#شكولينا
#الجزء_الخامس_والعشرين"القسم الأول"
#الجمان_الفريد
سئل رسول الله ذات مرة..
أي الأعمال أفضل؟ فقال...الصلاة في وقتها...
الصلاة أولا وقبل كل شي❤
قولوا لاإله إلا الله تفلحوا...
تاني شي...
مش مهمه كثرة الأحداث في الروايه ع قد مامهمه قصتها والرسائل اللي فيها..كل حدث حيجي في وقته بإذن الله..
وكل حدث حتكون ليه تمهيدات وبعدين يصير...
مش حلو افتعال الأحداث من لاشيء القصه واقعيه والواقع مش كل يوم صايرلنا فيه حدث ومواقف قويه..
اللي يبي يقرا ويستمتع لازم يعيش الروايه مش بس يقراها بكل مراحلها...
ودمتم سالمين ومن الله مقربين إن شاء الله❤
🍫🍫🍫🍫🍫🍫🍫🍫🍫🍫🍫🍫🍫🍫🍫🍫🍫
ماشي...متوجه لمكتبه بعد كمل محاضرته..
وصل فيه خش وقال:لصاحبه طالع ولامازال؟
ابوبكر:لا بنطلع غير نراجي فيك..
سفيان:مش مروح طول..بعد نصلوا العصر نقعمزوا في مكان نشربوا قهوة..
ابتسم ابوبكر وقال:هدا من دواعي سروري..لكن خل نخبر الحكومه قبل..تعرفني راجل ملتزم وماشي بالقانون..
ضحك سفيان نص ضحكه وطلع..
وابوبكر وهو يضحك قام تليفونه واتصل بالحكومه...زوجته..
بعد كمل مكالمته طلع من المكتب وسكره..
ومشي لسفيان اللي كان واقف في الممر يراجي فيه..
ابوبكر:هيا..
سفيان:هيا...
ومشوا مع بعض وهما يهدرزوا لين وصلوا للواجهه تلاقوا هما والعميد طالع حتى هو..
ابوبكر:او دكتور فتح الله..
العميد:اهلا دكتور ابوبكر...مرحبا دكتور سفيان..
صافحوه الزوز...
العميد:شن الأمور ماشية تمام؟
ابوبكر:تمام الحمد لله..
العميد:واستاذ سفيان ان شاء الله رجع اندمج هنى..
ابتسم سفيان وقال؛قعدت غادي خمسة شهور وهني نقري ليا سنين..
العميد ابتسم وقال:فعلا..ومع هذا قاعدين نحاولوا نخدموا ع ارواحنا..وكان ربي وفق بعد وقت تولي جماعتنا كيف اللي برا وخير منهن..
سفيان كان منسجم معاه وهو يتكلم مش مركز ع كلامه ع قد مامركز مع اللكنه..
ابوبكر شبحله بعدين شبح للعميد وقال:ان شاء الله..
العميد:ان شاء الله..هي نستأذن..السلام عليكم..
الزوز ردوا عليه:وعليكم السلام..
ابوبكر شبح لسفيان وقاله:جامله حتى مجامله راجل..
سفيان:خيرني شن درت!؟
ابوبكر بضحكه:قباله مش طايقه...
سفيان ابتسم وقال:بالعكس..بديت نتقبله عندكم حق الراجل عنده طموح ويبي يخدم..
رفع ابوبكر حواجبه وهو يشبحله..
سفيان تنهد وقال:هيا تحرك العصر قريب يذن..
مشي ومشي معاه صاحبه وهو يشبحله بإبتسامة استغراب..
🌺🌺🌺🌺🌺
بعد صلاة العصر..
في الصاله...
خشت جايبه ماعين العاله لعزوزتها اللي كانت لاهيه بالهدرزة مع بنتها..
رنده اللي دايره شعرها ذيل حصان وحطاته ع كتفها وتلعب بيه:اني استغربت فيها علاش تشبحلي هكي وهي لاحظت مش قتلي اكيده تقولي هادي خيرها تشبحلي هكي..ضحكت وهي تقول....قلتلها ايه خفت منك..مشي ضحكت وقالت ماتخافيش اني حامل ونتوحم ونبي نتوحم عليك ومن بكرى نشبحلك ونشرب في الميه بش تجي بنتي زيك..
