شكولينا

الجزء الثامن عشر

#شكولينا 🍫
#الجزء_الثامن_عشر
#الجمان_الفريد

الصلاة أولا💕💕💕
نبي نبهكم ع حاجه لما تلقوا في الحوار كلام انقال بين "" معناها الشخصيه اللي تتكلم قالاته بينها وبين نفسها...
ولو لقيتوا الكلام بين "" بدون مايسبق الكلام اسم معناها بدايه حوار...او جمله مهمه انقالت في وسط الحوار...
او شخص خش في الحوار فجأة...
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
"ان شاء الله ماتعبتوش في الجيه"
الحازة بإبتسامه:لا والله الحمد لله تريحنا
وجيهه؛كيف خليتوا سبها وناسها؟
الحازة:في خير ونعمه من ربك الحمد لله...
وجيهه بإبتسامه:الحمد لله..
.............
الشريف:آنستنا ياحاج عبد الودود..
عبدالودود:الله يآنسك ياحاج..
الشريف:والله لو كنا نعرفوا استقبلناك في المطار الحق ع عدنان مفروض قال..
ضحك عدنان ضحكه خفيفه..
عبدالودود بضحكه:قال ماتقولوا نبي نفاجئ لينا ونفرحها..
ابتسم الشريف وهو يشوف لولده وقال:ع العموم مرحبتين بيكم في أي وقت..
🏵🏵🏵🏵
في الكوجينه..
كانت لينا تجري وتوتي في ضيافه ماليها مابتش تخلي سلفاتها يخشوا في اي شي..
منى بإبتسامه:آنسوك ماليك ومولى بيتك يالينا..
لينا وهي لاهيه بالتجهيز: الله يآنسك..
زهور:شكله عدنان مروح ليه وقت اللي مشي جابهم وجي .
لينا:مش عارفه والله مانندري ع حاجه حاطه في بالي ان مرواحه في الليل كيف ماقالي..
زهور:كان يبي يديرهالك مفاجأة..
ابتسمت لينا..
بعدين طلعت تليفونها من جيبها ومشت طلعت للجنان وعيون زهور معاها وهي تشوفلها من فوق لتحت..
برا...
لينا:ايوه عدنان..تعال ارفع السفرة.......نزلت التليفون وخشت..
شبحت لمنى وقالت..نتعبك منى اطلعي السفره هديك للنساوين..
منى وقفت وهي تقول:لا تعب ولاشي من عيوني..
لينا بإبتسامه:تسلم عيونك..
مشت منى خدت السفره وطلعت بيها من الكوجينه..
"لينا".
ابتسمت بفرح..ومشت خدت السفره وطلعت بيها من الكوجينه...
لينا بإبتسامه خجوله:هاك..
عدنان وهو يشوفلها بإبتسامه حلوة خدي السفره وقعد واقف يشبحلها..
لينا وهي تساوي في وشاحها ومبتسمه بخجل:برا..
عدنان:وين تبيني نمشي!..
لينا :عدنان خلاص عدي..
عدنان ابتسم وقال:مستاحشك دنيا دنيا واجد واجد هلبه هلبه عرم بكل .
ولينا تضحك بخجل..
عدنان بضحكه:هدرزي ع امك شويه بعدين اركبي للشقه وتيلي حوايج بندوش..
لينا بإبتسامه:حاضر..
هو شبحلها شويه بعدين مشي..
وهي قعدت واقفه تبع فيه بعيونها اللي نظراتهم كلها حب..
لعند ماادرق من قدامهم...
تنهدت من قلبها..بعدين مشت خشت داخل..
لقت زهور واقفه ع التلاجه..فاتت من حداها ومشت طلعت من الكوجينه...
سكرت زهور التلاجه وهي تمسح في دموعها..بعدين ولت قعمزت حدا الطاوله...
🌺قعدت ام لينا لوطا تهدرز مع العيله لبعد العشي..
بعدين ركبت مع بنتها لشقتها تشوفها...
الحازة:ماشاء الله ماشاء الله كل شي فيها سمح وماناقصتها حاجه حتى من العصافير دايرهلك..
ضحكت لينا..
شبحتلها امها شويه وقالت:لكن ضاعفه واجد ومانكش كيف قبل..قولي الحق يمي متريحه؟
لينا ابتسمت وقالت:ايه الحمدلله تشوفي في عزوزي معاي وهل داري ناس كويسه عمي ربي يحفظه يعامل فيا تقول بنته...الحمدلله..لكن كيف ماتعرفي يما حمل وتعب ووحم طبيعي بنضعف..
الحازة؛الحمدلله..والله ديما نفكر فيك وعقلي عندك ونقول زعمه كيف دايره مع عربها بالذات وراجلك ديما بعيد..
لينا؛لا يما معاد تفكري الحمد لله نا هنى بين ناسي وهلي ومرتاحه واجد..مخلييني ع راحتي..وكيف ماشفتي حتى الشكولاته قاعده نخدم فيها..
الحازة:وافتكيتي من خدمه المستشفى ماجايك من وراها الا التعب والمرض وانتي في حالك هدى..
لينا بإبتسامه:ايه صح..
🏵🏵🏵🏵🏵🏵
خش بالسيارة للحوش...
شبح قدامه ع الطاوله اللي برا..
بوه وخوه عدنان وخوه مروان ومعاهم رجل كبير اسمر اول مرة يشوفه..
درس ونزل من السيارة ومشي جيهتهم..
لما وضل فيهم قال:السلام عليكم..
هما ردوا عليه...وعدنان ناضله...
سلموا ع بعض بالحضن..
سفيان:حمد لله ع السلامه..
