شكولينا

الجزء الاول

#شكولينا 🍫
#الجزء_الأول
#الجمان_الفريد

قبل كل شي...الصلاة أولا🏵
تانيا... نبي نوضح حاجه مهمه...
من بعد نزلت المقدمه جتني هلبه رسايل تتكلم ع بعض العبارات عند اهل الجنوب في منه صححته وفي من لا حنستمر بيه...
لسبب واحد نبي نشرحه لحبيباتي من سبها تحديدا..
اول شي اني قبل نكتب سألت اكثر من وحده من سبها عن هلبه حاجات يعني مش من راسي اللي كتبته..
لهذا لازم تعرفوا ان في حاجه اسمها"تنوع ثقافي" شن معناها..
معناها ان في البلاد الوحده حنلقوا تنوع في اللكنه والعادات واحيانا حتى اللغه يكون فيها اختلاف..
وهدا ينطبق حتى ع المدن الكبيره...
بلادها حني لو بنقسموها لتلاته اقسام...غرب شرق جنوب..
فعاصمة الغرب حتكون طرابلس هادي فيها تنوع رهيب..
والشرق عاصمته بنغازي كذلك حتى هي فيها تنوع..
والجنوب عاصمته سبها طبيعي حيكون فيها تنوع زيها زيهم..
والتنوع هو اختلاف اللكنه والعادات لسبب واحد ان اللي يعيشوا في المدينه ناس مخلطين من كل مكان في الاقليم نفسه او من البلاد بكبرها..
نذكر قبل لما كتبت روايات شرقاويه خشولي هلبه قالولي الكلمه الفلانيه مش لاهل بنغازي لاهل درنه...الكلمه العلانيه للبدو مايسعتملوش فيها اهل بنغازي..
واني لما قريت روايات شرقاويه الكاتبه فيها من بنغازي وتستعمل فهالكلمات هدا يعني ان اصولها من منطقة تانيه لكن عايشه عمرها في بنغازي وهدا شي طبيعي..
حتى في طرابلس الطرابلسيه الاصليين عندهم كلمات حني مانستعملوش فيها الناس اللي اصولنا من مدينه تانيه لكن انولدنا وعشنا عمرنا كله فيها...
معاش نبي حد يخشلي ويقولي حني السبهاويه ماعندناش الكلمه هادي وعندنا لأني اكتشفت هالتنوع موجود عندكم كن الرسائل اللي جتني يسكنوا في سبها وكل وحده تقول في كلام يختلف عن التانيه..
واني هني نبي نبرز ثقافة اهل الجنوب ومش حنركز هلبه ع الاصول...ولاحنفرق...
ان شاء الله نكونوا متفاهمين...
حبيت اليوم نكتب الجزء الاول بش نعرفكم بموضوع الروايه اكثر🍫🏵
《بنوه ع شي مهم...في كلام حيكون مؤذي وغير مقبول نعتذر عنه مسبقا بس هو ع لسان الشخصيات اللي في منهم هلبه في مجتمعنا ومايعبرش ابدا عن وجهة نظري...نتمنى انكم تحاولوا نتقبلوا لان كل شي حنكتبه حيخدم قصة الروايه والرساله متاعها》
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
طرابلس..
في مطبخ الدور الأول من حوش الحاج الشريف..
كانت وجيهه تقص في فخد لحم الخروف الوطني بش بيديروا بيه الغدي...
مسموع في الحوش غير صوت تقطيعها الفخد بالبالطه...
صوت المكنسه الكهربائيه اللي مشغلتها كنتها "زهور" دور بيها في الحوش كله وتكنس...
اما كنتها التانيه "منى" حاصله في الحمامات تكد وتغسل...
والحاجه زبيده متكيه حدا راديوها تسمع فيه وهي تسبح بالسبحه...
لحظات...
وكملوا منى وزهور شغلهم...وطول توجهوا للكوجينه..
لقوا عزوزتهم تغسل في ايديها..
زهور:شن نديروا الغدي اللاي..
وجيهه سكرت الشيشمه وهي تقول:كسكسي بالبصله وجنبه مبطن...وكفته...
ومشت طالعه وهي تقول...ابدوا طيبوا..
زهور:حاضر..
وطلعت من حداهم...
منى بهمس:كفته ومبطن!
زهور بهمس:اسكتي فكينا...
تأففت منى بعدين مشت لسلة الخضرة وهي تقول:اني بندير المبطن والكفته..
زهور:لا هلبه عليك الزوز خليني اني ندير الكسكسي والكفته وانتي المبطن..
منى ؛لا والله لما نديرهم الزوز خليك انتي في الكسكسي..
تنهدت زهور وهي تقول:على راحتك..
منى في نفسها"تبي تبيضي وجهك ع حسابي تحسابني مش فاهمتها"..
زهور:صوت سيارة...
منى وقفت ع حيلها وهي شاده البطاطا قالت بصوت منخفض:هديكا جت..
زهور تنهدت وهي تقول:الصبر وخلاص..
منى شافت لباب الكوجينه لقت عزوزتها خاطمه بسرعه ماشيه ترحب ببنتها..
عادة وجيهه تستقبل بناتها من فم الباب..
🍀وصلت في الباب فتحاته..
جوها احفادها يجروا زوز ولاد وبنيه ...
والبنت تنادي "حنينه".
