||• فَسُبْحَانَ اللَّهِ حِينَ تُمْسُونَ وَحِينَ تُصْبِحُونَ (17)
*وهي مارَّة فجأة سمعت صوت سُعال قوي جوَّة الحمام، وكان باب الحمام ما مقفول للنهاية، وقفت مدَّة كدا ولسة صوت السعال طالع، اتوترت مشت بسرعة عشان تشوف البيسعل بقوة دا مين، أول ما دخلت اتصدمت وضربت بيدَّها على خدَّها، شافت رشا واقفة وبتسعل دم على الحوض، على طول جات جارية عليها..*
رحاب بفزع وخوف: رش رشا دا شنو يا بت؟!
رشا وهي بتتنفس بسرعة: ر رحاب زحي ما تجي جنبي أطلعي برَّة.
رحاب: كيف يعني أطلع برَّة مالك يا بت في شنو؟؟؟!
رشا: رحاب يرضى عليك أطلعي برَّة أطلعييييي.
*ومسكتها من يدها طلعتها وقفلت باب الحمام، بقت واقفة في الباب وهي مصدومة من الشافته دا، رشا؟! رشا مالها؟! ليه رشا بتسعل بالطريقة دي؟! مسحت على صدرها شديد من الضيق وحست إنها حتبكي للحظة أو حتجن، فجأة اتهلعت وقبلت وراها لمَّا سمعت صوت بنان بتقول ليها "يا بت"..*
رحاب: أأ آي.
بنان: في شنو مالك واقفة كدا؟!
رحاب: منتظرة رشا.
بنان: ااا، عشان اتأخرتي ما جبتي الموية.
رحاب: طيِّب دقيقة بس هسي بجيبها.
بنان: تمام.
*مشت خلتها واقفة وهي خايفة ومحتارة، مشت على المطبخ عبَّت الموية وشالتها أدتها لبنان توزعها، مشت وقفت وانتظرت رشا لمن طلعت، أول ما طلعت عاينت لرحاب بنظرة يأس وبركت على الأرض بتبكي، رحاب بركت جنبها وضمتها وبقت تبكي معاها..*
رشا: رحاب أنا حأموت يا رحاب.
رحاب: يا بت استغفري وما تقولي كدا.
رشا: رحاب أنا ماف أمل إنِّي اتعالج تاني، خلاص حأموت، حأفارقكم يا صاحبتي.
رحاب: يا بت استغفري استغفري ربَّنا يطول بعمرك دا شنو البتقولي فيه دا.
رشا: لسَّة يا رحاب أنا ما بقيت مُهندسة، لسَّة ما حققت حلم أبوي وأمِّي، أنا حأفارق أمِّي وأبوي، لسَّة أنا ما حفظت القرآن زيِّك عشان ألبسهم تاج الوقار، تاني ما حأشوفكم، رحاب خلاص رشا حتفوتكم وتمشي لذمَّة ربَّنا بعد شهرين بس، آخخخ أنا...
رحاب وهي بتبكي شديد: يا بت دا شنو الكلام البتقولي فيه دا يا بت سبِّحي الله واستغفري وما تتشاءمي، مالك أحكي لي انتِ في شنو وبتشتكي من شنو؟!
رشا: سُل رئوي.
رحاب بهلع: سُل؟! طيِّب من متين؟!
رشا: من فترة، أعراضه كانت بادية معاي، وكنت بقول نزلة عادية، تاني ظهرت لي شوائب في الرئة، وقالوا لي إلتهاب حاد في الرئتين بتعالج، وهسِّي اكتشفت إنه المرض سُل، وفي مراحله المتقدِّمة كمان..