وجيهه؛ووك عليا قريتي ع روحك .
رنده بضحكه؛ديما ماما نقرا...المهم قالتلها وحده كان جتها في الزين منين بتجيبي اللون ماهو هي قمحيه..قالتلها ناكل في الحليب ومشتقاته واجد..
عفاف بضحكه:وهي اللي تشرب الحليب يجوها صغارها بيض!!
رنده بضحكه:هي وحده من قعر ******..
وجيهه بضحكه:اها هدا علاش..
رنده:بكل اقاربهم من بعيد شلافطيه ومتخلفين والتقعميزة معاهم تزهق الكبد..
عفاف:ايه لاحظت لما مشينا يومها..في اللي قاعدين بالرداوات لتوا..
رنده:اممم بدو...
ولينا حطت اخر حاجه في العاله وطلعت من حداهم وهي تقول بهمس:مسكينه..
خشت ع منى وهي تقول؛ها شن مازال؟
منى:لا خلاص طلعتهم وعسلتهم..
لينا:تمام معناها كل شي واتي..
ابتسمت منى وقالت:ايه..هي تعالي نطلعوا نقعمزوا حداهم قبل يقولوا مايبوش يقعمزوا معانا..
ارتسمت ع وجه لينا ملامح عدم التقبل..
منى:الله غالب بنتحملوا وخلاص..
لينا؛ربي يصبرني الايام هدينا مش متحمله حتى روحي..
منى:معليشي معليشي..
ومشوا طلعوا هما الزوز من الكوجينه..
🏵🏵🏵🏵🏵
شرب من فنجان القهوة بعدين حطه وقال:اممم شن تخبرنا..
شبحله وقال؛بايته..
ضيق ابوبكر عيونه بإبتسامه بعدين قال:المده الاخيرة مولي كتوم هلبه..
سفيان حاول يخفي ارتباكه لما قال:لاكتوم لاوحده..ماعندي شي نحكيه هو هدا..
ابوبكر:ولاعن حياتك مع الصغار؟
ارتسمت ع وجه سفيان ابتسامه وهو يقول:هادو حكايه تانيه صاحبي..وين نشوفهم ونقعمز معاهم ننسى نفسي..هكي..مش عارف...كاسرين الروتين والحياة الرتيبه اللي عايشها عايش معاهم كل يوم بيومه..نراقب فيهم كيف يكبروا وكل مرة تتغير فيهم حاجه..توا بادين يلعبوا بإيديهم ويديروا في اصوات تجنن بالذات ع الصبح مناغاتهم ع الصبح تخليك تبي تاكلهم..وضحك..
ابوبكر وهو مبتسم بإنسجام:غريبة قبل ماعندكش ع الصغار في السن هدا..
سفيان بإبتسامه:هادم بروحهم....ساد انهم الحاجه اللي قعدت من عدنان رحمة الله عليه..
ابوبكر:الله يرحمه..
رفع سفيان فنجان القهوة وشرب منه..وابوبكر يشوفله..
بعدين حتى هو خدي فنجانه وقال:يعني بشكل عام تأقلمت..
وشرب من القهوة..
سفيان شبحله وقال:ايه..يعني عادي..
ابوبكر:اممم..يعني معاش عندك مشكله تتقبل مستقبلا..
سفيان عقد حواجبه وقال؛نتقبل شني؟!
ابوبكر قعد يشبحله وهو ساكت..
سفيان توتر وقال:باهي غير الموضوع وقولي شن صار في الأرض اللي تبي تاخدها..
ابتسم ابوبكر وقال:قاعد متردد...
🌺🌺🌺🌺🌺
"نهار اسود ع روسهم"..
عفاف:والله يام كيف مانحكيلك حطها في الطريق بشنطة حوايجها وورقه حداها كاتب فيها انها مريضة زهايمر والمراة مافيها شي..وكله تخطيط كناينها راهو...
زبيده:وبناويتها وين؟
رنده:شن بيديروا بناتها ياحناي كانهم في حكم رجاله الله غالب..
