#شكولينا
#الجزء_الخامس_والخمسون"القسم_الأخير"
#الجمان_الفريد
كل شي حيخليك بعد موتك الا اعمالك الصالحه حتلحقك..
واولها الصلاه..ماتبدي عليها شي في الدنيا مهما كان مهم كله زائل وهي بس اللي حتقعد...الصلاة اولا🌸
قولوا لاإله إلا الله تفلحوا باللسان بالقلب وبصوابعكم اللي تكتب🌷
وصلوا ع الحبيب اسعدكم الله بجواره في جنات النعيم💖
🍫🍫🍫🍫🍫🍫🍫🍫🍫🍫🍫🍫🍫🍫🍫🍫
هي واقفه ورا الطاوله وتشبح للقاضي اللي كان يشوف في ملف قدامه من داخل كانت مرتبكه ومتوتره وفرائسها ترتعد من الخوف..
بس ظاهرها متصنعه القهوة والثقه بالنفس..
اما هو من ورا الطاوله واقف يشوف للقاضي وهو واثق من نفسه ظاهريا وداخليا ومصدق تماما انه ع حق وانه صاحب حق..
والكاتبه تجهز في الوراق اللي بتكتب عليهم وهي تمرر في نظرها عليه وعليها...
القاضي شبحلهم وقال:انتم شن قضيتكم بالزبط..
رنده؛اني نبي حضانة بنتي وحقوقي بعد الطلاق..
القاضي:انتي رافعه القضيه..
رنده:ايه..
شبح لمحمد كويس وشبه اذكره بعدين قال:قبل كل شي..نحاولوا نحلوا القضيه وديا..انت يامحمد تعطي لطليقتك حقوقها كامله شرعا وقانونا..وتعطيها حضانه البنت والمحكمه تحددلك ايام او ساعات معينه تشوف فيها البنت..تنحل بهدوء وبالتراضي افضل ليك وليها..لأن قضايا زي هادي ممكن تاخد سنين من عمركم..
محمد:لامش حنعطيها بنتي وحقوقها شرعا وقانونا لاتستحقهم..
شبح القاضي لرنده وقال:انتي تنازلتي عن البنت في البدايه؟
رنده بلعت ريقها وقالت؛لا بنتي انخطفت مني خطف..اني ياحضرة القاضي ضحية لمكيده كادها ليا طليقي لما كنت ع ذمته.
القاضي:مكيده شني..
محمد قعد يشبحلها..
رنده وهي تحاول تكون ثابته:الراجل هدا لما كنت ع ذمته خاني وكان يضرب فيا ويحبس فيا في الحوش..خاني مع قريبته وقريبتي ومانعرفش مع مني تاني ولما اكتشفت خيانته قعدت في حوش اهلي وطلبت الطلاق..
القاضي:اختصري يارنده اختصري..
بلعت ريقها وارتبكت غمضت عيونها وفتحتهم وهي تقول:باهي..هو حاول فيا بش نوافق نرجعله وفي االنهايه وافقت ع خاطر بنتي..قالي بيسافر برا خدمه وحني بنسافروا معاه..
القاضي:اختصري يارنده في وراكم ناس تستنى..
غرقوا عيون رنده بالدموع وهي تقول:اهو نحكي..رفعني معاه اني والبنت لفندق ع اساس اليوم تاني بنسافروا واليوم التاني خلاني نخش للحمام وبعد طلعت لالقيته هو لابنتي لاشنطة حوايجي لاجوازي لاهويتي لاتليفوني..
وقفها وهو يقول؛تمام لهني..
بلعت ريقها وقعدت ساكته وبدت ترجف ..
القاضي:شن ردك يامحمد..
محمد؛دارت زي مايقول المثل رمتني بدائها وانسلت وحسبي الله ونعم الوكيل..والله عمري مامديت عليها يد وكنت مدللهاوالله العظيم..
رنده قعدت تشبحله بصدمه..
محمد:هي اللي كانت مش مزبوطه وكنت ديما شاك فيها بس ماشديتش عليها دليل وقلت بالك ظالمها..
القاضي:تصرفات زي شني؟
محمد:مكالمات في التليفون اول مانخش عليها تنهيهم طول..مشيها لحوش ماليها ديما وبياتها غادي ولما نتصل بيها نلقاها انتظار..حتى لما نطلع فيها معاي نلاحظ عليها في حاجات مش مزبوطه..
