#شكولينا
#الجزء_41 "القسم الأخير"
#الجمان_الفريد
عماد حياة المسلم..واكسيرها الصلاة..
واول شي يتحاسب عليه..لاخير في عمل يلهي عنها..
صلوا صلاتكم...بعدين ديروا اللي وراكم...
وقولوا لاإله إلا الله بقلب سليم طاهر تفلحوا❤
🌾صلوا على غيث القلوب وريها
خير الخلائق رحمة الرحمن🌾
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
"نوريه...اني حامل.."
نوريه بصدمه:حامل!!؟
ورنده تبكي..
قعدت نوريه تشبحلها وهي مصدومه بعدين قالت:امي ماتعرفش؟!
رنده ببكي:مافي حد يعرف غير لينا..
نوريه:لينا!
رنده؛كانت معاي في العياده وهي اول من عرف وهي اللي خبرتني..
نوريه حطت الطاسه ع الكامدينو وهي تفكر بعدين قالت:مفروض كلهم يعرفوا حتى هداكا الكلب..
ورنده زادت في البكي..
نوريه:لازم يعرف يارنده حتى الدين هكي يقول..
رنده ببكي:ماهو انتي مش عارفه..
نوريه عقدت حواجبها بخوف وقالت:شن هو اللي مش عارفاته!؟..
رنده حاولت تهدي بكي وبدت تحكي لأختها في كل شي صار من اللي مدرق عليهم بالتفصيل..
خبطت نوريه بيدها ع خدها وقالت؛نهار أحرش!..
رنده ببكي:يعني توا لو عرف شن بيقول..حينكر طول يانوريه ..
نوريه غمضت عيونها بشده وقالت؛نبيهاله كبيرة مش صغيره ياربي جعنه يلقاه ويتلقاه..
ورنده تبكي..
نزلت نوريه يدها وفتحت عيونها وقالت:من يعرف تاني بالقصه اللي حكتيهالي؟
رنده؛خوتك ولينا..
نوريه:حتى هادي تعرفها لينا وحني خواتك لا؟!
رنده؛مش هدا المهم توا يانوريه..اني نبي نعرف كيف ندير..نفكر نجهضه لكن خايفه تصيرلي حاجه وربي يحاسبني..
نوريه شبحت ليد اختها اللي حاطتها ع بطنها وقالت:لازم الكل يعرف بش نعرفوا كيف نتصرف..
رنده:خايفه..
نوريه تنهدت وناضت ومشت طلعت من حداها..
ورنده بدت تكح وهي تبكي..وقلبها بيوقف من التوتر والخوف...
🍁🍁🍁🍁🍁
خش عليها لقاها رافعه الدبش في السله وبتركب تنشره..
جاها وقال:طيب فيك اللي غسلتيهم..
عفاف:اللي يسمع يقول اول مرة نغسل دبش..
عبدالصمد:باهي خليني من الدوة الفاضيه وقوليلي..معاش كلمتي ماليك؟!
عفاف؛علاش شن تبي منهم..
ابتسم بتهكم وقال:نبي نطمن عليهم بس..
شبحتله شويه بعدين خدت السله ومشت بتركب بيها الدروج..
هو لحقها وقال:شن رايك نرفعك تهدرزي شويه..
عفاف وهي تركب الدروج:ماخاطريش..
هو :غريبه قبل كان تلقي تقعدي عندهم اقامه..
عفاف قعدت ساكته وهي تركب..
عبدالصمد:باهي قولي شن حال اختك روحت للكويت..
عفاف وصلت للمستراح وجت بتكمل ركوب وهو وترها بأسئلته واسلوبه اللي يبين انه عارف شي..
من التوتر ماانتبهتش ع رجلها اللي جت في النص مابين الدروج الاول والتاني من برا...
عيطت وجت طايحه..
وهو من الفجعه مشالها يجري...لكن مالحقش..
وهي لحسن الحظ جت طايحه ع كتفها بالجنب..
ومن الخوف فقدت الوعي...
🍁🍁🍁🍁
"والله حرجان منك بجديات ياسفيان اقسم بالله"
سفيان؛في النهايه عرفت..
ابوبكر:بعد شني!؟ علاش صحاب حني قولي كان ماوقفناش مع بعض في مواقف زي هادي..شن لزومها الصحبه من اصلها كان مالقيناش بعض في الشده..
سفيان تنهد وقال؛عندك حق..آسف..
ابوبكر قعد ساكت وهو مضايق..
سفيان:خلاص اهو ناديتك وحكيتلك..
