يا الله يا معزه ما قادره أصدق ، أقرصيني ، أقرصيني عليك الله عشان أستوعب إنو دي حقيقه ما حلم ، أنا عايزا أطير من الفرح ، أخيراً حـ أعرس عمر ، أخيراً حـ أبقى مرتو ، وااااي ياخ يا معزه قادرهـ تستوعبي معاي إنو عمر حيكون لي !! لي براااي !؟😍
_ مها بطلي البتعملي فيهو دا !! افهمي إنو دا ما اسمو حب دا اسمو هوس و جنون !... سألتي نفسك عمر حـ يعمل فيك شنو لو عرف انك كذبتي عليهو عشان تصلي للعايزاه ؟؟ تبريرك حيكون شنو لمن يجي يقيف قدامك و يسألك عن الكذبه الكذبتيها و يواجهك بكل العملتيهو !؟
طبعاً لمن قالت لي كدا عكرت لي مزاجي ، قلت ليها ما حـ يعرف إلا لو انتِ مشيتي و كلمتيهو ، قالت لي عاجلاً أم آجلاً الحقيقه دي حـ تنكشف و انتِ عارفه كويس انك ما حـ تقدري تخفيها لفتره طويله و انتِ فاهمه أنا هنا قاصده شنو !.. قلبت عيوني و قلت ليها اففف ياخ ! اصلك لو ما عكرتي لي مزاجي ما بترتاحي ، ختيت الفستان الكنت شايلاهو على السرير و قلت ليها أنا كل البهمني إنو الزواج دا يتم ، و الحقيقه دي لو ظهرت حتظهر بعد العرس ، يمكن عمر يزعل يوم ، يومين أو اكتر بس بعدها حـ يتقبل الواقع ، لأنو ما حيقدر يغير شي بعد ما أبقى مرتو ، و بعدين الغايه تبرر الوسيله ... قلت كدا و إبتسمت بس إبتسامتي دي إتلاشت لمن معزه قالت لي كيف ما حـ يقدر يغير شي !؟ ناسيه إنو دا عمر !؟ أقل شي ممكن يعملو فيك إنو يطلقك بعد ما يعرف الحقيقه و يعرف عمايلك ، ساعتها موقفك حيكون شنو ؟؟ تبريرك حيكون شنو و الأهم حتكوني إستفيدتي شنو ؟؟
صدقيني عمر عااادي يحفر ليك و يدفنك حيه !
طبعاً غضبت غضب ما عادي ، غمضت عيوني و لمن فتحتهم قلت ليها معزه أطلعي برا ، قالت لي مها أنا بس عايزا مصلحتك لأنو.... قاطعتها و قلت ليها أطلعي براااا ما عايزا أكرر الجمله دي تاني !... بقت تعاين لي بـ يأس شديد ، مسكتها من يدها و طلعتها من الغرفه و قفلت الباب ، أخدت نفس عميق و إتخلصت من كل الأفكار السلبيه و اتناسيت كل القالتو معزه ، شلت الفستان و مشيت وقفت بيهو قدام المرايه و قعدت أتخيل في يوم بكرا ، يلي هو يوم عقدي أنا و أكتر انسان بحبو في الدنيا دي ، سرحت بعيد بخيالي و أنا مبتسمه ....
قبل ما أحكي ليكم بعدها الحصل شنو عايزا أقول ليكم إنو
حياتنا عباره عن روايه فيها فصول كتيره ، كل واحد بطل حكايتو ، و الأكيد إنو كل قصصنا أو رواياتنا زي ما فيها أفراح فيها أتراح و زي ما فيها فوز كمان فيها خساره و زي ما فيها شده فيها رخاء و زي ما فيها مصائب و مصاعب فيها سهوله و يسر ، بس كيف نحنا نقتنع بالحاجه دي و كيف نتعلم من أغلاطنا و كيف نجاهد أنفسنا و نمشي في الطريق الصحيح ، و كيف نستفيد من كل تجربه أو درس بتعلمنا ليهو الحياة ، كل واحد فينا قصتو بتختلف عن التاني حتى و إن كان في تشابه كبير بين قصصنا إلا انها مختلفه ، قصة كل شخص بتبدا من أول ما يجي على الدنيا دي ، بس مرات بحصل موقف معين أو مجموعة مواقف معينه كدا بتخلي الواحد يقول إنو دي البدايه الفعليه لـ قصتي ....
