A Change of Heart

Chapter 14

DUMAAN ang mga araw na lagi kaming nagkikita sa rooftop tuwing gabi kapag tulog na ang mga tao. Nakasanayan namin ang magkuwentuhan kung kumusta ang buong araw namin, paminsan-minsan ay tahimik lang din kaming nakikinig ng musika hanggang sa yumakap sa amin ang antok.

Dasal kong gabi na sana at para makasama ko ulit siya. Ayaw ko na nga mag-umaga dahil may mga nagbabantay sa kilos namin. 

Simangot kong hinablot ang nahulog na pamunas sa silong ng silya. Hindi ko alam kung ano mayroon sa akin at parang gusto kong dumaan sa harap nila at kunin iyong basong may tubig tapos aalis.

Pagkatapos kong punasan, sinadya kong idabog ang mangkok sa mesa. Kumuha pa ako ng isa para punasan ulit.

Mabilis ang pag-ikot ko ng mangkok. Hindi man lang ako tinatablan ng kaba kung sakaling mahulog ko ito. 

“Nangyayari sa’yo Lyka?”

Bumagal ang pagpunas ko, tumayo nang maayos sabay lihis ng tingin. “Wala, ate. Masama lang gising ko.” Magaan kong inilapag ang mangkok nang walang ingay.

Titig na titig ako kay Aquilla at sobrang higpit ng hawak ko sa platong hugis dahon. Mukhang sa kamay ko mababasag ang pinunasan at hindi dadapo sa mamahaling sahig ng mansion. 

Napabaling ako sa katabi noong sikilin niya ako sa braso. 

Sinimangutan ko lang si ate dahil pinagtatawanan ako habang sinasabayan nang mabagal na pag-iling-iling.

“Matutunaw na si Sir Junior sa katitig mo.”

Bumalik ang mata ko sa kanila ng babaeng kaharap niya. Unat na unat ang blonde niyang buhok. Payat siya pero likod pa lang, wow na. Ang kinis din ng balat kahit balikat at likod niya lang ang naaninag ko mula sa kinatatayuan ko dahil sa suot niyang crop top. Pero noong humarap siya kanina, parang may lahi. Ang liit ng mukha niya, matangos ang ilong—as in parang nakakita ako ng aktwal na modelo.

Bakit hindi makangiti sa akin ng ganiyan si Aquilla kapag magkasama kami sa gabi? Gusto ba niya iyong kaklase niya? Kung sa bagay, maganda kasi kaya sino ba naman ang hindi magkakagusto sa tulad niya. Kung kasing-ganda niya ako, baka lahat ng guwapo, ganiyan din ang ngiti nila sa akin.

Hindi niya kinakausap iyong ibang mga kasama niya, pokus lang siya sa babae. Kanina pa rin sila nagtatawanan na sobrang bago sa pandinig at mata ko. Nandito rin iyong lalaking naghatid sa kaniya noong gabing nalasing siya. Gusto niya kaya iyong babae? O baka naman . . . nandilat akong yumuko. Hindi niya sana girlfriend o gusto iyong babaeng mala-model sa ganda.

“Guwapo pala siya kapag nakangiti ano, ate?” tanong ko, bilang pag-iiba ko ng atensyon pero mukhang mali ang ginawa ko dahil mas nahalata lang niya.

“May gusto ka kay Sir Junior?”

“Ah . . . eh . . . .” Nag-iwas agad ako ng tingin pero sinundan ni ate ang direksyon ng ulo ko.

Ngumiti siya at halos tumusok pa ang kuko niya sa dulo ng ilong ko. “Gusto mo?”

Tikom ang bibig kong nag-iwas lang ulit ng tingin, bahagya pa akong tumalikod at nagpatuloy sa pagpunas. 

“Guwapo naman talaga si Sir Junior kaya sino ang hindi magkakagusto sa kaniya.”

Mistulang artista rin ang kaguwapuhan niya. Literal na hihilain niya ang buong atensyon ng mga babae kapag dumaan siya at mapapasunod ang ulo mo kung saan tutungo. 

“Saka bagay naman din kayo.”

Dumulas ang hawak kong pinggan sa sinabi ni ate at mabuti na lang ay nasa mesa ako, kundi makakagawa pa ako ng kasalanan para sigawan ni ma’am mamaya.