وجيهه بضحكة فرح:مرحبتين مرحبتين ...
وجت بعدهم نوريه وهي تشوفلهم بإبتسامه...
نوريه:امي..
وجيهة:نويرة...
وجت لأمها سلمت عليها سلام حار بالخد..
بعدين خشت هي وياهم داخل....
نوريه:شن حالكم..
سكرت وجيهه الباب وهي تقول:الحمد لله..حطك راجلك ومشي؟.
نوريه:ايه يدوب يلحق ..
وجيهه:ربي يوصله سالم..
حولت نوريه جلابيتها وهي تقول؛بوي قاعد..
وجيهه:لا طلع للسوق..
نوريه:وحناي شن حالها..
وجيهه:خشي شوفيها..ضحكت وهي تقول..سبقونا الصغار..
نوريه بضحكه:من قبل مانجو وهما يدووا عليها..
وجيهه:هاتي جلابيتك..
نوريه:لا عنك اميمتي اني نعلقها..
ومشت علقت جلابيتها ع الشماعه...
بعدين مشت هي وامها للصاله...
نوريه؛وينهم الخوانم..
وجيهه بضحكه:في الكوجينه يطيبوا في الغدي..
نوريه:كويس...
وخشوا للصاله...
نوريه بضحكه:للا زبيده...
.............
في الكوجينه..
زهور:غير نسمع صوتها بطني توجعني..
منى:مالا اني شن نقول..
زهور:خل نمشوا نسلموا عليها فكينا.
منى:ايه...وكل وحده خلت اللي في يدها ومشوا للاوندينو بش يغسلوا ايديهم...
............
في الصاله..
زبيده:قصيتيه يازوفريه..
نوريه قعدت تضحك وهي تلعب بشعرها..
وجيهه:حرام عليك شعرك خسارته..
نوريه؛يام والله مقلقني ومتعبني وبعدين حلو التغيير..
زبيده؛غير راهو يشوفه سفيان ياحيه عليك وحيه..
وجيهه عضت ع شاربها وقالت:ايه ياغبارتك ..
بنتها نور قالت:حتى اني قتلها حي عليك من خالو..
ضحكوا ع كلامها..
واحد من الولاد قال:بنطلعوا برا...
وجيهة:اطلعوا لكن ماتجوش حدا  الغرس يعارككم جدكم راهو..
:حاضر..
ومشوا الزوز طلعوا يجروا ع خشة زهور ومنى..
زهور ومنى:السلام عليكم..
رفعت نوريه حاجبها وقالت؛وعليكم السلام..
جوها الزوز..
وهي قعدت مقعمزة...
طبستها منى الحامل سلمت عليها..بعدين زهور...
نوريه:شن حال خوتي..
زهور ومنى باصوات متقطعه:الحمد لله..
منى:مروان كانت عنده مناوبه روح الصبح..
نوريه:ركبتي فطرتيه وشفتي شن يبي ولا؟
وجيهة:ايه..
زهور:قصيتي شعرك حي عليك من سفيان!
نوريه:مادخلاش بيا سفيان..يحكم فيك انتي مش اني..
زبيده؛ايه تو نشوفوك بعدين..
ضحكت نوريه وقالت:هي كنيناتنا الباهيات وحده منكم اديرلنا فطور..
وجيهه:مافطرتوش!
نوريه:لاوالله لهيت بحسين وحوايجه..فطرتهم هو والصغار بس..
وجيهة شبحت لكناينها وقالت:بسرعه سقدوا ديروا فطور..
زهور ومنى:حاضر اللاي...
سمعوا صوت كلاكس سيارة..
نوريه بضحكه:فوفا جت..
ناضت وجيهه وهي تقول:ايه كلاكس سيارة راجلها..
طلعت ورا كناينها...
هما خشوا للمطبخ وهي مشت للباب...
..........
في المطبخ...
زهور:نديروا فطور ولاغدي حني سحيقة..
منى:خل نديروه بسرعه ونكتروا اكيد التانيه حتى هي جاية جعانه..
زهور:هايشات..
وضحكوا الزوز...
شويه وسمعوا صوت ضحكة عفاف اللي تنسمع من اخر الشارع...
ولحظات وسمعوا صوتها وهي تقول بعياط..
"نويرة حييي عليك"...
زهور؛ع القصه...غير امتى يروح سفيان ويشوفها يهزبها عليها ويمسح ع كبدي..
ومنى تضحك...
🏵كملوا الزوز تجهيز سفرة الفطور...
ومشوا طلعوا بيها من المطبخ للصاله...
عفاف لما شافتهم قالت وهي تمضغ في المسكته:اوو كناينا البايرات...
ضحكت نوريه..
الحاجة زبيده؛وين بايرات من بكري وهما واقفات ع رجل وحده...
عفاف وهي تمضغ في المستكه:نبصروا..نبصروا ياحنينه..
حطوا هما الزوز الصفره قدام نوريه..
بعدين سلموا ع عفاف..
وجيهه:هيا سقدوا بالغدي ع الساعه اتنين نبيه طايب..
عفاف:هي سقدوا اسمعوا كلام عزوزتكم...
زهور:حاضر اللاي..
ومشوا الزوز مع بعض..
نوريه:شن مازال مش باين شي ع زهور..
وجيهة:تس..