عدنان:الله يسلمك..بعد عنه وحاوطه من كتافه ووجه نظره لعبد الودود وهو يقول:وهدا خوي الكبير سفيان..شبح لسفيان وقال..عمي عبدالودود والد زوجتي..
سفيان ابتسم وقدمله صافحه مصافحه حارة بإيديه الزوز وهويقول:اهلا وسهلا انست وشرفت..
عبدالودود جي بيوقف وهو يقول:الله يآنسك..
حط سفيان يده ع كتفه وقاله:خليك مرتاح خليك مرتاح..
قعمز عبدالودود وهو يقوله: تسلم..
طلقوا ايدين بعض وسفيان يقول:كيف حالك وحال سبها قبل ماتخلوها..
عبدالودود:الحمد لله بخير ونعمه الله..
سفيان:عن اذنكم نركب نبدل وننزل..
عبدالودود:اذنك معاك..
سفيان ابتسم ومشي..
وخوته وبوه معاه بعيونهم وهما مش مصدقين اللي شافوه من شويه..
عبدالودود:الله يبارك ع النخل اللي عندك ياحاج ..
شبحله الشريف بإبتسامه وقال:تسلم...
🏵🏵🏵🏵🏵
وكانت هديكا الليله بسلم لجروح لينا كلها..
حداها اميمتها ووبويها...وراجلها اللي تحبه ويحبها شن تبي اكثر من هكي؟!.. المشاعر الحلوة اللي حستها لينا فهالساعات نستها ماشافت في شهر كامل من وجع وحزن وقهر..
☘واستمرت  هالساعات...لثلاته ايام...
قعدوا فيها ماليها ضيوف عليها وع اهل زوجها اللي اكرموهم اخر كرم..
بس طبعا البنات ولاوحده فيهم جت..
رنده ونوريه قصدا...اما عفاف راجلها ماكر فيها يرفعها لأي مكان عادي الا لحوش اهلها وكذلك بش مايشوفش خوها سفيان...
فهالثلاثه ايام... اهل لينا ادهوروا في طرابلس وزارو اغلب الاماكن الحلوة الموجوده فيها...
عدنان كان يوميا يطلع فيهم ييتغدوا برا ييتعشوا وفي كل مرة امه لازم تكون موجوده معاهم بس بوه مشي مرة وحده بس بسبب مشغولياته...
اخر يوم ليهم في طرابلس قعدوا نهار كامل ع البحر..
ومعاهم مشت حتى زبيده هالمرة....
وهما عايشين احلى جو قدام البحر في عشة حلوة اللي أجروها...
مبكبكه وشوا..وعصبان...وهدرزة حلوة...
في حوش الشريف...
في الصاله...
حطت الغدي لراجلها وهي مبوزمه..
مروان:خيرك قالبه خليقك..
منى بعبوس:سلامتك مافي شي..
مروان؛بتقولي خيرك توا ولاكيف..
منى تنهدت وقالت؛ماهو كان تكلمت بتقلبها ع راسي..
مروان؛معناها خليك ساكته..
منى:طبعا مادا بيك ساكته ومانتكلمش ولانقول علاش حظي هكي..اللي مافي مرة قتلي خل نطلعوا نشموا هوا نتمشوا ع البحر من لما خديتك البحر ماشفته..
مروان وهو يحاول يتمالك نفسه:استغفر الله العظيم..
منى:ماقلت كان الحق..شوف اليوم كيف خوك مطلع مرته واماليها..ياحسرة ع ماليا اللي ماقلت تعزمهم ع همبورغا..
مروان دف السفره وناض وهو يقول:اقعدي في امها..
ومشي طلع من حداها وهو معصب..
طبست خدت السفرة وهي تقول:هدا اللي عنده هو..وبقهر كملت تقول...اه لو يرجع بيا الزمان لتالي بس..
ومشت للكوجينه..
حداها في جنب الكوجينه...
في الجنان..
سفيان؛ارفعي..
زهور:صحتين..وخدت السفره..
سفيان وهو نايض قال؛تبي تقعدي ولانرفعك لماليك قبل نسافر..
زهور:لالا نقعد هني..
سفيان شبحلها شويه بعدين هز راسه ومشي...
وهي مشت بالسفرة وهي تقول بصوت منخفض؛نمشي ونخلي الجو يفضى لهديكا !..
وخشت للكوجينه...
لقت منى تغسل في الماعين وهي تخبط فيهم بعصبيه..
زهور:بالشويه راك تكسري حاجه تقوم عليك للقيامه..
منى؛بالله خليني في حالي..
زهور:خيرك!
منى:خيرني يازهور خيرني عايشه عيشة تقصر العمر وتنشدي فيا خيرني ماهو حالنا واحد..
زهور حطت السفره ع الطاوله وقالت:صدقتي..شوفي شن دارو لماليها لما جو ماخلوا وين عزموهم..قريب ليا معاهم عام لتوا ماقالوا يعزموا ماليا ع كشيك كسكسي..
منى التفتت وقالت؛مش هما اللي قدروا ماليها يازهور راجلها هو اللي قدرها وقدر اماليها..فرق التريس يازهور فرق التريس..كان نعرف عدنان من وين جاها هالعيله..
زهور ابتسم بحسرة وقالت؛الدنيا حظوظ ع قولتك..اغسلي الماعين اغسلي..
منى التفتت للماعين ومن غيظها خدت صونيه وكسرتها في اللاوندينو..
زهور بصدمه:منى..
منى براحه:احسن هدا وين برد خاطري..
🌺🌺🌺🌺
الساعه 8:45ليلا..
في الطريق..
الحازة:بارك الله فيك وليدي ربي يبارك في عمرك وفي رزقك..
عدنان وهو يسوق:ويسلمك ويطول في عمرك انتي وعمي ياعمتي..
