شكولينا

الجزء الثالث والعشرين

#شكولينا 🍫
#الجزء_الثالث_والعشرين
#الجمان_الفريد

سئل رسول الله ذات مرة..
أي الأعمال أفضل؟ فقال...الصلاة في وقتها...
الصلاة أولا وقبل كل شي❤
قولوا لاإله إلا الله تفلحوا...
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
بعد اسبوع اخر...
يوم السبت...الساعه 4:45 عصرا..
مقعمزات في دار التقعميز وهما لابسات اسدال الصلاه..
بعد ماصلوا العصر..وحده فيهم سألت التانيه..
لينا:منى معاش سألتي مروان عن الخدمه؟
منى:امس سألته وقالي مازال..
لينا ضيقت عيونها وقالت:نحس فيه يمشي فيا..
منى:منو مروان؟!
لينا:لالا سفيان...يمشي فيا وخلاص..
منى:تبي الحق حتى اني استغربت زمان زهور كان محرم عليها الطلوع وكان طلعت معاه السوق يكرهها في الطلعه..
لينا:بس في فرق بيني وبين زهور وانتي فاهمه قصدي..
منى:ايه فهمت عليك لكن انتي في النهايه ع ذمته يالينا..
لينا تنهدت بضيق وقالت:اكره مانكره حد يعاملني هالمعامله نحس في روحي كيف الهبله لما نصدقه ونوثق في كلامه..
منى:اني نبي نسألك سؤال انتي علاش تبي تولي للخدمه برغم انك قبل سيبتيها وعادي وقلتي خير اللي سيبتها..
لينا قعدت ساكته شويه بعدين قالت:الظروف اختلفت والرجاله اختلفوا...يعني مانعرفش القدام شنو يصير فيا..مرات يقولي نا ملزم بعويلة خوي انتي ماليش بيك دخل..نبي يكون ليا مصروفي الخاص..
منى:مستحيل شن تحكي انتي ! هو صح سفيان فيه حاجات هلبه مش حلوة لكن مش لهالدرجه قتلك انتي مادام ع ذمته مش حيقصر عليك بكل..
لينا قعدت تشبحلها وهي ساكته..
اللي ماتعرفاش منى عن لينا انها تخدم ع اهلها حتى وهي هني ..خدمه الشكولاته اللي يطلع منه تبعته لأهلها..
وهي فعلا مش واثقه في ان سفيان حيتكفل باللي تحتاجه من حاجات خاصه او حاجات ليها علاقه بخدمة الشكولينا
وفي نفس الوقت كانت مستثقله هلبه لو احتاجت شي تطلبه منه...
لهذا هي متمسكه بالخدمه توا اكثر من قبل..
تنهدت بعدين قالت:مش عارفه...خلي نعدي توا نركب نخدم ع الطلبيه..
منى:تمام..
ناضت لينا ومشت طلعت للصاله وقفت في الفم وقالت:بنرقى لشقتي اللاي كان ناضوا ولايبوا شي اتصلي..
وجيهه:اركبي اخدمي خدمتك ومادوريش اني نديرلهم كل شي عيوني هادم..
ابتسمت لينا وقال:ربي مايحرمكم من بعض..
وجيهه بإبتسامه:آمين...
مشت لينا للباب...لبست في رجليها وطلعت من الحوش..
ركبت للشقه...
وصلت فيها...فتحتها وخشت وسكرت الباب..
حولت اسدال الصلاة ومشت طول للدار..
بعد شويه طلعت منها وهي لابسه توته...ورافعه شعرها فوق ومغطياته من القدام بستريتشه توخر الشعر للخلف..
خشت للكوجينه وخدي المريول وبتبدا تخدم...
🌺فهالوقت...
لوطا....
انفتح باب الحوش...وخش بالشنطه متاعه...
سكر الباب..بعدين مشي اتجاه الدروج بيركب..
بس بعدين تراجع..فضل يشوف الصغار في الاول بعدين يركب يحط شناطيه ويبدل..
خلا الشناطي حدا الدروج ومشي خش للحوش..
حول من رجليه وقعد يمشي وهو يسمع في امه كيف تلعب في الصغار..ابتسم..
بعدين بان عليهم وهو يقول:السلام عليكم..
زبيده بفرحه:وعليكم السلام وليدي..
وجيهه بفرحه:اهو روح عمو...حمد لله ع سلامته..
قدملهم سفيان وحتى من عيونه يضحكوا بشوفتهم...
سلم ع حناه وبعدين امه..وبعدها قعمز جنبها وهو يشوفلهم ويقول:ماشاء الله ماشاء الله الله يبارك...يكبروا فيسع الخرابيش هادم..
وجيهه بإبتسامه:ايه الله يبارك عليهم...هاك خود..
سفيان:لالا خل نركب ندوش وبعدين ننزلهم نشبع فيهم بوسات..
ضحكت وجيهه..
وقف ع حيله وقال:بوي مهناش..
وجيهه:ايه..
هز راسه ومشي بيطلع جاه الشريف يجري وشد في رجله..
سفيان:اووو فلفول..."شعره هلبه ومنكوش"
طبس قامه ومشي طلع بيه وهو يقول:شن جو..
........
فوق
لينا حاطه السماعات في وذاتها تتكلم بالتليفون وتخدم..
لينا:لا والله عادي جدا من عيوني نخدمك دكتورة  انتي قديش تبي..
فتح باب الشقه وقال:هي خش..
خش الشريف يجري..
وهو دخل الشناطي بعده وخش وسكر الباب..
"مبارك عليه ان شاء الله وربي يهنيه والله من عيوني احلا #شكولينا وهديه فوقها"
هو ضيق عيونه وقعد يقدم ويسمع فيها شن تقول..
وهي في الكوجينه تتكلم تفاجئت وين شافت الشريف واقف قدامها..
لينا بشهقه:كيف جيت!!....ضحكت بإحراج وقالت...لا مش ليك دكتورة..............لالا ماتبعتي حد نا تو نتصرف...
هو جي للكوجينه ووقف قدام رخامه البار وقعد يشوفلها...
شكلها...شعرها...كيف تتكلم وتضحك..وتبتسم ونظره عيونها المندهشه وين شافت الشريف...
صعب ع راجل يشوف صورة جميله متحركه قدامه ومايقعدش مسهم فيها بدون ارادة منه...يابال لو كان هالنظر حلال في حلال..