زبيده:مازال بكري تو يسخرلها ربي وتحمل..
حولت عفاف المستكه وهي تقول:ان شاء الله قريب نبوا نشوفوا صغار كبيرنا..
وجيهة:قريب ان شاء الله بجاهه وسلطانه..
زبيده؛آمين..
عفاف؛عدنان تسقد..
تنهد وجيهة بضيق وقالت؛ايه الصبح..
نوريه؛ربي يحفظه وخيي ويكون معاه..
كلهم بأصوات متقطعه قالوا:آمين..
عفاف نادت ع بناتها وهي تقول:تعالوا كولوا ماما..
نوريه بصوت عالي:زهور...ولامنى ضبحوا ع ولادي يجوا ياكلوا..
جاها صوت زهور من الكوجينه:باهي باهي...
ومشت وقفت فالروشن وهي تقول:شريف مؤيد قالت امكم خشوا افطروا...
منى وهي تقشر في البطاطا قالت في نفسها"ربي يتوب علينا من هالعيشه"...
🍀🍀🍀🍀🍀🍀🍀
ومنك ياطرابلس...لسبها....
مع آذان الظهر...
فرشت لينا الصلايه...ووقفت عليها..
وولد خوها فرش جنبها صلايه ووقف عليها..
ابتسمت لما شافاته شن دار بعدين استعدت للصلاة...
وبدت تصلي وولد خوها يشبحلها ويقلد في حركاتها..
لعند ماكملت الصلاة..
بعد سلمت لفت ع ولد خوها وضماته وهي تقول:نجيهلي هالسمح ياربي..
ع خشة امها..
الحازة:هي صبي وتي روحك باتك ع جية..
لينا؛هيا يما هاني نايضه..
وبعدت عن سالم وناضت وقفت وقعدت تحول في ملايتها..
سالم؛عمتي امتى تروحي؟
لينا:بعد المغرب حبيبي..
سالم؛روحي بسرعة عمتي باهي..
لينا بضحكه؛حاضر ياقلبي..
قامت لينا صلايتها وسالم قام معاها صلايته..
ومشوا طلعوا من وسط الحوش...
والحازة في الكوجينه لاهيه بالغدي..
ع خشة راجلها الحاج عبدالودود عليها هو جايب شكاير خضرا وفواكه...
عبدالودود:هاك خودي مني..
جاته الحازة تاخد منه وهي تقول:سلمك جياب..
عبد الودود؛وين لينا قوليلها تطلع..
الحازة خشت بالشكاير وهي تقول:شويه بس..
وحطتهم ع الرخامه ومشت طلعت تنادي بنتها...
🏵فهالوقت..
نزلت مرت عبدالله من شقتها وهي لابسه ومتأنقه وريحة عطرها تجيب من وين ووين...
مرت عبد الله وردة من الغرب...بيضاء البشرة وجميلة الملامح وشايفه روحها...واخدها عبد الله عن حب..يحبها حب كبير ومش شايفه معاها حد وكل همه رضاها...
وهي عاجبها حبه ليها ومخليها تزيد تشوف روحها عليه عارفاته مايقدرش يعيش من غيرها..
🏵خشت لحوش شيابينها من الباب الفاصل..
وردة:عمتي...
ع جية الحازة شافتها جايه..
وردة؛كيف حالك عمتي..
الحازة:الحمد لله..وخشت للكوجينه..
لحقتها وردة وهي تقول:شن غدانا..
الحازة وهي تشوف في الخضرة اللي جابها راجلها؛فتات..
وردة جتها وقعدت تشوف معاها في الشكاير خدت تفاحه ومشت بيها للاوندينو وهي تقول؛لينا مشت؟
الحازة وهي تشبحلها من فوق للوطا: توا بتعدي..
غسلت وردة التفاحه وبدت تاكل
ع خشة لينا ومعاها سالم شافت مرت خوها قالت؛عافية ورده وردة:الحمد لله..
لينا بإستعجال:ماتبي شي يما..
الحازة؛سلامتك بنيتي..
لينا؛بالسلامه..
ومشت بسرعه طلعت من باب الكوجينه وسالم وراها بش يودعها زي العاده..
اما امه طلعت بتفاحتها برا الكوجينه متوجهه لدار المعيشة وين مافي التلفزيون بش تقعمز قدامه لين يطيب الغدي..
🏵خش سالم لحناه وهو يقول..
سالم؛حنينه عطيني تفاحه..
تنهدت حناه بضيق وخدت تفاحه غسلتها كويس بعدين مدتهاله وقالت؛خودها وعدي قعمز بيها حدا امك..
سالم خدي التفاحه وهو يقول؛باهي..
ومشي طلع بيها من الكوجينه وتوجه للدار اللي فيها امه..
قعمز بحداها وقال:نبي رسوم..
تأففت وخدت الريموت وحطتله ع قناة للرسوم المتحركه..
ولوحت الجهاز جنبها بعدين قامت تليفونها وفتحت الفيس ولهت بيه...
🏵🏵🏵🏵🏵
وصلت لينا للمستشفى ونزلت بباكو الشكلاطه ومشت خشت..
كالعاده اللي يقابلها تسلم عليه ويسلم عليها..
"لينا شن الاخبار"
لينا:تمام..
"شن جو "
لينا؛تمام..
"لينا ياهلا"
لينا:اهلين بيك..