رنده بصدمه؛حسبي الله ونعم الوكيل..اتقي الله..
محمد:نبي ناخد فرصتي سيدي القاضي..
القاضي:لو سمحتي اسكتي لما يجي دورك تكلمي..
سكتت رنده وهي تبلع في ريقها كأنها تبلع في سم..
القاضي:كمل يامحمد..
محمد تنهد وقال: لاحول ولاقوة الا بالله...المهم صبرت عليها وحطيت الحق عليا قلت اكيد وسواس اني اللي تفكيري خي..
عيونه تعبوا دموع كذابه وبنبرة بكاء كذابه قال...انت راجل زيي وتفهم اللي نحس بيه لما نعاشر زوجتي ونحسها مش معاي بكل..
رنده حطت يدها ع صدرها بصدمه..حست الدنيا تلف بيها...
هدا شني يقول...هدا خيره هكي قام يده من ربي مرة وحده!!؟
والكاتبه مركزه معاه وتأثرت وين شافت الدموع في عيونه صدقاته ووجعها..
والقاضي يسمع فيه ومايبيش يقاطعه يبيه يقول اللي عنده كله..
وهو متابع يقول:في مرة نادتني سامي وحني في المعاشرة..
رنده بصدمه:انتي شن تقول انت..اتقي الله خاف ربي..
محمد:انتي اللي خافي ربي انتي ياسرك ظلم..
القاضي؛هدوء هدوء..رنده ..مدام هو ماينفعش علاش قررتي توليله..
رنده:قتلك ياحضرة القاضي ع خاطر بنتي هو اصلا ماخلا من دخل واسطه بش يردني والله خواته قالوا يبكي..
قاطعها محمد وهو يقول:كذب كذب كذب ماصارش.
القاضي:هدوء..هدوء..ولاننهيها..
سكتوا الزوز..
القاضي:يعني انت يامحمد مش حتعطيها حضانه البنت ولاحقوقها اللي طالب بيهم..
محمد:مراة خانت راجلها وخاشة طريق وسخ كيف نعطيها بنتي بش تتربي زيها..
رنده بصوت يدوب طالع من الصدمه؛حسبي الله ونعم الوكيل..
محمد:اني ع قد ماصبرت ومشيت واحسنت الظن فيها بعد اكتشفت خيانتها في الفندق وفوقها مستخدمه البنت بش تغطي ع وساختها لو تطلع روحي بنتي ماتاخدها وماهي طايله مني قرش..
القاضي:عندك دليل ع خيانتها؟!
محمد:قدمت الادله الفندق اللي كانت فيه والموظفيه اللي شافوها بعيونهم خاشة مع واحد بعقد زواج مزور..
هز القاضي راسه ونادي:يامبروك..
رنده التفتت للباب ولقت اللي ينادي فتح الباب..
القاضي:تأجل الجلسه لتاريخ20\ .....تفضلوا..
رنده بقهر شديد طلعت وهي تقول: ياويلك من ربي..حسبي الله ونعم الوكيل..
القاضي:رنده..ماديريش هكي يارنده..
طلعت رنده وهي مقهور قهر شديد والظلم حارقها قالت بصوت عالي:حسبي الله ونعم الوكيل فيك..تلقاه في خوتك الخمسه ياربي..
هو طلع يمشي عادي وكأنه ماصار شي..
هي لحقاته ونوريه مشت وراها تنادي:رنده..
رنده:ربي ينتقم منك ربي يرده في خواتك..
واحد من الموجودين قاله:مادورهاش..
محمد:حتى اني مش معبرها وحده مريضه..
نوريه:انت المريض ياواطي يامنحط..
طلعوا برا مرة وحده ونوريه تقول:والله ماهي ليك اختي الله ماهي ليك ولاتستاهلها يانذل ياخسيس ياعديم الرجوله..
محمد ابتسم بتهكم وركب سيارته وهو يقول:عيله مريضه..
وتحرك طول وهو يحرق في العجل..
ورنده تبكي وتقول:حسبي الله ونعم الوكيل فيك..
نوريه:ان شاء الله ماتوصل ياربي..
والناس في الشارع يتفرجوا عليهم..
نوريه خدت اختها ضمتها وهي تقول:خلاص خلاص وخيتي ربي ياخد فيه الحق..
ورنده تبكي بالعبرة..