ابوبكر:بعد شني ياسفيان..اني وين تصير معاي حاجه نكلمك انت قبل خوتي تكون معاي من البدايه لين تنحل مشكلتي وانت بعد ماخلاص جبتني تحكيلي زيي زي أي حد براني..
سفيان؛اني قاعد في عز المشكله..
ابوبكر عقد حواجبه وقال:والكلب هدا وينه توا؟
سفيان:مافي حد عارفله طريق وماليه ماقالوش وينه..
ابوبكر:ترفع عليه قضيه حضانه ونفقه وطالب بحقوقها..
سفيان:محاكم وفضايح..
ابوبكر:فضايح شني هدا حقها..وبعدين فكك منها العقليه المتخلفه هادي ياراجل الطلاق مش عيب ولاحرام..
تنهد وقال؛مش هكي ياابوبكر الموضوع معقد شويه..
ابوبكر:مهما كان معقد ينحل..عندي قريب زوجتي محامي متخصص في القضايا هادي شاب صغير صح لكن ممتاز ياسفيان والله في نساوين وصلوا فيهم رجالتهم بقضايا شرف هو طلعهم منها وجابلهم حقهم وحبس حتى الكلاب اللي طعنوا في شرفهم..
سفيان قعد يسمع في كلام ابوبكر وهو يفكر....
ابوبكر:نكلمهولك؟
سفيان وزع نظره قدامه بعدين شبح لصاحبه وقال:نشوفها هي قبل ونرد عليك..
ابوبكر:والله لو منكم نجبرها ترفع القضيه وتمرمده الكلب هدا..
هز سفيان راسه وقال:يصير خير إن شاء الله يصير خير..
🍁🍁🍁🍁
"حامل!"
نوريه:ايه يام حامل.
وجيهه بصدمه:وليش هدا وين تقول؟
نوريه؛امس بس عرفت يام والوضع كان ملخبط ماقدرت تقول شي..
وجيهه:باهي كيف يصير توا؟!
نوريه:لازم يعرفوا بوي وخوتي..
وجيهه:بوك بيقعد مع حناك في حوش عمتك ربيعه يومين تلاته..
نوريه:سيوره يعرف..
مسحت وجيهه بيدها ع وجهها وقالت:مش امتى بيفرج ربي..وهي غير ماتزيد ضيق اكثر واكثر..حاسه روحي انخنقت..
وبدت تبكي..
نوريه ناضت وجت حدا امها وضمتها وهي تقول؛سيورها تفراج يام سيورها تفراج..
ووجيهه تبكي في حضن بنتها بألم..
ورنده كانت واقفه ورا الحيط تسمع فيهم وتبكي بصمت...
بعدين مشت خشت للدار..
قعدت معاها رتيل بعيونها لين رجعت تمددت ع السرير وعطتها بالظهر..
ورتيل تنهدت بحزن ورجعت تشوف لكتابتها وتحاول تركز ف قرايتها..
وفي دار اللي حداهم..
كانت لينا مقعمزة مع صغارها وهي مسكرة عليهم الدار وتلعب معاهم...
بس عقلها مشغول...
لينا:شويه ماماتي هي..
بعدت شويه وطلعت تليفونها وخشت ع الماسنجر لقاته فاتح النت..
قعدت متردده تبعتله رساله..بعدين خدت قرار..
وكتبت وبعتتله..
•••••••
قدام السيارة..
سفيان؛سامحني بوبكر بالله عليك..
ابوبكر؛خليني ننسى قبل بعدين نسامحك..
ضحك سفيان ..
ابوبكر بضحكه:نشوفك ع خير...
سفيان:ان شاء الله..
ابوبكر:اي شي يصير طول كلمني طول..ولا ليش نراجيك لين انت تتصل اني نتصل بيك..
ضحك سفيان وقال:باهي لكن راهو كان نفختهم بنحطك في الحظر..
ابوبكر:تحط عينك..ومشي ركب سيارته...
وسفيان ركب سيارته وهو يضحك..
شويه سمع صوت نغمة رساله الماسنجر..
طلع التليفون من جيب البالطو..
وشاف الرساله..
(سافيوش)
ابتسم وبعت..
(شكولينتي)...
قعد يشوف فيها تكتب وطولت..
حسها وكأنها تكتب وتمسح..
ضحك ضحكه خفيفه...
شويه جاته رساله..
(شن جو)
سفيان بضحكه:وفي الاخير شن جو!
شافه ابوبكر وهو لاهي بتليفونه ويضحك ابتسم وقال:باهي اللي عشت وشفت هالأيام..بعدين ضحك..وحرك السيارة ومشي...
