شكولينا

الجزء الثامن والثلاثين "" القسم الاول""

#شكولينا
#الجزء_الثامن_والثلاثين"القسم الأول"
#الجمان_الفريد

"اي حد يسألني امتى الروايه هادي تكمل بش نبدا في البطل المغمور بلوك..."
عماد حياة المسلم..واكسيرها الصلاة..
واول شي يتحاسب عليه..لاخير في عمل يلهي عنها..
صلوا صلاتكم...بعدين ديروا اللي وراكم...
وقولوا لاإله إلا الله بقلب سليم طاهر تفلحوا❤
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
الساعه 4:50عصرا..
نزلت من الشقه وفيده شنطه صغيره..
وصلت في باب الحوش...
خدت نفس..بعدين بلعت ريقها..
وخشت للحوش ونادت..
لينا:اللاي...
شويه وطلعت وجيهه وهي مستغربه وزادت استغربت لما شافت الشنطه اللي فيدها..
وصلت فيها ووقفت وهي تقول..
وجيهه؛شن في!؟
لينا وعيونها معبيات دموع:بعد ماتوا وامي معاد عندي نوليله لو صار بيني وبين راجلي زعل...تقبليني نجي نحرج عندك من ولدك؟!
وجيهه مشاعرها تحركت بقوة هزت راسها بإيجاب ودمعوا غرقوا عيونها..
لينا دموعها نزلوا..نزلت عيونها وهي تمسح فيهم..
وهي جتها وضمتها طول...لينا طلقت الشنطه وضمت عزوزتها بقوة وهي تبكي بصمت..
وجيهه:معليشي بنتي معليشي..هي تعالي خشي...
بعدت لينا شويه ووجيهه قعدت تمسحلها في دموعها وهي تقول:خلاص ماتغشيش روحك انتي عند امك وبوك..
هزت لينا راسها وقالت بصوت يدوب طالع:ربي يطول في عمركم...
طبست خدت شنطتها وخشت هي وياها داخل..
🍁الأب والأم ماتوا...وحوش العيله انباع...
والخوت خوت العازة..كل واحد فيهم لاهي بحياته وناسي ان عنده خوات...حتى اللي سكن معاها في نفس المدينه ماكلفش خاطره يوم يجي يشوفها شن حالها هي وصغارها..
يجي شني!؟......حتى بالتليفون ماسألش عليها.....
ولخواتها ماتقدرش تلجأ.....كل وحده عندها ماسادها...وبعدين  ماتحملوها خوتها بيتحملها النسيب!!؟
وياكم من وحده حالها من حال لينا واسوأ شي يندى له الجبين من خذلان الخوت..والأهل في احيان أخرى..
ومآسي تنفطر لها القلوب🍁
وهو كان عارف هالشي..وكان ومازال يبي يكونلها كل شي في حياتها ويكون معاها زي ماوعدها..
بس طبعه وعقليته خذلوه زي ماهو خذلها..
وخذلانه ليها كان صعب عليه اكثر منها هي...
هو عارف ان غلط في حقها غلط كبير..
بس رافض يستسلم ويسلم في حبه ليها..مش بالساهل لقي هالحب..مش بالساهل لقاها هي..ومش حيخلي اي مطب مهما كان كبير وواعر يوقف بينها وبينه..
لكن..
قبل اي شي لازم يعرف من هو حليف الشيطان اللي طيح بيناتهم..
••اما احدي شركات الأتصالات..
سفيان؛نبيك اطلعلي عنه كل معلومه تقدر تعرفها وفي اقرب وقت نبيك تبلغني..
:تم كون هاني..راجي مني اتصال بس..
سفيان هز راسه ومشي...
وصديقه خش لمبنى للشركه..
🌺🌺🌺🌺🌺
"مانبيكش تجي جيهتها يارنده مانبي حد يقوللها حولي من الطريق"
رنده:ماعندها حظ معاكم هالعبده..
وجيهه بحده:رنده..
رنده:باهي خلاص..المهم توا ماعرفتيش خيرهم؟!
وجيهه :قالت ماتبيش تحكي..
رنده؛مش مهم نعرفوا السبب..المهم انك ريتي بعيونك كيف مش متريحين مع بعض..زوجي ولدك يام وهنيه..
وجيهه تنهدت بملل وقعدت ساكته..