شويه جاهم واحد.عنده محل مواد غذائيه قريب ع المحكمه..
كان في يده كرسي قال:تفضلي ياأختي..
نوريه قعمزت رنده عليه وهي تقول:خلاص حبيبتي خلاص...ركزت ع وجع اختها لقاته شاحب وفمها ابيض..قالت بالله وخيي عصير وحاجه مالحه..
الراجل:هي شويه بس..ومشي يجري..
ع طلعة المراة اللي كانت معاهم داخل تراجي في دورها..
:علاش درتي هكي يارنده اللي درتيه مش فصالحك يخلي الحق معاه هو..
رنده ببكي؛مش مني من قهرتي من حرقة قلبي..
نوريه ودموعها ينزلوا:عطيه مايحرقه...
شويه وجي الراجل ومعاه عصير وبشكوطي "بسكويت" مالح وقال:تفضلي يااختي..
خدتهم نوريه والراجل مشي ع حاله...
فتحت العصير وعطاته لاختها :هاك اشربي..
دفاته رنده وهي تبكي قالت:مانبي شي..
نوريه:دوخي يارنده..
رنده:خل ان شاء الله نموت ع اللي صار فيا معاش نبي نعيش..
نوريه:ان شاء الله في راسه ياربي
:مفروض متوقعه منه يقول اي شي..
رنده رشفت وهي تقول:اني ماقهرني شي غير نظرة القاضي ليا حسيته مكذبتي ومصدقه حتى البنت اللي تكتب حسيتها صدقاته الحقير..ماعرفتش ندافع ع روحي ماعرفتش..وغمضت عيونها بشده وقعدت تبكي..
نوريه رفعت راسها وقالت بألم؛ااه...حسبي الله ونعم الوكيل..
شويه درست سيارة عاليه..
نزلت منها وحده ومشت بتخش المحكمه شافت رنده ونوريه..
حولت نظاراتها وركزت فيهم ..بعدين قدمتلهم وقالت:السلام عليكم..
نوريه شبحتلها وردت السلام وهي تتمعن في وجهها بعدين قالت:نجاح!..
:نوريه بن عامر ولا..
نوريه:نجاح الوداني..
نجاح ضحكه:والله لنوريه...وسلمت عليها بالخد بحراره..
نوريه:سبحان الله..
بعدوا عن بعض..
ونجاح تقول:ايه والله سبحان الله الدنيا الصغيره..
شبحت لرنده وقالت؛لاباس!؟
نوريه:رنده..
نجاح بدهشه:رنده!! خيرها شن صايرلها..بنات عمي الشريف شن يديروا هني!!؟...
🍁🍁🍁🍁
"حابسه روحها في دارها قالت مريضه"
مها:حامل طبيعي تتعب ياعمتي مش مشكله تو نديره اني الغدي..
رمضانه:باهي ربي يعاونك..
ومشت مها وخشت للكوجينه...
واكرام في دارها مقعمزة ع السرير لابت تاكل لاتشرب من أمس....
اكرام؛تو نوريك انت وياها..
رفعت حاجبها وشبحت لتليفونها وهي تهز في رجلها من الغيظ...
🍁🍁🍁🍁🍁
"يابنتي لتوا ماكلمنا حد واني مابتش نتصل"
هادي وجيهه تكلم في عفاف في التليفون وهي تمشي وتجي في الممر..
والكناين في الكوجينه يديروا في الغدي..
لينا:ربي يستر بكري كلمت سفيان قالي ماكلمونيش شكله مازال..
منى:ان شاء الله مايصير شي خايفه هلبه الحق..
لينا بقلق:ان شاء الله..
🍁🍁🍁🍁
"اييه يارنده اييه في اوطى واحقر من راجلك مروا ع راسي في هالمحكمه"
:حتى اني قتلهم واولهم طليقي..
نجاح:مع الاسف الراجل غالبا كل شي يكون لصالحه ويتصدق اللي يقوله ع حسب القاعده اللي ماشيين بيها ان المراة تبالغ في الشكوى..وتكفر العشير..عندهم اللي تقوله 90%منه كذب..
نوريه:وين العدل ع هكي؟
نجاح:العدل عند ربك بس...تعرفي في قضايا تعبت فيهم هلبه على ماجبت حق اللي وكلوني وبش صدقها القاضي...في اللي اضطروا ينسحبوا مع الأسف لأن كل شي ضدهم وكل شي مع الراجل..