وسفيان يكتب في رساله للينا..
بعدين بعتها.
(تمام الحمد لله)
(قريت الأذكار)
ابتسم وبدي يكتب..
🌺جتها الرساله..
(ايه..وقريت حتى الورد)
ابتسمت وبعتت..
(حلو ❤)
وهو رد عليها
(👍)
لينا؛شكله مش فاضي..
بعدين بعتت...
(باهي بتعطل )
شويه وجتها رساله..
(لابعد صلاة العشي مروح)
لينا قرت الرساله ومعاش بعتت..حطت التليفون ع تركينه لما جاها بحر ..
لينا بضحكه؛شن تبي يادحناس..وقعد يضبط فيها وهي تحضن فيه..
بعدين جتهم ياسيمنه..
لينا:هي تعالي بنوتي..
وقعد سفيان يبعت في الرسايل وهي ماتردش..
سفيان:اشبح في شن لهت..تنهدت بعدين حط التليفون قدامه وشغل السيارة وتحرك..
🌺وهي خشت عليها نوريه..
سكرت وراها الباب وقعمزت قدامها..
نوريه؛ماقالش سفيان امتى بيروح؟
لينا:قال بعد صلاة العشي..
نوريه قعدت ساكته شويه بعدين قالت:بما إن عندك علم باللي صار..شن تقولي فيه؟
لينا تنهدت وقالت:شن بنقول واضح انه انتقم منها..ماتنسي اللي دارته فيه..
نوريه:يعني مش مصدقه ع رنده انتي؟
لينا؛شن تقولي يانوريه اكيد لا..
نوريه:واكيد ماطلعتي اللي صار مع حد..
لينا تنهدت وغمضت عيونها بنفاد صبر وهزت راسها بإيجاب..
نوريه؛لاحبيبتي ماتتنرفزيش من حقي نحرص عليك ونزيد نبهك..راهو لو اسرار هالحوش تطلع منه تطلعي حتى انتي..
لينا مابتش تشبحلها قعدت اطبطب ع صغارها اللي بدي النوم ياخد فيهم النوم..
نوريه:عاد اكيد نكتي الشكارة لسلفتك انتم الزوز راسين في شاشيه..
لينا شبحتلها وقالت:علاش انتي اطلعي في اسرار هل دارك للناس وتهدرزي بيها هنى وغادي!؟
نوريه:مش اني اللي نديرها..
لينا؛حتى انا مانديرها مش انتي بس اللي طالعه من حوش ناس ومتربيه كويس وتعرفي الاصول..
نوريه رفعت حاجبها وقعدت تشبحلها من فوق للوطا..
لينا غيرت عيونها عنها وهي مستاءة وقعدت تشبح لصغارها وهي اطبطب عليهم..
نوريه:ع العموم اني حذرتك..وقد اعذر من انذر..
وناضت مش طلعت من حداها..
لينا بضيق؛استغفر الله العظيم واتوب اليه..
بعدين خدت تليفونها وشافت رسايل سفيان..
(ديريلي عشي قنين نبي نتعشى فوق اليوم)
ابتسمت...وقرت.
(وينك)
(#شكولينا)
(👍)
ضحكت بعدين جت بترد عليه لقاته مسكر ردت التليفون في مكانه..
وشافت لصغارها لقتهم راقدين..
ناضت حطتهم في مكانتهم وغطتهم كويس..
ومشت طلعت بش تتوضا لصلاة المغرب..
🍁🍁🍁🍁
بعد صلاة العشاء..
روحوا سفيان ومروان للحوش..
لقوا نوريه تستنى فيهم...
حطتلهم العشي تعشوا...بعدين فتحت معاهم موضوع حمل رنده..
سفيان قعد يشبحلها وهو مصدوم..
ومروان قال بصدمه:كيف!!؟
نوريه بحزن:الله غالب هدا اللي صار توا..
مروان قعد ساكت وهو يشبحلها..
وسفيان قعد يفكر في اللي بيصير بعدين..
"مايقعدش"
التفت وشبح لمروان بصدمه اكبر..
مسح مروان ع لحيته بعصبيه وقال؛نعرف دكتورة عندنا غادي ماشاء الله عليها.
قاطعها سفيان بغضب وقاله؛شن تقطف انت ضم فمك ضم..
مروان:شن انت مش عارف شن بيصير بعد هالمصيبه..
سفيان؛شن بيصير لازم بوه يعرف بعد يعرف هو يحدد مصيره..