رنده قعدت تشبحلها وهي تقول في نفسها"اني تو نتصرف بروحي"
🍁ومن الصاله للدار..
كانت لينا متكيه في التركينه وحداها صغارها راقدين..
الوساده اللي حاطه عليها تبللت بدموعها اللي مش قادره توقفهم..
موجوعه...موجعه وحس بالوجع في وسط صدرها وكأنه مطعون..
كانت حزينه حزن..مامرش عليها في حياتها حزن زيه..
واجعتها روح اكيد...بس اكثر شي كان واجعها الفراق..
يعني توا هي لازم لاعاد تكلمه ولادوره ولاتشوف وجهه ولاتخليه يشوف وجهها..
برغم انه هدا اقل شي ديره ثأرا لكرامتها...لكن ماكانش هاين عليها...
حاسه بشي منها تحول...وكأنه انتزع انتزاع...وألم انتزاعه كانت تحس بيه واصل للروح...
غمضت عيونها...وبدت تستغفر لعلها تقدر ترقد شويه وترتاح..
وماهي الا لحظات وغشاها الله النعاس رحمة منه بحالها...
💎اما هو..
مع المغرب كان خاش للحوش...
كان متمني وهو خاشله انه يطلع اللي هو فيه كابوس وحينوض منه..بس مع الأسف كان حقيقه واقعه..
وهو موجوع بقهر..
رجليه خدوه لدارها اللي كان بابها مفتوح..
وقف قدامه وقعد يمرر في نظرها عليها..كان فاضيه منها وفي نفس الوقت معبيه بيها...من ريحتها الحلوة واثر وجودها اللي قاعده في جزء من هالدار...
تنهد بألم..
بعدين لف ومشي لداره..
خشلها...شم نفس ريحه... ريحتها...استغرب..
كانت هني!!؟
قعد يدور بعيونه في الدار...لين جو ع الزيانه..
شاف عليها شي قسمله قلبه..
خاتم الزواج....
وكأنها تقوله...انت من بعد اليوم بالنسبه ليا مرفوض جملة وتفصيلا..
قرب منه وعيونه اللي غرقت بالدموع عليه..
لين وصل في الزيانه..
حط ايديه عليها...ودموعه الحسرة والدموع طاحوا من عيونه قرب الخاتم...
🌺🌺🌺🌺🌺
وقت آذان المغرب..
فتحت عيونها بعد ماحست بخبطة يد صغيرة لطيفه ع خدها..
شافت صاحبه اليد...ابتسمت وضمتها وقعدت تبوس فيها وهي تقول:بنيتي حبيبتي..
شويه جي خوها خبط امه ع جبهتها..
لينا بضحكه:آاي يامعفن..هيا تعال تعال ياقلبي..
وضماته ليها حتى هو..
ع خشة عزوزتها شافت منظرهم ابتسمت وقالت:صار نوضوك..جايه قبل بنوضك..
لينا:فات المغرب؟
وجيهه:توا كيف تم الآذان..
لينا هزت راسها..بعدين ناضت قعمزت بصغارها وهي تقول:هي خل نحطكم في حباسكم..
وجيهه:حطيهم في دار رتيل...
لينا:مانبيش نزاحم ع رنده وبنتها..
وجيهه:شن تزاحمي ماتزاحمي..جتهم وقالت..اني تو نرفعهم نوضي صلي..
لينا هزت راسها وناضت وقعدت تمشي بشي من التعب..
طلعت من الدار..
في الوقت اللي فيه سفيان خش للحوش ووقف في اول الممر...
شافها وهي خاطمه...قلبه قريب طلع من صدره ومشالها..
ع طلعة امه من الدار..بالصغار...
"يام"
🌺هي سمعت صوته حست قلبها انعصر..
خشت طول للحمام وسكرت الباب وبدت تبكي بصمت..
اما هو..
جاته امه بالصغار..
هو طبس عليهم باسهم...وشم ريحة امهم فيهم...ابتسم..وعيونه تعبوا دموع..
وجيهه:شن داير للمراة..
عقد حواجبه بضيق وقعد ساكت..
وجيهه:شكلك واجعها هلبه..
سفيان بحزن:فوق ماتتصوري يام.
وجيهه:ليه عليك ياولدي مش حرام هكي..ماصدقتك ولت وحالها باهي تردها للنكد ليش..
ابتسم بحزن وقال:تحبيها هلبه يام..