وجيهه؛وكيف تقعد عند بناويتها وعندها بدال الولد 7يعني سبعه حياش..النسيب اكيد بيقول مش ملزوم وعنده حق..
زبيده:سبحان الله...من قال رجعه يصير فيها هكي شوق مادارت ع خاطر صغارها بعد توفى راجلها وع قد ماجوها خطابه ردتهم وقالت نبي نربي صغاري..وشوفوا بشن كافوها..
عفاف:كله من تحت راس كناينها الله لايوجهلهم الخير ياريتها كانت مش باهيه فيهم...كانت تقول امهم..
رنده:والله الكناين مايبوا كان النار والعين الحمرا كان هدا يديروا العبيتر..
لينا: حاشا البعض..
شبحوا للينا..
رنده شبحتلها من فوق لتحت وقالت:خيرك انتخصتي..
لينا:لا ماانتخصت بش صلحتلك الكلام..لانه مش في حلو في حقك حتى انتي..نسيتي انك كنه..
وجيهه شبحت للينا بحده من فوق لتحت..
ومنى شبحت لوجيهه بعدين شبحت للينا بضيق..
زبيده:عندها الحق الناس مش كلها زي بعضها..اهي امكم ربي يرضى عليها دنيا وآخره دارت معاي اللي مايديروه بناتي..
وجيهه:اني هكي تربيت وتعلمت ياللاي وانتي تستاهلي نحطك في عيوني ونخدمك برموشهم..
ابتسمت عفاف...
ورنده مازال تشبح للينا بنظرة حاده...
لينا:هدى علاش صلحت كلام رنده..وشبحتله وابتسمت ببرود..
رنده قلبت عيونها وحطت شعرها للخلف..بعدين نادت:رتيل..
يارتيل...
"نعم"
رنده:بنتي ناضت؟
رتيل:ايه وتلعب...
ناضت رنده وهي تقول:خل نمشي نشوفها..
ومشت طلعت من حداهم...
وجيهه:منى نوضي مصمصي الطواسي..
ناضت منى وهي تقول:حاضر..
مشت خدت السفرة وطلعت من الصاله...
عفاف وهي تشوف للينا بنظرة عدم رضا:شني يالينا كل شي واتي؟
لينا:خل نوض نبدا في الفتات..
رفعت حواجبها وقالت:بديري فتات؟
لينا؛ايه عمي طلبه...وناضت ومشت طلعت من حداهم...
وجيهه بنرفزة:طولة اللسان مانحبها
عفاف؛ياريتك شفتي منى كيف شبحت لرنده بشماته..
وجيهه؛لينا هادي انحلت تبي من يلمها دلعناها لين فسدت..
زبيده؛ايه وانتي عاد تبي دخلي سفيان ولا؟..
وجيهه؛مايقدر عليها حد كان هو...هو بس اللي يقدر يحطلها حد..
زبيده:باهي زيدي نكديها عليه وراك تقصري..
وجيهه جت بترد شافت منى جايه بالسفرة سكتت..
•••لينا من بعض النقاش اللي صار شدت الكوجينه وقعدت لاهيه بالفتات..
وهما في الصاله يهدرزوا ويشربوا في شاهي اللي ماجتش من للينا ولاطاسه وهالحركه دارتها وجيهه قصدا..
ولينا تجاهلت ومابتش توقف عندها..
قبل المغرب بربع ساعه..
جو زوار مفاجئين للحوش..
او زائرات...كانوا بنات العيله اللي لمتهم رنده..
كانوا 5بنات..زوز منهم بنات واحد من عاممها...وبنت وحده من خالاتها...وبنت عمتها ربيعه اساور..
في الكوجينه..
خشت منى وهي تقول:وووه الركيكات التموا..
لينا:وانا نقول ليش عفاف دارت كميات كبيرة شكلهن متفقات لكن ماقتلي..
منى:عادي اللي حني درناه بزايد اصلا..
لينا؛الكعك المخمر مش بزايد مادخليش فيهن كل زوز في وحده وخلاص..
ضحكت منى...
وقعدوا هي ومنى في الكوجينه يجهزوا لين آذن المغرب..