مروان ضحك بسخريه وقال:تتكلم وكأنك ماتعرفش..ماتعرفش شن هو اللي بيقوله لما يعرف..
سفيان فنص واشرله بعيونه ع نوريه..
مروان شبح لنوريه..
نوريه تنهدت وقالت:نعرف حكتلي وفاهمه انت من شن خايف يامروان..
شبحلها سفيان...
نوريه:اني نقول لازم يعرفوا اهله..
سفيان؛وهدا اللي نفكر فيه..
مروان:وهو حيعترف بيه ويقول ولدي بعد الفيلم اللي داره..
سفيان ونوريه قعدوا ساكتين..
مروان؛كان جابت العيل ع اسم مني يتسجل!!؟
هما مش قادرين يتكلموا يسمعوا وصدورهم ضيق اكثر واكثر..
مروان؛مافيش حل غير اللي قلت عليه وبالمرة تفتك منه بكل ومعاش يربطها بيه شي وربي يعوضها خير في بنتها..
سفيان تنهد ومسح بايديه ع وجهه بعدين شبكهم في بعض وقال؛ناديهالي يانوريه نبي نكلمها بروحها..
نوريه حطت ايديها ع ركابها وناضت ومشت طلعت من حداهم..
سفيان شبح لمروان..
مروان تنهد وهز راسه بعدين مسح ع لحيته وناض طلع..
••برا....
في دار التقعميز لينا مقعمزة ومربعه ايديها تشوف للتليفزيون..
شويه شبحت للباب شافت رنده فايته ونوريه وراها..
تنهدت بعدين رجعت شافت للتلفزيون..
وصلت رنده في المربوعه وخشت..سكرت نوريه الباب..
ومشت خشت للدار اللي حدا المربوعه..
كانت موجوده فيها امها..شافتها واقفه تتفرج ع صورة عدنان..
نوريه:يام..
مسحت وجيهه دموعها وشافت لنوريه بعدين قالت:شن صار..
نوريه جتها وربعت ايديها وهي تقول:مروان يبيها تجهضه.
وجيهه:وسفيان..
نوريه:قال يبي يكلمها بروحها..
وجيهه تنهدت ورفعت عيونها وقالت:يارب استرنا بسترك فوق الارض وتحت الارض ويوم العرض وماتشمت فينا عدو ياربي..
نوريه بضيق؛يارب..
🍁🍁🍁🍁
"مش عارفه..اني خايفه ياسفيان"
سفيان؛من شن خايفه؟ مادرتيش غلط..وربك اعلم بكل شي..
رنده ودموعها ينزلوا:باهي لو نكره اني كيف ندير بعدين؟
سفيان:في الف طريقه وطريقه تثبت انه ولده..
رنده نزلت عيونها وهي متحشمه من خوها وكان تلقى الارض تنشق وتبلعها..
سفيان:شوفيلي هني..
قامت عيونها بالسيف وشبحتله..
سفيان:حني حنخبروهم ولو كانت ردة فعله هي المتوقعه..حترفعي عليه قضيه اطالبي فيها بحضانة بنتك وحقوقك كامله وحتثبتي قانونيا انه العيل ليه هو..
نزلت عيونها تاني وهي تبكي بخجل وقهر وقالت:معناها فضيحه..فضيحه كبيره..
سفيان:بش مايضيعش حقك ولاحق العيل ويعيش بوه ناكره وضعك وقتها حيكون اصعب..وقتها بس حتولي فضيحه..
رنده؛اني نبي نطيحه..
سفيان:تقتلي روح بريئة من غير وجه حق!؟
رنده وهي تزيد توطي في راسها خجلا وتبكي:مجبورة مضطرة ياسفيان...
سفيان قعد يشبحلها شويه بعدين:خودي وقتك وزيدي فكري اني حاليا مش حنقول شي لحد لين تزيدي تفكري..ومش تفكري في انك تخلي العيل ولا لا..هدا امر مفروغ منه ماتفكريش في انك ديري شي ينزل عليك غضب ربي..اني نبيك تفكري في حكايه القضيه....وحطي في راسك ديما اني وراك ومش مخليك بكل..
هي هزت راسها وقعدت تمسح في دموعها وترشف...
سفيان:نوضي خشي..
ناضت ومشت بتطلع..
وسفيان معاها بعيونه شاف اخته قداش تبان مكسورة..
منظرها يوجع القلب حزنا عليها ويفور الدم من الغضب ع حالها...
خطر عليه كلام لينا وزاد حس بالمسؤوليه تجاه اخته ويبي يجيبلها حقها بأي شكل...