لين وصلت لحجرة الممرضات وخشت وهي تقول:السلام عليكم..
ردوا عليها؛وعليكم السلام..
وحده من زميلاتها اسمها"مريم" كانت تشوف في نقالها وهي تقول؛قالك صايرة اشتباكات بين الجيش وجماعة التهريب..
وحده من زميلاتها اسمها امل قالت:عطهم ذيب..
لينا وهي تلبس في البالطو:معناها وتن رواحكن..
امل:ان شاء الله مافيش موتى والله قلبي معاد متحمل..
لينا:ان شاء الله..
مريم شبحت للينا وقالت؛اسعفينا بشكولاطتك بالله..
ضحكت لينا وقالت؛باهي..
خدت الباكو وفتحاته ومدت لزميلاتها:تفضلن..
خدوا الزوز..
امل:اسمعي وتي 70طرف..
لينا:بديروا اللمه؟
امل:اها واخيرا..
مريم؛حتى اني وتيلي 30طرف بندير عزومه...
لينا؛حاضر..مية طرف..سبعين امل..تلاتين مريم..
ع خشة وحده من الممرضات وهي تقول..
:جابوا جماعه من الجيش منصابين في الاشتباكات ياغبيني مساكين يقطعوا القلب..
امل:راك تقولي في ناس ميته!
؛والله مانعلم..
وطلعت تجري..
مريم دست طرف الشكلاطه في الشنطه وناضت..ولينا لحقتها..
اما امل قعدت تاكل في الشكلاطه وهي ترعش من الخوف..
◇◇من باب الاسعاف◇◇
كانت تخش الباريلات وهي حامله حالات من الجرحى..
وعدنان كان ماشي وراهم ع رجليه وهو خايف ع صحابه..
من خوف عليهم مش حاس بالجرح اللي ينزف من جبهته..
واحد من الدكاترة قال للواحد من طلبة الامتياز:خود الافندي  وداويله جرحه..
عدنان؛مادورنيش اني الهوا بيهم هما مافيا شي اني..
شده طالب الامتياز وقاله؛ماتخافش عليهم..تعالى..
مشي معاه عدنان بالسيف وعيونه المليانات دموع ع صحابه...
في غرفة الاسعافات..
كان موجود عدنان ومعاه زوز من زملائه جروحهم بسيطه..
وفي زوز دكاترة تانيين غير طالب الامتياز المتدرب اللي خش مع عدنان..
قعمز عدنان ع سرير وبدي يداويله في جرحه...
ويهدرز مع الاطباء...
الطبيب:هدي نتيجة اهمال سنين طويله..
واحد من الدكاترة:ولعند توا مستمر الاهمال شوف شن قاعد يصير قدامك..كل اسبوع عايشين هالحاله..كان مش من المهربين قبايل يتقاتلوا..
الدكتور:الجنوب يبيله حد من الحكومه يجي يقعد هنى ووحدات عسكريه كبيره..وميزانيه بروحه..
عدنان شبح للدكتور وبعدين غير عيونه عنه وهو يفكر في كلامه..
ع خشة رئيسة الممرضات مراة في منتصف الخميسنات..
قطعه شوكولا عتيقه لذيذة...طيبة القلب واللسان وبشوشه الوجه..اسمها "بريكه"
بريكه:لاباس وليداتي لاباس..
طالب الامتياز؛بالله استاذة بريكه تعالي..
جاته وهي تقول:لاباس عليك ولدي..ربي يحفظكم ويحميكم كيف ماتحموا في رزق هالبلاد..
عدنان ابتسم وقال:تسلمي..
بريكه بإبتسامه:خلي عنك تو نكمله نا..
الطالب:تمام..
وكيف جاي بيطلع خشت لينا ..
انخبطت فيه وفاتاته وهي تقول:ان شاء الله لاباس عليكم..
شبحلها عدنان بنظره عابره بعدين شبح القدام..
اما طالب الامتياز فنظرته ليها ماكانتش عابره..ابتسم بعدين طلع..
لينا قعدت تساعد في واحد من الدكاترة..
بريكه؛جيتي شوكلاطه لينا..
ابتسموا الدكاترة..
لينا ضحكت بإحراج وهي تقول؛اها..
بريكه؛ذوقيني مش كيف المرة اللي فاتت..
لينا؛نذوقك شني ياخالتي بريكه ناسيه السكر ولاكيف..
بريكه:هي ذوقه شن بدير ع راس اللسان..
الدكتور:ردي بالك تعدلي عليها..
بريكه:خليك في حالك دكتور لو سمحت..
ضحكوا..
والحالات اللي تحت ايديهم كانوا يسمعوا في الحديث ومستانسين بيهم لدرجة ان الابتسامه ارتسمت ع وجوههم..
سكتوا شويه..
بعدين بريكه قالت بعد كملت لفة الشاش ع راس عدنان:تو يديرولك صورة بيش يطمنوا عليك..
عدنان شبحلها وهو يقول:الشباب اللي معانا شن صار فيهم..
بريكه:والله مانعرف جيتكم طول نا..
التفتت لينا وهي تقول:الزوز دخلوهم العمليات تحت ايدين احسن الدكاترة اطمن..
عدنان شبحلها وهز راسه بإيجاب..
الدكتور:لينا عدوا وتولهم اسره في وحده من الغرف..
