فأذاقني النَّجوىٰ (الجزء الثاني من همسات العشق)

الفصل الثاني

فأذاقني النجوى
ــــــــــــــــــــــــــــ

جفف خصلاته بالمنشفة ثم توجه إلى الدولاب لينتقي ملابسه التي سيذهب بها إلى الشركة، توقف قليلًا ينظر للملابس كالتائه ولأول مرة يشعر بهذا الضجر والضيق، فهو لا يعرف انتقاء ملابسه أبدًا، كانت هي من تختار ماذا سيرتدي كل يوم ومنذ أن غادرت صار بتلك الحيرة دائمًا.

شعر بيد ناعمة توضع على كتفه فاستدار وإذا به يراها أمامه، انفرجت شفتيه وهو يهمس بعدم تصديق: حور!

ابتسمت حور ابتسامتها الواسعة التي سلبت عقله لتقول برقة: واقف تايه كده ليه؟

جال ببصره فوق ملامحها ليقول: تايه من ساعة ما مشيتي، مش عارف اختار هدومي اللي هلبسها.

زفرت الأخرى بقلة حيلة لتبعده عن طريقها قائلة: طب وسع كده شوية، متعرفش تعمل حاجة لوحدك أبدا.
توقفت أمام الدولاب تقلب في الملابس لتختار بذلة من اللون الجملي فالتقطتها واستدارت لتتجه إلى الفراش ثم وضعت الملابس عليه، اتجه براء خلفها ليمسك يدها فاستدارت إليه مبتسمة ليقول: هو انتي رجعتي امتى؟

حور بابتسامة مراوغة: ومين قالك إني مشيت اصلا!

حدق بها بتيه قائلًا: طب انتي هتفضلي معايا ولا هترجعي تمشي تاني؟

اقتربت منه ثم حاوطط عنقه بيديها الناعمتين، ارتفعت على أطراف أصابعها تطبع قبلة حانية فوق جبينه لتقول وهي تنظر في عينيه: حوريتك متقدرش تبعد عنك أبدا يا براء.

أغمض عينيه وحاوط خصرها بتملك شديد ليقول وهو يستند بجبينه فوق جبينها: هونت عليكي تسيبيني طول السنين دي لوحدي، قدرتي تبعدي عني!

حور بعتاب رقيق: انت اللي قدرت وبعدت، وانا حورية متقدرش تعيش برا البحر، وانت بحري، لما خرجتني من البحر بتاعي انا مُت.

فتح عينيه سريعًا ليقول بلهفة: اوعي تقولي كده تاني فاهمة.

حاوطط وجهه برقة لتهمس بابتسامة ساحرة: متخافش، انا روحي معاك ومنين ما تكون هتشوفني حواليك.

ثم انتقل كفها ليستقر فوق موضع قلبه النابض بعشقها لتقول بعشق فاق كل الوصف: انا عايشة جواك وعمرك ما هتقدر تنساني.

فتح براء عينيه ليجد نفسه يقف أمام الفراش محتضنا البذلة بذراعيه، ودموعه تغرق وجهه، فناداها وهو يتطلع حوله باستغراب: حور!

التفت حول نفسه ليضحك بخفة وهو يمسح دموعه قائلًا: بلاش هزار يا حور، انا عارف إنك مستخبية، يلا اطلعي.

ظل يدور حول الفراش وهو يتلفت حول نفسه كاللذي ضل الطريق، توقف ليضع بيده فوق قلبه هامسًا باسمها: حور.

انحنى فوق ركبتيه لتتساقط دموعه وهو يهمس بتحشرج: انتي قولتي مش هتسبيني، قولتي مش هتبعدي عني، انتي ليه مش قد كلامك؟