بنوتات بس طلب صغنوني 🙈
اغلبكم من يعلق يكمل البارت ويعلق آخر شي وتبقى الفقرات فارغة وهالشي ما حبيتة
ممكن تعليقاتكم تكون بين الفقرات أثناء ما تقرون بالبارت إذا ما تصير زحمة 🙈♥️
▬▬▬▬▬▬▬▬▬
أغلال من نار ⛓️🔥
بقلمي : زهراء الموسوي 💎
لا أُحلل نقل الرواية على اي موقع من مواقع التواصل الأجتماعي
▬▬▬▬▬▬▬▬▬▬▬▬▬
"قوت "
مقرفصة روحي بالطرمة واجلف بالزوالي حتىٰ اتحضر من هسة للشتا
الشتا ع الابواب نسمات الهوا الباردة بدت تنسم علينة وبدت روحي تتكئب وية جيتة من اني وصغيرة اكتئب من الشتا واجوائة خصوصاً بليل
اجلف وارجع ليورة فحطت بس ضليت مستمرة قاطعني صوت حوراء القلق :
- عوفيها عوفيها امداج ليش ما گلتيلي راح تطلعيها طول عمرج خوينسة ديلا باللّٰه
ابتسمت اباوعلها :
- ديلا هسة شمسوية هو بيت اهلي ماكو فرق
تباوعلي مبتسمة تريد تسولف بس مترددة
قوت : صاير شي
توسعت ابتسامتها ونطقت :
- اي
قوت : شكو
حوراء : يعني يمكن يمكن مو اكيد اني حامل
فتحت عيوني بصدمة وگلبي يدك قوي فرحانة
قوت : صدك عود
حوراء : اي
گمت امسح ايدي بالدشداشة وتقربت وگفت گبالها :
- شلون مو متأكدة غير تتأكدين
حوراء : علي گال بليل نروح نحلل بالمختبر اللي براس الشارع يگول يضلون للعشرة
غورگت عيوني :
- شايفة إذا طلعتي حامل بعد گشاية ما تشيلين من الگاع لحد ما يجي ولي العهد ما مصدگة عود صدك يصير عدنة نونو يملي علينة البيت
حوراء: چا شلون قابل وحد بعدين ماكو هاي السوالف واللّٰه ما تشتغلين اني نذرت بس اخذ علاوي اشيلكم شيل بعيوني وادللكم وأبد ما اقصر
قوت : شلچ به الحچي شمزوجة سلطان سليمان هو علاوي
ضحكت وگالت :
- يمة هذا الروح والرية وانتِ هم روحي احبچ لأن صديقة طفولتي ولأن من ريحة الغالي ابد ما أتحسس منج اني
ابتسمت بهدوء على برائتها تحجي من كل عقلها وهذا واني چنت دائماً اضوجها واحاول أقلل منها .. عفتها ورجعت اغسل بالزولية ابتسامتي على وجهي افكر إذا يجينة نونو واصير عمة
أنت تقرأ
أغلال من نار
Romanceأظن ها قد حان الأوان لتشتعل النيران وتحرقنا رُبما علينا الآن أن نتهيأ للأغلال لِتُقيدنا باللّٰهِ عليكم يا أهل الأرض ألا تعترفوا بالغُفران ؟ ألم يكفي ما عانينا ! أنتَّ الذي جئتَ حبيباً لي هيا دعني وشأني لِماذا لم تُخبرني إنك ستصبح غُلاً لي إن...
