တုနှိုင်းမဲ့ထန်မျိုးနွယ်

81.2.3.4.5.6

တုနှိုင်းမဲ့ထန်မျိုးနွယ် အပိုင်း(၈၁+၈၂) (၂၁*၃+၂၁*၄) စာစဉ်၆
" သိုင်းပညာ၀ိညာဥ်သုံးခုကို အတွင်းပိုင်းပေါင်းစပ်ခြင်း "
°°°
ဟို့ယွိဟောင်ကို ဒေါသထွက်နေဖို့အတွက် ၀မ်သုန့်မှာအချိန်မရှိပါဘူး။ သူတို့တွေ ပြဿနာတက်တော့မယ်ဆိုတာကို သိနေတဲ့အတွက် ဟို့ယွိဟောင်နဲ့အတူတူ ပြေးပါတော့တယ်။

သူတို့တွေ မနက်စာစားဖို့လဲ အချိန်မရခဲ့သလို ရေချိုးဖို့လဲ အချိန်မရခဲ့ပါဘူး။ အဲ့ဒီအစား သင်ကြားရေးနယ်မြေတွေဆီကိုသာ အမြန်ဆုံးပြေးပါတော့တယ်။ သူတို့တွေ ကျိုးယိရဲ့ အခြေအနေအကြောင်းကို ကောင်းကောင်းသိနေခဲ့တယ်။ ဒါ့ပြင် အတန်းချိန်ကို နောက်ကျတာက ကိုယ့်ကိုကိုယ် သတ်သေတာနဲ့အတူတူပါပဲ။

သူတို့ရဲ့ပုံစံတွေကတော့ အတော်လေးကို ဖရိုဖရဲဖြစ်နေခဲ့ပါတယ်။ ၀မ်သုန့်က အခြေအနေကောင်းနေသေးတယ်။အနည်းဆုံးတော့ သူက အ၀တ်အစားတွေကို မတွန့်ကြေအောင် ပြန်ပြီဆွဲဆန့်ခဲ့တဲ့သူပါ။ ဟို့ယွိဟောင်ကတော့ပိုပြီး အခြေအနေဆိုးနေခဲ့ပါတယ်။ သူ့ရဲ့ ကျောင်း၀တ်စုံက ဘောင်းဘီထဲမှာသွားပြီ ငြိနေခဲ့ပါတယ်။ ဆံပင်တွေရှုပ်ပွနေရုံတင်မက ကြယ်သီးနှစ်လုံးကလဲ ပြုတ်နေခဲ့သလို ရင်ဘတ်ကလဲပေါ်နေခဲ့ပါသေးတယ်။ သူပြေးနေတဲ့အချိန်မှာတော့ လေတိုက်တာကြောင့် အ၀တ်အစားတွေက ပိုလို့ ပွယောင်နေခဲ့ပါပြီ။

ဒါပေမယ့် အဲ့ဒါတွေကို စိုးရိမ်ဖို့အချိန်မရှိခဲ့ပါဘူး။ လက်ရှိအချိန်မှာ အားလုံးက ကျိုးယိရဲ့ဒေါသကို မဆွမိစေဖို့အတွက် အမြန်ဆုံးပြေးဖို့သာ လုပ်နေခဲ့ကြတာပါ။

တစ်မိနစ်အတွင်းမှာပဲ သူတို့ရဲ့ အတန်းနံပါတ်တစ်ရဲ့၀င်ပေါက်ကို ရောက်လာပါတော့တယ်။

" ၀င်ခွင့်ပြုပါ "

ဟို့ယွိဟောင်က အော်လိုက်ပါတယ်။

" ၀င်ခွင့်ပြုပါ "

၀မ်သုန့်ရဲ့အသံက သူ့ထက်တိုးနေခဲ့ပါတယ်။ သူက အားမရှိတော့တဲ့ပုံစံပါပဲ။ ဟို့ယွိဟောင်ကို ရှုပ်ထွေးတဲ့မျက်နှာထားနဲ့သာ ကြည့်နေခဲ့ပြီ ဟို့ယွိဟောင်ရဲ့နောက်ကျောကို လက်နဲ့ရိုက်ချပြစ်လိုက်ပါတယ်။