لينا:حاضر دكتور..
ومشت بسرعه طلعت من الحجرة...
بريكه:خل نعدي نشوف وضع اصحابكم ونجي نبشركم..
عدنان:ياريت..
بريكه ابتسمت وقالت:قول ان شاء الله..
ومشت طلعت من حداهم..
واحد من المصابين قال للدكتور:الوضع عندكم تمام ماناقصه شي المركز؟
الدكتور:لاتريح الحكومه موفرة كل شي للقطاع الطبي هنى الحمد لله بدوا يلتفتولنا بس مازال نبو اهتمام واجد اكثر من هكي..
تنهد عدنان وقال:عندك حق...
🍀🍀🍀🍀🍀🍀🍀
الساعة 3:00بعد الظهر...
في الصاله مقعمزين يتغدوا..
الحاجه زبيده بروحها...
والبنات وامهم والكناين برواحهم..والصغار برواحهم..
نوريه؛باهي زهور تطييبك متحسن تعلمتي من امي..
عفاف:ايه صح قريب ع بنة كسكسي امي..
رتيل وهي تاكل:لا معليشي..تطييب ماما مايجيبه حد..
نوريه:سلم حبيبة امها ياربي..
ابتسموا وجيهه ورتال..
عفاف؛لكن مبطن وكفتة منى صامتات شويه.
نوريه:البطاطا غليظه مش مرققتيها مش طايبه معاك كويس..
بلعت منى بعدين قالت:درته صامت ع خاطر عمي.
نوريه:درتي لبوي طروف ع تركينه والباقي ملحتيه..
منى هزت راسها وهي تقول:مرة تانيه ان شاء الله.
رتيل:خليتوا لرنوده حصتها؟
زهور وهي تاكل هزت راسها بإيجاب..
رتيل؛امتى تجي هي؟
عفاف؛العشيه..
"زهور"..
نوريه سيبت الكاشيك ولفت شعرها وربطاته ب"ستريتشا "
وخواتها وامها يضحكوا بصمت.
ومنى لبست وشاحها..
وجيهة بإبتسامه:خش سفيان..
عفاف:سفيان تعالى..
شويه وبان عليهم سفيان وهو يقول..
سفيان؛السلام عليكم..عقد حواجبه وقال..شن جابكم انتم!؟
نوريه بضحكه:خزي عليك..وناضتله وناضت بعدها عفاف..
سفيان سلم ع نوريه بالخد وهو يقول؛شن جو..
نوريه:تمام الحمد لله..شن جوك انت..
سفيان؛تمام..
وجي سلم ع عفاف وقال؛وين الختشه التالته..
عفاف بضحكه:جايه العشيه..
وخر عن عفاف وقال؛كيف عاد لازم يكون كامل اجتماع مجلس الامن..
زهور ومنى شادين ضحكتهم بالسيف..
ورتيل تشبحلهم بحده..
قعمزوا نوريه وعفاف...
حط سفيان ايديه في جيوبه وقال:زهور نوضي حطيلي غدي..
زهور ناضت وهي تقول:حاضر..
سفيان شبح لحناه وقال:شن جو حناي..
زبيده:الحمد لله ولدي..
سفيان:الحمد لله...شبح للصغار وقال:قبيلة قريش..
شبحوله الصغار وابتسموا..
وجيهة بضحكه:خزي عليك..
سفيان؛شن جو..
ردوا عليه باصوات متقطعه:تمام..مليح..
سفيان؛تمام..بوي ومروان في المربوعه..
وجيهة:ايه..
مشي سفيان وهو يقول؛شريف جيبلي الغدي للمربوعه..
شريف ولد نوريه:حاضر خالي..
نوريه:يارب نشوف صغويرته مع صغارنا ياربي..
كلهم قالوا؛آمين..
🍀🍀🍀🍀🍀
خشوا للضباط للحجرة اللي جهزوهالهم..
كانت لينا فيها..
واحد منهم كان مركز فيها...
وهي كانت مركزة في شغلها..بعدين مررت نظرهم عليهم التلاته وقالت:تفضلوا..
كل واحد فيهم مشي لسريره..
وهي كانت تشبحلهم بس عيونه كانوا مركزين اكثر على عدنان...كان ملفت للإنتباه بوسامته وشخصيته..بس هي فيسع غضت بصرها عنه...
وجت بتطلع لين سمعاته قال..
"شن صار في الضباط اللي تحت العمليه"
التفتت لينا وقعدت تشبحله..وهو يشوفلها ويراجي في الاجابه بقلق..
كيف جت بترد..
خشت بريكه وهي تقول بإبتسامه:صحابكم نجحت عملياتهم وحالتهم مستقرة ومافيش عليهم خطر..
ابتسموا الضباط بفرح...وعدنان قال؛الحمد لله..
واحد منهم شبح للينا وقال:ع هالخبر نبوا شكلاطة الاخت..
لينا فنصت عيونها وشبحت لبريكه..
وعدنان شبحلها..
بريكه:والله شوكلاطه مافي كيفها حتى متاعات دعايات مش خير منها..
لينا شدتها من ذراعها وهي تقول بإحراج؛ماتبالغي..
بريكه بضحكه:لا ياحنه مانبالع هدى الحق..هي عدي جيبلهم الشباب ضيوفنا راهم..