ولينا تشبحله من المرايه بحب وهي مبتسمه..
عبدالودود:نبوكم تجونا نهار وندهوروا بيكم غادي اي نعم ماعندنا بحر بس عندنا حاجات سمحه كيفه..
عدنان؛زي قلعة سبها..
وجيهه:ان شاء الله ياحاج ان شاء الله..
الحازة:تأنسوا وتشرفوا ياوخيتي..
ابتسمت وجيهه وقالت:تسلمي..
ورتيل تشبح للينا كيف تشبح للمرايه وشافت لخوها لقاته مره مرة يشبح للمرايه ويبتسم وهي شاده ضحكتها..
🏵بعد ماوصلوا الحوش قعدوا هدرزوا شويه..
بعدين لينا ركبت بأمها فوق لأول مرة من لما جت تبات معاها وعدنان نزل رقد مع بوه ونسيبه في المربوعه..
الحازة:هدا شنو يابنتي!
لينا؛غير خودي يما ماعندي ماندير بيهن هنى مش محتاجه شي والحمدلله...المهم نا مقسمتهن بينكم وبين امال وعبدالله..
الحازة؛عبدالله راجل يدبر راسه ويصرف ع عويلته بروحه ساده ايكاله وشرابه كل يوم عندنا حرام مايحط في حاجه..
لينا؛يما راهي حالته مش ولابد وماعنداش غير المرتب اللي مايدير شي وعنده عيل والآخر جاي في الطريق..مايصير شي كان ساعدناه شي..
الحازة تنهدت؛ع كيفك فلوسك وانتي حرة فيهن..وخدت منها الفلوس..
لينا ابتسمت وقالت:تبي نديرلك حاجه تشربيها ولاتاكليها؟
الحازة:لابنيتي نبي ترقد بكرا بنطلعوا بدري..
لينا بإبتسامه:باهي خل نعدي نقص المكيف شوي..
الحازة؛ايه نقصيه خير...
🌺🌺🌺
وراحو اهل الحوش في نوم عميق..
ماعدا هما الزوز قعدوا سهرانين لبعد نص الليل..
فتحت باب الشقه بهدوء..وسكرتها وراها بنفس الهدوء..
ومشت نزلت من الدروج..
وين وصلت لوطا قعدت ادور ...
لينا؛وينه؟!
"شكولينا"..
التفتت وهي مخلوعه بعدين حطت يدها ع قلبها وقعدت تضحك..
هو قال بضحكه؛اسف..
لينا بإبتسامه حب:ولايهمك..
🌺🌺🌺
مقعمزين فوق الطاوله اللي ورا الحوش ايديهم متعانقه زي قلوبهم..وحديث حلو يدور بيناتهم..وكل واحد فيهم يسمع للتاني ويتأمل فيه ويحفظ في تفاصيله..
عدنان؛لكن والله قلبي استفدنا منها هلبه..
لينا :كويس...تنهدت بعدين قالت...مافكرتش تغير مكان خدمتك وتخليه هنى ولاقريب؟
عقد حواجبه وهو مبتسم قال:حاليا لا ومانقدرش..علاش؟
لينا بإبتسامه؛مش لشي غير اني نستاحش فيك واجد..نبيك تكون معاي في اهم مراحل الحمل تبي وين نتعب نشوف اهتمامك الحلو بش ننسى كل شي يتعبني ويوجعني..
شد ع يدها وقال:حنكون معاك في كل وقت حبيبتي حتى لو كنت بعيد وبإذن الله سفر لمدة طويله تاني معاش في..
ابتسمت لينا بعيون معبيات دموع وهي تشبحله..
وهو بادلها الابتسامه الحلوة...بعدين قربها ليه وطبع قبله ع راسها...
منظرهم الجميل هدا...
كانت في عيون محرومه...وحاسده...تشوف فيه...
وكل مالها تزيد حسد وحقد ع صاحبته اكثر واكثر..
زهور...اللي كانت واقفه في روشن الحمام متاع شقتها وشافتهم منه بالصدفه...
🏵🏵🏵🏵
ويطل اليوم اللي بعده..
ومشت لينا مع راجلها واهلها للمطار تودع اهلها....
حاولت تشد روحها بقوة قدام امها وبوها لعند مامشوا للطيارة..
قعدت تبكي وعدنان حاول يهديها...بعد طلعوا من المطار رفعها للبحر اللي ماتشبعش منه لينا وديما مشتاقه للقعده قدامه..
كان يتفرج عليها وهي مغمضه عيونها وتتنفس في ريحته
وشفاهها تتحرك بالإستغفار وهي تعقد عليه بالأنامل..
كان يتأمل فيها بحب وشوق...
وهو يتأمل فيها كان يبي يحفظ تفاصيلها بش وين يبعد تقعد في خياله بكل شي حلو فيها...
🏵🏵🏵🏵
في المطار..
واقف يتكلم بالتيلفون ..
سفيان؛ايه توا نادوا ع الرحله متاعي..
"باهي وين توصل اتصل"
سفيان:تمام..وانتي كان تبي تمشي لحوش اماليك قولي لواحد من خوتك يجي يرفعك..
"لالا قتلك مانبيش مش لازم"
تنهد بملل وقال:براحتك..سلام..وسكر..
بعدين لف ومشي حط التليفون في وضع الطيران وحطه في جيبه وطلع من قاعة الإنتظار...
☘☘☘☘
وتستمر الأيام تمر...
ولينا وعدنان قاعدين يعوضوا في ايام فاتتهم في البعد..
لينا من رغبتها في اسعاد عدنان تقعد في حوش العيله اغلب الوقت..
وهو يرتاح وين يشوف علاقتها بأهله كيف ولت قويه اكثر من قبل وكل ماله يزيد يطمن عليها معاهم اكثر من قبل...