وجيهه:ايه والله نحبها زي مانحب خواتك..والمحبه من ربي..سبحانه حط حبها في قلبي هالمراة...
تنهد من وسط قلبه..
وجيهه:لكن مش لاني نحبها بس ياولدي...المراة مكسورة وفاقده..واللي صار فيها مش شويه..حن عليها سلم ولدي..
سفيان"تي اني بنموت عليها يام وتقوليلي حن":ان شاء الله..هيا ماشي بنصلي المغرب..عينك عليها يام..وخلي بنتك رنده بعيده عليها ورب العزة نسمعها موجعتها بكلمه..نخش نهبدها..
وجيهه؛غير ريح عريقاتك كلمتها وقتلها تجي يالاها تشوف..
رفع حاجبه وقال؛ايوه هنيني يام..
وجيهه:باهي برا صلي صلاتك..
ضحك وقال؛معاش عرفنالك يام..
وجيهه:مانحبش الراجل المرخي مع مرته اشحط روحك...
سفيان؛هدا كله ومرخي معاها يام..ياريتني مرخي راهو ماصارش هكي..
وجيهه:وكان نعرف شن صار..
تنهد وقال:السلام عليكم...
ولف ومشي طلع..
وهي تبعاته بعيونها لين طلع..بعدين شبح للصغار..
لقتهم حاطين روسهم ع كتافها وعيونهم مفتوحات..
وجيهه:مازال مانشطوش هيا انشطوا وديروا شطانتكم العسل..
وهي ماشيه جي قدامها شريف ولد مروان شد في رجليها..
وجيهه:تي غير حول غادي..
بعد عنها وهو منفزع من صوتها العالي..
وهي كملت طريقها..وهو مشي يجري لأمه في الكوجينه..
كانت كيف باديه اطيب..
جاها شد رجليها وحط راسه بيناتهم زبطاته زعلان قالت:خيرك ماما..
الشريف:نينه..
تنهدت وطبست عليه ومسحت ع شعره وقالت:معليشي ماما حبيبي..نعطيك تفاحه؟
الشريف؛ايه.
منى:باهي تعالى ماما...
🏵🏵🏵🏵🏵
في المستشفى...
ياسين:خلاص ان شاء الله خلال الأيام الجايه نحدد موعد ونقترحه عليكم كان ناسبكم نجيب العيله...
مروان ابتسم وقال:على خير ان شاء الله..
ياسين ابتسم وهو يحاول يخفي قلقه يبي يحاول يعرف بطريقه غير مباشرة لو تسبب في مشكله للينا مع راجلها او لا بش ماعرفش كيف..
ياسين:إن شاء الله..هي مانعطلك اكثر من هكي دكتور..
مروان بإبتسامه:مش مشكله..بالإذن..
ياسين:اذنك معاك..
ولف ومشي لمكتب الدكتورة اماني..
اللي كانت واصله حالا من عمليه ولادة قيصريه وبتجهز نفسها للمرواح..
لقاته قدام المكتب قالت؛دكتور ياسين..
ياسين:اسف دكتورة ع الازعاج بس بنطلب منك طلب بسيط..
اماني ابتسمت وقالت:مش مشكله..تفضل..
🏵🏵🏵🏵🏵
"الرقم باسم عبدالكريم حرب"
سفيان ضيق عيونه وقال:منو عاد؟!
:واحد اسمه عبدالكريم حرب..ليه شهرين واخد الشفرة..
توسعوا عيونه بدهشة وهو مش مصدق اللي سمعه..بعدين غير عيونه وقعد يوزع في نظره يساره ع الطريق بعدين هز راسه وقال؛مشكور..شبحله وقال..بارك الله فيك..
:فيك بارك الله خوي سفيان تبي اي خدمه مايحشمك شي كلمني طول..
سفيان:منور ربي يحفظك.
:تسلم..هي السلام عليكم..
سفيان:وعليكم السلام..
مشي الراجل..وسفيان قعد واقف يفكر بهدوء ويحاول كبت غضبه...لين وصل لشي..بعدين مشي طول لسيارته..
🌺🌺🌺🌺🌺
في الكوجينه..
منى تفصفص في الحمص للشربه وهي تشبح للينا كيف تصب في الرز وسط الطنجره..
منى شافت حالتها كيف موليه ومابتش تطفل عليها وتسألها برغم فضولها لكن حبت تخلي لينا تحكي منها ليها..
