اولاد الشوارع

الثامن عشر ....

انفتح الباب دخل ابوهم

ابو محمد / شصاير هنا ليش هالربابه

محمد / بويه ماكو شي امي ما فهمت عليه عبالها البنيه من بيت طارش

ابو محمد / وان جانت من بيت طارش انا الدخلتها للبيت محد يعترض لو جانت چتالت ابووي طگ بعصاته حيل

الكل سكتو عبالك گطعو النفس لان صار هدوء لو تشمر ابره ينسمع صوتها

گعد على كرسي وصاح عليه تعالي يبنيه احجيلنه سالفتج وها من غير لف ترانه انعرف اليجذب من اليصدك

جريت نفس
/ عمو اني اجيت هنا خطار وضيعت دربي وبس معرف منو هالناس الي انتو دتحجون عنهم ولا اصلا ملتقيه بيهم ولا اعرف هايه ارضكم

الشيخ / منين انتي جنج مو بصراويه

/ ليش انتو بصره يعني احنه هسه بالبصرره عزززه

كلها صفنت بوجهي وستغربو من ردت فعلي اني انصدمت كل ضني احنه باطراف بغداد حسبت مثل المنطقه الي رحنه اني وعلي بيها ضمينه الذهب

خليت ايدي على راسي وكعدت على الجربايه كل حيل ما بيه

من شافوني بهاي الحاله صدكوني اني معرف بيت طارش

الشيخ / وينج يالشيخه هالبنت ضيفه عدنه ثلاث ايام تكرمونها وحالها حال بنياتنه وبعد الثلاث ايام انشوف سالفتها

كام راد يطلع صحت عليه

/ عمو الله يخليك بس وصلوني للشارع العام اني اندل الباقي

الشيخ / يبوي الدنيا خطره وانتي بنيه صغيره ما اكدر اطلعج لو ما طلعلج صاحب مالج طلعه منا

عينج عليها يالشيخه باس راس امه وطلع وتبعه محمد

اجت يمي الشيخه
/ كومي يمه وعذريني عمن محمد ما فهمني السالفه وبيت طارش كتالين ابني وحسبتج وحده منهم

/ خاله صدكيني اني معرف منو هالعالم بس ردت ارجع بيتنه وضيعت

هزت راسها وصاحتني اتبعها

رحت وراها دخلتني بغرفه بيها بنات ثنين وحده منهن مريم الي دخلتنه للبيت والثانيه عرفتني على روحها زينب اسمها هاي بنات الشيخ

فرشن اليه فراش رحت بدلت ونمت مثل الميته جان يوم صعب
بس منو يخليك اتنام الفجر وصار رمي لحد مطلعت الشمس
البنات نزلن يشتغلن اني رجعت نمت وكلتلهن لتكعدوني

ومكعدت الا على صوت صريخ وعياط والدنيا محتركه

فزيت مخروعه دخيل الله شنو هالناس لو رمي لو عياط واليبوي اتشك الكاع وتطلع

نزلت جوه اركض نسوان ثنين يملخن بروحهن مردن گلبي

والبقيه ملتمات عليهن وهم يلطمن ويصرخن