لينا شبحت لعدنان بعدين نزلت عيونها لوطا وهي متحشمه وقالت؛باهي..ومشت طلعت وهي تقول..عليك موقف حطتني فيه...
وصلت للحجرة وخدت الباكو ومشت بيه للحجرة...
وصلت فيها لقتهم يضحكوا وبريكه تهدرز معاهم..
لما شافوها سكتوا...
لينا عطت لبريكه الباكو..
خداته بريكه وفتحته ومشت تفرق عليهم..
بريكه؛هي تفضلوا..
كل واحد منهم خدي طرف وبدي يفتح فيه..
ولينا تشبحلهم..
كلي نفس الضابط وقال:امم..لاقوة الابالله...
بريكه:ليها وقت ادير فيها وولت مشهورة واجد في سبها..
ولينا تشبح لبريكه بنظرات امتنان ..عارفتها تسوق للشكلاطه متاعها وتساعد فيها...
وعدنان يشبحلها..
زميله قال:عندها اسم صفحة !؟
بريكه؛اها صفحة سماها حلو سبها..
الضابط:باهي الشكلاطه عندها اسم؟
لينا شبحتله بآستغراب..
بريكه شبحت للينا..
لينا :لا..
الضابط؛ديرلها اسم بش يعرفوها بيه..ماتعرفيش مرات تولي كيفها كيف جالاكسي وفيريرو والجماعه المشهورة..
ضحكت لينا وقالت؛مافكرتش فيها..
الضابط ابتسم..
بريكه:خلاص فكري من تو..ومشت عطتها الباكو..
خداته لينا وقالت؛لاباس عليهم..وشبحت لعدنان..
جو عيونهم في عيون بعض غيرتهم طول ولفت ومشت طلعت..
بريكه:ان شاء الله ماتشوفوا سو...
ردوا عليها باصوات متقطعه:تسلمي..بارك الله فيك..
ومشت طلعت وخلتهم..
زميل عدنان قال:سمراء وطرف لينا هدي..
عدنان شبحله بحده..
ضحك وقاله؛خيرك !شن قلنا!
عدنان بحده؛ارقد ارقد..ارقد..
ضحك صاحبه ورقد وغم وجهه بالشرشاف..
وعدنان حتى هو اتكى وحط ذراعه على جبهته..
وزميلهم التالت رقد حتى هو ويضحك عليهم...
🏵🏵🏵🏵🏵
"تسلم ايديك عمتي "
الحازة؛صحتين...هي صبي قلي الماعين للكوجينه واغسليهن
ورده حاولت تكتم غضبها وهي تقول:حاضر
وناضت رفعت الماعين...
الحازة في نفسها"باهي اللي لينا مش هنى كان هدى راهي حلفت تغسلهن هي هالدقن"
••وخشت وردة للكوجينه وهي معصبه ومش راضيها
غسلتهم من غير نيه....
وحطتهم في الدواليب طول من غير ماتنشف..
وطلعت وخلت الكوجينه من غير ماضمها كويس..ومشت طول ركبت لشقتها..
لقت فيها عبدالله كيف واصل ويبدل في حوايجه وبدت عاد تشكي وتبكي...
وهو بعد ماتم شحنه ل100% نزل لأمه يجري..
خش عليها الدار لقاها متكيه..
عبدالله بعصبيه:يما..
فاقت امه مخلوعه:هاه خيرك..
عبد الله:نبي نعرف يمي خيرك مع بنت شن دارتلك بش تحطيها في راسك هكي..
امه عقدت حواجبها بإستغراب وقالت:خيرني شن درتلها!؟
عبدالله؛يما ليش تكرهلي الراحه مش عارف واني من نهار تزوجت وانتن ناصباته لهالمراة وحاطات روسكن من راسها..والله معاد مخليها تنزل لاهي ولاولدها دام انتم هكي..
ومشي طلع من حداها..
حطت الحازة ايديها ع بعض وقالت بهزوة؛ياقهرة عمري وخلاص..
ع جية الحاج عبد الودود وهو يقول:خير دعوتك هدى خيره يعيط؟
الحازة؛ع خاطر ست الحسن ياسيدي..هدى كله يالاش قتلها اغسلي ماعين الغدي...
عبدالودود حرك راسه يمين ويسار وهو يقول؛لاحول ولاقوة الا بالله..مرة تانيه ماتخلن حد يدير عنكن شي ديرن حاجتكن برواحكن وفكنا...ومشي وخلاها..
ناضت الحازة وهي تقول:اللي يسمع يقول خليتها تغسل الكواين واللايانات!..
خشت للكوجينه..
لقت بلا كنس قالت:خزي على اللي حاويك ياباير..
وخدت المكنسه وقعدت تكنس في الكوجينه..
وبعد كملت مشت بتاخد الباله من تحت اللاوندينو جو عيونها  ع اللي فيه لاقاته قاعد بالوسخ متاعه..
الحازة؛خزي وتفي..خزي..
🍀🍀🍀🍀🍀🍀
"وووك ظهري انقسم"
زهور:قعمزي شويه كان هدا.
منى؛لالا تو نكمل...
شويه سمعوا اصوات ضحك..
تنهدت منى بعصبيه وزهور ابتسمت بتهكم...
••في الصاله
نوريه بضحكه:مابعدكم حق..
مروان:اني كان تطلق سراحي امي بس والله لما نهاجر ومعاد موليها..
