ဖြတ်လျှောက်မင်းသားလေးက မုန့်ဖုတ်သမားလေးပဲ ဖြစ်ချင်ရုံပါ (Completed)

2- မင်းရနံ့လေးက မွှေးနေတာပဲ

ဆံပင်အဝါရောင်လေးနဲ့ ဖန်းချောင်ဆိုသူဟာ ဟိုတယ်ကိုအပြေးလေးလာခဲ့သည်။ အခန်းတစ်ခုကိုယူလိုက်ပြီး ထိုအခန်းနံပါတ်အား လုယန့်ကျိုး၏လက်ထောက်အား လှမ်းပို့လိုက်ပြီး အဲ့ဒီနောက်မှာတော့ သူဟာရေချိုးခန်းထဲမှာ ရေဝင်ချိုးလိုက်သည်။

လုပ်ရိုးလုပ်စဥ်တွေကို ရင်းနှီးနေတာကြောင့် တစ်ခါတည်းနဲ့ ပြင်ဆင်စရာရှိတာများကို ပြင်ဆင်လိုက်နိုင်သည်။

ရေချိုးခန်းဟာ ပဲ့တင်သံကိုပြန်ကြားနိုင်လောက်သည်အထိအသံလုံစနစ်ကတအားကောင်းတာကြောင့် ရေချိုးနေစဥ်အတွင်းမှာ ဖန်းချောင် သီချင်းမဆိုဘဲမနေနိုင်ခဲ့။

သူ့မှာ အသံကောင်းရှိတဲ့အပြင်ကို သူက ခေတ်လွန်တဲ့ အဖွဲ့တစ်ဖွဲ့မှာ ဦးဆောင်အဆိုရှင်တစ်ဦးတောင်ဖြစ်ခဲ့သေးပါ၏။

နည်းလမ်းကျကျပြောရမယ်ဆိုရင်တော့ ခေတ်လွန်အဖွဲ့လို့တောင်မပြောနိုင်လောက်အောင် သူ့အဖွဲ့က လုံးဝလူသိများကျော်ကြားခဲ့ခြင်းမရှိခဲ့။
ပိုပြီး နည်းလမ်းကျကျပြောရရင်တော့ သူတစ်​ယောက်ပဲမအောင်မြင်ခဲ့တာဖြစ်သည်။
အဖွဲ့ဝင်ငါးယောက်ရှိတဲ့ဤအဖွဲ့မှာ တစ်ယောက်ကအဖွဲ့ကထွက်ပြီးနောက်မှာပဲ တစ်ကိုယ်တော်အခွေနှစ်ချပ်ထုတ်ခဲ့ပြီး နှစ်ယောက်ကတော့ သရုပ်ဆောင်မင်းသားလမ်းကြောင်းပေါ်ကို​ပြောင်းလဲလျှောက်လမ်းခဲ့ကြပြီး နောက်ဆုံးတစ်ယောက်ကတော့ ရသစုံအစီအစဥ်ရှိုးတစ်ခုမှာ ပင်တိုင်တင်ဆက်သူအဖြစ်နဲ့ အတော်လေးကိုပင် အောင်မြင်နေလေပြီ။

ဖန်းချောင်အနေနဲ့ကတော့ လွန်ခဲ့တဲ့နှစ်လလောက်က ဖြတ်လျှောက်သာသာအနေနဲ့ရိုက်ခဲ့ပြီးနောက်မှာတော့ အခုထိဘာအလုပ်မှရှိမနေသေး။
ဒါပေမယ့် သူကဒါအတွက်စိတ်ပူပန်တာမျိုးရှိမနေဘူး။ ဘယ်လိုဖြစ်ဖြစ် သူ့မှာ စပွန်ဆာရှိနေတာမလို့ အချိန်တစ်ခုအထိကတော့ ဝမ်းစာရေးနဲ့ပတ်သတ်ပြီး တွေးပူစရာမလိုပေ။

သူ့ရဲ့ Sugar Daddyအကြောင်းပြောရမယ်ဆိုရင် သူ့ကိုမတွေ့ရတာ နှစ်လကျော်ကြာပြီဖြစ်သည်။
ကြားရတဲ့သတင်းများအရဆို သူ့ရဲ့Sugar Daddyဆိုသူမှာက မရေမတွက်နိုင်တဲ့အချစ်တော်ပေါင်းမြောက်များစွာရှိနေတာလေ။
ဒီလို သူ့ရဲ့ ပြည့်ကျပ်နေတဲ့ ဇယားတွေထဲမှာ ဖန်းချောင်ကိုခေါ်တာနဲ့တင် ဂုဏ်ယူစရာကောင်းနေပြီမဟုတ်ဘူးလား။