وبعد الصلاة..
مشت لينا ركبت للشقه بتنزل الحاجات واتفقت مع منى تجي تنزل معاها..
لينا وهي تحط في الحاجات حدا بعض سمعت صوت خطوات في الشقه قالت:جيتي منى؟
"باهي مافاتني شي".
هي شبحتله بعدين نزلت عيونها وقالت:لوسمحت نزل معاي معاد في وقت..
هو قدم لتورته اللي كانت في باكوها..خداها..
وهي خدت الكياس ومشت قبله..
وهو مشي وراها وع وجهه ابتسامه جانبيه..
نزلوا لوطا...
لينا:تعال من جيهة الكوجينه..ومشت وهو وراها..
سفيان:خليتولي غدي؟
لينا:تو تاكل توا..
سفيان:يعني ماحسبتونيش..
لينا؛لا حسبوك..
سفيان:سخنيهولي قبل..
لينا تنهدت وقالت:باهي..
وصلوا للكوجينه وخشوا...
حطوا الحاجات ع الطاوله وهو قعمز..
هي مشت طول للميكرويف بش تسخنله الغدي..
وهو قعد يقلب عيونه في الكوجينه لين جو ع الكعك المخمر..
سهفه...ناض بياخد منه..
هي التفتت شافاته قالت:لا ماتمس شي..
شبحلها برفعة حواجب..
لينا عقد حواجبها وقالت بدون ماتشوفله :بالعدد.
سفيان:نبي حصتي توا..
لينا:قداش بتاكل حاجه؟!
سفيان؛وانتي شن دخلك؟
لينا غمضت عيونها محاوله منها لتهدئة اعصابها بعدين فتحتهم وقالت:ايه مادخليش..لكن ماتاخدش لأنهن بالعدد وانت مش محسوب...والتفتت للكوشه طفتها وقعدت اطلع في الصواني..
وهو واقف يشبحلها ...
هي حطت الصواني في سفرة ومشت حطتها ع الطاوله وقالت؛نعرفك ماتحبش تاكل شي ماتعرفاش..
وخدت الحاجات ومشت طلعت...
هو قعد معاها بعيونه لين طلعت...وبعد طلعت قعد يشبح لحظات للباب..بعدين تنهد..
وولى قعمز بش يتغدى
خشت هي مرة تانيه قعد معاها بعيونه لين طلعت باقي الحاجات...
عقد حواجبه وشبح للسفره وبدي ياكل..
شويه انتبه لريحة اكل مميزة...قعد يدور بعيونه لين جوا ع طنجره..
ناض..ومشي بيشوف شن فيها..
وقف عليها وقام الغطا..
ع خشتها شبحاته وقالت:اه ايه..وصتلك اختك ع فتات من برا..فتاتكم..
ومشت للدولاب فتحاته بطلع منه حاجات..
هو شبحلها وقال:قصدك هدا فتاتكم..
لينا سكرت الدولاب ومشت وهي تقول:اللي ماتحباش..
وطلعت من حداه..
هو ارتسمت ع وجهه ابتسامة تعجب..بعدين ضحك ضحكه خفيفه..ومشي ولى قعمز ورا الطاوله ورجع ياكل..
وعيونه ع الباب يراجي تخش مرة تانيه...
بس ماخشتش..
وهو ياكل...شاف جماعه من القوم متحركين من دار التقعميز للصاله..
وفجاة ضيها انطفي..
وبدي يسمع....
"سنه حلوة يانونو...سنه حلوة يانونو..
سنه حلوة سنة حلوة...سنه حلوة يانونو...."
بعدين سمعها قالت...
"هي طفوا الشماعي كلكم"
ابتسم..
شويه وسمع عفاف قالت..
"طارت الطورطه"..
ضحك معاهم...بعدين سمع رتيل قالت..
"عامت في الروايق"..
تعركشت ملامح وجهه بقرف وقعد يسمع فيهم يقولوا..
"زهق كبدك...يامقرفه...خي عليك يارتيل"..
وهو يضحك بقرف..
••في الصالة.
كانت نور فرحانه بطير مسيبه خالاتها وشاده في لينا وخلاص..
