قلب من رماد💔
بقلمي عطر الياسمين🌸🖤
البارت 34
____________
تجري الرياحُ كما تجري سفينتنا
نحن الرياحُ
و نحنُ البحرُ و السُفُنُ
____________
سابين ...
استمر المطر لثاني يوم العصر يلله وكف و الشوارع نشفت بس جانت عطلة نهاية الأسبوع بقينا كلنا بالبيت محد طلع و باليوم اللي بعده داومنا
و اني افكر بسيارتي اللي عفتها بالكراج هناك مقفوله و بالشحنه اللي جانت واصله لنص الطريق
وصلني سيف لدوامي الصبح و راح ؛ دخلت كرم موجود قبلي تركت غراضي بغرفتي و رحت دكيت باب مكتبه و اجاني صوته :
- تفضل
- صباح الخير
من سمع صوتي رفع راسه بسرعه و ابتسم :
- صباح النور اتفضلي
- ردت اسألك بموضوع
- شوكت وصلتي؟
- هسه
- لعد نشرب كهوتنا سوه و نسولف
- شمدريك اشرب كهوه اول ما اوصل؟!
جان شايل التليفون يريد يطلب الكهوه من حجيت اتفاجأ بسؤالي مدري حس بنفسه حجى شي مو بمكانه ما فهمت سبب نظرته المتفاجأه من رفع راسه فاتح عيونه بحيره
سكت شويه و بعدين رد :
- كلنه نشرب كهوه اول مانجي ليش انتي ماتشربين؟
باوعتله بشك و ما رديت هو غلس و طلب الكهوه و اجه كعد كدامي
- كولي
- الشحنه اللي راح تجي شوكت نستلمها؟!
صارلها كم يوم بالطريق اخاف الأجهزه تتضرر
اندك الباب و دخل ابو نور قدم الكهوه و طلع ويه ما سد الباب حجى كرم :
- الشحنه وصلت و استلمتها آني و صارت بالمخازن
فتحت عيوني متفاجأه
- و اني ليش ماادري؟!!
- لأن هسه وصلتي
- ليش مو المفروض اكون موجوده وياكم وقت الأستلام؟!!
سابين استلمتها البارحه من وكف المطر للمغرب يلله وصل السايق و لل 12 بالليل احنه نشتغل اني و العمال اذا تريدين تتأكدين هسه انطيج القوائم و اخذج للمخزن و......
قاطعته :
- لااا كرم مو هذا قصدي لا تفهمني غلط اني مدا اشكك بأمانتك لا تقولني شي ما حجيته
بس مااحب دوري ينلغي و يصير شي من ورايه اني مو صوره اهنا
- انتي الأصل بس مااكدر ابلغج بهيج شي يعني اخليج توكفين على راس العمال لل12 بالليل بهالبرد؟!!
صدك تحجين؟!
و ما كتلج مو متعمد بس جنت منتظرج تجين و نكعد سوه و نسولف
- تمام هذا هو الله يقويكم
رجع ظهره عالكرسي مبتسم و كال :
- الله يسلمج ؛ اشربي الكهوه راح تبرد
- لا راح اخذها اشربها بغرفتي
- اااا لحظه مو لازم نشوف القوائم سوه و اكو شغلات محتاجه توقيعج
- اي عادي دزهن الي و اوقعهن
- اوكفي لحظه
أنت تقرأ
قلب من رماد
Roman d'amourقصة فتاة عراقيه تعصف بحياتها الرياح فيتغير كل شيء في يوم و ليله و بعد أن كان قلبها ينبض بالحياة يحدث مالم يكن في الحسبان و يصبح قلبها من رماد