رنده؛معناها اني تعبت روحي وشقيت ماليا لمارفعت عليه القضيه..
نجاح؛لا مانبيش نقول هكي..بس نبي نسألك من المحاميه متاعك انتي..
رنده بضيق:انس الهمالي.
نجاح:انس نار...مافيش قضيه خداها ماربحهاش يسموا فيه نصير المرأة..ماتخافيش كان هو المحامي متاعك حقك جايك جايك بإذن الله..
رنده:حاسه القضيه هادي اكبر منه..ومحامية هداكا اقوى منه..
نجاح:من هي؟
رنده:اسمها رفعه..
نجاح:رفعة الحشاني هديكا قويه هلبه..
نوريه:سحيقه..
نجاح تنهدت وقالت؛لحظه شويه..فتحت شنطتها وطلعت منها كرت وعطاته لرنده وقالت..كان احتجتيني كلميني..
خداته رنده وهزت راسها بإيجاب..
نجاح؛نتلاقوا في ظروف احسن ونهدرزوا نويره..عن اذنكم توا..
نوريه:اذنك معاك..
نجاح:السلام عليكم..ومشت خشت داخل..
ردوا عليها السلام بعدين المراة قالت.
؛نجاح محاميه مشهوره هلبه...يتجنبوا يوقفوا ضدها في قضاياها..كان توكليها خيرلك بالذات في بينكم معرفه..والنساوين مافيش خير منهم في المحاماة..
رنده كانت تسمع في كلامها وهي تفكر فيه..ونوريه هزت راسها وقعدت ساكته..
المراة؛ربي يفرج عليك وينصرك..نستأذنكم..
ومشت المراة خشت داخل...
نوريه:خودي اشربي العصير بالله عليك..
رنده وقفت وقالت؛مانبي شي يانوريه كلمي سفيان...وقعدت تمسح في دموعها..
نوريه مشت حطت اللي فيدها ع رخامه..
بعدين طلعت تليفونها من جيب الجلابيه واتصلت بسفيان..
بعد كملت مكالمتها كلمت الراجل يجي يرفع الكرسي وشكراته...
وقعدت واقفه مع اختها يستنوا لين جت سيارة سفيان..
مشوا الزوز وركبوا وسفيان عيونه مع رنده.
سفيان:شن صار..
نوريه:قطافه نفسه ماتغيرش..
سفيان:رنده خيره وجهك هكي..
رنده؛مافي شي رهبة الموقف بس..
سفيان:الكلب شن قال الزبط..
رنده:نفس الدوة ياسفيان هي نفسها..واتكت براسها ع ظهر الكرسي وغمضت عيونها..
سفيان شبح القدام وهز راسه وقعد ساكت..
ونوريه شبحتله بعدين شبحت لباب المحكمه واذكرت الموقف اللي صار...حست روحها وكأنها كانت تحلم مش مصدقه ان هي واختها يصير فيهم هكي..وعيلتها كلها..
تحرك سفيان بالسيارة هي شبحتله وقعدت تفكر لو عرف باللي صار شن ممكن يدير..
بعدين شبحت القدام وقعدت تفكر في بوها...
اما رنده كانت سرحانه وتذكر في اللي صار بالتفصيل..
افترائته نظرات القاضي والكاتبه اللي معاه..
الراجل اللي قاله مادورهاش..
هدا كله..وفوقه مكالمة طليقة انس اللي قاعده مرعشتها لتوا..
دموعها بدوا ينزلوا سيل وحاسه بصدرها في نار والعه تحرق في احشائها حرق...
سفيان؛شن قال القاضي..
رنده:شي سمع مني ومنه وقعد يسأل واجل الجلسه ليوم عشرين سته..
سفيان تنهد وقال؛لاحول ولاقوة الا بالله..
نوريه:كلمك المحامي..
سفيان؛من بكري يتصل ويسأل...
نوريه تنهدت بضيق وقعدت ساكته..
وقعدوا طول الطريق ساكتين..
لين حطهم سفيان في الحوش ومشي يشوف في باقي اشغاله..
لما خشت رنده للحوش لقتها امها وقالت:شن صار..
رنده:بوي قاعد..
وجيهه:لا في حوش عمتك عند امه..قولي شن صار..
