قلب من رماد💔
بقلمي عطر الياسمين🌸🖤
البارت 36
_____________
لو ماخذ وياه الهوى و لا بي ترك ذكرى
كل ما اشمه اختنك كل الهوى عطره🍂
_____________
سابين ...
" الحمدلله على سلامتج يا حلم عمري ؛ انتي اللي ماتشرق شمسي إلا من اشوف عيونها "
قريتها و حسيت بشعور غريب دخل لقلبي فرحه غريبه مااعرف يمكن كثر اهتمامه بيه و بتفاصيلي بدا يخلي الجليد اللي بداخلي يذوب
معقوله كدر يأثر بيه؟!!
يمكن!!
موقفه ويايه يوم اللي وكعت
و الخوف و القلق اللي شفته بعيونه للحظه حسيت اكو بداخله صدق
غمضت عيوني و شميت باقة الورد انفتح الباب بهدوء و حسيت بي دخل ميزته من عطره نفس العطر اللي شميته بي بهذاك اليوم
التفتت و لكيته واكف بالباب .. تقدم بخطوات هادئه و ابتسامه حلوه على وجهه
جان لابس بنطرون جينز و بلوز و عليهن كوت اسود طويل يوصل شويه فوك الركبه
وكف كدامي و حجى :
- الحمدلله عالسلامه ؛ هسه يلله نورت الشركه
- الله يسلمك اشكرك
- اعذريني مقصر وياج بس خجلت اجيكم للبيت و ماردت ازعجج و اتصل و انتي مريضه بس جنت اسأل سيف عليج دائماً
- بالعكس ماقصرت اللي سويته كفى و وفى اني اشكرك تعبتك ويايه
- ممكن تبطلين تشكريني؟
- ليش؟!
- مااحب
- تمام براحتك
- شلونج هسه؟
- الحمدلله هوايه احسن
- دوم يارب
كمل اليوم طبيعي و ما صار بيننا حديث اكثر من هيج لأن كل واحد انشغل بعمله
الفتره اللي بعدها بدت تطلعلنه مشاكل بالشغل و كرم دوم روحه بطرف خشمه و معصب استمرت العراقيل شهر تقريباً و انتهت بفسخ الشركه المنتجه العقد ويانه
او هو اساساً العقد انتهى و علمود نجدده طلبو سعر ضعف السعر السابق و المبلغ حيل مبالغ بي مانكدر نتحمله هنا كرم انهار
كاعده بغرفتي و سمعت صوت شي انكسر بقوه طلعت اركض و دخلت لمكتبه لكيته شامر كلاص المي و مضروب بالباب و مكسور و هو عيونه ناطه و يفتر بالغرفه بعصبيه ايد على خصره و الثانيه يفرك براسه
- شكو كرم شصاير
- راااح تنهجم بيوتنا انتهى العقد و مايقبلون يجددو راح نصفط و نكعد
يحجي و يصفك بأيده ؛ اول مره اشوفه بهالحاله و حقه الموضوع جبير حاولت اهون عليه :
- اهدأ العصبيه مو حل
- شسوي فهميني شسوي المخزن فااارغ هذا مو هجمان بيوت؟!!!
- كول ياالله يمكن بيهه صالح النه
- سابين احنه مو وحدنا اني عندي موظفين كل واحد بيهم فاتح بييييت منين انطيهم رواتب من شيب الخلفونييي؟
أنت تقرأ
قلب من رماد
Romanceقصة فتاة عراقيه تعصف بحياتها الرياح فيتغير كل شيء في يوم و ليله و بعد أن كان قلبها ينبض بالحياة يحدث مالم يكن في الحسبان و يصبح قلبها من رماد
