( Unicode )
အသက်ရှူကြပ်လာချိန်မှ ခွာလိုက်သော နှုတ်ခမ်းနှစ်စုံဟာ အနည်းငယ်မောဟိုက်နေခဲ့သည်။ နဖူးချင်းထိကပ်ရင်း နှစ်ယောက်စလုံး ပြိုင်တူရယ်ချမိသည်။ ဘယ်နိယာမကိုမှဂရုမစိုက်ဘဲ စိတ်တွေကို လွှတ်ပေးလိုက်တာက အလွယ်တကူရရှိနိုင်တဲ့ နိဗ္ဗာန်ဘုံတစ်ခုပဲမဟုတ်လား။
နယ်ကျွံလက်စနဲ့ ကျွန်တော်တို့ နည်းနည်းပိုပြီး ရူးမိုက်ကြည့်ကြမလား ကိုကို။
" ဒီတစ်ညနေလောက်ပဲ ကျွန်တော့်အနားမှာ နေပေးလို့ရမလား "
ပြုံးပြလိုက်သော ကိုကို့အပြုံးသည် မြူမှိုင်းအတွက် ကမ္ဘာကြီးတစ်ခုလုံးအပိုင်စားရလိုက်သလိုအထိ ခံစားမိခဲ့စေသည်။ သုံးနှစ်ကျော် လေးနှစ်အတွင်း ပထမဆုံးအကြိမ်အဖြစ်နဲ့ ချစ်ရသူကိုမျက်လုံးချင်းဆုံကြည့်ရင်း စိတ်လိုလက်ရပြုံးဖြစ်တဲ့ချိန်ပဲ။ ဒီလိုနဲ့ ကျွန်တော်ဟာ ရုန်းလေနစ်လေ။
" တီ တီ တီ "
အင်္ကျီအိတ်ကပ်ထဲက မြူမှိုင်း၏ ဖုန်းသံမြည်လာခဲ့သည်။ ထုတ်ကြည့်မိသောအခါ မိုးဦးဆီကဖြစ်သည်။
" ဟယ်လို "
မိုးဦးရုံသည် တစ်ဖက်ကဖုန်းဖြေသံကိုကြားကာမှ စိတ်အေးမိသွားသလို သက်ပြင်းတစ်ချက်ချလိုက်သည်။ သူ့ဘေးတွင်တော့ မကေသွယ်နှင့် မမေမီ ၊ နောက်ပြီး ကိုထက်ပိုင်ရှိနေသည်။ မြူမှိုင်းတို့ E Bike ပါမလာတာကိုသိပြီးနောက် တမာပင်ရိပ်တစ်ခုတွင် စက်ရပ်ပြီး စောင့်နေကြခြင်းဖြစ်သည်။ ကိုသူရနှင့် မသဇင်တို့နှစ်ယောက်ကတော့ ဘယ်ကိုမောင်းလို့မောင်းသွားမှန်းပင်မသိ။
" ငါ တစ်ညနေလောက် ကိုကို့ကိုခေါ်ထားချင်လို့ "
ဆက်ပြောလာသောစကားသံကိုကြားသောအခါ အနည်းငယ်ပြုံးမိသည်။ ဘာမှထွေထွေထူးထူးဆက်မပြောဖြစ်တော့ဘဲ အရမ်းနောက်မကျဖို့သာမှာလိုက်ပြီးနောက် ဖုန်းချလိုက်သည်။ မကေသွယ်တို့ကိုပြန်ကြည့်မိတော့ မိုးဦးကိုခပ်ပြုံးပြုံးကြည့်နေကြသဖြင့် ပြန်၍ပြုံးပြလိုက်ရတော့သည်။
" သူရတို့က မျှော်စင်ဘက်ရောက်သွားလို့ နေဝင်ချိန်ကိုအပေါ်တက်ပြီးစောင့်ကြည့်မယ်လို့ပြောတယ်။ အစ်မတို့ကော ဘယ်သွားကြမလဲ "
YOU ARE READING
မှန်လေးတစ်ချပ် ခြားထားသလို
General Fictionနှစ်ရှည်ကြာစွာ ဆက်၍ရေးချင်မိတဲ့ ပန်းချီကားငယ်... အဆုံးမသတ်ချင်မိတဲ့ ဒိုင်ယာရီတစ်ပုဒ်... ဖြတ်မျဉ်းနှစ်ကြောင်းရဲ့ အညိုရောင်မျှော်လင့်ချက်လေး... နောက်ပြီး အမျိုးသားနှစ်ဦးကြားက ကာဆီးထားတဲ့ မှန်လေးတစ်ချပ်... ဒီလိုနဲ့ပဲ နီးနေရင်းကနေ ဆွေး... - Yoon Yeik -