يعني عقله الباطن زاد حفزه على زيادة النظر وتأمل...
ونسي نفسه تماما..
لينا بضحكه:حاضر دكتورة......بالسلامه....بالسلامه..
سكرت طول وقالت للشريف..انت كيف خشيت!!؟
خداته من يده وجت بتطلع وقفت في مكانها جامده من الصدمه..
هو لما شبحاته استاقظ...وكان في قمة التوتر والآرتباك..
عقد حواجبه وغير عيونه وقال:نحسابك لوطا..
هي طلقت الشريف وطلعت بسرعه من الكوجينه متوجهه للدار..
خشت وسكرتها عليها بالمفتاح..
هو غمض عيونه بغضب..بخبط بروس صوابعه جبهته اكثر من مرة....
جاه صوت الشريف وهو يقول:كلاته ..كلاته..
نزل يده وفتح عيونه وقال وهو مضايق:تعالى...قامه ومشي خش بيه الكوجينه...
قعد يدور لين شافه قدامه باكو..
فتحه وطلع منه طرف عطاه للشريف خداه..
بعدين هو خدي طرف وحطه في فم واحد..وطلع بيه من الكوجينه ومنها من الشقه كلها..
ومعاش بي يركب لين هي تنزل....
🌺وهي بعد مابكت لين عييت..
غيرت حوايجها...ولبست حجابها..وطلعت كملت خدمتها ودموعها على خدها...
وقعدت في الشقه لعند آذان العشاء..
صلت وبعدين نزلت...
خشت للحوش وطول للكوجينه..
لينا:سامحيني عطلت..
منى:لا ولايهمك..انتي طيبت الشربه انتي ابدي في البيتزا..
لينا:باهي..
ومشت طول بتعجن البيتزا ومنى تشبحلها بضيق..
ع خشة وجيهه:ترا تعالي لينا..
لينا شبحتلها بعدين سيبت اللي فيدها ومشت طلعت وراها..
وقفوا في الممر..
وجيهه:خيره سفيان ركب لشقته ونزل بسرعه ومعاش ركب بعدها؟
لينا بلعت ريقها وقالت؛مش عارفه..ركب بالشريف بعدين نزل..
وجيهه:مش شايف منك حركه ولاسامع منك كلمه؟
لينا:شن بيشوف ولايسمع يااللاي والله مادويت معاه بحرف..
وجيهه هزت راسها وقالت:بري للكوجينه بري..
لفت لينا ومشت للكوجينه ودموعها بيطيحوا..
ووجيهه مشت للمربوعه..
وصلت فيها لقت سفيان حاط الشريف في حجره ..
الشريف يتفرج ع التلفزيون وسفيان لاهي بتليفونه..
وجيهه:سفيان...
شبحلها..
وجيهه:لينا نزلت..
هو وجهه ولى احمر..حاول يخفي ارتباكه لما قال:ايه وشن يعني؟!
شبحتله امه شويه بعدين قالت:شي..
ولفت ومشت طلعت من حداه..
هو بعد طلعت تأفف بضيق...بعدين حول الشريف وقال:شويه عمو...حطه ع تركينه والشريف لاهي بالتلفزيون..
ناض سفيان..ومشي طلع من المربوعه..ومشي للممر اللي يرفع للكوجينه وقف وقال..
سفيان:شريف في المربوعه بروحه يام.....
في الكوجينه..
منى ولينا سمعوه...
ولينا كانت تعجن وتمسح في دموعها...
شويه ومنى شافت رتيل خاطه من قدام الكوجينه..
بعدين التفتت للينا وقالت:درت تارت بكري بعدين نقعمزوا اني وياك في الجنان نشربوا قهيوه ونهدرزوا..
لينا هزت راسها بإيجاب وهي تغطي في العجينه..
••ولبين ماتخمر العجينه...
دارو قهوتهم وقعمزوا برا حدا قفص العصافير اللي كانت لينا تشبحلهم..
منى:علاش خليتهم هني مارفعتيهمش للشقه!؟
لينا:هدى احسن مكان ليهم بعد عدى صاحبهم...
منى:لينا...عارفه الكلام اللي بنقوله صعب بس هو اللي مفروض يصير..حاولي تتأقلمي وتتعودي..
لينا:لاقدر الله لو كنتي مكاني شن درتي؟!
منى :عارفتها صعبه والله عارفه..بس الحياة لازم تمشي وتستمر...وهدا المكتوب..حاولي تتكيفي بش تبعدي عن وجع الراس والمشاكل العيله هني اهم حاجه عندهم راحة ولادهم وشفتي بعينك شن دارو في زهور مسكينه ع خاطر سفيان مش مرتاح معاها..ماحطوش الحق عليه هو بكل حطوا كل شي في راسها هي برغم انها ماخلت مادارت بش ترضيه..
حتى انتي رغم كل شي رغم ظروف زواجكم يبوك تكون ملزمه بخدمة ولدهم وراحته وبعينك تشوفي شن صاير معاي قدامك..
لينا:باهي واحنى شنو مش بشر يامنى مش بنادميه دم ولحم ونحسوا..!!؟ مش عارفه كيف الناس هدي..والله نحنا مانا هكي بكل..بكل..وقعدت تبكي..
تنهدت منى وقعدت تسمح ع ذراعها وتقول:خلاص حبيبتي خلاص..
هدت شويه لينا ومسحت دموعها وهي تقول:حتى بكي مش من حقي نبكي...وكان روني يديرولي نهار..
منى ربعت ايديها وقعدت تشوفلها بحزن..
رشفت لينا وقالت:خل نوض نشوف العجينه..
منى:لاخليك مقعمزة اني بنخش نشوف الشربه وتو نشوفهالك..
لينا هزت راسها ومازال تمسح في دموعها..
ومنى ناضت ومشت بإتجاه الكوجينه..
بعد مشت منى...لينا شبحت لقفص العصافير بحزن وقالت في نفسها...
"ااه ياعدنان لو تعرف اللي صاير فيا من بعدك..طلعت متحمله كل شي ع خاطرك وكل شي كان عليا هين ومايأثر فيا شي..
لكن بعدك انهرت ياعدنان وادمرت...ماني عارفه كيف بنكمل الطريق من غيرك...الله يرحمك الله يرحمك ويسامحك"
"خمرت يالينا"..
تنحنحت ومسحت دموعها وناضت رفعت السفره ومشت بيها للكوجينه..
🌺🌺🌺🌺🌺
في المربوعه..