ناض..
ومشي طلع من المربوعه من بابها الخارجي..
شاف مروان مقعمز برا ويبان سرحان حس بأن صاير معاه شي هو ومرته..
تنهد بضيق بعدين مشي بيركب لشقته..
ومروان اللي كان سرحان خدي تليفونه وحط ع رقم منى وقعد يشبحله..حاول يتصل بيها...
بس شعور بالخجل من نفسه منعه..حاول يبعتلها رساله بس ماعرفش شن يكتبلها فيها...تراجع..
حطه في جيبه وتنهد بحزن ومسح بيده ع شعره وهو يمرر في نظره قدامه..بعدين ناض ومشي بيركب لشقته حتى هو...
••داخل••
طلعت نوريه من دار التقعميز وهي لابسع بالطو ووشاح ومشت لأمها وهي تقول..
نوريه:هي بالسلامه يما توا..شدتها وباست راسها وهي تقول..تو تفرج يام وكلي الأمر لله..
وجيهه:حسبي الله ونعم الوكيل..
نوريه:هي تصبحوا على خير..
ومشت نوريه بتطلع وامها معاها تسقد فيها..
وفي دار التقعميز..
لينا كانت تفرش ليها ولصغارها وعزوزتها..
شويه خشت عليها وجيهه وقالت؛شن ديري..
لينا؛نبي نبات حداك الليله..
وجيهه:لا بنيتي بري اركبي باتي في شقتك اني بنبات مع رنده في الدار..
لينا؛مرات تحتاجوا لحد معاكم..
وجيهه:صحيتي بنتي..مكانك حدا راجلك توا هو محتاجك اكثر منا..خودي صغويرتك واركبي..
هزت لينا راسها وقعدت ساكته..ووجيهه مشت خدت بطانيتها وطلعت من الدار وهي تقول:تصبحي على خير..
لينا:قدامك كل خير...
بعدين تنهدت وشافت لصغارها وقالت شن بيرفعكم انتم تو..
ومشت خدت تليفونها واتصلت بسفيان..
هو كان بيخش للحمام..
سمع تليفونه مشاله..
خداه وشاف المتصل رد طول..
سفيان:هاه لينا...
"نبيك تجي ترفع مع العويله فوق"
سفيان:راجي 5دقايق٠٠٠.
"تمام"..
🌺سكرت وقعدت اضم في الدار وتحول في الفراشات..
بعدين قعمزت وقعدت تستغفر...
لين خش عليها هو وقال:هي وينهم..
لينا:اهم..
قدم وجاهم رفعهم هما الزوز وهي ساعداته بعدين قال:بري اشربي مية..
لينا:هي شويه بس..
ومشت لبست بالطوها بعدين طلعت للكوجينه...
وهو مشي طالع يراجي فيها..
شويه وجاته وقعدت تغطي في الصغار كويس..
ومشوا طلعوا مع بعض..
🌺🌺🌺🌺
في الدار النوم..
"قصدك انتي تعرفي من هداكا الوقت وماقلتيش؟"
لينا:ماقدرت نقول..حسيت ان هي اللي مفروض تحكي بروحها..
غير عيونه عنها وتنهد بضيق وقعد ساكت..
وهي تشوفله..
شبحلها وقال:اليوم تلاقيت اني وابوبكر كلمني ع محامي يعرفه قعد يشكر فيه قال انه متخصص في القضايا هادي..
لينا:تبيها ترفع عليه قضيه..
سفيان؛ايه..عارف العواقب لكن مش حتكون اصعب من انها تجيب عيل بوه ناكره
لينا:ومرات لما يعرف يولي لعقله
حرك راسه بالنفي وقال:لا يالينا لا...واحد زي هدا لايمكن نرضى لأختي تولي تعيش معاه ولاهي ترضى من الاساس..مازال تأمنله بعد اللي داره!؟
لينا:اقل شي ماينكره ويسجله ع اسمه..
سفيان وهو يفكر:ماأعتقدش واحد زيه اني غاسل ايديا منه..
سكتت لينا وهي تفكر..
سفيان؛ع العموم اني مخليها عليها اللي تبيه هي يصير..
لينا:إن شاء الله خير..
سفيان:إن شاء الله...
سكتوا شويه بعدين هو قال..
سفيان؛ماكلمتكش مرت مروان ولاكلمتيها؟!
لينا؛لالا ليش..
سفيان؛مش عارف حاس في شي صاير بيناتهم..
لينا:حتى انا مانعرفش بالزبط بس هي واخده موقف قوي..
