قلب من رماد💔
بقلمي عطر الياسمين🌸🖤
البارت 13
__________________
مو ذنبك حلاتك كل ذنب مابيك
ولكن صوج كلبي الماعرف يصبر
اشكد ردت اكتفي بالنظره الاولى وياك
اغمض والفصوص من الجفن تطفر
يانظرة براءه اظل براءه وياك؟
اذا نظراتي جانت بالجلد تحفر🌷🍃
_____________________
يوم جديد
حياة جديده
بيت غريب راح يصير هو بيتي
و البيت اللي عشت بي سنوات راح اكون ضيفه بي بعد هاليوم!
اهلي اللي كبرت بيناتهم راح ابتعد عنهم
راح افتقدهم
صوت بابا وهو يقرأ القرآن ورا صلاة الفجر
ريحة طبخات ماما اللي اشمها اول ما افوت للبيت
سيف اللي الجأ اله من اكون محتاجه سند يقويني
اروى بيت اسراري و صديقة طفولتي
سناريا توأم روحي .. نصفي الثاني .. مداهرنا و شقانا و ضحكاتنا اللي يرن صداها بجدران هذا البيت
غرفتي ؛ مكاني على طاولة الطعام ؛ المطبخ اللي يشهد على سوالفي ويه ماما يوميه اول ماارجع من بره
و اكعد احجيلها شنو سويت و شنو امتحنت و شلون اكلت و ضحكت ويه صديقاتي
بوسة بابا و حضنه كل يوم الصبح قبل مايطلع و اركض احضنه بروح طفوليه كأنه راح افاركه ايام مو ساعات
كل هاي الأشياء راح افتقدها ؛ و راح اصير اشوفها صدفه منا و رايح
لأن راح اعيش حياة مستقله
آني اليوم عروس
زوجه
ام بيت
مسؤله
؛؛؛؛؛؛؛؛؛؛؛
الله ...
شكد حلو يابيتنا
صغار وكبار بخيمتك لميتنه
يا كعدة امي و والدي .. و اخواني
يابيت ابونا الما يعوضك ثاني
شكراً الك ماقصرت
ربيتنا🥀
؛؛؛؛؛؛؛؛؛؛؛
واكفه كدام بابا اللي عيونه مدمعه و هو يشوفني بفستان عرسي نظرته تحمل هوايه معاني
فرح
حزن
فراق
و مسيطر على دموعه مايريد يقهرني
- كل واحد بيكم اله بقلبي و بروحي مكانه ماتنوصف
انتي
و سيف
و سناريا
اغلى من روحي
ربيتكم بمايرضي الله و نطيتكم حرية بهوايه امور بحياتكم ؛ مو اهمال ولا لامبالاة بس حتى تعرفون معنى المسؤليه
تتعلمون تواجهون الحياة
علمتكم تتحملون نتائج اخطائكم حتى توزنون تصرفاتكم
علمتكم تحلون مشاكلكم البسيطه اللي بينكم بنفسكم
حتى من يقوى عظمكم و يشتد عودكم و تواجهون مشاكل اكبر تعرفون تحلوها بعقل
أنت تقرأ
قلب من رماد
Romanceقصة فتاة عراقيه تعصف بحياتها الرياح فيتغير كل شيء في يوم و ليله و بعد أن كان قلبها ينبض بالحياة يحدث مالم يكن في الحسبان و يصبح قلبها من رماد
