قلب من رماد

البارت1

- واكفه كدام شباك الصاله و بأيدي كوب النسكافيه و اتفرج على الطبيعه و الشمس اللي مدت خيوطها لداخل البيت و دخلت من الشباك

احب هالمنظر خضار الأشجار و زراك البحر و نسمات الصيف الصبح راحه نفسيه

قطعت صفنتي ايد صغيره تكمش طرف بجامتي ؛

- حبيبي كعدت تركت الكوب على الميز و شلته بين ايديه ابوس بي ..

شنو هالنوم الحلو اشتاقيتلك

يحيى- جوعان

سابين- يموت الجوع ياعمري تعال اريكك

سميه- كعد حبيب نانا تعال انطيني بوسه
انطيته لأمي حتى اسويله حليب و اوكله طلعت سناريا من غرفتها

سناريا- اييي يحيى افندي مدلل ايد تشيل و ايد تحط ؛ ولك ترى ديقشمروك آني ادري شلون قبلت تعوف امك و ابوك يروحون يجددون شهر العسل و انته اهنا مكابلني ؛ دروح وياهم يحضي

امي جانت لو تروح لفاتحه هم مااعوفهه شنو هالجيل هذا اني قلقه على مستقبل هذا العالم منكم

سميه- دعوفي الطفل ساكت بعدين هو متعلم علينه ليش مايقبل يبقى خليهم خطيه يتونسون هو كله اسبوع واحد

سابين- هو حبيب عمته و يبقى يمها انتي ليش تغارين؟

سناريا- وكت اللعب حبيب عمته و من يوسخ نفسه كومي سناريا سبحي حبابه

سابين- عوذه منج شصار بعد مااكلج سبحي اني اسبحه مو يويو

يحيى يضحكلي و يهز براسه اي ؛ هذا مدلل البيت الكل يحبه و ايد تشيل و ايد تحط اول حفيد بالعائله

ابن اخونا الوحيد سيف عمره سنتين اخذ زوجته و راحو يصيفون و يغيرون جو رادونا نروح وياهم

بس محد قبل يروح بابا عنده مشاغل و ماما ماتقبل تعوفه توسلو بينه آني و سناريا

تحججنا هي بدراستها و اني بشغلي و بالحقيقه ردناهم يكونون وحدهم و ياخذون راحتهم هو كل وقته مضغوط بالشغل و هي من الزواج للولاده و التربيه ما حبينه نصير بنصهم مثل العذول هههه

اجه بابا الظهر و تغدينا و كلمن دخل لغرفته متعودين
ننام الظهر

دخلت لغرفتي و حطيت راسي عالمخده صار فتره مااكدر انام بصعوبه يلله تغمض عيني كل ما اغمض اتذكر ايامي و سنيني اللي فاتت

اندكت باب الغرفه و دخلت سناريا

سناريا- سوسو خوما نمتي

سابين- ياستار كولي شرايده

سناريا- شكد دمج ثكيل ياالله هسه اني بعدني فتحت حلكي؟!!

سابين- مو اعرفج من تدكين ناعم لو تريدين شي من ملابسي لو تريدين اطلع وياج