غطت لينا الطنجره بعدين قالت:في مكسرات.
منى:ايه في شكارة في الفريز..
لينا مشت للفريز بش اطلعها..
منى:ايه..وصلتي الرد للدكتور ياسين..
تنهدت لينا بضيق بعدين قالت؛ايه..وفرح واجد..
منى بإبتسامه:حتى هند فرحانه حصلت ماتبي..دكتور..
ابتسمت لينا مجامله..ومشت بشكارة المكسرات بش بتصب منها في صونيه..
بعد صبت..قعدت تحول في الكاجو ع تركينه..
وخلت اللوز العادي والخزايني..
منى:ايه حقه لينا في شن صار في حكاية المحل حسيتها طولت..
لينا وهي تحاول تخفي ضيقها:مازال شوي..
منى:اني خايفه بعد تبدا المدرسه معاش نلهى...
لينا:تو توفقي ان شاء الله..
منى:زعمه نقدر نوفق زيك بين المستشفى والحوش وخدمة الشكلاطه..
لينا:لاخلاص معاد في مستشفى..بنسيب.
منى:ليش!؟
لينا:هكي احسن تعبت معاد عندي جهد...
ومشت تشوف الرز...
ومنى معاها بعيونها وهي حاسه ان في شي قوي صار بينها وبين سفيان وهو اللي خلاها تسيب الخدمه مش بإرادتها سيبتها..
🏵🏵🏵🏵🏵
واقف بالسيارة يستني..
لين شاف الشخص اللي يبي يقابله جاي من بعيد..
نزل من السيارة وسكر الباب وقعد واقف حداها..
وصل فيه وقاله:السلام عليكم..
سفيان:وعليكم السلام..من غير طول سيرة..مدله التليفون وقاله..الرقم هدا ليك..
خدي التليفون وشافه كويس بعدين قال:لا..
سفيان خدي التليفون وقال:ممكن مايكونش ليك لكن تعرفه لمنو..ع العموم الرقم هدا جتني منه رساله اليوم واني عارف من باعتها..لان قبلها جوني رسايل من رقم تاني المالك متاعه نسيبكم عبد الوارث..لهدا وصل كلامي لاختك وقوللها..غير جيت نخاف ربي بس..كانهدا تصرف معاها تصرف يدمرها..قوليلها تحشمي ع وجهك والهي في حياتك ومعاش تلاحقي راجل متزوج..
خوها كان شاد ع قبضة يده بقوة من الغضب..
وسفيان ركب سيارته وتحرك..
بعد مامشي سفيان بالسيارة...
هو لف ومشي للحوش وهو في قمة الغضب..
وصل فيه وخش..
ومشي طول لدار خواته..
خش عليهم وجاها هي طول جبدها من شعرها.
زهور قعدت تعيط وخواته يتعايطوا ويكلموا فيه يخليها..
وهو يضرب فيها ويقول؛بديرلنا العار ياحيوانه...تجري ورا طليقك وانتي مخطوبه لراجل تاني!؟
خواته انصدموا ومرته ومرت خوه كذلك..
زهور بعياط:خليني..تعالولي....الحقوني..
وهو يضرب فيها برجليه..
لين حزوها خواتها منه بصعوبه..
ومفيده طلعاته من الدار..
:تو تشوفي في المعامله في جديد ياحيوانه..
وطلعت مرته معاه حتى هي..ومفيده سكرت وراهم الباب وجت لزهور وقالت:شن درتي يامصيبه شن درتي..
اميره:علاش هكي يازهور علاش..كان وصلت الدوة لخطيبك شن يصير فيك بعدين..
وزهور تتحسس في ذراعها وهي تبكي...
مفيده:لالا انتي لازم تتزوجي بسرعه وتطلعي من البلاد بكل قبل لاديرلنا خارقه..
...خطيبها ارمل وعايش برا البلاد.....
وحده تانيه من خواتها:ايه هدا اللي مفروض يصير..
وهي تبكي بعبرتها ومش قادره تتكلم....
بس في نفسها متمنيه لو ان اللي تبيه وصلتله ومش مهم الثمن اللي دفعاته..
🌺🌺🌺🌺🌺
الساعه9:30ليلا..
وجيهه؛هيا سقدوا بالصفرة.
