﴿هُوَ الَّذي أَنزَلَ السَّكينَةَ في قُلوبِ المُؤمِنينَ لِيَزدادوا إيمانًا مَعَ إيمانِهِم وَلِلَّهِ جُنودُ السَّماواتِ وَالأَرضِ وَكانَ اللَّهُ عَليمًا حَكيمًا﴾
*في الزنزانة*
سلافة: شفت حلم، حلم شين الله لا جابه
رحاب: بسم الله يا خالتي حلم شنو؟؟
سلافة: ما عارفة اقول شنو يا بتي حلم غريب خلاص
رحاب: احكي يا خالتي أحكي
سلافة: شفتك وانتِ مبسوطة وفرحانة وبتلوحي لينا بيديك وماشة بعيد، تاني شفت حولينك بكاء كتير كدا، خفت عديل يا بتي
رحاب: قولي بسم الله يا خالتي ما بتحصل حاجة إن شاء الله استعيذي واقري شوية قرآن وارجعي نومي
سلافة: عاد النوم طار من عيني يا بتي
رحاب: لالا قولي بسم الله وهدي، دقيقة... هاك الموية دي اشربيها واقري المعوذتين ونومي
سلافة: طيب..
*شربت من الموية قدر الحاجة البتهدي بيها نفسها، اتنهدت ومسحت وشها ورقبتها بطرحتها، ورجعت تاني رقدت وهي بتهبب بطرحتها على وشها، اتنهدت وقلبت على جنبتها عشان تنوم، رحاب نزلت على الأرض واتمددت عليها بعد اتأكدت إنها نامت تاني، فضلت تتقلب على يمينها وعلى يسارها، ضمت يدينها سواء وقرت فيهم المعوذتين ومسحت بيها على طول جسمها، غمضت عينيها واخدتها نومة طويلة...*
*في الصباح*
*كعادتها، صحت قبل طلوع الضوء، مع موعد صلاة الفجر بالضبط كدا، قامت وهي بتردد "أصبحنا وأصبح الملك لله، وإليه النشور"، شالت الإبريق ووقفت في حديد الزنزانة بتتلفت، كانت في ضابط مارة من جنب الزنزانة، وقفتها وطلبت منها تجيب ليها موية في الإبريق، اخدت منها الإبريق بنرفزة كدا ومشت، ما مرت شوية وجابت ليها الإبريق مليان، شكرتها رغم معاملتها واخدت منها الإبريق، اتوضت وصلت وقعدت في مصلايتها بترتل القرآن من الحافظاه، فضلت بترتل وبتشغل نفسها بالقرآن لحدي ما طلع الضوء،سمعت صوت كركبة وراها اتلفتت ولقتها البنت الجديدة، ابتسمت ليها وهي ما ابدت ليها اي ردة فعل، شالت الإبريق اتوضت وغسلت وشها، وقفت رحاب على حيلها وادتها العباية تبعتها عشان تصلي، اخدتها من غير ما تعاين ليها ووقفت في المصلاية تصلي، بعد سلمت قامت على حيلها وطلعت العباية ادتها لرحاب...*
رحاب بإبتسامة: تقبل الله
البنت: آمين
رحاب: كيف أصبحتي؟؟
البنت: شايفة شنو مثلاً؟ دا ما صباح أصلاً ينقال عليه
رحاب: حنشوف ضوء الصباح قريب إن شاء الله
البنت بنرفزة: انتِ لسة ماسكة لي في فكرة حنشوف الضوء حنشوف الضوء موهومة انتِ؟! ضوء شنو انتِ في السجن يا بت الناس في عالم الظلام
