﴿ وَلَيُبَدِّلَنَّهُم مِّن بَعْدِ خَوْفِهِمْ أَمْنًا ﴾
"صباح يوم جديد، يوم مليان بيرسم تفاصيل جديدة، كانت بنت الخيرات قاعدة على أريكة الصالة، ماسكة الشيت بتاعها وبتمشِّي على السطور بقلم الرصاص، كالعادة، لابسة الأسود لونها المفضَّل، بنطلون من الخامة الجينزيَّة المطاطة أسود، مع قميص مزرر باللون الأسود السادة وأكمامه كاملة، مسرِّحة شعرها ضفيرة واحدة لوراء ومطبقاها، بهدوء تام، هي بتقرأ، بتردد المعلومة عشان تحفظها، مُثابرة ومجتهدة رُغم الضغوطات البتعيشها، وهي مندمجة مع السطور، رفعت رأسها بصوتها هي التانية وابتسمت..."
شجن بكسل: صباح الخير.
رحاب: صباح النُور.
شجن: كيفك كيف أصبحتي؟!.
رحاب: بخير الحمدلله انتِ كيف؟
شجن: كويسة الحمدلله، انتِ ما نمتِ تاني من صحينا الصُبح داك؟.
رحاب: لالا والله.
شجن: واي، انتِ جيتي من المكتبة متين أمس؟
رحاب: الساعة 10:30 كدا.
شجن: واي ياخي يا بتي بتموتي بالتعب انتِ.
رحاب: عادي اتعوَّدت.
شجن: ربَّنا يعينك ياخ.
رحاب: آميين يكون في عوننا جميعًا.
شجن: آميين، واي ياخ أنا عايزة استحمَّى واتخارج.
رحاب: براحتك يا بت ها، طيِّب تعالي أديك من ملابسي.
شجن: لالا هيي.
رحاب: ما تخجلي ياخ، عندي ملابس ما لبستها قبل كدا لو خايفة من الإستعمال المشترك، تعالي.
شجن: معقولة؟؟ ما كدا ياخ بس... طيِّب تمام خلاص.
رحاب: تعالي يا قلبي تعالي.
" مسكتها من يدَّها ومشت على غرفتها، فتحت لها دُولابها، وورتها رف الملابس الما حصل لبستها علشان تختار، شالت فُستان منقاوي أكمامه كاملة ومقبوضة بلستك على المعصم، مزرر بزرائر لمَّاعة، ونظام "Highneck" من اللياقة، ونفس اللستك الفي المعصم على الخصر، عاينت فيه مدَّة، كأنَّه الوحيد العجبها ولفت نظرها، بس اتنهَّدت وحاولت تشوف شيء تاني أقلَّ منَّه، قبل ما ترجَّعه رحاب وقفتها..."
رحاب: مرجعاه ليه يا بت؟
شجن: أشوف شيء تانِي ألبسه، يعني ألبس دا مستحيل.
رحاب: مُش عجبك؟
شجن: آي عجبني لكن عيب آخد منِّك فُستان زي دا.
رحاب: وين العيب في الموضوع؟؟! يا بت هيي ما بيناتنا شيلي ساي، أصلًا ألوان زي المنقاوي والحاجات دي ما قاعدة ألبسها، عينك أهو في باقي هدومي البلبسها واللابساها حاليَّاً دي.