شاف الجانب الحلو..او هي ماخلتاش يشوف غير هالجانب ومايحسش بغيره...مستعده تتحمل في نفسها شي المهم ماتكدراش هو...
وع صعيد اخر..
كان وضع سلفاتها كما هو عليه..
منى من الكرد والتعب والجري ناسيه مروان وممكن هي تبي تنساه بش ماتذكرش خيبتها فيه..
واه لو كانت تعرف اللي يدير فيه من وراها ...!
اما زهور فبدت تركز ع لينا وحياتها اكثر مامركزة ع نفسها وحياتها هي..
زهور زي هلبه ناس وين يشوفوا المفقود عندهم مع غيرهم وهما مش قادرين يكسبوه يتمنوا زواله عنهم بأي شكل..
🍁هلبه ناس يستغربوا في التغير اللي طرأ ع شخصية زهور..بينما في الحقيقه اللي صار لزهور مش تغيير إنما هو ظهور..ظهور لجانب مخفي لشخصيتها...
عجبني كلام انقال بهالخصوص..عن ابليس..
لمن لايعرف...ابليس كان اصلح الجن عابد متعبد وقريب من الله هلبه..لدرجه ان الله سبحانه خلاه مع الملايكه....
عاش صالح عابد متعبد ظاهره الصلاح الكامل...لعند ماجي يوم وخلق فيه ربي آدم اللي قعد  جسد من غير روح لوقت طويل اثار فضوله ومشاعر بغض اتجاهه بالذات وان رب العالمين خلقه بإيديه...
كان ديما يراقب فيه..يقرب يتفحص فيه..يتأمل في تفاصيله ويبي يعرف علاش الله فضله وخلقه بإيديه..!؟
لعند ماجي اليوم...اللي نفخ فيه الله من روحه في آدم..
والحاجه هادي خلاته يزيد يحس اتجاهه بحسد وبغض..
وهالمشاعر طلعت بكل وقاحه لما امره ربي بالسجود ورفض..
ابليس اللي كان عابد ومتعبد وصالح..انقلب في لحظه لفاسق متكبر عاصي...الموقف هدا طلع حقيقته المخفيه..
وهلبه ناس في حياتنا هكي المواقف اطلعهم ع حقيقتهم ماتغيرهمش..
اي نعم زهور عايشه في وضع كله قهر وظلم...زوج سيئ اهل زوج ظالمين..اهل قلتهم خير...لكن هدا كله عمره ماكان مبرر بش تكون انسانه كارهه حقودة حسوده....
من جهة تانيه لو نشوفوا اللي عايشاته سلفتها منى نفس اللي هي عايشه فيه بالزبط الا بإختلاف طفيف...بس لاحقدت ولاحسدت كانت تحس بالقهر والغيره بس كانت منصفه حتى في احساسها هدا...
في النهايه...الانسان ما يحكمش ع غيره حكم مطلق الا لما يعاشره في كل الظروف ويشوف كل حالاته وبعدين يحكم عليه..اذا كان انسان سيء ولاجيد...🍁
🏵🏵🏵🏵
يوم الخميس...
الساعه 5:30عصرا..
في شقتها مع اساور يهدرزوا...
اساور وهي تشرب في القهوة؛امم..باهي سفيان امتى يروح اليوم ولاغدوة؟
لينا؛ماعندي فكرة الصراحه..ليش تسألي..
ابتسمت اساور ابتسامه ارتباك وقالت:عادي هكي وخلاص..
ابتسمت لينا مجامله وهي تشرب في القهوة...
لوطا....
حدا الكوجينه الخارجيه..
رنده؛قالت امي بدت تنزل الفترة الاخيره لكن لما جينا حني معاش بانت..
نوريه بتهكم:ان شاء الله.مش واخده موقف من اللي صار اخر مرة..
رنده:شكلها..
زهور اللي كانت تمصمص في الطواسي وتسمع في حديثهم استغلت الفرصه والتفتت وهي تقول:بنقوللكم حاجه غير نبيها تقعد بيني وبينكم..
عقدوا حواجبهم وهما يشبحولها بإستغراب..
زهور؛يومها سمعت حناي زبيده تحكي مع اللاي قالتلها لينا قالت معاش نوريه معاش نبي نحضرلها شي..
نوريه برفعة حواجب :هي هكي قالت!؟
زهور؛هدا اللي قالاته حناي زبيده..
رنده:ريتيها مقواها حتى امي بعد سمعت الكلام هدا مادارتلها شي..
نوريه:تمقرست ياحنه..ادلعت لين انحلت وتمقرست..
رنده؛قالت عفاف يومها قاللها سفيان انها خاشه حتى في حياتكم..
زهور:ايه..وقالت كيف متحملين هالعيشه وصابرين عليها..
نوريه :ريتي!
رنده؛جاني امس مروان تغدا عندي وقعد يشكي من منى كيف تغيرت معاه وبدت تقارن فيه هلبه بعدنان واللي يدير فيه مع مرته..
نوريه بعصبيه:جد اصل المقارنات مانحبه..عارفه هدا اللي بيصير من الأول...الحكايه تبيلها تدخل سريع..
رنده:ايه..امي تمرخت هلبه..
نوريه:هلبه...شبحت لزهور وقالت..بري ارفعي الطواسي للكوجينه هديكا..
زهور:حاضر..وخشت خدت سفرة الطواسي وطلعت بيهم..
نوريه قعدت معاها بعيونها لين بعدت بعدين قالت:فاهمه شن تبي هادي ولا؟
رنده ابتسمت بمكر:اني اللي نفهم..
نورية بإزدراء:دراه كبد..كان نعرف شن اللي مخلي سفيان متحملها لتوا..بعدين مشت بتطلع..