ع العشي...
مروان:قداش ليهم يسألوا فيا عليها ويراجو امتى تبدا اداوم..
سفيان وهو ياكل:امم..من غدوة ان شاء الله..
الشريف:برغم اني مش راضي ع الموضوع بس مادام انتي راضي خلاص..لكن مستغرب فيك شن غيرك؟
بلع وقال:عطيتها كلمه مانقدرش نولي فيها..
الشريف شبحله شويه بعدين ولى ياكل من غير مايعلق..
سفيان:خيره شويه هكي..
مروان:شن هي؟
سفيان:البيتزا....تنهد وبدي ينادي...رتيل..
في دار التقعميز...
رتيل بتذمر:كرهته اسمي كرهته..
وجيهه بحده:رتيل!
رتيل ناضت وهي تقول بنفس التذمر:هاني نضت..
ومشت طلعت من الدار..
وجيهه:تعالي كملي عشاك كان رقدوا الصغار..
لينا ابتسمت مجامله وقالت:والله معاد عندي نيه ياللاي..
ع خشة رتيل وهي تقول:مازال في بيتزا لينا؟
لينا:لالا..
رتيل:سفيان قال شويه مازال يبي..
وجيهه:نوضي ديرله تاني بنتي..
وكالعاده لينا تتمالك في اعصابها ع قد ماتقدر..ناضت وهي تقول:باهي ومشت طلعت من حداهم..
وجيهه:قوليلها مافيش واتيه تو يديرولك تاني..
رتيل مشت طول..
وهي ماشيه فاتت من حدا الكوجينه اللي فيها لينا توتي في العجينه وتقول بهمس وعصبيه:الصبر من عندك يارب الصبر..
••كملوا عشاهم..
ومنى ولينا غسلوا الماعين وفي نفس الوقت كانت اطيب في البيتزا اللي يراجي فيها سفيان...
بعد كملت نادت ع رتيل..
رتيل:يمييي تسهف..وخدت الصفره اللي فيها زوز طروف حجم عائلي وطلعت من الكوجينه...
لينا:رسمي اليوم انهد حيلي نبي نرقد..
منى:حتي اني خلاص..هي تركبي معاي..
لينا:تمام..
••ومشوا الزوز طلعوا من الكوجينه للدار..
خودوا صغارهم واستأذنوا ومشوا طلعوا من الحوش...
زبيده:اسمعي ياوجيهه..
وجيهه:نعم اللاي..
زبيده؛خفي ع المراة شويه مش هكي..خليها تتعود عليه بالشوي عليها..
وجيهه بحزن:اني واجعني ولدي يااللاي...
زبيده:وحتى اني واجعني اكثر منك لكن حتى هي توجع هلبه..معاش تنزلي بيش ماتزيد تكرهه ياوجيهه..
وجيهه تنهدت وقالت:ان شاء الله يااللاي ان شاء الله...
••فوق...
لينا بعد ماحطت صغارها في اسرتهم اتكت ع سريرها وخشت ع الفيس تشوف في صفحة المحل..
لقت منشورات ع الشكولينا وتعليقات الناس عجبتها..
لفت انتباهها تعليق لوحده تقول...
"ياريت لو دير دورة في صناعة الشكلاطه"
ضحكت لينا وقالت:دورة شنو بالله...باهي اللي قاعده ندير فيها فالحوش..تنهدت بضيق وقالت..الخوف حتى هي بعدين يحرموني منها...تعبوا عيونها بالدموع وفاضوا...
فجأة دق الباب...
قلبها بدي يدق بقوة من الخوف...
رجع دق مرة تانيه..
ناضت قعمزت وهي تبلع في ريقها من الخوف بعدين قالت بهمس:خل ندير روحي راقده وخلاص..
رجعت تمددت ع السرير ...
دق من جديد...قعدت تشبح للباب وقلبها تزيد دقاته كم الخوف وهي تقول بهمس:عدي عدي..يارب خليه يعدي..
وفعلا مشي ومعاش سمعت دق الباب من بعدها..
تنفست براحه وحطت التليفون ع الكامدينو..وغمضت عيونها وبدت تقرا في الأذكار..
🌺اما هو..
خش للدار...ومشي قعمز ورا اللاب توب..
لما جي بيفتحه....
جي بين عيونه الموقف اللي صار بينه وبين لينا...
واكثر شي يجي بين عيونه...ابتسامتها وشكل شعرها..
رفع نظاراته الطبيه فوق راسه..غمض عيونه بعدين بدي يحك فيهم..
بعدين رجع نزل النظارات وجي بيفتح اللاب توب..
رجع اذكر نفس الشي..
غمض عيونه وتأفف بعدين قال:استغفر الله العظيم..
تنهد...وحول نظاراته وحطهم ع الطاوله..فتح عيونه وسكر اللاب توب...وناض ومشي لسريره..
انطرح عليه..وعيونه كانوا مقابلات السقف...
ومصر طيفها يطلع قدام عيونه...
حول المخده من تحت راسه وغم بيها وجهه...شويه وقال..
"شن هدا ياربي استغفرالله واتوب اليه"
وبعد جهد في مقاومه عقله واللي يجيبله فيه جاه النوم ورقد...
وانقضى هالليل بهدوء...
وطلع فجر اليوم التاني..
راجاته لين طلع..بعدين طلعت للحمام...
توضت وصلت...وطول خشت للكوجينه بديرله فطوره...
وكانت تستعجل وهي ادير فيه بش تلحق تخش الدار وتسكر عليها قبل مايوصل...
لينا بتوتر:شن قعد ياربي!؟....ايه طاسة للعصير...مشت خدت طاسه من الشباك...
ومجرد ماجت بتحطها سمعت باب الحوش انفتح
ارتبكت ع الآخر وبدا ماتحطها في السفرة حطتها ع حافة الطاوله طاحت انسكرت...
هو سرع خطواته لين وصل للكوجينه لقاها واقفه تشبح للطاسه المكسورة وع وجهها ملامح الضيق..
هي حاولت تدارك الموقف جت بتقعمز ع روس صباعها بتلم المرش..
قاللها...خليه..ماتمسي شي..
هي شدت ع قبضة يدها وناضت وقفت ع حيله..
وهو مشي خدي المكنسه اللي باله متاعها ومشي بيلمه..
هي وخرت ولفت بتمشي بش تطلع..
وقفها وهو يكنس لما قال؛خليك..
