فأذاقني النَّجوىٰ (الجزء الثاني من همسات العشق)

الفصل الخامس عشر

فأذاقني النجوى "كتب كتاب نمبر وان"
ـــــــــــــــــــــــــــــــــــــــــــــــــــــــــــــــ

وضعت نرمين الصينية المرصوص فوقها أكواب الشاي أمام ولدها لتقول وهي مسلطة أنظارها فوق الفتاة الأخرى بتفحص: اتفضلوا الشاي.

التقط أحمد الكوب بتوتر قائلًا: ربنا يخليكي يا ماما.

مد يده بالكوب ناحية فجر يهتف: خدي يا فجر.

فجر بإحراج: thanks مش عايزة.

عاد بأنظاره إلى الكوب ورفعه ليلتقط رشفة فاصطدم بنظرات والدته الثاقبة وهي تضع كفيها فوق بعضهم أمام بطنها، ابتلع لعابه وأعاد الكوب إلى الصينية دون أن يمسه ليميل على فجر هامسًا في لطف: فجر انا هروح اكلم أمي وابويا وراجعلك تاني، اشربي الشاي يا حبيبتي.

أعطته إيماءة صامتة لينهض آخذًا بيد والدته ثم خرجا من غرفة الضيوف ليصطدم بوالده يجلس بالخارج يدخن سيجارة، ينظر إليه بضيق جلي، تقدم أحمد من والده ليقول بثبات: بابا.. لو سمحت فجر هتعيش معانا هنا.

صالح بجمود: يعني ايه تعيش معانا هنا؟ مين فجر دي اصلا وعرفتها فين وايه علاقتك بيها؟!

أحمد: دي بنت كويسة أوي يا بابا وكانت جارتي في بيتي في استراليا، أهلها ميتين ومفاضلش ليها حد.

صالح بسخرية: وانت يا قلب أمك الصدر الحنين صح؟

رمش أحمد باضطراب لكنه استجمع قواه ليهتف بثبات: بابا انا بحب فجر وناوي اتجوزها.

تقدمت منه والدته قائلة بضيق: انت اتجننت، جايبلنا واحدة منعرفلهاش أصل ولا فصل وتقول هتجوزها!!

رفع صالح يده بالسيجارة وهو يهتف فيه بلهجة حادة: اسمع يا أحمد، انا سبتك تسافر وتشوف مستقبلك عشان واثق فيك وعارف إنك شاب طموح وعايز تكون حاجة، انما ترجعلي من برا في ايدك خوَجاية منعرفهاش، والله أعلم عرفتها ازاي وعملت معاها ايه وانت بعيد عن عنينا، لا وتقولي بحبها وهتجوزها كمان؟ انت كده زودتها أوي!!

أحمد بسرعة مدافعًا عن نفسه: بابا انت واثق ومتأكد إني عمري ما هعمل حاجة غلط أو حرام تغضب ربنا.

هز صالح رأسه باستنكار قائلًا بوجوم: تصرفاتك بتثبت عكس كده، وانت اللي بتخليني اشك فيك.

مسح أحمد على وجهه بنفاذ صبر ليقول من بين أسنانه بهدوء حاد جاهد ليحتفظ به: طب انسى انها خوَجاية وانسى أي حاجة، دلوقتي انا بقولك هي بنت كل اهلها ميتين وملهاش حد بس انا عارفها كويس اوي، وبحبها وعايز اتجوزها ومش شايف مشكلة في كلامي، ياخوانا انا مدخلتش عليكوا وهي في ايدي وبقولكوا اعرفكم بمراتي، لاء انا جبتها معايا تشوفوها لأني مش هعمل حاجة من وراكم.