ورنده مشت وراها ..
طلعوا من الكوجينه ونوريه تقول:وين صغاري وين ..
رنده:يلعبوا القدام..
نوريه:نبيهم يمشوا معاي لشقة خالهم قالوا مستاحشين مرته..
ضحكت رنده وقالت:والله عرفتك..
ابتسمت نوريه وخشت للكوجينه ورنده معاها..
🌺🌺🌺🌺
"لا اليوم قاعدين لبعد العشي"
لينا بإبتسامه:خلاص نشوفك بعدين ان شاء الله..
اساور:ان شاء الله..باي..
لينا:سلام..
فتحت اساور الباب وطلعت...سكرت وراها لينا الباب بعدين خشت داخل..
مشت للدار النوم..كيف جت بتخشها..رن الجرس..
لينا بإستغراب:نست حاجه زعم؟
ولت متجهه للباب..
وصلت وفتحاته...واول ماشافت اللي واقف قدامه ارتسمت ع وجهها ملامح المفاجأة..
جتها نور ضمتها وهي تقول:لينا..
هي نزلت عيونها لنور وابتسمت ضمتها وهي تقول:نور السمحه حتى نا توحشتك..
الشريف:حتى حني واشتاحشنا الكعك..
ضحكت لينا وقامت عيونها في امهم وقالت:تفضلوا..
خشت نوريه ومعاها ولادها..وقعدت تقلب عيونها في الشقه وهي تقول؛كيف حالك مرت خوي..
لينا سكرت الباب وقالت؛الحمد لله..
خشت نوريه داخل من غير ماتسمع كلمة تفضلي وهي تقول:فقدتك نهار مرواحتي من الحج..
لينا ابتسمت بتهكم وقعدت ساكته ومشت وراها مع الصغار..
وصلوا في الصاله..
ونوريه وهي تقلب في عيونها فيها قالت؛علاش ماجيتيش..
لينا :جيت وروحت..
شبحتلها شويه بعدين قالت:كانك ع سوء التفاهم اللي صار..فمش بقصدهم عيت راجلي مايعرفوكش..
لينا:مش مشكلة نسيت اللي صار..
قعمزت نوريه وهي تقول:كويس..تعالوا ماما قعمزوا..
مشوا صغارها قعمزوا حداها..
لينا؛شويه وجايه..
نوريه هزت راسها بإيجاب..
مشت لينا...ونوريه ناضت ومشت وراها..
خشت لينا الكوجينه ولما فتحت التلاجه انخلعت وين سمعت صوت نوريه وهي تقول؛درتي خير لما سيبتي الخدمه متاع التمريض مش مناسبه لعيلتنا بكل..
لينا هزت راسها وهي تقول:امم..وطلعت باكو عصير من الثلاجه..
نوريه:تس تس تس..مانشربش فيه هدا نشرب في فرش بس..
لينا؛باهي نديرلك قهوة..
نوريه:لا شربت لوطا لين عييت شاهي وقهوه..ومشت لباكو الشكولاته اللي كانت تشبحله فتحاته وخدت منه طرف..
يدوب كلت حاجه بسيطه منها بعدين قالت؛مش عارفه ليش مش مشقيه روحك وتخدمي وانتي ماناقصاتك حاجه..
كيف جت لينا بتتكلم..
قاطعتها وهي تقول:عارفاتك شن بتقولي مش ع خاطر الفلوس ونبي نخدم لإني نحب خدمتي..كلها دوة فاضيه..المراة الصح تقعمز في حوشها معززة مكرمه تخدم راجلها والعيله اللب عايشه وسطهم..
لينا ؛تو لما نولي مراة صح ندير هكي..
رفعت حواجبها وقالت:تتسهوكي..!
لينا تنهدت وقالت:نا ماندخل في حياة حد مانبي حد يدخل في حياتي..
قدمتلها وهي تقول:متأكده! مش خاشه في حياة غيرك وقاعده تحرضي وتفتني..
ضحكت لينا بسخريه وقالت؛عليك حاله وخلاص..في حياة من بنخش وليش بنحرض ونفتن.! مش ليا الشي هدى وكيف ماتشوفي مش فاضية للدوة الفاضيه..وابتسمت..
نوريه قعدت تشبحلها وهي مبتسمه بكبر بعدين قالت:تمام...تمام...اني توا جيت ودويت معاك دوة مرة تانيه بنتصرف تصرف تاني وبعدها ماتلومي الا نفسك..
مشت وين مافي القمامه لوحت الشكولاته ومشت طلعت من حداها..
لينا حطت باكو العصير ع الرخامه وطلعت وراها..
نوريه:هي ماما قدامي..
نور:نبي نقعد..
نوريه شبحتلها شويه بعدين قالت؛باهي اقعدي..بعدين شبحت للينا وقالت..قالوا رديتي بالك من صغاري...صحيتي..
لينا بإبتسامه متعجبه:سلمك!
نوريه؛في الجديد وين مانمشي نجيبهم نحطهم عندك..
لينا؛مرحبتين بيهم...
نوريه شبحتلها من فوق لتحت بعدين مشت طلعت ووراها ولادها...
فتحت الباب وطلعوا مع بعض وسكروا الباب..
نور:نبي شكلاطه..
ضحكت لينا قالت:تعالي معاي..
وخدت البنت من يدها ومشوا للكوجينه..
🏵🏵🏵🏵🏵
"وحده كذابه وفتانه زهور هادي ماتصدقوش كلامها"
رنده،:وخيرك حمقتي انتي!
رتيل؛لانها كذابه لينا شاده حوشها وماتجيش هلبه وتعامل فيهم معامله سطحيه لاتحكي معاهم ولادور فيهم..