سفيان عقد حواجبه وقال؛قالتلك حاجه..
لينا:امم..قالت انها وصلت للنهايه مع مروان..
ساوا سفيان تقعميزته وقال بنرفزة:قوليلها تصلي ع النبي الحكايه مش ناقصه..
لينا:المراة عندها حد لطاقة تحملها ووصلتله سادها ماجاها.
سفيان:غير شن هو اللي جاها وشنو هو اللي راته ماعاشتش ربع اللي عاشاته رنده..
لينا زادت تنرفزت؛وانت شن دراك باللي عاشاته...ولا مافي حد يحس كان خواتك..
سفيان:شن الأسلوب اللي تكلمي فيا بيه هدا!؟
لينا:شوف روحك كيف تحكي كلامك مستفز واجد..
سفيان؛وبشن وصلت فيك بش نستفزك..
لينا:حالي من حال منى كنه كيفي كيفها وانا اللي نعرف هي شن عاشت...طيب فيها اللي عندها هل كان هدى انظر شن صار فيها.
سفيان قعد يشبحلها شويه بعدين قال:باهي شكرا..بارك الله فيك..
ونزل من السرير ومشي طلع من الدار وخبط باب الدار وراه بقوة..
هي قعدت مربعه ايديها ومعصبه...
وشويه خفت عصبيتها واذكرت كيف كان اسلوبها معاه والوضع اللي يمر بيه ندمت هلبه..
حتى لو غلط في كلامه كانت مفروض تعرف كيف تتكلم بدون ماترقى معاه في الدوة وتجرحه بالكلام..
وهو مش ناقص..
مفروض يلقى راحته عندها هي..
تنهدت بضيق..
بعدين ناضت خدت البطانيه من ع السرير ومشت فتحت الدار وطلعت..
مشت للصاله لقاته راقد ع الكنبه بالجنب مربع ايديه ومتكمش في بعضه من صقع..
قلبها وجعها ...جاته وغطاته..
سفيان وهو مغمض عيونه:خوديها وبري خليني في حالي..
لينا مشت قعمزت ع رووس صباعها وقعدت تسمح ع شعره وتقول:آسفه..
هو ماباش يتكلم..
لينا:تنزفزت وغلطت معاك في الكلام سامحني..
ولا كلمه..
لينا:سافيوش..
ولاعبرها
لينا تنهدت وقالت:باهي ماترقدش وانت زعلان مني..
ماباش يعدل عليها..
ابتسمت وناضت ساوت البطانيه كويس وهي تغطي فيه..
بعدين مشت قعمزت جنبه عند راسه..وقعدت تمسح ع راسه وهي تقرا وبدت تقرا في القرآن..
وهو يسمع فيها...لين كملت فتح عيونه وقال:نوضي ارقدي في الدار..
لينا؛من غيرك والله ماني متحركه من مكاني..
تنهد...بعدين حول الغطا وناض قعمز..
كمكم البطانيه وقال بحده:نوضي..
في ابتسمت وناضت..
وهو ناض ومشي للدار..
خشوا وقال:ياريت ترقدي طول وماتكلمنيش بكل..
لينا بإبتسامه:حاضر..
رقدوا والصمت ساد المكان..
ولينا بدت تقرا في اذكارها بهمس..
شويه وهو قال؛ترا ذكريني بالدعاء نسيته شن هو؟!
لينا بإبتسامه؛باسمك ربي وضعت جنبي وبك ارفعه ان امسكت روحي فاغفر لها وان ارسلتها فأحفظها بما حفظت به عبادك الصالحين..
سفيان:اني قتلك ذكريني بيه مش قوليه كله..!؟
قعدت تضحك..
سفيان:ماصدقتي كلمتك..
زادت ضحكت وقالت؛ ع اللي يرد عليك ولا يعبرك..
حدفها بالمخده وقال؛غصب عنك..
وهي تلقت المخده وتضحك وهو غير عيونه عنها وع وجهه ابتسامة عصبيه...
🏵وفي الشقه اللي مقابلتهم...
كان صاحبها راقد بروحه في داره ومستوحش...
كانت الدار اشبه بالكهف الخالي البارد..
من غيرها هي وولده....
خطروا عليه احلى ايامه مع منى...
مواقف حلوة...احاديث حلوة..
صوتها وضحكتها في وذانه وبين عيونه..
ملامحها الجميله...
خفة دمها...وهبلها في بعض الاحيان.
عصبيتها وغضبها...
كل شي منها استاحشه..وحس انه مستحيل يقدر بعيش من غيرها من غير وجود تفاصيلها في حياته..
