أغلال من نار ⛓️🔥
بقلمي : زهراء الموسوي 💎
لا أُحلل نقل الرواية على اي موقع من مواقع التواصل الأجتماعي
▬▬▬▬▬▬▬▬▬▬▬▬▬
قمراء
كعدت من نومي اتقلب بأنزعاج اسمع اصوات برة ،، شنو اجونة خطار
كمت كعدت على حيلي استحي اطلع
ما مغسلة وجهي ،، جريت بطل المي غسلتة ع السريع وكمت لفيت الشال وطلعت
اول ما طلعت من الغرفة تفاجأت برائف موجود
هذا شجابة هنا
وشذكرة بينة !
ابتسملي وكال :
- شلونج قمورة ، انشاللّٰه زينة
دنكت بخجل وكتلة :
- هلو رائف شلونك ، اني الحمدلله زينة
رائف :
- انشاللّٰه دومج زينة ، تعالي تفضلي ليش واكفة
قمراء : ها ، اي هسة
عفتة رحت اغسل ع المغسلة بالمي والصابون ،، بعدها جريت الكلينس اطبطب على بشرتي امسح المي وآثارة
ما متعودة انشف بخاولي ، الكلينس افضل للبشرة
رجعت عدلت شالي ورحت ناحيتهم
ابتسمت عمة اللي توها حطت صينية الچاي والبيتيفور
بلقيس : تعالي ماماتي هذا رائف جابلنة بيتيفور انتِ تحبي
تقربت كعدت بصفها ورائف كبالنة ، خنست فد خنسة
طبيعتي ما آخذ ع الشخص بسرعة واجتماعية بس وية الشخص اللي ارتاحلة ، خصوصاً الزلم ما اعرف اختلط بأي واحد بيهم بس عمار وغالب احسهم اهلي وطبيعي متعودة عليهم
ضل يسولف ويشاقة وية عمة واني مستغربة جيتة اول مرة يسويها هو أصلاً ما يقرب شي العمة ، هيَّ مجرد خالة حفصة اختة ، علاقتة زينة بس بأُم عمار بس عمة بلقيس !
اول مرة انتبه
بس عمة طبيعتها اجتماعية وية الكل ماكو فرق لذلك جانت كلش منطلقة بالكلام وياه
رائف : شطلعتي بنصف السنة قمراء
انتشلني من صفنتي سؤالة رفعت راسي اجاوبة بجمود :
- ناجحة
ابتسم وجاوب :
- ها ، شلونها درجاتج
قمراء : كلة ثمانينات بس الإسلامية والاحياء بالتسعين
رائف : ها عفية سباعية ، بس لازم تشدين حيلج اكثر على اخير السنة حتى تطلعين طبية
قمراء: اي انشاللّٰه
ابتسم وحاول يتكلم بلطافة عبالك يسأل طفلة :
- شنو ببالج تطلعين
صفنت ثواني وبعدها جاوبت بكل عفوية وما زال الجمود مسيطر علية :
- عمار يريدني اطلع طبية واني واعدتة من زمان به الشي
أنت تقرأ
أغلال من نار
Romanceأظن ها قد حان الأوان لتشتعل النيران وتحرقنا رُبما علينا الآن أن نتهيأ للأغلال لِتُقيدنا باللّٰهِ عليكم يا أهل الأرض ألا تعترفوا بالغُفران ؟ ألم يكفي ما عانينا ! أنتَّ الذي جئتَ حبيباً لي هيا دعني وشأني لِماذا لم تُخبرني إنك ستصبح غُلاً لي إن...