وقفت بالسيف..حطت ايديها ع ظهر الكرسي وقالت:شنو في؟
هو قعد يلم في المرش بهدوء وحذر وماردش عليها..
وهي اعصابها حتتلف من التوتر....
كمل...ومشي لوح المرش بعدين رد المكنسه في مكانها...
ومشي للشباك وجاب طاسه تانيه..
قعمز ع الكرسي وقال:وتي روحك بتبدي الخدمه من اليوم..
هي تفاجئت شدت ع ايدين الكرسي بقوة وقالت؛خدمه؟!
هو صب العصير وقال:ايه الخدمه...مروان قال يوميا دوامك من الصبح للساعه 2الظهر...
لينا:عامه ولاتابع دكتور...
سفيان:دكتورة...تابعه لدكتورة في نفس التخصص المتعوده تخدمي فيه...نساء وولادة..
لينا:اها يعني من الأحد للخميس..
هز راسه بإيجاب وهو ياكل..
هزت راسها وقالت:تمام...شكرا...
هو كان يمضغ عادي...لما سمعها قالت "شكرا"..
ولى يمضغ ببطء لأنه رجع حس بحالة الارتباك رغم انه ماقامش عيونه فيها بكل..
بس طبعا حاول يتماسك...رجع يمضغ عادي بعدين بلع وقال...امم..وتي روحك...
لينا:باهي..
وكيف جت بتمشي وقفها..
سفيان:استني..
شبحتله وقالت:شني؟!
سفيان:عبايه سودا سادا مافيها شي...الوشاح غامق...الوان فاتحه لا...شي ملفت للإنتباه لا..خواتم ساعات حدايد لا...
وطبعا..عطر...لا...لا...لا...
لينا:لبسي مش ملفت نهائي وقتلك قبل عطر مانحطش..
سفيان:لبس عادي لا..عبايه سودا سادا...يعني عباية سودا ساده...ومانبيش نشم عليك شي
لينا غمضت عيونها وهي تحاول تتمالم نفسها بعدين فتحتهم وقالت؛باهي
ومشت من حداه وهي تمتم:شن هالمخلوق الغريب هدى..لايطاق ياربي..لايطاق..
وخشت للدار وسكرت الباب.
هو شبح جهة الدار وقال:اشبح شن تبرطم عليا توا...كان تدعي عليا ان شاء الله في.....في...خدي طاسة العصير وشربها وقال...اللي دار المطب الجديد في الشارع..كان نعرف من هو بس..السيارة تقربعت..
ورجع يفطر...
••لوطا.
"كيف!؟"
الشريف:هو هكي يبي..
وجيهه بصدمه:سفيان! سفيان بيبعت مرته تخدم وفي مكان مختلط!؟
الشريف:قال عطيتها كلمه..
وجيهه:اني كان نفهم بس هي شن محببها في هالخدمه المبهدله هادي..
الشريف:مادخلكش ماتدخليش خليك برا الموضوع...
وجيهه سكتت وهي متنرفزة..
اللي خلاها تعصب هكي هو موقف سفيان...مش مصدقه ان سفيان بيبعت مرته تخدم...سفيان صاحب العقليه الصعبه المتزمته!
هدا بالنسبه ليها مؤشر خطير...وطبعا كبير العيله مش صغيرها..
سفيان بالذات لأنه الكبير امه ماتبيش مراة تأثر فيه فالدنيا غيرها هي...
🍁هلبه امهات هكي يكون احساسهم اتجاه الولد البكر...غالبا الولد لما يكون البكر علاقته بأمه تكون فريده من نوعها الولد البكر عكس الصغير...الولد الكبير غالبا في طوع امه ومقدم رضاها على كل شي ويحسس امه انها اهم حد في حياته ولايمكن تجي مراة تقاسمها هالأهميه.. ومادابيها مايسمع كلام حد غيرها وتكون هي الأولى  في حياته زي ماتعودت...
عكس الصغير المدلل اللي طلباته ديما اوامر وغالبا ادور رضاه ولو كان ع شي مش عاجبها...
طبعا الكلام هدا مش قاعده...بس بالعموم في امهات هلبه هكي..🍁
ومنهم وجيهه...
••فوق
طلعت من الدار وفي يدها شنطة الصغار قعدت ادور فيه بعيونها وهي تقول بهمس:وين عدى...
تأففت..بعدين استغفرت..ومشت قعمزت ع الصالون..
وحطت صغارها جنبها...كانوا نايضين لهت بيهم وقعد تلعب معاهم..
سمعت باب الدار متاعه انفتح..
تبدلت ملامح وجهها للجديه..
طلع وهو كالعاده متأنق ع الآخر وع كتفه لابس شنطة اللاب توب..
بدون مايشبحلها قال:هي نوضي...
ناضت بالصغار..
ومشت للباب..وهو مشي وراها وقعد يتفحص في لبسها..كان زي ماطلب بالزبط..
وصلوا في الباب..
هو فتح الباب...طلعت..
وهو طلع وراها وسكر الباب...
قعدت تنزل بهدوء وهو وراها..
لعند ماوصلوا تحت لقوا وجيهه والشريف مقعمزين برا يشربوا في القهوة وزبيده انضمتلهم مؤخرا..
هو لبس نظاراته الشمسيه..
بعدين الزوز قدملوهم وهما يقولوا:صباح الخير..
كلهم ردوا الصبح عادي..ماعدا وجيهه اللي كانت تشبح للينا بعدم رضا..
الشريف :ترا جيبيهم..
ابتسمت لينا ومشت عطتهم لجدهم..
زبيده ؛بتبدي تخدمي..
لينا:بعد اذن عمي..
الشريف:الحكم لراجلك..
لينا "توا لراجلي !!؟"
ووجيهه:وشنو اني مش لازم منه اذني؟
سفيان شبح لأمه..
لينا بربكه؛لااللاي مش هكي..بس الموضوع اتفقنا عليه من البدايه..
شبحت وجيهه لسفيان..
سفيان غمض عيونه وفتحهم بمعنى "ايه"
وجيهه غيرت عيونه عنه  وشبحت للينا وقالت:مش عارفه شن عاجبك فهالمرمده والبهدله..
لينا:هدي خدمة انسانيه كيف خدمة الدكتور اللاي..
وجيهه:صغارك اولى بإنسانيتك..
لينا وهي متفاجئة:اها قصدك انتي عندك مشكله في قعاد العويله عندك!؟اسفة والله ماكنت نعرف نحسابه عادي عندك...