ورنده تشبحلهم بغيره..
اساور:هي قصي الطورطه نونو...
لينا:هي تعالوا معاها كلكم..
جو الصغار حدا نور..هي شدت الموس وهما حطوا ايديهم ع يده..
قالوا بصوت واحد:واحد اتنين تلاته..
لينا:هي قصوا..
قصوها...كلهم صاحوا"هيييه" وقعدوا يصفقوا..
وسفيان وهو منسجم معاهم عن بعد..
خشوا عليه رنا والشريف يجروا ورا بعض..
حصل الشريف ع رنا شدها من شعرها..
سفيان بضحكه:لالا حول...وناض فكهم من بعض..
رنا شدت في خالها..
والشريف حتى هو شده فيه ويشبحلها بنظرة تخوف..
وسفيان عقد حواجبه وهو يشوفله قال:مش عارف وين شايف زيك ؟!
ضحك بعدين رفعهم الزوز لحضنه وهو يقول:خل نمشوا ناكلوا حتى حني مش غير هما..
وقف فم الكوجينه وقال:يام..
البنات تفركسوا وخشوا بعضهم واساور قريب داخت من المفاجأة ماتحسباش موجود..
لبسوا كلهم حجابهم..
وامه قالت؛تعالى ولدي تعالى..
هو مشي للصاله وخش..
سفيان؛طالقين هادوا برواحهم يريشوا في بعض..
عفاف:واك منها هالبنت...نزلهم سفيان وقال:نور..
نور مشتله...
والبنات بدوا يسلموا عليه م بعيد..
"كيف حالك سفيان..شن جو سفيان"
هو رفع نور لحضنه وقال:الحمد لله..بطول عمرك ياقطوسه..هي ابتسمت بخجل..
ضحك وقرص من خدها بعدين شبح للينا وقال:وين حصتنا حتى حني ولاحتى هادي مش محسوبين..
كلهم شبحوا للينا..
وهي انحرجت وقالت:راجي شويه..
نزل نور ومشي قعمز ع الكرسي وقال؛نراجو شن ورانا..
والبنات يشبحوا لبعض ويشبحوله هو ولينا..
لكن اساور عيونها عليه هو وبس..
وجيهه:قصيله يالينا..
لينا وهي محرجه:اهو نقصله اللاي..
حطتله الطرف متاعه في صونيه ومعاه شوكه وكلينس ورفعتهوله حطتها قدامه ومشت.
هو خدي الصونيه وبدي ياكل وعيونه مرة ع الصغار ومرة عليها..
اساور:وتوا دور الهدايا..
صفقت نور بحماس..
اساور:هادو من خالتو اساور ليك ياعسوله..
خدت نور الهديه وهي فرحانه فتحتها طول لقتها لعبة حلوة نور فرحت بيها..
اساور:حلوة..
نور:ايه..
بعدين قعدوا باقي البنات يعطوا فيها الهدايا..
وبناويت عفاف وخوتها الولاد كانوا يشبحولها بغيره..
رنده؛واني جبتلك اهوا..
نور خدت البوكس من خالتها فتحاته لقت فيه حذاء حلو بالمرة:محلاه...
رنده؛تعالي عطيني بوسه...
ضمت نور خالتها ورنده توزع عليها في القبلات..
منى:اني جبتلك هادو ان شاء الله يعجبوك..
خدت نور الكيسه من منى فتحتها لقت فيها مجموعة بكلات"توكات" حلوات...
منى:عجبوك ..
نور:ايه يهبلوا..بعدين شبحت للينا ورمشت بعيونها..
سفيان ركز معاهم..
لينا ضحكت وقالت:اكيد جبتلك هديه وان شاء الله تعجبك..
ولفت خدت الكيس وطلعت منه تلاته علب ...
لينا:هدي ليك...
خدتها نور وفتحتها لقت فيها خاتم حلو ع هيئة فراشة..قالت.
...واااو...
ابتمست لينا وقالت؛وهدين لرفيده وغيداء..
طاروا بنات عفاف من الفرحه وجو للينا يجروا وخدوا منها الهدايا..
عفاف:قولوا لمرت خالو شكرا..
