FAP : Min Lineage Throne

JUNG SSI 35

ညဟာ တဖြည်းဖြည်း နက်သည်ထက် နက်လာသည်။ အကျဥ်းထောင်ရှေ့တွင် ငြိမ်သက်စွာ လှဲလျောင်းနေသော ထယ်ယောင်း၏ ခန္ဓာကိုယ်မှာ နွေးထွေးခြင်း မရှိတော့ဘဲ အေးစက်စွာ အသက်မဲ့နေ၏။ ဟိုဆော့မှာ ထိုသွေးအိုင်နေသော မြင်ကွင်းကို ကြည့်ကာ မျက်ရည်မဆည်နိုင်...

" အကိုတော်... ကျွန်တော်တော့ မှားပြီထင်တယ်၊ ကျွန်တော်သာ အရင်ကတည်းက ထီးနန်းကို လက်လွှတ်လိုက်ရင် အခုလိုမျိုး အဖြစ်ဆိုးနဲ့ ကြုံမှာမဟုတ်ဘူး... အငယ်လေးရော၊ နမ်ဂျွန်းရော၊ မြို့စားမင်းပါ အသက်ရှင်နေဦးမှာ "

အကျဥ်းထောင်၏ သစ်သားတိုင်ကိုမှီရင်း ရှေ့တွင်ရှိနေသော အကိုတော့်ကို တိုင်တည်ကာ ယွန်းဂီနောင်တရမိသည်။ အကိုတော့်ကို ကြည့်ရတာ ပုံမှန်မဟုတ်၊ ဒီအခြေအနေကို မဟုတ်ဘဲ တခြားတစ်ခုကို စိတ်ပူကာ စဥ်းစားနေသလိုမျိုး ခန့်မှန်းရခက်အောင် ရုပ်တည်နေသည်။

" မင်းအပြစ်မဟုတ်ဘူး ယွန်းဂီ... မင်းက ထီးနန်းကို သူတို့လက်ထဲ မရောက်အောင် အတတ်နိုင်ဆုံး ကာကွယ်ခဲ့တာဘဲ... မင်းအပြစ် မဟုတ်ပါဘူး "

သို့ပေမယ့် အကိုတော်က ပြေရာပြေ​ကြောင်းနှင့် သူ့ကိုနှစ်သိမ့်၏။ သို့သော် ယွန်းဂီစိတ်မပြေနိုင်၊ ယနေ့ အပြစ်မဲ့စွာ တိုင်းပြည်အတွက် သေဆုံးသွားကြတဲ့ အသက်တွေ အတွက်တော့ အပြစ်တင်စရာ လူတစ်ယောက် လိုလိမ့်မည်။ ထိုလူကလည်း အိမ်ရှေ့စံဖြစ်သည့် သူသာ ဖြစ်လိမ့်မည်။

" ဟေ့! သတိထားကြ! လုပ်ကြံသူရှိနေတယ်! "

ထိုအချိန် အစောင့်ရဲမက်တစ်ဦး၏ အော်သံကြောင့် ထိုနေရာကို ယွန်းဂီတို့ လှည့်ကြည့်လိုက်ကြသည်။ အစောင့်တစ်ယောက်က မြားတန်းလန်းနှင့် လဲကျနေပြီး ကျန်တဲ့လူတွေက ထိုမြားပစ်လိုက်သည့်လူကို လိုက်ရှာနေကြသည်။ ထိုအခါမှ ဟွာလင်းမင်းသားမှာ စိတ်အေးသွားဟန် သက်ပြင်းချ၏။

ထို့နောက် ယွန်းဂီ ကြည့်နေရင်းမှာပင် အခြားသော အစောင့်တွေမှာလည်း ဆက်တိုက်ဆိုသလို ​မြားပစ်ခံရပြီး လဲကျကုန်သည်မှာ ထိုနေရာတွင် အကျဥ်းထောင်ထဲက သူတို့ဘဲ ရှိတော့သည်အထိ၊ ထိုအချိန်မှ မှောင်ရိပ်ကနေ အမဲဝတ်ထားပြီး မျက်နှာအုပ်ထားသော လူတစ်ယောက် ထွက်လာကာ...