نزل شطنتها وقالت بضيق...خلاص مالا مش لازم منها..
سفيان قعد يشبحلها..
الشريف:لاخلاص بنتي مادام متفقه انتي وراجلك من البدايخ تم الكلمه كلمته هو..وبعدين وجيهه تحط الصغار في عيونها..ولااني غالط ياوجيهه..
وجيهه:لا مش غالط...تنهدت وقالت..باهي امتى تروحي..
لينا رجعت لبست الشنطه وهي مبتسمه بفرح:الساعه 2والله يعني الوقت اللي تقعدي فيهم معاهم بالعاده وبعدين انت بروحك تقولي كان نلقى يباتوا معاي حتى البيتان..وحتى هما خدوا عليه ولو يرقدوا عندك طول او ماتاخدهم اما نا يهلكوني عليما يرقدوا..يحبوك اكثر مني راهم..
وجيهه غلبتها الضحكه وقالت:ووك من لسانك ووك..خلاص بري..ارفعها ياسفيان ارفعها..
هي ضحكت ومشتلها وباست ع راسها..
ووجيهه تضحك وخلاص..
وزبيده والشريف يشبحولهم بإبتسامه..
بس في من واخد راحته من ورا النظارات يتفرج وهو ساكت ومش عارف شن اللي صايرله..
تفاصيلها تفاصيلها...تشد شد..تجذب بقوة..
صوتها لما تتكلم...اسلوبها في الهدرزة...اللكنه...الضحكه...
الضحكه ...والابتسامه...فيها شي مش طبيعي..
هدا كله زياده ع اللون...اللي عيونه بدو يشوفوله زي مايشوفوا للشكولاته بالزبط..
ولأنه كان منقطع عن اللي حواليه معاها هي..
ماسمعش بوه وهو يكلم فيه لعند مانادى بصوت عالي هو وامه..
"سفيان"
انخلع..رفع حواجبه وقال:نعم..
الشريف:وين كنت سارح؟
هو عقد حواجبه وحاول يخفي ارتباكه لما قال:موضوع في الكليه شاغلني شويه..
الشريف:باهي قولي امتى مروح؟.
سفيان:4..
الشريف:كان هدا اخطم ع حوش عمتك ربيعه واعطيها هدا..
مدله ظرف...خداه سفيان وقال..ان شاء الله..
شبح للينا وقال:بري اركبي..
هي شبحتله شويه بعدين مشت للسيارة..
وهو مشي وراها...
امه قعدت معاهم بعيونها لين ركبوا الزوز..
وشغل السيارة...وبدي يتحرك..
وبعدين طلعوا..
غيرت عيونها عنهم وقالت:ان شاء الله خير..
شبحوا الشريف وامه لبعض...
بعدين هو رجع لهي مع الصغار وزبيده قالت:رتيل
مشت المدرسه؟
وجيهه:من بكري ياللاي...
🌺🌺🌺🌺
في الطريق...
كان الصمت سيد الموقف..
وكل حد فيهم كان اشبه بالتمثال..كانت حركاتهم جدا بسيطه..
هو يسوق...وهي تشبح للروشن..
بس هي كان في نفسها يدور سؤال كانت مترددة تساله بس كان لابد من طرحه وطرحاته..
لينا:كان انت بتروح الأربعه من بيروح بيا؟
سفيان:من يعني اني؟
لينا سكتت شويه بعدين قالت؛مش لازم اتعب روحك نكلم السواقه اللي كانت ترفع فيا وتجيب قبل..
قاطعها وقال؛ماتكلمي حد.....هادي مسؤوليتي اني بس..اني اللي نرفعك..واني اللي نروح بيك..
سكتت وقربت وجهها من الروشن وهي معصبه..
سفيان:شن عندك غادي! اشبحي القدام..
لينا شبحتله برفعة حواجب..
سفيان:تركبي معاي السيارة وجهك القدام وعيونك القدام..
شبحتله بغضب من فوق لتحت..
بعدين شبحت القدام وشدت بإيديها ع شنطتها بقوة..
هو حرك عيونه جيهتها شافها حركة ايديها..غير عيونه وركز في الطريق..
وكملوا طريقهم وهما ساكتين..
لعند مادرس قدام المستشفى..
سفيان:قبل ماتنزلي...خليك ديما مذكره انتي ع ذمة مني وكنة لعيلة مني..
لينا شبحتله وقالت؛من قبل مانعرفكم نخدم في خدمتي بإحترامي لأني لينا بنت عبدالودود *****..
رفع حاجبه وقال؛باهي انزلي يالينا بنت عبدالودود *****..
لينا فتحت الباب وقالت... و يكفيني..
ونزلت وسكرت الباب ومشت بإتجاه المبني..
هو رفع نظاراته فوق وقعد معاه بعيونه لين خشت..
غير عيونه وقعد يشبح في الفراغ ويفكر..
"قصدي معقوله اني عندي طاقه للمسايرة لهالدرجه.! لولا هالصغار بس... "
عقد حواجبه بغضب..ونزل نظاراته...وتحرك بسرعه...
🏵🏵🏵🏵🏵
"خلاص ماما خلاص حبيبتي"
حاطه بنتها في حضنها وتمشي بيها وتجي بش تسكتها..
وهو واقف ع المرايه يبخ في العطر قال؛اليوم خواتي وخوتي جايين لامي...انزلي مش تقعدي هني..
رنده؛كان قدرت وخلتني بنتك..
محمد:ماتتسبليش بيها تنزلي بعني تنزلي..
رنده تأففت بتذمر وقالت:باهي..
محمد شبحلها بحده بعدين مشي بيطلع..
رنده:ماتنساش تجيب معاك اللي وصيتك عليه..
التفت وقاللها:المرة هادي بنجيبلك لكن في الجديد خلاص صرف فلوس ع المكياج واللبس والقطاف الفاضي لا هدا كان تبي تسكني في حوشك بسرعه..
رنده بضيق:باهي..
مشي حداها وهو يقول:تعلمي تقدري الظروف تعلمي..
وفتح باب الشقه وطلع..
هي تأففت بإنزعاج وقالت:شن هالعيشه ياربي..
🌺🌺🌺🌺
"وخيرها هالعيشه مش عجباتك"
:يامعتصم اختك خانقتنا مكرهتنا في عيشتنا..