لينا:هيا هي ...وحطت صواني الرز وخده فيه فيها كاجو وكبده بس..والتانيه فيها كل شي..
وجيهه وين شافتها ابتسمت ابتسامه خفيفه بعدين خدت السفرة ومشت طلعت بيها...
منى:ترا صونيتنا حني..
مدتلها الصونيه..
رفعت منى الصفرة وقالت؛هيا تعالي..
لينا:لا والله ماخاطري في حاجه..
منى:لينا وجهك مش عاجبني تعالي تعشي يامراة..
لينا بضيق:والله ماخاطري يامنى عدي يرجوا فيك..
تنهدت منى وقالت:ربي يهديك..
ومشت طلعت من الكوجينه..
ولينا قعدت اضم فيها...
💎في اول الممر...
وجيهه؛هاك ارفع..
سفيان خدي السفرة وقال؛من داره العشي..
وجيهه:الشربه مرت خوك..والرز والطاجين مرتك..
ولفت ومشت خلاته..
هو شبح للصواني وتسائل زعمه هي دارتله الرز كيف مايحبه منها ليها ولاأمه قالتلها..ولاخوفا من امه دارت هكي؟!
ماباش يعطي لتساؤله أي اجابه..ومشي للمربوعه..
🌺هي بعد ماضمت الكوجينه..
مشت طلعت قعمزت تحت المظله...
قعدت تشبح للكرسي اللي قدامه وتذكر في المواقف اللي صارت في هالمكان....
ويتردد في ودنها صوته وهو يقول..
"خلي عندك ثقة بيا" "احسني الظن فيا"...
وكل مايخطر عليها انها فعلا كانت باديه ترتاحله وتوثق فيه وهو يقابلها  بصفعة خذلان قويه...
تنقهر وقلبها يزيد يتوجع...
درقت عيونه بإيديها وهي تبكي بصمت بعدين نزلتهم وحطتهم ع الطاوله فوق بعض..وحطت راسها عليهم وقعدت تبكي بألم شديد..
حولت وحده من ايديها وحطتها ع صدرها االلي كانت حاسه فيه نار والعه تبيها تطفى بس هي كل مالها تزيد تقوى اكثر واكثر..
《 ايه اني فيا المتناقضات كلها..بس معاك انتي اني ديما بحاله وحده وبس حتى لو كنت قاسي وعصبي وشرير ع قولتك..اني ديما..
بسعة احد عشر كوكبا معا..
بعوامل ضخمة وليال طويله...كسماء سابعه تحتضن سبع سماوات......احبك....جدا...》
غطت ايديها عيونها وقالت بصوت هامس مخنوق:اللي يحب مايديرش ديرك اللي يحب مايهنيش اللي يحبه ويقهره..
قهرتني قهرتني واجد..وقعدت تبكي بقوة لكن بدون صوت ماتبي حد يسمعها.
وتبكي ومش حاسه بريح الخريف اللي تضرب فيها.
ريح تجيب تدوي البنادم جسديا ونفسيا...تأثيرها عليه زي تأثيره ع اوراق الشجر..🍁
🌺حاول بعدين تتماسك..
ناضت غسلت وجهها وتوضت وولت للكوجينه...لقتهم  جايبين السفرة..
بدت فيها طول...
شويه وجتها منى تساعد فيها...
🏵🏵🏵
الرجاله بعد ماتعشوا خشوا للصاله يهدرزوا ع زبيده..
زبيده:عليك كركديه اديريلي فيه خلتني مانفوتش يوم من غير مانشربه..
الشريف:حتى اني نرتاح بعد نشربه..مانحصلوش طاسه توا..
سفيان وهو يسمع فيهم ويمرر في نظره عليهم..تبت عيونه ع امه لما سمعها قالت:لينا...جيبي لعمك طاسة كركديه..
مروان:قول بوي شن صار في حكاية البضاعه اللي حاصله في الجمرك..
الشريف:خوك كلم واحد يعرفه وانحلت المشكله..
سفيان:غدوة...وعيونه راحو ناحيتها وهي خاشه بالطاسه وكمل بإرتباك..قتلك..غدوة ان شاء الله..يفرجوا عنها.
الشريف:صحيتي بنتي..ضيق عيونه وقال...خيره وجهك..
سفيان ارتسمت ع وجهه ملامح الضيق وامه تشوفله وكذلك مروان..
