قلب من رماد💔
بقلمي عطر الياسمين🌸🖤
البارت9
_______________
الحب هو ذكاء المسافه...
ألّا تقترب كثيراً فتلغي اللهفه ؛ ولا تبتعد طويلاً
فتُنسى
احلام مستغانمي🥀
____________________
سناريا ...
كلش حابه التغيير اللي صار بحياتي .. الجامعه عالم ثاني اندمجت ويه بنات قسمي و صرنه كروب خمس بنات ؛ احنه ثلاثه من بينهم عراقيات و اثنين منا مو عرب اصلاً بس حيل حبابات البنات
ندرس سوه نروح للكافتريا سوه يومنا كله سوه ضحك و شقى و ونسه و اليوم كاعدين بالحديقه عدنه امتحان فارشين الكتب و الملازم و كاعدين ندرس و نراجع
بعيد من عدنا كاعدين شباب ثلاثه آني مندمجه ادرس و اسمع البنات يسولفن و يضحكن ..
سناريا - هاي شبيكم وكت سوالف ورانه امتحان
ندى - ههههههه غير هذني التافهات نور و هازال ديزحفن على بشار مالكيتن غير هذا العكره و تزحفن عليه
سناريا - بشار منو؟
نور - لج هذا ويانه بالقسم بس مصيبه شايل خشمه و ميتحاجه
سناريا - و مادام تعرفين هيج لعد شكو كاتله نفسج تزحفين عليه مو عيب؟
نور - هسه اللي يسمعج يكول رحت نطيته رقمي هو كل اللي دنكوله هو شخصيه و شكله و اناقته تجذب
ندى - دكافي حجي آني بعدلي نص الفصل ما مراجعته لا تضيعون الوقت بعدلنه نص ساعه و ندخل الأمتحان
سناريا - انتبهت عالشاب اللي جانو يحجون عليه واحد من الثلاثي اللي كاعدين مسافه عنا عرفته صح شايفته بقسمنا و فعلاً هالمجموعه كلهم شباب رزنين خصوصاً هو بشار اللي كالت عليه نور
رجعت اقرا قبل مايبدي الأمتحان
امتحنت و الحمدلله مجاوبه زين و راضيه عن نفسي ..
- يلله بنات اني اروح
ندى - اني هم اروح اريد انام البارحه سهرت اقرا و حيل تعبانه
نور - وين بعد وكت راح تعوفوني جان اتغدينه سوه
سناريا - لا حبي مااكدر اتأخر اذا تريدين شوفي هازال و هيلين يجوز يبقون وياج
نور - عابتلكم خربتوها بعد وين اكو واهس
سناريا - هههه يلله باي
رجعت للبيت بس اريد انام اول ما دخلت سلمت على ماما و دخلت لغرفتي ابدل دك موبايلي
باوعت المتصل ( سما) صديقتي ببغداد ياااي شكد مشتاقتلها :
- الو شلونج حياتي مشتاقتلج
- واضح كلش مشتاقتلي حقيره صار شكد ماسائله عليه؟
ضحكت و كلتلها :
- والله حقج بس التهيت هوايه شغلات صارت اريد احجيها الج ؛ شلونج شنو اخبارج؟
- الحمدلله زينه انتي شلونج سابين شلونها خاله عمو؟
- الكل بخير ؛ آني داومت جامعه هالسنه كتلج قبل
- اي آني هم ؛ انقبلت تربيه قسم احياء مو حلمي بس الحمدلله راضيه
- حياتي الله يوفقج يارب
- آمين قلبي ؛ اكلج ماعدكم نيه تجون لبغداد؟
- لا وين آني و سابين كليات و امتحانات ؛ ليش شصاير؟
- لا مصاير بس من زواج سيف اني شايفتكم عبالي نلتقي
- والله مااعرف يجوز بالعطله كل شي يصير
- بابا يمكن يجي على عمو يوسف هالشهر
- لعد تعالي ويا
- لا دوام عندي اني هم مااكدر ؛ يلله عالعطله ان شاءالله
- الله كريم ؛ سمسم عليج الله لاتكطعين هيج
- كولي لنفسج
- ههههههههه والله حقج اعذريني
أنت تقرأ
قلب من رماد
Romanceقصة فتاة عراقيه تعصف بحياتها الرياح فيتغير كل شيء في يوم و ليله و بعد أن كان قلبها ينبض بالحياة يحدث مالم يكن في الحسبان و يصبح قلبها من رماد
