لؤلؤه لغواص واحد

الفصل الثلاثون

و عسى أن تكرهوا شيئا و هو خير لكم 💙

أنهى صلاته و التى أصبح مداوما عليها منذ ذلك اليوم الذى تحدث فيه مع حفصه .. لقد عاد كما كان فى السابق و لكن مع اختلاف بسيط .. نعم هو يمزح و يضحك و لكن قلبه من الداخل يصرخ من الألم يشعر بأنه يمثل السعاده و الغبطه و لا يزال يمثل على أمل أن يتحول ذلك التمثيل إلى واقع
أما بالنسبه للعمل فقد كوّن صداقات عديده و أصبح يحب عمله او على الأقل تقبّله و كان ذلك بسبب أنه شاهد على قناه الأخبار أن هناك حادث قد صار على ذلك الطريق الذى أعتاد أن يسير فيه حتى يصل إلى الشركه التى كان يعمل بها سابقا .. و كلما تخيل أنه كان من الممكن أن يكون من ضحايا ذلك الحادث يرتجف جسده و تتحرك شفتاه بجمله واحده : ( الحمد لله )
فقد يمنع الله عنك سوء الاقدار على هيئه ضيف مفاجئ أو مرض فى الجسم أو تأخر فى الاستيقاظ .. فلو فتح الله لنا الغيب لسجدنا شكرا على أمور حجبها الله عنا
مؤمن : مصعااااب .. انت ياض يا مصعب

مصعب : نعمين يا سى مؤمن

مؤمن : اعملى كبايه شاى

مصعب : ليه شايفني الفلبينيه اللى جايبهالك الحاج الله يرحمه

مؤمن باستفزاز : آه .. أنا أخوك الكبير

مصعب : الحوار ده يا غالى تعمله على حفصه مش عليا انا .. انا راجل زيى زيك يابا

مؤمن : تصدق صح .. اعمل إيه بقى ست الكل راحت تقعد مع حفصه و الواحد نفسه فى كبايه شاى

مصعب : تيجى ننزل نشربها على كافيه

مؤمن : ابعدنى عن الأماكن الغاليه دى الله يسترك .. انا داخل فى جمعيات و الحاله ضنك .. يلا أهو كله يهون عشان الواحد يتجوز و يتلم و ميتحوجش لأشكالك

مصعب : الله يسامحك .. على العموم هعزمك انا يا سيدى

*****

و فى ذلك فليتنافس المتنافسون 💙

علىّ : اللهم بارك يا ابنى .. غلطاتك قليله جدا رغم إنى سألتك فى المتشابهات زى ما خديجه طلبت

آدم : ما انا كنت محضر نفسى كويس من ساعه ما عرفت من أختى إن حضرتك هتسألنى فى سوره البقره كامله قبل ما أقعد مع العروسه و إن شاء الله لو كان فى نصيب نتفق على ميعاد الخطوبه و نشترى الشبكه

علىّ : إن شاء الله .. انا هقوم بقى و اسيبكم تتكلموا شويه

خرج علىّ عن المكان و ترك آدم جالسا و كانت خديجه تجلس فى الجهه المقابله له

آدم : عامله إيه .. انا حفظت أهو سوره البقره كامله و نفذت طلبك .. عندك طلبات تانيه

خديجه : ربنا يجعله حجه ليك يا رب .. قبل ما اتكلم انا عاوزه اعرف لو انت اللى عندك طلبات

آدم : بصراحه انا جاى و مش طالب اكتر من زوجه صالحه و أم تكون قدوه لأولادى و كل المواصفات دى منطبقه عليكى .. لكن فى نقطة حابب اتكلم فيها .. انا شقتى فوق شقه والدتي و انا حابب اننا منكنش معزولين عن أمى أوى لأن مبقاش ليها غيرى بعد جواز آسيا