( Unicode )
မြူမှိုင်းမောင်
ကျေးငှက်များ၏ တွန်ကြူးသံက ခပ်သာသာလွင့်ဝဲနေသည်။ ပြတင်းပေါက်မှတစ်ဆင့် ဝင်ရောက်လာသော နေခြည်နွေးနွေးသည် သူ့အား ထပ်၍အိပ်မရအောင် ပြုလုပ်နေသည်။ ထိုပြတင်းကနေ ထပ်မံတိုက်ခတ်လာသော လေနုအေးတို့ဟာလည်း ကြက်သီးဖြန်းဖြန်းထစေသည်။ မျက်လုံးတို့ကိုမဖွင့်သေးဘဲ လေကို အရင်ရှူရှိုက်လိုက်ချိန်မှာ တစ်နေ့တာအတွက် အားတွေအပြည့်ရလိုက်သလို ခံစားရသည်။ အပူပိုင်းဒေသ၏ ဆောင်းမနက်ခင်းဟာ ဒီလိုပဲ မနိုးထချင်လောက်အောင် မက်မောဖို့ ကောင်းတာလား။
" ဟေ့ကောင်ရေ ထတော့ဟေ့ ဧည့်သည်တွေက ရှစ်နာရီခွဲရောက်မှာ။ အခုပဲ ခုနစ်နာရီထိုးနေပြီ ။ ထတော့ ထတော့ "
အထပ်သားကာထားသော အခန်းငယ်ထဲကနေ အပြင်ကအော်သံကို ကောင်းကောင်းကြားရသည်။ မြူမှိုင်းသည် မျက်လုံးတို့ကို အားယူဖွင့်လိုက်ရင်း ပြုံးကာ အပျင်းကြောဆန့်လိုက်သည်။ ရှည်လွန်းသော အရပ်ကြောင့် အောက်က အထပ်သားနံရံနဲ့ ပွတ်ဆွဲမိလေသည့်အခါ လျင်မြန်စွာ ခြေထောက်ကို ရုတ်လိုက်ရသေးသည်။ ပြီးမှ ကိုယ့်ကိုယ်ကိုယ် သဘောကျရင်း ထပ်ရယ်မိသေးသည်။
" မြူမှိုင်းမောင် ဟေ့ကောင် "
" အေး ထပြီ ထပြီဟ "
အပြင်မှ သူငယ်ချင်းဖြစ်သူ မိုးဦးရုံအား အထဲကနေ ပြန်၍ အသံပေးလိုက်ရသည်။ မဟုတ်ရင် ဒီကောင်က အခန်းထဲကမထွက်မချင်းအော်နေတော့မှာ။ အိပ်ရာထဲ ထိုင်နေရာမှထကာ မြူမှိုင်းလုပ်စရာရှိသည့် တစ်နေ့တာအလုပ်များကို စလုပ်ရတော့သည်။ မျက်နှာသစ် ၊ သွားတိုက်ခြင်းကို ထရံကာအိမ်လေး၏ အနောက်ဘက်က ရေသိုလှောင်ထားသည့် စဉ့်အိုးကြီးသုံးလုံးစီချထားရာနေရာတွင် ပြုလုပ်ရသည်။ မင်းနန်သူရွာသူရွာသားများကတော့ မြင်းလှည်းထွက်သူကထွက် ၊ ဆိတ်ကျောင်းသူကကျောင်းဖြင့် လုပ်ငန်းခွင်ကို စနေကြလိမ့်မည်ထင်သည်။ အိမ်၏ အနောက်ဘက်တွင် လူနေအိမ်မရှိတော့ဘဲ အရိပ်ရအပင်ကြီးများကြားထဲကနေ အုတ်နီနီဘုရားများကိုသာ ခပ်ပြပြတွေ့ရတော့တာမို့ အခုလို မနက်ခင်းဆို လေအေးများဝင်ကာ အသဲခိုက်အောင်အေးလေသည်။
YOU ARE READING
မှန်လေးတစ်ချပ် ခြားထားသလို
Fiksi Umumနှစ်ရှည်ကြာစွာ ဆက်၍ရေးချင်မိတဲ့ ပန်းချီကားငယ်... အဆုံးမသတ်ချင်မိတဲ့ ဒိုင်ယာရီတစ်ပုဒ်... ဖြတ်မျဉ်းနှစ်ကြောင်းရဲ့ အညိုရောင်မျှော်လင့်ချက်လေး... နောက်ပြီး အမျိုးသားနှစ်ဦးကြားက ကာဆီးထားတဲ့ မှန်လေးတစ်ချပ်... ဒီလိုနဲ့ပဲ နီးနေရင်းကနေ ဆွေး... - Yoon Yeik -
