي تراجي فيه برا..
ركب فيها هو وبنته وقال للسواق:للمطار..
وتوجه بيهم السواق للمطار..في نص الطريق وقفه محمد وقال:راجي شويه...
نزل ببنته وفي يده الشنطه مشي لوحها في المكب..
بعدين ولى للسيارة ركبها وتحرك بيهم طول...
وصلوا للمطار..
نزل ببنته وخش داخل لقي واحد يراجي فيه..
محمد:هاه شن صار..
:شحنولك الشناطي..
محمد:منور..وطلع مبلغ باهي ومدهوله وقال..لانعرفك لاتعرفني..
:تم..
ومشي محمد ببنته وهو يقول؛ياروح بابا..لاعاش اللي يحرمني منك ولايكسر خشم بوك...
🍁وماهي الا دقايق وكانوا في الطيارة االلي طارت بيهم لوجهه رنده ماتعرفهاش ولا في حد يعرفها غيره هو...
وهادي كانت المرة الاخيره االلي تشوف فيها رنده بنتها....

يتبع …
الفصول الاربعة