﴿مَثَلُ الجَنَّةِ الَّتي وُعِدَ المُتَّقونَ تَجري مِن تَحتِهَا الأَنهارُ أُكُلُها دائِمٌ وَظِلُّها تِلكَ عُقبَى الَّذينَ اتَّقَوا وَعُقبَى الكافِرينَ النّارُ﴾
*كانت بتسبح في يدينها وهي في مصلايتها، فجأة سمعت صوت باب الزنزانة انفتح، قبلت وما شافت إلا واحدة رمتها الضابط في الأرض، وقفلت باب الزنزانة وفاتت، البنت كانت بتبكي بحرقة وماسكة مفصل يدها، وبتكورك "طلعونييي طلعونييي"، وكل البنات الفي الزنزانة قاعدين بيتفرجوا فيها وفي منظرها، أول ما شافتها رحاب دموعها جروا من غير استئذان، مسحتهم وقامت وجات وقفت قصادها، البت رفعت راسها وبقت تعاين فيها، وهي بتبكي وبتشهق من البكاء، قعدت قصادها في الأرض ومسكت يدها طبطبت ومسحت عليها بحنية كدا، البنت وقفت صراخ ودموعها وبقت تعاين ليها وعيونها لسة بتكب الدموع ووشها محمر...*
رحاب: ازيك؟ انتِ كويسة؟؟
*البنت سكتت وعقدت حواجبها باستغراب، ليه بتسألها السؤال الغريب دا وهي شايفة حالتها؟ وهي منو أصلاً؟...*
رحاب: أنا آسفة لأني بسأل فيك السؤال دا رغم إني شايفة حالتك، بس دقيقة...
*قامت ومشت على الفخارة غرفت كوز موية منها، وجات بركت على ركبها قصادها ومدت ليها الكوز، وهزت ليها براسها بمعنى شيليه، البنت بقت تعاين للكوز مرة، وتعاين ليها مرة تانية، اترددت في إنها تشيله ولا لأ، لما شافت إنها مصرة، شالته وغسلت بيه وشها، رحاب أشرت لسارة عشان تمد ليها الإبريق اللي كان جنبها، مدته ليها ومسكته ختته قدامها...*
رحاب: قادرة تتوضي؟
*اكتفت بهز راسها بمعنى اي*
رحاب: طيب اتوضي وصلي ليك ركعتين في المصلاية دي(وهي بتأشر على المصلاية) واستغفري
*مسكت الإبريق وبقت تصب الموية منه وتتوضأ، بعد خلصت نفضت يدها من الموية ووقفت على حيلها، وقفت معاها رحاب وطلعت ليها العباية الكانت لابساها مدتها ليها، وهي اتلفت بطرحتها الكبيرة، لأنها متعودة تكون غرقانة جوة عبايتها الكبيرة والسوداء طول الوقت، إلا إذا واحدة كانت عايزة تصلي بيها، وقفت في الركن مستنياها تخلص، سلمت من الصلاة واستغفرت وطقطقت اصابعها، قامت من المصلاية وطلعت العباية رجعتها لرحاب، ومشت قعدت في الركن جنب حديد الزنزانة وهي بتعاين لبرة وسرحانة، رحاب لبست عبايتها وشالت مصحف صغير من واحدة من البنات، وقعدت جنبها من غير ما تحسسها ومدته ليها قدام عيونها، عاينت للمصحف واستغربت وتاني اتلفتت لجنبها ولقت رحاب....*
البنت: انتِ ليه بتتعاطفي معاي؟ عايزة مني شنو؟
رحاب: ولا شيء، أنا ما بعرفك لسة بس حابة أوريك حاجة ممكن تعيشي بيها، أو ممكن ربنا ينصرك بيها
البنت: أعيش بيها؟ يعني انا تاني ممكن أعيش؟ انا خشيت للموت بيدي ومستحيل أعيش تاني، خليني في حالي وشوفي ليك حاجة تانية لو سمحتي