لينا؛مافي شي عمي شويه تعب..
الشريف:والله يابنتي وقدام راجلك نقولها خدمتك في المستشفى مش راضي عنها وانتي عارفه من قبل..
لينا:لاخلاص هالمرة سيبتها نهائي ومعاد نوليلها..
وجيهه:طيب والله فينا...
لينا التفتت وشبحت لعزوزتها بإبتسامه حزينه وبدون ماتغلط وتجي عينها عليه..
وهو يشبحلها وبس..ومن داخل يشتم في نفسه ويجلد فيها..
لينا:هكي اريح للجميع..
الشريف:ايه بنتي هكي افضل...
لينا هزت راسها وقالت:ماتبوا شي تاني...
وجيهه:لا خشي ارقدي وارتاحي بنتي..
زبيده:ايه وجيهك مش عاجبني خاشه ع مرضه..
هو قعد يشوفلها وقلبه يغلي بقلق..
لينا:لالا مافيا شي شويه ارهاق..تصبحوا ع خير..
ردوا باصوات متقطعه:قدامك كل خير ...وانتي من اهله..
ماعدا هو اللي قعد ساكت وعيونه عليها..
لين ادرقت من قدامهم...
••••••••
"بتقعد هني يعني"
وجيهه:لين يطيب مافي خاطرها..
تنهد بحزن وقال:باهي تصبحي ع خير..وياريت يام تخلوا عيونكم عليها..
وجيهه:ماتخممش برا اركب لشقتك..
هز راسه ومشي طلع وامه سكرت وراه الباب..
💎ركب للشقة بالسيف...وماكانش يبي يخشلها وهي مش فيها..
بين عيونه طيفها هي والصغار ودوشتهم وحركتهم..
وملاعبتها ليهم..ومناقرتها ليه...
والأجمل..العادة اللي تعودوها جديد وهي قراية الورد اليومي من القرآن قبل النوم..وكل واحد فيه يبعت رساله للتاني انه كمل..
ومرات هالرسايل تنقلب لمحادثات طويله..
بين مناقره..وغزل....
شد جبهته بيده وهو مضايق لأبعد حد..
كيف بتفوت هالليله بس!
نزل يده وتنهد بضيق..ومشي بيخش لدراه..
سمع صوت تليفونه يرن..
كان تليفونها..
تبع الصوت لين وصل في الدار..
خشلها...وحس الصوت جاي من الشماعه..
مشالها ..وحط يده ع الشنطه بعدين فتحها وطلع التليفون..
شاف الدكتورة اماني تتصل بيها..
فصل..
قعد يشبح للتليفون شويه بعدين مشي طلع بيه من الدار لداره..
شويه جت رساله..
شافها..وفتحها..
(مساء الخير..وينك مشغوله عليك..الدكتور ياسين قال جي راجلك وروح بيك ان شاء الله مش صايرة حاجه بس)
سفيان:حسبي الله ونعم الوكيل فيه وفي هديكا المريضه..
ومشي لداره وخشلها..
بعدين حط تليفونها الزيانه..
بدل حوايجه...بعدين خداه ومشي قعمز بيه ع السرير..
كان عنده فضول يشوف شن فيه..ولما جي بيفتشه تراجع..
مش ساد الموقف اللي صار بكري..كان ماتعلمش منه من شني يتعلم..!؟
حطه طول حداه ع الكامدينو..
بعدين ربع ايديه وقعد يمرر في نظره ع الدار.
كان حاس روحه..صقعان..وخايف..ومستوحش..
كان عايش شعور الطفل اللي خلاته امه في وسط صحراء وتخلت عنه...
ناض من السرير...ومشي للبالكونه..
فتحها..وطلع وقعمز ع الكرسي...وراح في عالم فيه شتى انواع العذاب والألم...
🍁🍁🍁🍁
بعد ساعتين..
حطت يدها ع جبتها وقالت:سخونه زي النار يابنتي..
لينا شدت ع الغطا وغمت بيه جسمها وسنونها يصطكوا وعيونها ذبلانه.
زبيده:نوضي ديرلها حاجه.
وجيهه:هاني نايضه يااللاي..
وناضت مشت طلعت..
زبيده:والله عرفتك من بكري وجهك يقول هكي..
ع خشة ويجه بصونيه وفوطه.
زبيده؛كلمي راجلها..
