لؤلؤه لغواص واحد

الفصل الرابع و الثلاثون

لا تقنطوا من رحمه الله 💙

ليليان : انا ساعات بحس بالذنب من اللى بعمله و ساعات بحس أن اللى بعمله صح مش غلط و حاولت كتير اعمل بلوك أو اغير رقمى بس كل ما اوصل عند التنفيذ بحس نفسى مش قادره و كأن فيه حاجه بتمسك إيدى و بتوقفنى .. اعمل إيه أنا حاسه نفسى تايهه و ضايعه و مش عارفه طريقى اللى ماشيه فيه ده موديني على فين

نور : ليليان ! انتى بتكتبى فى إيه

ليليان و هى تغلق المذكرات : هه لأ مفيش حاجه .. انا بس بكتب شويه معلومات هتفيدنى فى الترم التانى إن شاء الله

نور بشك : ماشى .. تعالى يلا عشان تاكلى

ليليان : أوك اسبقينى و انا جايه وراكى

*****

أفلا يتدبرون القرآن 💙

آدم : أنا افتكرت إنى أول ما هخلص حفظ سوره البقره خلاص الدنيا هتبقى حلوه .. انتى منبهتنيش ليه أن ده هيحصلى

آسيا : قولت اسيبك تكتشف بنفسك

آدم : يعنى مصعبتش عليكى و انتى شايفانى قبل ما أقعد معاها لازم اسمع لأبوها الحفظ الجديد .. ده انا قربت أخلص نص سوره آل عمران .. انا كمان شويه هقولها يا أبله خديجه من كتر ما انا حاسس إنى رايح معهد تحفيظ قرآن .. ما ده مش شكل واحد رايح يقابل خطيبته خالص

آسيا : ده اللى موجود يا آدم .. و خد الكبيره بقى .. انتو مش هتتجوزوا غير لما تختم القرآن

آدم : إيه .. يا شماته أبله فازه فيا ..دى عين محمد أنا عارف ..الله يسامحك يا محمد .. بصلى فى الجوازه و أديه هيشمت فيا كمان

أنس : اسكت يا عم مش كفايه أنها قبلت بيك

آدم : بلاش أنت تتكلم عشان أختى معملتش فيك حاجه من دى

أنس : نحن نختلف عن الآخرين برضو

آسيا : ألا قولى يا أنس انت حافظ إيه فى القرآن

آدم : البس يا معلم

أنس : احم و إيه لزمته الإحراج بس

آسيا : قول هو سر يعنى

أنس : ٤ أجزاء

آسيا : أوك عندك امتحان على أول جزء و لو فشلت هتنام فى الصاله

آدم : هههههه

*****

و مهلهم قليلا 💙

مريم : أيوه بقى .. انتى كده قمر .. بلاش تعقيد و قرف

ألاء : أنا مش مرتاحه يا مريم .. هاتيلى الطرحه البسها مش هعرف اخرج كده

مريم : لأ طرحه إيه .. انسيها النهارده خالص .. انتى أحلى بشعرك

ألاء : بجد مش هقدر أخرج كده يا مريم