معتصم اخ زهور:اختي هادي هي اللي عايشين من خيرها يافالحه كانك ماتعرفيش..وبعدين كان مش عاجبك نسقدك عادي...
سكتت ودموعها نزلوا..
هو شبحلها من فوق لتحت وقال:تبكبكي..
ومشي طلع من حداها وسكر باب الدار بقوة..
وزهور في الكوجينه تراجي فيه يطلع من الحوش..
بعد طلع مشت لداره بدون احم ولادستور زي مايقولوا اقتحمت الدار وقالت؛خيرك ياللا!! تشكي وتتشكي..في شن ضريناك حني شن مش عاجب حضرت جنابك..
المراة قعدت تبكي وهي ساكته..
زهور:ايوه هدا ماعندك لما تحصلي تقعدي تبكي...اسمعي جاي مش عاجبك حالنا ووضعنا الباب يفوت جمل ويجوا غيرك ميه يتمنوا مكانك...
ومشت طلعت وخبطت الباب وراها بقوة..
واختها مفيده مقعمزه في الكوجينه تخدم تسمع وتشوف لكن ماتبيش تدخل عاجبها اللي دير فيه اختها ومتهنيه بيها...
وزهور خشت لدارها هي وخواتها وسكرت الباب وهي تقول بعصبيه؛مايبوا الا النار هادم..
وخرت شعرها للخلف بعصبيه...بعدين مشت لتليفونه خداته..
خشت ع قائمة جهات الاتصال.
حطت ع رقم سفيان وقعدت تشبحله...حاول تضغط ع الاتصال بس كالعاده خوفها منعها ...
بين عيونها لينا...تتخيل فيها كيف ولت مرت راجلها السابق..
زهور الوحيده اللي كان عندها احساس قوي من لما انصعقت بالخبر...ان سفيان حيطيح في حب لينا..
لينا اللي شافت بعيونها كيف قدرت تخلي اغلب افراد العيله يحبوها بعد كانوا رافضين وجودها....
مش حيقدر يفلت منها سفيان..حتى وان كان يوم من الايام عايف ياكل حد من يدها..
لوحت التليفون ع المندار وانهدت بالبكي..وفي قلبها نار والعه نار حبها لسفيان اللي مابتش تخمد..
🌺🌺🌺🌺🌺
الساعه 1:00ظهرا..
مقعمزة في الصاله حدا عزوزتها وهي شاده بنتها..
وفي الكوجينه حماواتها وسلفاتها حاصلين في الكوجينه..
أم محمد:خل البنت ونوضي عاوينهم شويه..
رنده؛لا عمتي مانقدرش البنت مريضه مانقدرش نخليها وبعدين انتي ماتقدريش تشديها نسيتي يدك؟
ام محمد:هي راقده توا...خليها هني وبري عاوينهم..
رنده معاش قدرت تناقش اكثر من هكي..
حطت بنتها ع تركينه وغطتها..وناضت مشت للكوجينه..
خشت عليهم وهي تقول :ربي يعاون..
كلهم شبحولها ونظراتهم حاده...
بعدين غيروا عيونهم ومافيش وحده ردت..
رنده بنبرة غرور:امم..شن درتوا..؟!
وحده من حمواتها قالت:تعالي لكدس الماعين هدا اغسليه..
رنده:اسفه حبيبتي مانقدرش ايديا يتحسسوا من الصابون والوركينه ماعين نغسل فيهم بالغساله بس حتى اسألي محمد..
وحده من حمواتها كانت فاتحه دولاب من غيظها سكراته بقوة..
وحده من سلفاتها قالت:تعالي فصصي اللوز..
رنده:امم تمام...ومشت للوز...رفعت كمامها شويه..وبدت تفصص فيه وايديها يلمعوا بالذهب اللي لابساته..
وتفصص في اللوز بطريقه مستفزة وكأنها منقرفه..
هو مايشوفولها ومش طايقين وجودها هي وحركاتها..
وحده من حمواتها فتحت باب الكوجينه الخارجي بتكلم صغارها وقعدت تقول:خشي انتي وياها داخل خشي ماتلعبوليش مع الولاد تعالوا للكوجينه وتعلموا من توا خير ماتطلعولي بايرات بعدين  وتخلوا متاعينكم ينزلوا في ربايتي..
خوتها شدوا الضحكه..
وسلفاتها يشبحولها بنظرات مكر..
هي عارفه الدوة عليها بس تجاهلت ومن داخل تغلي غلي..
بعد كملت تفصيص اللوز..
مشت غسلت ايديها بعدين قالت؛بنمشي نشوف بنتي ..وطلعت وهي تتبختر كعادتها..
وحده من حمواتها:خاطري نحطها تحتي وننزل فيها ردس.
ردت عليها اختها وهي تقول:الدوة مش معاها هي مع راجلها..
🌺🌺🌺🌺🌺
الساعه 1:45 بعد الظهر...
ماشيه في ممر في المستشفى بعد كملت اول يوم دوام فرحت لما طلعت الدكتورة اللي تخدم معاها نفسها اللي كانت معاها في مجمع العيادات لهدا كان يومها الاول حلو ومريح..
وهي ماشيه وقفتها وحده وقالت:معليشي نبي نسالك.
لينا بإبتسامه:تفضلي..
هي واقفه في بداية الممر مع المراة...
والقدام في هالممر الطويل...
زوز طبيبات واقفات ع بعض وهما يشوفوا لجهة محدده..
:خو الدكتور مروان تصدقي!
:عليك شخصيه...مش عادي..
القدام شويه ع الكراسي..
في زوز بنات مقعمزات ويشوفوا لنفس الجهه..
:شخصيته تقتل...
:غير كان يسيب التليفون شويه بس..
القدام اكثر شباك الصيدليه متاع المستشفى..
:اهوا اهوا اللي لابس اسود شفيته هدا خو الدكتور مروان..
:وحني اللي هبلنا في جرة مروان..طلع خوه غبارة سودا..هدا كان يخدم هني تصير كوارت..
:غير شوفي وقفته شوفي..
:كاريزما...
🌺برجوع لأول الممر..
؛صحيتي بنتي بارك الله فيك..
لينا:وفيك بارك الله...
مشت المراة ولينا كملت طريقها..
كانت تمشي ومحل نظرها غالبا الأرض..
كانت مشيتها واثقه مش خنوعه...لكن ع استحياء..
هو سيب التليفون ومرر نظره حواليه بعدين شبح القدام..