سفيان شبح للينا لما سمع اخته شن قالت..
لاحظ ان ابتسامتها تعكرت..وكانه ملامح الضيق قاعده تصارع في الإبتسامه مصارعه..
البنات الصغار مع بعض قالوا:شكرا..
لينا بإبتسامة مجامله:عفوا...
الشريف ولد نوريه بمزح:وشن حني ماحسبتونا في شي ع الماشي..
ضحكوا عليه..
ولينا قالت بإبتسامه:اكيد حسبناكم وانت بالذات ع خاطرك درت الكعك..
ولفت ومشت خدت كيسة الألعاب..
طلعت منها العاب قطنيه للبنات...
والولاد...العاب تخصهم فرحتهم هلبه..
قعدوا يشكروا في لينا...
وعفاف قالت:كيف عاد رنو وميرال"بنت رنده" ماليهم شي..
سفيان شبح لرنا وقال:تعالي رنو تعالي...
مشتله تجري..
خداها حطها ع رجليه وقال للينا:ترا جيبي..
هي خدت الكيسه ومشتله بيها..
وبنات العيله يتهامسوا بين بعض..
:لاحظتي سفيان اول مرة يقعمز معانا..
:حتى اني من بكري مستغربه...
واساور تسمع فيهم وهي تشبح لسفيان ولينا..
هو خدي من لينا الكيسه وطلع لرنا علبة الخاتم متاعها..
وهي ولت من وين ماجت..
طلع الخاتم وقال:اهو...وشد يدها وقعد يلبس فيها والبنت تشوف للخاتم وتقول:هاتم..
ضحكوا..
وهو بعد لبسها قال:بري وريه لأمك..
ونزلها من حجره بعدين ناض وقف وحط ايديه في جيوبه..
مرر نظره ع الصغار وقال بإبتسامه وحاجبه مرفوع:هدا كله من خالكم ومش هلبه عليكم..
لينا شبحتله بحده..
رنده بمكر:ربي يطول في عميرك وخي ويبارك في رزقك ويعوضك خير في كل شي..
وجيهه بإبتسامه:اللهم آمين..
منى شبحت للينا ولاحظتها كيف انحرجت الموقف كان بايخ بالمرة بعد مايحسابوا الهدايا كانت منها طلعت من هو..
وهي خلتهم يشكروها بدون من تقول من خداهم..
اساسا الفكرة فكرتها ولو مش هي وقفاته ع المحلات بش تاخد هدايا للصغار راهو مادارهاش..
ولو مش هو دفع حق الحاجات راهو هي شرتهم من حر مالها..
ماتوقعتش بكل انه يدير حركه زي هادي...
حركة بايخه وحطتها في موقف بايخ ومحرج جدا..
عفاف وهي تشبح للينا بطرف عينها:قولوا لخالو شكرا..
الصغار كلهم شبحوله وقالوا:شكرا خالو.
سفيان بإبتسامه:العفو...العفو..
وهي تشبحله بحده وعيونها تعبوا دموع..
فجأة...سمعت صوت واحد من صغارها يبكي..
طول انسحبت ومشت للدار...
خشتلها..
دموعها نزلوا...مسحتهم طول..وقعمزت حدا صغارها..
وخدت البنت هي اللي فاقت وخوها مازال راقد..
ضمتها لحضنها وخدت المرضعه فتحتها وبدت ترضع فيها..
ودموعها ينزلوا غصب عنها وهي تمسح فيهم..
خش عليهم وهو يقول:ناضوا..
هي رفعت حاجبها ومابتش تشبحله وكانت ع وشك الأنفجار..
هو وابتسامه جانبيه ع وجهه وين وصل قعمز ع رووس صباعه وخدي يد ياسمين بلطف وقعد يلبس فيها الخاتم..
ولينا مخنوقه من قربه كان تلقى تخبطه بالمرضعه ع راسه من غيظها..
هو بعد لبس ياسمين قال؛بناكلها يدك بناكلها..ضحك بعدين شبح لأمها وقال:خيرك يامنكده..
لينا شبحتله بحده وقالت:تكلم كويس لو سمحت..
سفيان رفع حاجبه وابتسم بتهكم..
