قلب من رماد

البارت30

قلب من رماد💔

بقلمي عطر الياسمين🌸🖤

البارت 30

_______________

لحظة حب تُبرر عمراً كاملاً من الأنتظار ..

أحلام مستغانمي🍁

________________
سيف ...

- خير يمه شصاير ليش تريدين ترجعين هسه اكو شي؟
- ماكو شي عرس بنت خالك باجر و اليوم العصر يحنوها بعد شعدنا باقين احنا و عايفتكم و عايفه ابوك وحده؟!

- ليش وحده ياامي مو اني و سابين يمه بعد شكو؟!
- ميخالف سوي مثل ماكتلك و احجزلنه اني و اختك بعد يومين ثلاثه بالزايد

- يمه ؛ انتي بيج شي ترى اني مو غشيم .. انتو اصلاً مارحتو بس علمود العرس و مو عوايدج تستعجلين بالرجعه و حتى صوتج مايبشر بخير ؛ احجيلي شكو لا تقلقيني؟!!

- اهووو ياسيف شكد تلح بيتي و اريد ارجع شنو اقدملك تقرير لازم!!

- لا يمه مو قصة تقرير بس اخاف خلصت فلوسكم
- لا عندي خير من الله لو رايده شنو مستحيه منك؟

جريت حسره و رديت :
- تمام يمه مثل ماتريدين احجزلج بأقرب وقت ؛ بس هاا لا عبالج صدكتج من تجين بالسلامه النه كعده
- الله كريم

سديته من يمها اجه ابويه سأل :
- ها يابه ويه منو جنت تحجي؟
- ويه امي
- شبيها؟
- تريد احجزلها بعد يومين
- شعجب؟
- مااعرف حاولت افتهم صارت عصبيه بس السالفه مو خاليه و صوتها ما عاجبني
- يجون بالسلامه و نفتهم منهم عود ؛ احجزلها بالوقت اللي تريده يابه
- اي يابه بسيطه تدلل
- اروح على اختك لو تروح انته؟
- هسه اني اروح يابه روح انته للبيت ارتاح

- اريدك تشوفلها معهد تعليم سياقه حتى اشتريلها سياره و تروح و تجي وحدها احسن

- جانت ببالي الفكره و اريد اكلك صار فتره و انسى سبقتني ؛ آني هم اشوف هيج احسن و اكيد راح تفرح هوايه

- ههههه آني بس كلتلها الفكره طارت من الفرح لو شافت السياره كدامها شلون؟

- بسيطه اليوم اسأل و اشوف و باجر اروح اقدملها بمعهد
- الله يبارك بيك يابه؛ يلله روحلها لا تتأخر
- يلله في امان الله
- الله وياك

______________
سابين ...

خلص وقت الدوام و بلشت الم غراضي طلعت مرايتي رتبت حجابي ؛ انتظر يجي عليه بابا يرجعني

اندك الباب :
- اتفضل
- حضرة المديره عدها مجال تدخلني؟
- هههههه سيوفي اتفضل
- لايكتلج الأداره بس غرفتج ينقصها شغله بسيطه

تلفتت بالغرفه اتفقد النقص و سألته :
- شنو؟!
- عندج صوره و انتي صغيره اني كاتلج و شعرج مكفوش و تبجين مدري ياطيب قلب مصورج هيج راح اكبرها و اسويلها إطار و اجيبلجياهه هديه نعلكها اهنا