شافها جايه..
قعد يشبحلها وخلاص...
اما هي وهي تمشي سمعت كلمه..
"محلا عيونه"..
ضيقت عيونها وشبحت القدام..
انصدمت...
مشيتها ولت بطيئة شويه..بعدين سرعتها..
وصلت فيه وقالت:ع اساس الساعه 2..
هو قام يده وشبح ساعته بعدين وراهالها ..
هي شبحتلها لقتها 2مزبوطه..
رفعت عيونها فيه بريبه..بعدين غيرتهم وقالت..هيا..
نزل يده...
ومشي وهي مشت معاه..
وطبعا نظرات العيون المذهوله كانت لاحقتهم..
الفرق كبير......ملحوظ جدا لايمكن التغاضي عنه..
••وهما ماشيين مع بعض...
سفيان:كويسه المستشفى..
لينا:امم كويسه..
سفيان رفع حاجبه وقال؛ماسألتكش عطيت رايي.
عكرشت ملامح وجهها وشبحتله من فوق لتحت..
سفيان حك حاجبه وقال:مش قدام الناس..
هي فنصت وغيرت عيونها عنه..
وهو ابتسم ع جنب..
طلعوا الزوز من المستشفى..
هو لبس نظاراته..
وهي سبقاته للسياره جت بتفتح الباب ماباش يفتح..
هو لف ع السيارة فتحها وقال:اركبي.
هي فتحت الباب وركبت..
وهو ركب معاها  الزوز سكروا الباب مع بعض..
شغل السيارة وتحرك..
وهي جت بتشبح للروشن..اذكرت اللي صار الصبح..
شدت شنطتها وشبحت القدام..
وهي عاقده حواجبها..
الصمت كان مطبق...
فتح الراديو...
ويجي ع اغنيه..كلماتها تقول...
اسمر يااسمراني...من قساك عليا...
لو ترضى بهواني...بردو انت اللي ليا...
هي شبحت للراديو..
وهو طول طفاه...
سفيان وهو عاقد حواجبه بتوتر نزل مرش الروشن:راهم يديروا حاجه فيها فايده..اغاني ودوة فاضيه وذنوب..
هي غيرت عيونها القدام ...
فجأة رن تليفونها..
هو حرك عيونه ناحيتها بعدين شبح القدام..
وهي طلعت التليفون شافت من متصل ابتسمت وردت..
لينا:السلام عليكم يما................ونا والله واجد............الحمدلله....الحمدلله........اها الحمدلله........لاانا مش في البيت مروحى من المستشفى......لالاحبيبتي مافينا شي غير بديت خدمه..........اها..............ضحكت.....ايه......هاتيه هاتيه............
هاه سلومه حبيبي عافيه ياقلبي.............وانا توحشتك دنيا  دنيا واجد عرم بكل.....ضحكت وقالت...اها........خشيت الروضه!.........باهي.........وشن اسمائهم اصحابك...............اها باهي باهي...شاطر سلومه انت نعرفك نا...........باهي حبيبي حاضر.........باي...باي......هاه يما.......يوصل...يوصل.....سلمي ع باتي.......بالسلامه بالسلامه..
سكرت وردت التليفون في الشنطه ورجعت شبحت القدام..
وهو في جنبها...
سفيان في نفسه"شن هدا وين ماشي اني":استغفر الله العظيم..
وقف...بعدين وخر بالسيارة ولف بالسيارة ومشي في الطريق الصح اللي ضيعها وهو يسمع في المكالمه..
حرك عيونه ناحيتها بعدين شبح القدام وقال في نفسه..
"استغفر الله واتوب اليه...اللهم اني اعوذ بك مش شر الفتن ماظهر ومابطن"..
🌺وكملوا الطريق في صمت تام لين وصلوا للحوش..
درس قدام وهي نزلت...رجاها لين خشت بعدين مشي مولي للكليه...
🌺🌺🌺🌺🌺
خش ع النساوين في الكوجينه وهو جايب شكاير مشاريب وعصاير..
قعد يدور بعيونه ع مرته مالقهاش...
محمد؛عطيكم الصحه..
جاته وحده من خواته وقالت:سلمك جياب..
وخدت منه الشكاير..
محمد؛وين رنده؟
رفعت حاجبها وقالت:رنده نزلت عشرة دقايق بعدين ركبت قالت بنتي مريضه..
وحده تانيه:هوبنا صفره غداها واتيه ومسلفرة كل حد يعمل بأصله..
محمد انتابه شعور بالغضب..
سيبهم وطلع..
وهما شبحوا لبعض بنظرات مكر..
:خلها تاكل ع راسها...بنت الشريف بن عامر..قلدتها بالصوت..
وهما ضحكوا..
فوق...
خش للشقه ينادي...رنده...
هي كانت مقعمزة ببرود تتفرج ع التلفزيون..
جاها وقال؛خيرك انتي خيرك..علاش ديما تحبي اطلعيني بالحشايم قدام اهلي قولي..
رنده:حشايم شني؟!
محمد:حشايم شني!؟تعرفي اني وصلتلي حدها منك راجعي نفسك يابنت الناس وماتخلنيش نغلط معاك..
رنده ابتسمت بتهكم وقالت؛راكب الشحن فل.
طلعاته عن طوره جاها وشدها من شعرها وهو يقول:هدوكا خوتك اللي يمشوا بودانهم ويحكموا فيهم النساوين.
دقت يدها بقوة وقالت بتكبر؛خوتي اني.!! خوتي اني طلعوا هكي في النهايه..!ناسي شن دارو معاك وقداش ساعدوه خوي سفيان بروحك فضايله مغرقاتك لودانك...
محمد بغضب:قسما بربي كلمة تانيه زياده نطلقك ونلوحك في حوش اماليك وبنتي تحلمي حتى الحلم تشوفيها ياكلبه..
رنده:شن تحساب ماوراي حد اللي تهدد فيا هكي..!..
ومشت للدار..
هو زبطها شن بدير...سبقها وخش سكرها عليه..
قعد يدور ع التليفون لقاه خداه...وهي اطق ع الباب بقوة..
فتحه ومشي من حداها..
رنده بصوت عالي:جيب التليفون جيب..
وهو طلع وسكر الباب بالمفتاح..
وخلاها تبكي وتتحلف فيه وتقول:والله نوريك الله انت والشلافطيات خواتك...
لوطا...
الكل يسمع في عياطها...