رنده بإنفعال:شن بصير!..الحقير هداكا زي العاده هو اللي غلب هو..واني ماعرفتش ندافع عن روحي يام ماعرفتش ياريتني رفضتها ياريت..ومشت طول لدارها..
نوريه لحقتها وهي تقول:رنده..
وجيهه بدت تبكي ومشت لحقتهم..
والكناين في الكوجينه يسمعوا وساكتات..
فجأة بدوا يسمعوا في صوت تكسير وخبط..ورنده تعيط وهي تقول..
"طعن في شرفي يام وماعرفتش ندافع روحي..
غلبني يام غلبني وهو ظالم..
علاش ياربي دير فيا هكي..مش سادني ماريت مش سادني ماجاني...سادني ياربي ساد..سادني خلاص ساد"
وسمعوا تخبيطها ع وجهها وامها واختها يقولوا..
"لاماديريش هكي بنيتي ...رنده..رنده بطلي"
وشويه وسمعوها وهي منهاره بالبكي....
منى بألم؛لاحول ولاقوة الابالله..
ولينا تمسح في دموعها اللي كانوا ينزلوا وهي ساكته...
🍁🍁🍁🍁
الساعه 4:00قبل العصر..
"توا بس كيف رقدت"
عفاف ودموعها ينزلوا:الله لايربحه ولايسامحه يلقاه في اعز مايملك..
"لاماتدعيش هكي مرات تجي في البنت"
عفاف:البنت..هالبنت..الكبد الحرفه الصرفه اللي خاطرها المراة لازم تسكت وتتحمل وتفوت وتمشي..
"ايه والله تتنازلي عن هلبه حاجات ع خاطرهم"
عفاف:واولهم الكرامه.
تنهدت نوريه بألم وسكتت...
عفاف بقهر؛آااه من قال حني يصير فيا هكي بنات الشريف بن عامر..
"ماهي الدنيا ماتميل كان ع الباهي"
عفاف:حسبنا الله ونعم الوكيل..
" ايه والله ربك ياخد الحق"
شويه سمعت صوت باب الحمام انفتح قالت:خلاص بنسكر توا نوريه نكلمك بعدين..
"باهي بالسلامه"..
عفاف؛بالسلامه..وسكرت..
ع خشة عبدالصمد..
عبد الصمد:نوضي حدديلي حوايجي..
عفاف شبحت للبسه العربيه اللي مطلعها وقالت؛وين ماشي؟
عبدالصمد:وانتي شن دخلك ديري شغلك وفمك ساكت..
عفاف سكتت ومشت خدت اللبسه بتحددها..
عبدالصمد؛اطلعي حددي برا عندي مكالمه مهمه بنديرها..
عفاف؛وفي شن بندوش عليك اني!؟
عبدالصمد:اطلعي من غير صداع وكسر راس متعكريش مزاج امي..
عفاف تنهدت ومشت طلعت من الدار وسكرتها عليها..
ومشت لدار بناتها بس تحددله حوايجه فيها..
وبدت تحدد ودموعها ينزلوا وهي تفكر في اللي صار مع اختها..
ومن كثر تفكيرها سرحت...ونست المكوى لين سخن زياده وحطاته ع الكاط وحرقاته..
انتبهت وشقهت بصدمه..بعدين حطت المكوى ع جهه وبدت تخبط في وجهها وهي تقول:حي عليا شن درت...حي عليا شن يفكني من لسانه توا شن يفكني..
حطت ايديها الزوز ع فمها وقعدت تبكي...
وخرت وقعمزت بهده ع سريرها بناتها وقعدت تشبح للكاط هي تقول..حي عليك ياعفاف حي..
شويه وسمعاته ينادي..
"عفاف...عفاف"
ماقدرتش ترد بحرف...
لين شافت ظله قرب من الدار وخش عليها.
.قعدت تشبحله بخوف..
عبدالصمد؛وين حوايجي...
عفاف قعدت تشبحله بنفس النظرات...
هو خش وقال؛خيرك!..وشبح ايمينه وشاف الكارثه..
انصدم وقال:شن درتي الله يلعنك!..
وقدم وشاف الكاط كيف محروق قال..
عبدالصمد:تعرفي كم حقه هدا ياحماره..تعرفي بكم هدا يابهيمه...مشالها وهو يقول..وين كان دماغك وين..وقعد يضرب فيها ع راسها وهو يقول..وين..
وهي ساكته حتى البكي بطلاته.