رنده؛شكلكم صحاب!
رتيل:صحاب ولامش صحاب زهور هادي وحده كذابه..
انفتح باب الدار عليهم..
خشت امهم وهي تقول:اطلعوا قعمزوا حدا عمتكم وبنتها..
رنده:نزلت اساور..
وجيهه:ايه هيا اطلعوا..
رنده:باهي هانا طالعين..
مشت وجيهه من حداهم للكوجينه..
وجيهه:ابدوا ديروا عشي..
منى:حاضر..ماتكتروش مافي حد في الحوش الليله..
زهور:حاضر اللاي..
ع خشة نوريه بصغارها..
وجيهه:وين كنتي؟!
نوريه:نهدرز على مريت خوي..
شبحتلها زهور..
ابتسمت وجيهه وقالت:نازله؟
نوريه:ايه اميمتي..شبحت لزهور ومنى وقالت..شن العشي؟!
زهور:رز بالخلطه وشربه عربيه وشيش طاووق وطاجين..
نوريه:ديروا كفتاجي..
زهور:حاضر..
وجيهه:تعالي قعمزي حدا عمتك..
نوريه بتذمر:افففف..
طلعت وجيهه وهي تقول:تعالي..
نوريه طلعت معاها وهي متنرفزة..
شويه وقالت:هالمبكبكه لاينفع فيها حج ولاعمرة.
زهور؛في الزايد..
منى:ايه...
زهور:لا وكنت نهدرز ع مريت خوي!!كان نعرف شن ديريلهم بس..
وخدت شكارة الكناسه ومشت طلعتها..
وصلت في المكان اللي فيه المكب الكبير..
ركبت درجه..وفتحاته وحطت الشكارة فيه...وين لفت وجيت بتنزل طلعت في وجهها قطوسه فجعتها..
نقزت وهي نازله ومشت تجري للكوجينه وهي تقول:اخلع فرايسك..
وخشتلها..
منى:خيرك!
زهور؛قطوسه مش عارفه من وين طلعت..
🏵🏵🏵🏵
وتمر نص ساعه..
نزلت لينا بعد ماصلت المغرب هي ونور...
كانوا يهدرزوا وهما ماشيات لين وصلوا الكوجينه..
لينا:السلام عليكم..
زهور:مازال بكري!
لينا عقدت حواجبها وقالت:آسفه..رفعت كمامها وقالت؛شن بديروا..
زهور:قوليلها يامنى..
منى  وهي تشوف للينا:ديري طاجين حبيبتي..
لينا وهي تشوف لزهور:باهي...
بعدين مشت لسلة البطاطا..
نور؛نبي نص بالشاميه..
لينا؛اطلعي توا حبيبتي قعمزي حدا ماما ونا تو نديره ونجيبهلك..
زهور:تعالي حبيبتي نور تو نديرهولك اني..
نور:باهي..
تنهدت لينا والتفتت لسله البطاطا..
ومنى توزع في نظرها عليهم الزوز وهي تصب في الرز...
🏵🏵🏵🏵🏵
طلعت تجري من باب الحوش القدامي...
جت لخوها وهي تقول؛نعم عدنانو..
عدنان:لينا داخل..
رتيل بإبتسامه:في الكوجينه..
عدنان:حلو...اسمعيني جاي...
...........
"ويومها كلنا سجدنا شكر بعد جابت"
منى؛وااك قداش شفتوا وقداش فات عليكم..
لينا؛مع هكي والله كانن احلا ايام..
منى:-خاطرك تولي؟
زهور ركزت مع لينا..
لينا:لالا هكي اريح ..
منى هزت راسها وقعدت ساكته..
ولينا الخلطه في طاجين بايروكس..وقعدت تساوي فيها..
بعدين خداته وحطاته في الكوشه..
"لينا"..
سكرت الكوشه وقالت:اللاي ولا؟
منى:ايه.
لينا حولت المريول ومشت للاوندينو غسلت ايديها..بعدين نشفتهم وطلعت..
وين وصلت في الصاله..وقفت في مكانها مندهشه...
شافت طاوله عليها تورته وفوقها  شماعي..
عقدت حواجبها وقالت بضحكه:هدى شنو؟!
نوريه:توا بديري روحك ناسيه عيد ميلادك!؟
ضحكت لينا وقالت:حي والله نسيته !!
اساور بضحكه؛بس راجلك ياحنه متفكره..
غطت لينا وجهها وهي تضحك بخجل..
رنده ونوريه شبحولها بإبتسامه ازدراء..
وجيهه بضحكه:هي تعالي طفي  الشماعي..
لينا نزلت ايديها ومشتلهم وهي تضحك..
بدوا اساور ورتيل يغنولها..
والباقي يتفرجوا...
ولينا تضحك وخلاص..
وزهور ومنى واقفات فم الصاله يتفرجوا..
بعد كملوا غني..طفت لينا الشموع..
وهما صفقولها ماعدا نوريه ورنده..
ربيعه:سلم الراجل اللي كاسبك ياريت منه ميه..
وجيهه بإبتسامه؛ربي يحفظهم ويهنيهم يارب..
لينا بإبتسامه خجوله:تسلمي عمتي..
رنده:اني عيد ميلاد فات جي محمد بيديرهولي قتله لا حرام الاحتفال بالحاجات هادي..
ربيعه؛ايوه الشيخه رنده تتكلم..
ضحكوا..
رنده؛هدا الدين عمتي..
لينا؛عندها الحق..بس كان بدلنا كلمة عيد بذكرى يتغير الوضع..
ربيعه؛باهي ياستي ذكرى ميلاد سعيده وان شاء الله العام الجاي صغويرتك ع ايديك..