وجيهة:تهاجر عينك مش سادني هداكا اللي نطروه للجنوب..
مروان:سيوره يروح يام..
عفاف:كان ربي يهديه ويتزوج بس..
وجيهه:ياريت...لكن هو مسكر راسه قال نثبت روحي في الخدمه بعدين ساهل...
ع خشة سفيان؛يسلم عليكم عدنان..
وجيهه:سلمه وسلم من جاب سلامه..شن داير غادي..
سفيان مسح ع لحيته وقال؛اموره تمام يام ماتخمميش...شبح لوحده من بنات اخته وقال..بري لمرت خالك قوليلها قالك خالي اركبي..
ناضت البنت وقالت:حاضر..ومشت للكوجينه..
سفيان شبح لمروان شبحه مروان فهمها..
طلع سفيان وشويه ولحقه مروان...
ووجيهة تبعتهم بعيونها...
في الممر...
مروان:شن في..
سفيان؛خوك كان في اشتباكات مع جماعة التهريب وانصاب..
مروان بخوف:شني!؟
سفيان:نقص صوتك..حاله باهي مافيه شي اصابه عاديه جرح بسيط قال...رد بالك تحسس امك وخواتك بشي مش ناقصين عياطات ووجع راس..
مروان هز راسه وقال:تمام تمام..تو نكلمه بعدين..
ع جية زهور..
سفيان؛تمام نشوفك بعد العصر..
مروانok...ولف ومشي للصاله..
وسفيان طلع وطلعت بعده زهور اللي ماصدقت افتكت من الحوسه اللي حصلت فيها منى...
ويزيدها راجلها اللي طلب منها اديرله شاهي وخواته حسبوا ارواحهم معاه...
ودارتلهم كلهم..بعدين قعمزت معاهم وهي تراجي في راجلها يقول هيا لكن ماقالهاش..
منسجم في الهدرزة مع خواته ..
هدا مروان مقرب جدا من خواته وعلاقته بيهم قويه..
برغم انه متزوج منى عن سابق معرفه وحب..لكن ماقدرتش تاخد مكانة خواته في حياته...
اما سفيان الاخ الاكبر فهو صاحب شخصيه قاسيه بعض شيء وجاده..تزوج زهور زواج تقليدي...وعلاقته بخواته فيها حدود...لكن مع هدا مافي شي بالنسبه ليه فوق عيلته..
وقالها لزهور من اول ماتزوجها...
"تبي تكسبيني اكسبي امي وخواتي وكان تبي تخسريني اخسريهم"..
عيلة الحاج الشريف البنات والولاد عطاهم ربي جمال الصورة شقر وبيض كلهم وعيونهم ملونه وكل حد عنده من الجمال ماينافس بيه التاني بنات وولاد..
ولما جو بياخدوا لولادهم كانوا حريصين ع اختيار ناس تشبههم..ولحسن حظهم ولدهم مروان حب منى اللي تناسب مايبوا من مواصفات..وزهور كذلك زيها ويزيدها ميزة عيونها اللي لونهم من لون مية البحر...
🌺🌺🌺
لكن مسكين من ظن ان الجمال حكر البشرة البيضا والعيون الملونه..
فالشعراء الفوا دواوين شعر في جمال السمراء وملامحها الفريده...
وقطعة الشوكولا السبهاويه لينا كانت جميله في الصورة والجوهر....وهدا الجمال اللي يفنى مع صاحبه ومايفنيشي الزمان..
"ودراتلي دعايه ياحنه"
مريم بضحكه:هابا منها هالبريكه هدي..
ضحكت لينا وقالت:زعم تنشهر شكولاطي حق!..
ع خشة بريكه؛تنشهر بعون الله توصل سويسرا..
امل:اضرررب..
لينا بضحكه؛ويقعدوا يحاربوا فيا بعدين يخافوا نطيح سوقهم..
بريكه بضحكه؛لكن والله عنده حق الضابط اللي قال لازم ديرلها اسم..
لينا ؛وشن بنسميها يعني..شكلاطه سبها!
مريم بضحكه:لالا تمر 13برو..
ضحكوا..
بريكه:كملتن صماته! ياغبيه انتي شكلاطتك مش عاديه راهي لازم اديرلها راي...لازم يعرفوها برا الجنوب في طرابلس والشرق مرات تحصلي حد يتبناها وديري منها مشروع كبير يخليك فوق الريح..
لينا؛معاد تبالغي بريكه..
مريم؛لاعندها حق..
امل؛حتى نا اقتنعت بكلامها..
لينا مررت نظرها عليهم وهي تفكر في كلامهم اللي فاجئها ماكانتش عارفه ان الشكلاطه اللي دير فيها طعمتها مميزة وحلوة لهالدرجه...كبر الموضوع في راسها وبدت تفكر فيه بجديه...
ع خشة وحده من الممرضات..
:لينا تبيك الدكتوره صالحه..
ناضت وقالت؛هاني ماشيتلها...
..........
في الممر كان عدنان واقف يتكلم بالتليفون..
عدنان:والله اموري تمام وحالي باهي مايجيني حد هني..
"نطمنوا بس ياعدنان"
عدنان وهو يحاول يضبط اعصابه:قتلك لا مش لازم..
شبح القدام شاف لينا جايه..
