شنوووو كناري تحجين صدك
/ وليش مقهوره خلي يولي هو الي خسرج
/ اتركيني فدوووه خليني كاعده وحدي
/ شنو راح تسوين مينا لتخوفيني وتخليني اتندم لان كتلج
/ اذا متركتيني وحدي اسوي كلشي عووفيني
عطت بيها اريد اتكوم اريد اظل وحدي
خبر ما دخل اذني لا جان سهم دخل گلبي وكطع شراييني
كامت من يمي واني ظليت انحب وابجي واعاتب الحظ واعاتب زيد
انت اول شخص حبيته محبيت گبلك ولا حته حب اخوه وصداقه بس انت انت زيد ااه يا زيد
اتخبلت مدري شصار بيه من القهر هيج احتركت روحي ذيج الليله وما نمت
صار الصبح واني بعدني نفس كعدتي انتبهت للضوه اجت ببالي شغله بسرعه كمت اطل من الشباك الشمس بعدها مو قويه توها طالعه
رحت للغرفه طلعت الجبه والشال واخذت فلوس وطلعت بره البيت قبل لا يكعد ضياء اعرفه مراح يخليني
مشيت اهواي الا وصلت للشارع العام ناس قليله توها بدت تطلع على شغلها كيات قليله عبريه ماكو
باوعت مو مال اصعد كيه شفت تكسي ونطيته اسم المنطقه
الساعه جانت 6:30 الجو بي بروده داخلين على شتا
وصلت للمنطقه هيه منطقه صناعيه بس اني مندل الورشه بالضبط
وكفت محتاره الف ورشة حداده اكو ظليت ادك على گصتي اتذكري مينا تذكري لابد يوم ضياء حاجي شي
فعلا اتذكرت اسم صاحب الورشه يصيحو سيد احمد
شفت كم رجال يباعون عليه مستغربين شكلي و وضعي بنيه من الصبح شتسوي هنا مبهذله و ابجي وضايعه
سئلت واحد منهم وين ورشة سيد احمد دلاني عليها ورحت
دكيت بابها حيل ايدي راحت الا سمعته صاح منوو
مجاوبت رجعت دكيت الباب
اجه فتحه انصدم من شافني
طلع راسه يطل وراي ورجع جرني دخلني بسرعه وسد الباب جان مرعوب
زيد/ لج شكو شبيكم ليش جايه من الصبح احجي ضياء وين ليش هالشكل صاير بوجهج عيونج شبيها لج احجي
جنت بس اباوع بوجها و اتنفس سريع والدموع تنزل من وحدها الكلام ميطلع وياي
هو مثل الي طخت عنده اتغيرت ملامح وجها وبعد عيونه عن عيوني
جاب كرسي وخلا يمي
/ كعدي هنا هدي هسه اجي
راح غسل وجها وجاب قوري صغير وسوه بي جاي
كل هذا اني عيوني علي مفاركته اجتمع عندي الحب والكره والحقد والتسامح والذكريات كلهن مره وحده
جاب كوبين جاي وخلاهن يمي جابله كرسي وكعد
/ ضياء يدري بيج هنا
أنت تقرأ
اولاد الشوارع
Actionنحن من جارت علينا الحياة ونبذنا المجتمع واستغلونا اصحاب النفوذ نحن اولاد الشوارع