لينا؛لا..لا...بالله..عليكم...ماتكلموه..
وجيهه بقلق:باهي بنيتي باهي..
وقعدت وجيهه اديرلها في الكمدات..
ودموع عيون لينا ينزلوا من الحرارة والألم..
شويه رن تليفون وجيهه..
وجيهه:مني فهالليل!؟
خلت الكماده ع راس لينا ومشت خدت تليفونها من حدا فراشها..شافت المتصل..شبحت للينا بعدين ناضت طلعت من حداهم..
ولينا وهي ترجف معاها بعيونها...
..برا..
وجيهه:ايوه خيرك
"يام لينا راقده...حالها باهي؟!"
وجيهه:ايه مافيها شي..
"لايام قلبي مش مرتاح..قولي الحق"
وجيهه تنهدت وقالت:مريضه حرارتها راقيه..
وماسمعتش الا صوت الخط فصل..
نزلت التليفون ومشت للدار..قبل تخش سمعت باب الحوش طق.
مشت للباب فتحاته..
خش وهو يقول بقلق:قداش حرارتها..
وجيهه:39..
سفيان:اهو عطيها الدوا هدا توا..
وجيهه خداته وقالت:خش..
مشت للكوجينه..
وهو مشي خش الصاله..
حط ايديه في جيوبه وقعد يدور فيها وهو في قمة القلق..
امه طلعت من الكوجبنه للدار وجت بيه للينا..
وجيهه:هي نوضي خودي بنتي..
لينا بتعب:هو هني..
وجيهه:ماهناك حد هني..غير هاك خودي واشربي عليها الميه..
خدت لينا الدواء..وشربتها عزوزتها الميه...
وولت اديرلها في كمادات..
فاتوا عشرة دقايق...وهو نادى.
"يام"
لينا لما سمعت صوته غمضت عيونها ونزلت مت وحده فيهم دمعه..
وامه ناضت طلعتله..
سفيان بقلق:هاه شنو.
وجيهه:مازال عاد محلها خدت الدوا..
سفيان:باهي يام نوضيها وارفعيها الحمام خل ادوش بمية بارده..
وجيهه:حتى اني فكرت فيها..ولفت ومشت للدار..
وهو ولى يدور في الصاله والقلق مسيطر عليها..
شويه سمع امه تقول؛هي بالشويه عليك..
قلبه فر فران...كان يبي يشوفلها بس ماقدرش مايبيش يضايقها بشوفته..
خشت لينا للحمام..وعزوزتها مشت ادورلها في دبش..
سفيان:شن يام كيف تخليها بروحها؟!
وجيهه:مايصيرلها شي المراة قويه وشاده روحها..
وخشت للدار..
وهو قلبه يرف من الخوف عليها..
ورجع يدور في الصاله..
لعند ماسمع باب الحمام انفتح وتسكر.
بلهفه مشي خش للممر اللي كان في اوله
دار التقعميز..واخره الحمام
وقف وشافها وهي طالعه تنشف في شعرها بالفوطه..
بعدين لفتها وشبحتله..
لما شافته شبحتله بنظره حاده..
بعدين ولت وخشت للحمام وسكراته عليها بالمفتاح..
هو في عز خوفه عليه ووجعه من نظراتها..ضحك وقال...عندها سر مع المفاتيح..
ع طلعة امه:شن دير هني تبيها تشوفك وتزيد تمرض
سفيان تنهد بحزن وقال:بنرقد في الصاله جيبلي غطا.
ومشي للصاله..
امه حركت راسها يمين ويسار بأسف..بعدين خشت للدار..
وهو مشي تمدد ع فراشات الصاله..
سمع باب الحمام انفتح ..وشويه وتسكر..
ابتسم وعيونه مليانات دموع..
ع جية امه..
غطاته وهي تقول:ارقد سلم وليدي ارقد..
حط ذراعه ع عيونه وقال:طمنيني بعد تنزل حرارتها..
وجيهه:باهي...وابتسمت ومشت للدار..
وهو تنهد من قلبه تنهيده زادت ولعت نار في صدرها من طاح في عشق السمرا وهي وقاده ماتنطفي...

《قال الله تعالى:ياعبادي انكم تخطئون بالليل والنهار  وأنا اغفر الذنوب جميعا فأستغفروني أغفر لكم》
صحيح مسلم...

يتبع …
الفصول الاربعة