اذكر هلبه مواقف تعرضت فيهم منى للأذى والاهانه من اهله وهو ماكانش يدافع عنها..بل مرات يزيد فيها..
اذكر قداش تحملت وعدت وفوتت وهو عارف ومع هذا ماحسسهاش مرة ان حاس بيها ومقدر اللي دير فيه...
وياريته هكي بس..سمح لنفسه بخيانتها في الوقت اللي كانا فيه هي قاعده تقاوم في حالة انهيارها نفسي من اللي راته وعاشاته..
لقي روحه وهو يفكر في هدا كله دموعه ينزلوا..
خدي تليفونه وحط ع رقمها وبدي يكتبلها في رساله
🌼وصلتها وهي راقده ع السرير في دار اختها والنوم مجافيها والدمعه ع خدها..
طول شافتها..
(كان تعطيني فرصه نحكيلك ونوضحك مافيش بنادم مايغلطش حبيبتي واني نعترف اني غلطت وتراجعت عن غلطي وماكملتش وربي شاهد...ارجوك منى اعطيني فرصه...نحبك موت)
هي مسحت دموعها وحطت تليفونها تحت المخده وغمضت عيونها محاوله منها تجاهل رسالته... وتجاهل مشاعرها...
🍁🍁🍁🍁
"تقدري ترقدي هكي"
عفاف:كان تخليلي السرير كله احسن.
عبدالصمد:واني نرقد لوطا!؟
عفاف:هونا المربوعه ولا دار بناتك..
عبدالصمد؛لا في الكوجينه خير!
عفاف:اللي يريحك..
عبد الصمد:مالا والله ماني متحرك منها الدار..وبنرقدلك لوطا..
عفاف؛اللي يريحك..
عبد الصمد :اللي يريحني مالا شني...غصب عنك..
وخدي فراش وطرحه لوطا ورقد وتغطا
"ااي"
حول الباطنيه وجي مقعمز قال بفزع:خيرك؟
عفاف:لاشي غير حركت كتفي بالغلط هو شبحلها بإمتعاض بعدين ولى رقد..
وهي قعدت تضحك بكتمان..
بعدين حطت راسها ع المخده ورقدت..
🍁🍁🍁🍁
تاني يوم...
"هيا بنيتي تربحي كولي حتى شويه راك مش بروحك"
رنده دموعها نزلوا وهي تقول:والله ياماما ماعندي نيه في حاجه ماخاطريش حتى في شبح عمري..
وجيهه:شني تبي تموتي يابنتي..
رنده:ياريت ياماما ياريت..
وجيهه قلبها قاعد يتقطع عليها..
ناضت بالسفره ومشت طلعت من الدار وهي تبكي..
خشت للكوجينه ولينا ضم فيها..
وجيهه بدموع:مش عارفه كيف ندير معاها..البنت بتموت يالينا بتموت..
لينا تنهدت بحزن وقالت:خل نحاول معاها ..
وجيهه:شوفيها يابنتي تربحي..
مسحت لينا ايديها ومشت لدار رتيل..
خشت لقت رنده مكتمشه في بعضها وتبكي..
لينا:رنده..
قعمزت حداها وقالت:رنده..نعرفك قويه واجد..
رنده ببكي:اللي اني فيه يهد جبال..
لينا:معاك صعب واجد لكن لازم تقاوميه ولازم تعرفي ان حالك خير من حال واجدات غير مالقنش مايصبي معاهن ويوقف في ظهرهن..
انتي عندك بات وخوت كيف الجيش وراك مصدقينك وواثقين فيك و مستعدين يديروا كل شي بش ياخدولك حقك...غيرك واجد يارنده مش لاقيات ربع اللي عندك..وفي منهن راحن ضحايا لأن مافي حد وراهن يحميهن..
هدت رنده بكي شويه وهي تسمعلها..
لينا؛لو تشوفي حالة سفيان..انتي شغله الشاغل همه كله يجيبلك حقك...ولا عمي والكلام اللي يقول فيه عنك يقول بنتي وعارفها كويس مافي حد يقدر يشككني فيها حنقعد وراها لين تاخد حقها لو تبيه..
رنده:قصدك بابا يعرف؟
لينا؛اها يعرف..ومش مصدق فيك شي..ع خاطرهم هديم شدي حيلك يارنده وقوي روحك..
تنهدت رنده وقعدت ساكته..
لينا:نجيبلك فطورك تفطري..
رنده:قولي لأمي تجيبه..
