( Unicode )
" ငါ့မှာ ငါ့မှာ......ကိုယ်ဝန်ရှိနေတယ် ငါ့မှာ ကလေးရှိနေတယ်လို့ "
" ဘာ ? "
" အဲ့နေ့ကဖြစ်မယ်ထင်တယ်။ ဒါပေမယ့် ဘယ်သူလဲဆိုတာကို မမှတ်မိတော့ဘူး။ တစ်ယောက်ယောက်က ဆေးခတ်ပြီးတော့.... "
" တော်တော့ "
မယုံကြည်နိုင်ခြင်းများစွာက ကျွန်တော့်စိတ်ထဲနေရာယူလာလျက် ဘာဆက်လုပ်ရမလဲ မသိတော့ဘဲ မူယာကြွယ့်ကို ကျောခိုင်းလိုက်မိသည်။ ရင်ဟာတလှပ်လှပ်တုန်နေလျက်ရှိပြီး ဒီအခြေအနေကြီးမှာ ဘာကိုလုပ်ရင် အမှန်ဖြစ်မလဲဆိုတာကိုသာ အပြေးအလွှားစဉ်းစားနေမိသည်။ နောက်ပြီး သူမ ပြောနေသည့်စကားတွေက အမှန်လားဆိုတာကိုလည်း ကျွန်တော်ဝေခွဲမရနိုင်အောင်ရှိသည်။ ဘယ်လောက်ပဲ လိမ်ပြောနိုင်တဲ့လူဆိုဆို ဒီလိုကိစ္စကိုတော့....။
" ငါတောင်းပန်ပါတယ် ချမ်းမြေ့ရယ်။ ဟင့် ဒီကိစ္စကိုလက်ခံပေးပါ။ ကိုယ်ဝန်ရှိနေတာ မေမေတို့သိရင် ငါ ဒုက္ခရောက်မှာ။ နော် ငါ့ကိုကူညီပေးပါ "
" ဘယ်သူလဲ "
" ဘာကို.... "
" ကလေးအဖေကိုပြောတာ "
ထပ်မံ၍ မျက်နှာချင်းဆိုင်လိုက်ရင်း မေးသည့်အခါ မူယာကြွယ်က ငြိမ်ကျသွားသည်။
" ငါ ငါ မသိဘူး "
" ကျစ် ! နင်မသိလို့ရမလား ! ဒီထဲက ကလေးအဖေကဘယ်သူဆိုတာကိုသိမှ သူ့ကိုအကျိုးအကြောင်းပြောပြပြီး တာဝန်ယူခိုင်းရမှာပေါ့။ နင် မသိဘူးဆိုတာဖြစ်နိုင်တဲ့ စကားလား။ ပြောလေ "
" ဆေးခတ်လိုက်တာလို့ ငါပြောပြီးသားပဲ "
" ဟုတ်ပြီ ဒါဆို ရဲကိုတိုင်ရမှာပေါ့။ ရဲကိုတိုင်ပြီး သူလုပ်ခဲ့တဲ့ အပြစ်ကိုသူတာဝန်ယူရမှာပေါ့။ အဲ့တော့ အဲ့ဒီ့ဆေးခတ်မခံရခင် နင် ဘယ်သူနဲ့ရှိနေခဲ့လဲ "
မထုံတက်တေးလုပ်နေသည့် မူယာကြွယ့်ကိုကြည့်ရင်း ကျွန်တော် စိတ်တိုလာမိသည်။ ဒီလိုအခြေအနေတွင် သိလိုက်ရသည့် အဖြစ်တစ်ခုအတွက် ခေါင်းလည်းရှုပ်သွားသလို ငယ်သူငယ်ချင်းဖြစ်နေခဲ့သည့် မိန်းကလေးတစ်ယောက်တွင် ဤကဲ့သို့ကိစ္စမျိုးရှိနေခဲ့သည့်အခါ ကျွန်တော် ဘာကိုမှရေရေရာရာ မစဉ်းစားတတ်တော့ပေ။ ဒေါသထွက်တာရော ၊ ဘာဆက်လုပ်ရမလဲ မသိတာရောပါပေါင်းပြီး ရူးသာသွားချင်တော့သည်။
YOU ARE READING
မှန်လေးတစ်ချပ် ခြားထားသလို
General Fictionနှစ်ရှည်ကြာစွာ ဆက်၍ရေးချင်မိတဲ့ ပန်းချီကားငယ်... အဆုံးမသတ်ချင်မိတဲ့ ဒိုင်ယာရီတစ်ပုဒ်... ဖြတ်မျဉ်းနှစ်ကြောင်းရဲ့ အညိုရောင်မျှော်လင့်ချက်လေး... နောက်ပြီး အမျိုးသားနှစ်ဦးကြားက ကာဆီးထားတဲ့ မှန်လေးတစ်ချပ်... ဒီလိုနဲ့ပဲ နီးနေရင်းကနေ ဆွေး... - Yoon Yeik -
