عَـجلِـة الـبَـخـتْ

الفصل الخامس والثلاثون |خَـيـبـة أمــل|

" ببساطة هو النظر من خلال نفق له مخرج واحد وظنّت عيناك أنها ترى ضياءً في آخره، وظننته أنت ضوء الشمس ..

وعند الاقتراب بقلب انفطر من الحماس، تُصعَق بأنها لم تكن سوى نيران تسد المخرج الوحيد ..

هذه هي خيبة الأمل من وجهة نظري "

*
*
*

بالمكان المحبب في الصيف لأي شخص يعاني من الحرارة التي لا تُحتمَل والطقس الذي ينافس طقس خط الاستواء ..

الشُرفــــــــة ♡ ...

تجلس ليلة وجميلة على مقعدين متقابلين يتناولان المثلجات بتلذذ شديد وبداخلهما يتنهدان باستمتاع ..

خبّروني من مخترع المثلجات رجاءً، يستحق تمثال مُصنَّع من الفراولة والتوت البري ..

هل تصدقون أن أول من اكتشف هذه الحلوى اللذيذة هم المغول تحديدًا " جنكيز خان " وليس الإيطاليين كما يعتقد البعض ؟!
.
.

تطلعت جميلة لليلة وهي تتمتم بخفوت :
_ فكريني أحنا في شهر كام ؟

أجابتها ليلة :
_ أول سبعة .

هزت جميلة رأسها قائلة :
_ معقول برضو .. أومال في تمانية هيحصل ايه ؟ هتنزل كرات لهب علينا ؟؟

قالتها باستياء شديد وهي تتناول حلواها فخاطبتها ليلة بغتّة :
_ أنا خايفة أوي من العملية دي يا جميلة .

توقفت عن تناول المثلجات ونظرت لها باستفهام قائلة :
_ ليه يا ليلة ؟ ده أحنا ما صدقنا !!

تنهدت ليلة بغَم ووضعت كوبها على الطاولة ونطقت بما يشغل تفكيرها طوال الليالي الماضية :
_ معرفش مالي بجد مش عارفة أنا ليه خايفة كدة وليه أفكاري كلها سلبية !!

صمتت جميلة لحظات مُستمعة لها ثم قالت بخفوت :
_ خايفة من النتيجة مثلًا ؟ متخافيش الأعمار بيد الله وربنا كاتب لك الخير في أي حال .

تنهدت ليلة مرة آخرى وكأن معدن ثقيل على صدرها يمنعها من التنفس، فقالت :
_ مش قصدي .. أنا مش خايفة من الموت ده آخر حاجة بفكر فيها .

_ أومال خايفة من ايه ؟؟

لازمت ليلة الصمت وقتٍ قليل ثم أجابت :
_ أنا اتعودت على المرض، بقالي ٥ سنين بيه .. بدأ معايا وأنا في تانية جامعة لما اكتشفت إن عندي فشل كلوي لسة في مراحله الأولى .. وقعد كل يوم يزيد رغم جلسات الغسيل اللي كنت بعملها ٣ مرات في الأسبوع والتعب اللي كنت بحس بيه من صداع ودوخة، الأول مكنتش بستحمله ومكنتش راضية عن اللي بيحصل ..
قعدت فترة طويلة مكتئبة وبشتكي من اللي حصل لي .. لحد ما جه وقت كدة ولقيت نفسي فيه مستسلمة وراضية عن كل حاجة في حياتي

ارتسمت ابتسامة خافتة على شفتيها وهي تتابع :
_ في الفترة اللي حبيت يونس فيها .. حسيت إن الحياة قصيرة على إننا نشيل جوانا منها .. وقتها قولت لنفسي ما تعيشي عادي واستمتعي أنتِ كدة كدة هتموتي سواء بالمرض أو بأي حاجة ربنا كاتبها لك ..