وجيهه بضحكه:صغويرة شني اللي في عام هادم؟
ربيعه:حالمه بيها بتجيب تويمه..
لينا بضحكه اندهاش:والله حتى عدنان يقولي فيها بيجونا توامه..
وجيهه بضحكه:ماشاء الله..
نوريه:لكن الله اعلم جينات مني اقوى..
ربيعه؛ان شاء الله جيناتها هي ع قنانتها..
رنده بضحكه؛ويجونا عبيدات صغيرين..
لينا شبحت لرنده بحده..
والباقي بصدمه..
ربيعه:الله غالب مش منك قليلة ادب وطويله لسان بالفطره..
رنده:نبسروا..
ربيعه؛اقطع بصارتك..
لينا: ع سيرة القطع وين الموس خل نقصها الصغار يبوا..
اساور:اهوا لينو...ومدتلها الموس..
زهور وهي تتفرج عليهم لفت وولت للكوجينه وهي تسحن ع لينا...وين خشت حست بوجع في ظهرها من الأسفل..
شداته..
ع خشة منى شافتها قالت؛خيرك!؟
زهور:ظهري من التقعميز ع الكرسي شكله..
منى؛اها اوقفي مالا..
زهور:خل نطلع نتمشى شويه...
منى:باهي..
مشت طلعت زهور.. ومنى كملت شغلها...
داخل...
لينا وهي شاده في ايديها صواني لسلفاتها:قاعد هو..
رتيل:لاطلع قال عند مشوار..
ابتسمت لينا ومشت بالصواني للكوجينه..
وفي نفس الوقت..
اساور خدت بنت خالها رنده وطلعت بيها من الحوش من القدام..
وصلوا حد النخله ووقفوا...
رنده؛خيرك؟
اساور:دبريلي حل مع خوك رنده ارجوك..
رنده؛مافيش فايده؟
اساور:بكل..مش عارفه ندير رنده حاسة روحي بنموت..
رنده:ماعندي مانديرلك يااساور الحق..
اساور:كيف! تو مش انتي قلتي بتوقفي معاي رنده شن غير رايك..
فهاللحظه..
وهي تتمشى سمعت كلامهم وقفت ورا الحيط وقعدت تتسمع ...
رنده:حاولت وعطيتك رقمه وحاولت نوصلك بيه اكثر من هكي مانقدرش كان هو مايبيش..
اساور:وتخليه عايش متعوس مع هديكا..
رنده؛الود ودي يطلقها توا قبل بعدين وياخدك انتي بنت عمتنا منا وفينا...اسمعي اساور انتي لازم تصبري..اولها عن اخرها خوي ونعرفه زهور مش حطول معاه كان مادارتش صغار..انتي اصبريلك شويه واستني..
زهور اللي سمعاته طيرلها عقلها..
طلعت عليهم وهي تقول:تبي تخربيلي حوشي يارنده علاش شن درتلك..
الزوز قعدوا يشبحولها وما مصدومات..
زهور:وانتي ياحقيره انتي اللي تجري في جرته وتتصلي بيه ولا..تعرفي شن قال عليك..قال وحده مش متربيه وتو نعرف نربيها..وحي كان يعرف ان اخته ليها يد فهالعار..
رنده:اثبتي كان قدرتي تثبتي باهي..مش حيصدقك انتي اللي مش طايق يشوف شبح وجهك ويكذب اخته..
زهور:نقوله ونشوفوا من يصدق..
رنده ببرود:كان تبي تطلقي قوليله تسهليها عليه وعلينا..
ومشت وخلتها..
زهور:والله لما نفضح بيكم باهي!
اساور:تعرفي لو كان عندك دم وشويه كرامه تطلقي ..معاش تعيشي مع انسان عايش معاك بالسيف عليه..
وحتى هي مشت لحفت رنده..
زهور بدت تبكي وهي تقول:حسبي الله ونعم الوكيل فيكم.ربي يخرب حوشك كيف ماتبي تخربي حوشي يارنده..
فجاة حست بوجع فضيع في ظهرها وبطنها..
شدت بطنها بقوة ومشت بتعب وهي تقول:حسبي الله ونعم الوكيل..
والألم يزيد..قعدت تمشي يإتجاه الدروج اللي يرفعوا لشقتها..
ركبت فوق بتعب..
وين وصلت فوق ..
طلعت مفتاح الشقه من جيبها وهي تتوجع ومازال تتحسب..
فتحت الباب بصعوبه..
مشت خشت داخل...حست من جديد بوجع بس رهيب شدت ع بطنها بقوة وقعدت تمشي بتعب وهي تقول:ياربي هدا شني..!!
يدوب وصلت لكنبه في وسط الحوش قعمزت عليها وقعدت شاده بطنها بقوة وهي تووجع..
نزلت عيونها لوطا لما حست بشي غريب..
لقت بقع صغيره من الدم تنزل منها..
قعدت تفكر للحظات بعدين توسعوا عيونها وهي تقول:لاياربي لا..!
"زهور"
بدت تبكي وتقول:لالالا ياربي لالا ياربي..
خشت عليها وهي تقول بفجعه :زهور خيرك..
شبحتلها زهور وهي تبكي بفجعه وتقول:زوديلي يالينا زوديلي بالله عليك...زوديلي...بيطيح يالينا بيطيح..
جتها لينا وضمتها وهي تقول:اهدي حبيبتي اهدي تونكلم عدنان..
زهور بعياط؛بيطيح يالينا بيطيح...ليا عام نراجي فيه وشوفي كيف جاني.....علاش ياربي علاش...علاش..
لينا ضمتها بقوة وهي تقول:استغفري الله...اذكري الله...
ايوه عدنان......سيب اللي عندك وتعالى.....لامش نا مرت خوك سفيان تعالى.......هي نرجى فيك..