لينا ابتسمت وقالت؛باهي..
وناضت مشت بتطلع..
"شكرا"
لينا لما وصلت في الباب شبحتلها بإبتسامه وقالت:العفو....
بعدين طلعت...وخلت رنده تفكر في كلامها...
🍁🍁🍁🍁🍁
الساعه 12:46قبل الظهر..
قدام المدرسه...
الهام:ماجاش هداكا اليوم..
رتيل:احسن...
الهام:قصدك مش هامك بكل..
رتيل:وشن بيهمني فيه يعني..غير بيديرلي المشاكل وخلاص..
الهام سكتت شويه وشافت سيارة خوها:اهو مبشر جي..باي..
رتيل وهي تشوف لمبشر في السيارة: بتمشوا لحوش خالتك اللي عندهم هلبه بنات...
الهام بضحكه:ايه..
رتيل:امبباه...باي..وغيرت عيونها عنه
والهام مشت ركبت مع خوها وهي تضحك..
الهام:شن جو..
مبشر؛عندك انتي...جي هداكا اللي قلتي عليه..
الهام:لا اليوم ماجاش..
هو قعد يشبحلها وهو ساكت وماباش يتحرك لين جي باصها وروحت..
بعدين تحرك ورفع اخته لحوش خالها...
حطها وولى للكليه متاعه...
••في الكليه..
جي لصحابه لقاهم مقعمزين ع كرسي طويل..
نقز وجي قداهم وقعمز وهو يقول:هاه شن صار..
:رياض قاعد يحاول فيه...
مبشر:لادامه الموضوع عند رياض معناها تم...
:ضامنه؟
مبشر:صاحبي واني اللي نعرفه كويس..مقنع لأبعد حد.
:اهو جي..
شويه جاهم رياض وقعمز جنب مبشر وقال؛هي ابدوا اقروا معاش في وقت بعد غدوة بيعاوده ان شاء الله..
:منور..
:والله مافي منك..
مبشر:مش قلتلكم صاحبي ونعرفه استاذ في الاقناع..
تنهد رياض وقال:الا مع الكبيده..شي شي..
مبشر:فوتها هي الخاسرة.
رياض:ياريت نقدر..البنت رزينه هلبه وصعبه مش عاطيتني معاها فرصه بكل..واني الله ماناوي معاها كان كل خير..
:مع الوقت تلين وتقتنع بيك..
رياض:ان شاء الله..اليوم في جرتكم انحرمنا من شوفتها..
ضحكوا صحابه..
مبشر بضحكه؛مرات تفقدك ماتندريش..
رياض ابتسم وقال:ياريت..بعدين تنهد وقال..خلاص غيروا الموضوع..وخلونا في امتحانكم..
🍁🍁🍁🍁🍁
خشت للكوجينه...
كانت تبي تشرب ميه..
شافت قدامها براد مرش يبان منه مغلي الزنجبيل اللي دارته اختها..
قعدت تشبحله بعدين مشت خدت طاسه..
وصبت منه فيها..
ومشت طلعت للجنان..
قعدت تشبح للطاسه لحظات..بعدين في مرة شربتها كلها برغم حرارة الزنجبيل والحده متاعه...
كملاته..وحطت يدها ع رقبتها اللي حستها انحرقت..
بعدين خدت نفس وبلعت ريقها..ومشت خشت للكوجينه...
🍁🍁🍁🍁
"لا المحشي المرة هادي ابداع"
سهيله:من يومي ندير فيه مبدع مش جديد عليا..
ضحك ابوبكر وقعد ساكت شويه وقال:ايه سهيله..بنسألك..
سهيله:عن شني؟!
ابوبكر:عن ولد خالك مفتاح...أنس..
سهيله؛اييه اسكت ساكت..مش طلق مرته..
ابوبكر:قرار عطل فيه خمسة سنين.
سهيله؛ايه بس والله يوجعوا الصغويره ياناري امهم لوحتهم لبوهم وقالت معاش دخلي فيهم..
ابوبكر:شن تتوقعي منها وحده زي هادي..
سهيله تنهدت وقالت:ربي يعوضه خير وخلاص..
ابوبكر:هدا كان مازال فكر يتزوج تليقه كره جنس النساوين..
سهيله:والله صدقت...المهم قولي علاش تنشد عليه..
ابوبكر:لاغير هكي وخلاص خطر عليا وسألت عنه..
سهيله هزت راسها وقعدت تاكل وهي ساكته
وابوبكر قعد ياكل وهو ساكت ويفكر
يتبع…
الفصول الاربعة
