#مكتوبي
الجزء الثالث والخمسون 1||
بعنوان " نقطة ضعف "||
"أعلمُ تمامًا أن لدي القُدرة على ردّ الصاع صاعين، الكلمة بعشرة، على إطلاق كلمات طائشة تترك علامات داكنة في القلب كما يحدث معي، ولكنّي اختار - بملء إرادتي- التجاوز، اختار ألا أُوذي وهذه أنبل اختياراتي."
**************
فلاش باك >>
ليلة الحنه عند العروس
شفناها بس ح نديرو عوده زمنيه ليومين لورا
وتحديدًا "عرس صفيه وايوب "
والي نال انتقادات كبيرة على جميع المَستويات
اولاً لان ايوب مش متزوج من قبل ، وثانيا لاني صفيه مطلقه ، ثالثا انه في فتره قبل طلاقها قاعده في حوش خوه !!
ماحد شاف للموضوع على انه حوش اخت صفيه لا الكل شاف للزاوية الاخرى والخاطئة أكيد .
الفرح كان عائلي بالنسبه لهل العروس
اما هل العريس فكان الفرح كبير بكل
بينما كانت تمكيج ومشغوله على حنان قالو امس خشت العمليات
ومش عارفه شن صار معاها
خشت عليها غزالة ونوارة
نوارة مرات خالها : ها ياخالتى نوارة شن صار مع حنان
غزالة قالت مبتسمة : حنان سلمت وجابت بنيه لكن سبيعيه " في شهرها السابع "
بفرحه : الحمدلله الحمدلله هذا وين تريحت عليها
: ايو الاه الحمدلله زاد اختك قليلة عافيه كنت نخمم في جيبتها
: اهو ربي سهل الحمدلله
: الحمدلله
وبحتت في وجها لقت مكياج صفيه كله داكن والوان باهته رفعت حاحبها : العفو يا بنتي عليش حاطه هالالوان
صفيه : نحبهم
غزالة : لا لا غيريهم انتِ عروس حطي حاجه تنور وجك
تنهدت : غير شن بنحط بس
نوارة : اي حاجه لونها حيوي مش هكي ياصفيه عاد
غزالة : ايوه صدقت نوارة لازم تغيري يا صفيه
تنهدت : لا خلني هكي والله متريحه
بعدين ايوب ميحبش الالوان هكي افضل
نوارة : باهي غيري الالوان اقل شيء هنا ف حوش عيت جدك الليلة
معاش قدرت تعارض فعلاً غيرت الالوان وحطت الوان مبتهجه شويا
وليلة الحناء غير بذات عند عيت جد صفيه عندهم طقوس خاصه