هي لما شافاته ارتبكت وغيرت عيونها عنه..
هو غير عيونه للحيط ونزلهم وقال:خلاص بنسكر توا مروان..
فاتت من جنبه لينا ومشت..
عدنان؛سلام....وسكر..
والتفتت شاف لينا كيف طلعت من الممر..
ارتسمت ع وجهه ابتسامه خفيفه بعدين ولى خش للحجرة...
🍀🍀🍀🍀🍀
"شن حال ماليك منى"
منى:ليا هلبه ماشفتهم ع التليفون بس..حالهم باهي..
عفاف؛وخيرك معاش مشيتلهم مروان مايبيش يرفعك..
منى؛لايرفعني لكن اني نبي نبات وهو مايبيش.
نوريه:لا حبيبتي مازال عروس راك غلط تباتي برا حوشك..
وجيهه:المراة المقومة ماتباتش برا حوشها كان للضرورة بس..كان باتت برا من بيه راجلها..
ابتسمت منى بالسيف وقالت:عندك حق عمتي..
"السلام عليكم"...
رتيل بعيطه:رنودة..
وناضتلها تجري...وخواتها ناضولها وهما يضحكوا...
••رنده عروسه متزوجه ليها تلاته شهور.....
مغرورة لابعد حد وديما خشمها فوق...عاجبتها روحها...تعتبر الاجمل في خواتها والناس ديما تشكر في جمالها واناقتها..
وزادت غرور لما كانت بنت والخطاب دايرين عليها طابور والاخير بش وافقت عليه دار ع خاطرها هلبه لين كسب رضاها وتزوجاته...
جوها يمشي مع جو اختها نوريه..الزوز من اكثر انواع الافاعي سما وفتكا...
بعد ماسملت ع الجميع..
قعمزت حدا نوريه وفكت شعرها وهي تقول بدهشه:درتيها!
نوريه:شن رايك بالله!
رنده:تهبلي تهبلي..
نوريه:سلمها ياربي مش زيكم انتم حي عليك من سفيان ومش عارفه شنو..
رنده؛لاهو من ناحية حي عليك من سفيان فحي عليك فعلا..
ضحكوا..
نوريه قعدت تلعب في شعرها وهي تقول؛يمشي يحكم في زهور اني عندي راجل يحكم فيا..
زبيده:شن حالك رنده وحال ناسك..
رنده:الحمد لله حنينه كلهم كويسين ويسلموا عليكم..شبحت لمنى لقتها بترقد وهي مقعمزه..خيرها هادي !
وجيهه:منى ..منى..
منى استاقظت وهي تقول؛نعم عمتي..
وجيهة:نوضي  ارقدي في الدار..
ناضت منى وهي تقول؛حاضر..
ومشت للدار..
رنده:ارقدي ياخميره ياحبك للنوم وين نجي نلقاها راقده..
منى "ان شاء الله انتي ترقدي معاد تنوضي وخواتك معاك"
وخشت للدار..
رنده؛وينها الركيكه التانيه..
وجيهه:ركبت مع راجلها بكري..
رنده:تعرف كيف تفركها وتشيط..
زبيده؛حرام عليكم والله ديما يخدموا في الحوش وقايماته ع روسهم..
نوريه؛ياكلوا فيه ويشربوا ياحناي..
زبيده؛ايه باهي ماقلنا شي لكن بشويه عليهم..
رنده:قداش طيبه ياحناي..هادم كان تحليلهم شويه يتمرقسوا يسلبوا امي تستمالها اللي لابساته..
عفاف:صدقت...نقطعولهم رووسهم من توا بش يعرفوا ان الله حق..
وجيهه:عندهم الحق ياللاي كناين هالوقت يخوفوا..
زبيده تنهدت وهي تقول؛ربي يهدي من خلق..
رتيل؛والله حقه ياحنينه صاحبتي مرت خوها خلتهم يبيعوا حوشهم بش يقسموا حقه بعد مات بوها وتوا ساكنين بالايجار مساكين..
وجيهه:عطيها دي..
نوريه:ريتي ياحناي ريتي..مايبوا كان النار هادم..
تنهدت الحاجه زبيده وقعدت ساكته..
رنده:خلونا منهم توا اسمعوا بنبات الليله..
نوريه بفرحه؛الله..وحضنتها وهي تقول..استاحشت قرمتك يافرخه..
عفاف بضحكه:والله حتى اني..
رتيل:اني بنرقد معاكم مش راقده في داري..
ضحكوا..
وجيهة تشوف لبناتها وهي تضحك..
والحاجة زبيده تتفرج عليهم وهي تسبح...
ع خشة زهور:السلام عليكم..
ومشت طول لرنده..
خش بعدها سفيان ..
لما شافاته نوريه طول لقت شعرها هو ركز عليها..
زهور:شن حالك رنده..
رنده ناضت وهي تقول؛الحمد لله..ومشت لخوها..سفيان شن جو..
سفيان:تمام...وسلم عليها بالخد وهو مركز بنظره على نوريه..
بعدت عنه رنده وهي تقول:خشيت لمحمد يسال عليك..
ضيق عيونه وحط صبعه ع فمه وهو يقول:تو نخشله..نوريه..
نوريه ووجهها الوان؛نعم..
سفيان:ترا افتحي شعرك...

يتبع …
الفصول الاربعة