هو طلع من الحوش كله..
وهما مطنشينها ويوتوا في غداهم عادي..
ع خشة امهم:قتلكم فكونا منها تو بوكم يجي ويسمع وانت عارفينه مايرضى فيها شي..
:تو لما يجي بوي نتصرفوا.
:بري تريحي يما بري وماتفكري في شي..
تنهدت امهم ومشت طلعت..
:زيدي عيطي وابكي زيدي واني نزيد ننطرب..
ضحكوا اللي في الكوجينه...
وهي فوق...
من عياطها بنتها ناضت وقعدت تعيط..
وهي مشتلها بش تسكتها..
لكن بدل ماتسكتها قعدت تبكي هي وياها..
🌺🌺🌺🌺🌺
الساعه 3:45قبل العصر..
في المكتب..
كان مركز مع اللاب توب متاعه...تعب..
حب يريح عيونه..مسحهم بعدين شبح لصاحبه..
لقاه يشبح في الفراغ ويبان سرحان..
ابوبكر:نيوتن..
لارد..
ابوبكر:سفيان...
لارد..
عقد حواجبه وقال:سفيان..
شبحله..
ابوبكر:وين سافرت..
سفيان شبحله شويه بعدين :قاعد هني..
ابوبكر:لا انت اليوم مش عاجبني بكل..من اول ماجيت الصبح حاسك متفركس وملخبط..مانلومكش الحق..
عقد حواجبه وقال:ماتلومنيش ع شني؟!!
ابوبكر:ع الفرق اللي تحس بيه..
سفيان:فرق شني!!؟
ابوبكر؛بين قبل وتوا...
سفيان:قبل وتوا!!؟ شن قصدك!؟
ابوبكر ضحك بإستغراب:لاانت اليوم رسمي عقلك مش معاك..
سفيان؛كان مش معاي مع مني مالا؟!!.
ابوبكر قعد يشبحله بإستغراب..
هو مسح ع حاجبه وقال وهويحاول يخفي ارتباكه:سامحني بس يعني تغير عليت الجو والظروف وخديت ع لودفيغ...
ابوبكر بضحكه:هدا علاش قتلك مانلومكش ع الحاله اللي انت فيها..بعد لودفيغ جامعة طرابلس!
هز سفيان راسه بعدين شبح لساعته وقال:خلاص هداكا..
وناض يلبس في شطنته..
ابوبكر:مروح طول..
سفيان وهوياخد في تليفونه ونظاراته:لاعندي مشوار قبلها حصلني فيه الحاج الله يسامحه.
ضحك ابوبكر وقال:كان الله في عونك..
وقف سفيان في الباب وشبح لأبوبكر...
《 "ربي يكون في عونك"...》
ابوبكر:شني!؟
سفيان حرك راسه يمين ويسار بمعنى"مافي شي"..
وطلع ...
قعد يمشي وهو مضايق ع الآخر...
وطول طريقه لحوش عمته وعقله مابطلش ياخده رحلات لنفس العالم...هو عالم حلو...بس كان هو ماتقبلاش..او كان خايف منه هلبه....
وصل لحوش عمته اللي اهلت وسهلت ورحبت..
ربيعه:يامرحبتين بسفيان غير من وين زارقه الشمس اليوم اللي سفيان بجلالة قدره جانا..
سفيان بضحكه؛والله لو الامانه اللي بعتها معاي بوي ماشفتيني..
شدت اساور ضحكتها..
وعمته وهي مبتسمه قالت:من يوم يومك اسلوبك زي وجهك..
سفيان رفع حواجبه بإبتسامه وقال:وهو في احلى من اسلوبي  كان زي وجهي.ياعمتي...
اساور خلاص بتضحك بس خايفه من امها..
ربيعه:ماعلينا..المهم توا انت شن داير مع مرتك..
اساور ركزت عليه..
هو تلاشت ابتسامته وعقد حواجبه وقال:عادي..
ربيعه؛كيف عادي يعني..متريح معاها..
سفيان بضيق:غير الموضوع...
ربيعه؛ع المهم وليدي انت ماتكدرش رويحتك..انت درت خير واجرك ع ربي ونهار تنوى تتزوج العروسه عليا اني.
هو حك لحيته بعدين عطي الظرف لعمته وقال"تفضلي..
خداته وقالت؛ربي يحفظه ويطول في عميره وخيي..
ناض سفيان..
اساور:وين..راجي بوي وخوتي قريب يخشوا يحرجوا راهو كان عرفوا انك جيت ومااستنتش لين تشوفهم..
سفيان:مرة تانيه ان شاء الله...ماتبي شي عمتي..
ربيعه؛سلامتك سلم بوك وحناك ومرتك..
سفيان ابتسم بخبث وقال:وامك؟
ربيعه:وانتم تسلميلي عليهم في طريقك سلملي عليها حتى هو السلام لله..
فنصت اساور في امها..
وربيعه مطنشه..
هو حرك راسه يمين ويسار بعدين قال:يوصل..السلام عليكم..
مشي بيطلع واساور لحقاته تسقد فيه..
وصلوا برا..
اساور:سفيان اوقف شويه..
طنشها..هي شداته من شنطته..
وقف وشبحلها بحده وقال؛شكلي بنقعد نراجي بوك وخوتك..
اساور:سفيان ارخي روحك وياسرك تشنج واسمعني..انت قبل قتلي مانبيش نخون مرتي عندك حق..بس توا الوضع اختلف..
رفع حاجبه وقال:كيف اختلف ترا؟
اساور:سفيان  معروف علاش متزوج توا..يعني تعتبر مش متزوج...ومافي شي يخلي ضميرك يأنبك...اساسا لينا بروحها مش معدله..بروحها قالتلي هو واخدني ع خاطر الصغار بس واطمني يااساور....يعني هكي بالعربي قتلي طريقك سالكه مع سفيان..
سفيان بغضب:هي تكلمت معاك في حاجة زي هكي؟!
اساور:ايه...هاه بش تكون مرتاح هي تعرف وراضيه..وانت مافي شي يمنعك...
هز راسه ومشي للباب فتحه وطلع وسكره وراه بقوة..
اساور:ييي افف مني افف..لينا عندها مايبيش من تجري وراه هدا...لكن مشكله طريق 1000 ميل تبدا بخطوة..
ولفت ومشت خشت للحوش...

#سبحوا_بحمد_الله

الفصول الاربعة
يتبع …