قلب من رماد💔
بقلمي عطر الياسمين🌸🖤
البارت38
________________
من جرح لجرح يانار اداور بيك
تبرد من كتر ولكتر تجويني
ذبلت بمحبتك زهرة العشرين
وبريحك طفت شمعة ثلاثيني
ما اعوفك بعد ماخذ عهد عالروح
وقابل لو حطب للنار ترميني
اتنفس هواك بزحمة الدخان
واكولن هم يحن كلبه ويطفيني؟!
________________
سابين ...
واكفه بشباك غرفتي المفتوح .. مغمضه عيوني و استنشق هوا الصبح ويه صوت العصافير و الأبتسامه ماليه وجهي و فرحه تارسه قلبي
و كل شويه افتح الموبايل و اقرا حروفه اللي دزهن بالليل قبل ماانام
💬اوعدج باجر اكون اول شخص تشوفي الصبح
كلماته طيرت النوم من عيوني و خلتني اكعد من الصبح مثل الطالب اللي رايح اول يوم دوام
بعدني على وكفتي و سمعت صوت الباب ورايه ينفتح كلبي رجف معقوله سواها صدك و ترك كل شي و رجع علمودي؟
اجاني صوته يرد على سؤالي :
- ماكو الحمدلله عالسلامه؟
التفتت لكيته واكف و ايده بجيوبه و ميل راسه و يباوع بشوق و ابتسامته الحلوه تارسه وجهه
ركضت بلهفه وكفت كدامه و حجيت :
- الحمدلله على سلامتك ؛ هاي سويتها صدك و اجيت
- الله يسلمج ياحلم عمري ؛ احلى صباح طلع عليه
نصيت راسي مبتسمه و مااكدر اخفي ملامح الفرح اللي على وجهي و هو يتأملني و حجى :
- لعد مو كتبتلج باجر اني اكون اول شخص تشوفي شنو تسألين سويتها صدك؟
- اتوقعتك تجي بس مو هيج من الصبح
- ليهسه ما عرفتيني؟
آني من اكول كلمه معناها خلص اعتبري تم
- اعرفك ؛ رجال كول و فعل
- سابين
- نعم
- البارحه كلتيهه بالتليفون و اني صار سنين متمني اسمعها منج
بعدت نظري عنه خجلانه مدري شبيه و احس ايدي ترجف كتله :
- شنو هي شتقصد؟
ابتسم بمكر و رد :
- لا كلش زين تعرفين شنو اقصد
البارحه كلتي احبك ؛ اريد اسمعها منج و اشوف عيونج و انتي تكوليها
- ااااا لااا عفيه مو هسه بعدين
- زين ليش عيونج تفتر على كل شي الا اني؟
مشتاقلج لاتبخلين عليه بنظره منهن
- كرم خلي هالأمور بعدين
- حقج اني آسف ؛ بس مشتاقلج شسوي تدرين اجيت من المطار كبل لهنا
فتحت عيوني متفاجأه :
- صدك؟!!
- و عيونج ؛ بس حتى اكون كد الكلمه اللي كلتها
و مو بس هسه وعد رجال كل العمر ابقى هيج وياج
أنت تقرأ
قلب من رماد
रोमांसقصة فتاة عراقيه تعصف بحياتها الرياح فيتغير كل شيء في يوم و ليله و بعد أن كان قلبها ينبض بالحياة يحدث مالم يكن في الحسبان و يصبح قلبها من رماد