هي استفزها وخلاها تقول:الشهاده متاعك واخدها بالفلوس!؟
هو قعد يضحك من جده..
وهي تشبحله بكره...
هدى ضحك بعدين قال:علاش ؟
لينا:هكي فكرت بعد شفت الحركه اللي درتها قبل شويه..
قعمز ع ارض وهو متكي بإيديه ع الارض..وتاني ركابه ورافعهم فوق وقال؛وشن اللي وجعك انتي كذبت اني..!؟
لينا هزت راسها وقالت:الحق مش عليك والله ماعليك الحق عليا انا اللي ظنيت فيك ظن خير..
ضحك وقال:عندي اقتراح كان تعطيني من الكعك اللي درتيه نطلع ونقوللهم الحقيقه كامله..
هي قعدت تشبحله من فوق لتحت..
وهو قعد يضحك..
من غيظها ناضت ببنتها ومشت طلعت من حداه..
هو تبعها بعيونه..ضحك بعدين ناض وقف ومشي طلع وراها..
هي طول مشت قعمزت جنب حناه زبيده وقعدت ترضع في بنتها..
وهو واقف وحاط ايديه في جيوبه وقعد يشبحلها...
"امي"..
سفيان شبح جهة الباب وقال:تعال يادكتر تعال..
شويه وبان عليهم مروان وفيده بوكس مفتوح فيه ورد وباكو ساعه رجاليه غاليه وهو يقول:السلام..
ردوا عليه كلهم وهما يشوفوا للي فيده..
ومنى من التفنيص عيونها قريب يطلعوا..
رنده بضحكه:هدا شنو يامروان هدا شنو؟!
مروان بضحكه:لالاماتفهميش غلط..
عفاف:الحقي يامنى..
لينا شبحت لمنى..
ومنى مازال تشبح لمروان بنفس النظرات..
هو شبحلها وقال بضحكه متصنع الخوف:اشي كيف تشبح!! قسما برب البرايا ماهي ليا بالله..
وجيهه:مال لمنو؟.
كلهم عيونهم توجهت لسفيان..
ماعدا لينا..
سفيان عقد حواجبه وحرك راسه وهو يشوف لخوه:شنو...
مروان:ليك انت يابرادر..
البنات شبحوا للينا ...وحتى هو شبحلها..
وهي ولامعبره ولاكأنه صاير حداها شي..
هو غير عيونه عنه ومشي لخوه خداها ومشوا مع بعض للمربوعه..
زبيده:من هالزوفريه هادي..
رنده شبحت لاساور..
اساور فنصت وحركت راسها يمين ويسار نفيا..
رنده ضيقت عيونها بشك..
اساور حلفت وهي تحرك في شفايفها..
ورنده مطت شواربها للأسفل بإستغراب..
•••في المربوعه..
مقعمز يقرا في الكرت اللي جي مع الهديه...
"ياسالب القلب مني عندما رمقا
لم يبق حبك لي صبرا ولارمقا..
لاتسأل اليوم عما كابدت كبدي
ليت الفراق وليت الحب ماخلقا
مابإختياري ذقت الحب يااملي
وإنما جارت الأقدار فأتفقا...
وكنت في كلفي الداعي الى تلفي
مثل الفراش احب النار فأحترقا
يامن تجلى إلى سري فصيرني
دكا وهز فؤادي عندما صعقا
انظر الي فإن النفس قد تلفت..
رفقا عليا فإن الروح قد زهقا"
...................
"لمن الشعر يابنت"
ايناس بضحكه:ابوالبقاء الرندي تو تشوفي شن يصير فيه لما يقراه..
زهور بإبتسامه:ايه هو يحب يقرا هلبه يحب الحاجات هادي..
ايناس:لكن مفروض خلتيني نكتب اي شي يبين انك انتي اللي باعتيها.
زهور:قتلك توا مانبيه يعرف شي..المهم وصلاته وفي حوش ماليه...
ايناس:كان نعرف لشن تخططي.
زهور ضحكت وقالت:تعالي تعشي تعالي..
ومشت طلعت واختها لحقتها
يتبع …
الفصول الاربعة
