قلب من رماد

البارت15

قلب من رماد💔

بقلمي عطر الياسمين🌸🖤

البارت15

_________________

افرحي شبيج لا تضوجين!
يا زهوة شبابج و انتي بالعشرين
عيشي بواهس الصفصاف
لو يمه اعتنو عشاق يحس بروحه شجرة تين

و لا تضوجين ..الكحله هواي عدها احساس
و حيل تضوج من تبجين🌱

__________________
سابين ...

فجأه اختنكت و حطيت ايدي على صدري و بجيت بقوه بابا جان يبعد عني خطوات اجه بسرعه لزم وجهي بين كفوفه و يباوعلي بقلق :

- شبيج بابا؟
- بابا اختنكت قلبي وجعني اسامه .. اسامه
- بنتي كولي ياالله اصبري شويه هسه يطلعون يبشرونه بسلامته ان شاءالله

حجت ماما و ايدهه تفرك على ظهري و تطمني :
- بنتي هاي من التفكير هيج ديصير وياج تعالي اكعدي من دخل ليهسه انتي واكفه على رجلج قوي نفسج شويه لا توكعين

راسي على صدر بابا يقرأ آية الكرسي و اجه سيف جايبلي مي و كيك و عصير :

- تعالي اشربي شويه و اكلي
- مااريد سيوفي مااشتهي صدكني
- شنو ماتشتهين من الصبح و انتي على هالوكفه تعالي لخاطري ؛ ارتاحي و صدكيني هسه شويه و يطلعون يطمنونه لا تأذين نفسج هيج

بابا طبطب على جتفي و كال :
- كلام اخوج صح يلله بابا ؛ تعال سيف اخذها للكافتريا تاكل زين و ترتاح و ارجعو

- لا مااروح اكعد اهنا بس اشرب مي و خلص
- بنتي لا تعبيني روحي ويه اخوج و هاي اني و امج كاعدين اهنا
- كومي اكلي حبيبتي اذا طلعو اتصل عليكم و يجيبج سيف يلله ماما

طلعت ويه سيف بعد ما كنا واكفين بالأنتظار كدام صالة العمليات اخذني و رحنه للكافتريا اللي بداخل المستشفى كعدنا و قدملي العصير و الكيكه اللي اشتراهن الي :

- يلله اكلي حبيبتي ؛ اجيبلج شي بعد؟
- لا عيوني تسلم اصلاً آني لخاطركم دا آكل

رفعت عيوني اباوع عليه مجتف ايده و ساندها عالميز و صافن :

- و انته ماتاكل ويايه؟
- لا مااشتهي احنه اتريكنه بالبيت قبل مانجي

فتحت العصير شربت شويه و اكلت صافنه افكر :
- سيف آني متعبتكم ويايه

باوع عليه عبس وجهه و كال :
- انلصمي و اكلي

ابتسمت لجوابه اعرف اللي حجيته هو الصح فعلاً آني شيلتهم همي اجوني من الصبح هو و ماما و بابا و وتين هم ما عافتني مرات احس بالذنب من اشوفهم هلكد قلقين ويايه على اسامه

كملت و كتله :
- يلله عفيه خل نرجع
- اكعدي شبيج مستعجله لو اكو شي جان خابرونه
- خايفه عليه هوايه
- لا تخافين ان شاءالله تعدي على خير