شدت زهور ماليه لينا وهي تقول؛بالله عليك يالينا بالله عليك..
لينا قعدت اضم فيها وهي تقول:اهو جاي عدنان اهو جاي..ان شاء الله مايصير شي..بسم الله الرحمن الرحيم..
وبدت لينا تقرا في سورة الفاتحه وزهور تبكي تتوجع بقوة..
صوتها وصل لتحت وكلهم كانوا عندها في لحظات ماعدا رنده واساور...وشويه وجي عدنان..
ورفعوها هو ولينا وامه لأقرب عياده...
كانت لينا تدعي طول الطريق انهم يلحقوا وينقدوا جنين زهور..
بس إرداة الله ونفذت...وزهور اجهضت جنين عمره شهر اسبوع....
🍁لينا طلعت ورا زهور بش تعطيها حصتها من التورته ولما لقتها وشافتها وين واقفه وشافت من بعيد اساور واقفه ع رنده قعدت تشبحلهم لين خشت زهور في الدوة وصارت بيناتهم المشكله..كانت لينا خايفه تدخل بيناتهم...لهدا قعدت بعيده تشوف في اللي صار..ولما شافت وضع زهور بعد ماهما مشوا خافت..
ترددت تلحقها...وفي نهايه حسمت امرها ومشت وراها🍁
☘☘☘☘
في نفس الليله..
كان سفيان مروح...لما وصل اتصل بعدنان يجي يروح بيه..
وعدنان في الطريق بلغه باللي صار ورفعه وين ماموجوده مرته...
☘☘☘☘☘
تشبحله ودموعها تنزل...
وهو يشوفلها بنظرات غضب ودموعه في عيونه..
زهور بتعب:سامحني..
سفيان:ع شني...ع استهتارك ولاقلة معرفتك..هدا العيل اللي قريب هبلي بش تحمليه وين حملتي ماعرفتيش روحك حامل حتى..
زهور بدت تبكي..
سفيان:قتلك اقعدي في حوش اهلك ولا؟..لكن انتي سكرتي راسك...كنت حاس الله كنت حاس بس مابيتش نقولك بش مانأملكش ع الفاضي ولانأمل روحي قلت راجي شويه تانيه بالك يبان عليها اكثر ونتأكد...لكن مع الأسف..
سكت وهو يمسح في دموعه اللي ينزلوا..
زهور ببكي:آسفه..والله اسفه..
سفيان هز راسه ومشي طلع من حداها..
اختها مفيده قعدت تشبحله وركزت ع ملامح وجهها قلبها انقبض وحست بشي خوفها..مشت خشت لأختها طول...
☘اما هو...
مشي طول طلع من العياده وركب سيارة خوه..
طول الطريق..كان سرحان وساكت..
وعدنان مرة مرة يشوفله وهو موجوع عليه...
وقعدوا ع هالحال لين وصلوا للحوش..
نزل سفيان ومشي خش للحوش ووراه عدنان..
خش للمربوعه لقي فيها امه مقعمزة تبكي حدا بوه..
لما خش شبحوله..
سفيان؛مانبي نسمع شي انتم اسمعوني...بنطلق..
الشريف:شني!.
سفيان:ايه بنطلق خلاص..زواج زي هدا استمراره اكبر غلط..اني راجل مش للزواج افهموا اني نبي نقرا نبي نمشي في طريق اني نبيها ومعاش نبي نظلم بنت الناس معاي اكثر من هكي..بنطلقها وبنطلع برا البلاد نقرا..ولو شن يصير ولوشن ديري يام ماني مولي في كلامي..
ومشي طلع من حداهم..
وجيهه ببكي:عنده حق وليدي عنده حق اني درتها فيه اني..
الشريف وهو مصدوم:بنت الناس شن ذنبها مسكينه!
عدنان:ذنبها انها رضت تقعد مع واحد هالمده هادي كلها وهو مايبيهاش..الطلاق ارحملها يابوي..
ومشي عدنان طلع من حداهم..
الشريف غمض عيونه بأسف بعدين فتحهم وقال:إنا لله وإنا اليه راجعون..
☘☘☘☘☘
بعد شهر...
نزل عدنان من الدروج وفي يده زوز شناطي كبار..
مشي بيهم لأخ زهور..
عدنان:ربي يعوضها خير..
خدي خو زهور الشناطي من غير مايرد بكلمه..
وطلع بيهم برا الحوش..
عدنان؛لاحول ولاقوة بالله...
في الكوجينه..
كانت منى تبكي بالعبره...مهما كان في النهايه عاشوا مع بعض عام وكانوا  لبعض خوات تحملوا مع بعض وهونوا ع بعض..
وان كانت منى ماتتقبلش في زهور هلبه طباع بس كانت تحبها..
اما دموع لينا فكانت ع حظ زهور والمآل اللي وصلتله..
🍁وماتعرفش ان اللي صار كله كانت استجابه لوحده من دعواتها في يوم عرفه...
《 ارجوك ادفع بحولك وقوتك شر كل من يبي يفرق بيني وبينه يارب.》🍁
🏵🏵🏵🏵
"مرتاح"
تنهد وقال؛هدا وين ارتحت...زحت حمل ثقيل عن اكتافي وارتحت والحمد لله ماهضمتش حقها في شي..مؤخرها دفعته كامل ذهبها ودبشها كله يوصلها اليوم..معاد عندها ليا اي شي..
ابوبكر؛ربي يعوضها خير..
سفيان:ان شاء الله..ابتسم وقال...السفر اخر الشهر هدا ان شاء الله خلاص..
ابوبكر:ع خير ...
سفيان تنهد وقال:اللهم آمين...

يتبع …
الفصول الاربعة