عَـجلِـة الـبَـخـتْ

الفصل السابع عشر |ثُـنـائـي القُـطـبْ|

" لقد كانت فترة سيئة .. لكني حاولت تجاوزها، كنت أظن ذلك ..
ولكن اتضح أن الشيء الذي تظن أنك تجاوزته .. عاد ليدق بابك مرة آخرى "

*
*
*
لم تنقضِ الجلسة بينهما بل مازالت قائمة واتخذت منعطفًا آخر غير اللهو والإستمتاع ..
فلها الآن قرابة الربع ساعة تسرد له حكايتها وكيف بدأت معاناتها ..

دعني أُذَكِرَكْ قارئي العزيز .. فآخر حوار دار بينهما حينما اعترفت بمرضها النفسي ثنائي القطب وجال الاهتمام على ملامحه وظل راكزًا طوال ثرثرتها ..

_ لما كان عندي ١١ سنة بدأت أعراض الإكتئاب تظهر فيا .. محدش اهتم ولا اخد باله اعتبروا إن دي حالة عادية بتيجي للبنت في وقت بلوغها وضيف على ده كمان طلاق أبويا وأمي وفراقهم عني فكان حوار الاكتئاب ده عادي يعني مش حاجة غريبة

قطعت حكيها بضحكة مضيفة بسخرية خافتة :
_ زمان برضو مكنوش بيهتموا بالاكتئاب والأمراض النفسية
تعمقت بنفَسِها ثم زفرته بهدوء وهي تتابع :
_ الإكتئاب قعد عندي فترة طويلة أوي يعني فضلت أجازة الصيف كلها بعيط كل ليلة منعزلة ومش عايزة اقوم من على السرير أو اخرج من أوضتي .. بعدين جات لي الحالة التانية نوبة الهوس ودي عكس الحالة الأولى تمامًا دي مليانة حيوية ونشاط وبهجة، كنت ملونة أوي وشايفة الحياة بمنظور بيلمع
كلنا بعدها ارتاحنا وقولنا اه دي كانت فترة واهي عدت والكل ركز في حياته ومحدش اهتم بالموضوع بقى

صمتت لحظة ثم أردفت :
_ لحد ما في تالتة أعدادي المرض أظهر نفسه وبقى كل يوم مزاجي يتغير، شوية ابقى مكتئبة وبعيط وشايفة الدنيا وحشة وسودة وشوية ابقى مهيبرة وعندي طاقة تكفّي إني ابني عمارة في يومين .. وفضلت على هذا الحال لحد دلوقتي عندي تقلبات مزاجية كفيلة تخلي الواحد يتجنن منها .

ما إن أنهت لفظ آخر كلماتها حتى سألها :
_ عرفتي منين إنه ثنائي القطب ؟
أجابته ببساطة :
_ شوفت أعراضه على ويكيبيديا .

عقد حاجبيه باستغراب وقال :
_ مروحتيش لدكتور يشخّصك ؟
قالت :
_ جدتي مكنتش عايزة توديني .. كانت شايفة إنه عيب اروح لدكتور نفسي وسمعة وحشة على البنت .

تنهد بنفاذ صبر .. اه من الكِبار الذين لديهم عقيدة لا تنفك وإن سمق الزمان ..

_ وعشتي ازاي بيه ؟

تنهدت بإختناق .. فبرغم تسلسل الأعوام الماضية وإدراكها لحالتها المعقدة ولكنها لم تعتاد ..
فتاة مرحة تنقلب خلال دقيقتين لأشد أهل الأرض تعاسة .. كيف لها أن ترى أن هذا طبيعيّ ؟

الأمر كان صعبًا عليها ومازال كذلك .. ولكن أتدركون ما الأصعب بكثير ؟
حينما لا تفهم نفسك .. فما الأهون بوجهة نظرك، اللفحة من شعلة نارية أم الإحتراق في جحر جهنم ؟

_ قعدت ٣ سنين بقاوم الحالة دي واقنع دماغي إنها فترة مؤقتة .. بس الضغط كان كبير أوي على واحدة في سن ال ١٥ لحد ما استسلمت وروحت لدكتورة وأدتني دوا يتحكم شوية في النوبات اللي بتيجي لي .