المهم في اليوم البعدو عمر ما طلع يشرب معانا الشاي ، عمتي قلقت عليهو و قالت عمر ما متعود ينوم للزمن دا ! مالو ياربي ! علاء قال ليها شفتو قبيل صحى بدري صلى الصبح و أظنو رجع نام تاني ، قالت كدي النمشي أشوفو ، طبعاً أنا عارفه و ساكته ، مع إني ما متعوده أدس حاجه زي دي من عمتي بس سكته عشان وعدت عمر ، فجأه هو جا طالع و كان شبه بمشي برجلو بطريقه كويسه ، ما عارفه هل هو ما كان حاسي بألم ولا كان بتظاهر إنو ماف ألم و أصلاً هو ليه ما عايز يكلم زول بالحادث ! قال لينا صباح الخير ، عمتي قالت ليهو صباح النور مالك اليوم قايم متأخر و.... عمرررر مالو وشك دا وارم كدا ! قال ليها امبارح من دون ما انتبه ضربت الباب ، قالت ليهو مالك يا ولدي بقيت ما بتشوف ، كدي تعال أقعد جنبي هنا خليني أشوف الضربه دي ، قال ليها لا لا ماف شي ضربه عاديه ما تشغلي بالك ، فاروق قال ليهو انت أمبارح اتأخرت وين ؟؟ قال ليهو كنت في النادي ، قال كدا و قعد و قال جيبوا لي الشااااي لأني مصدع شديد ، عاين لي و قال لي بعد شويه سايقك معاي السوق عشان تشتري مستلزماتك المدرسيه ، عمتي قالت ليهو والله امبارح كنت عايزا اقول ليك وديها السوق أو جيبهم ليها انت ، لكن خلي فاروق ولا علاء واحد فيهم يوديها ، انت شكلك عيان و حالتك دي ما عاجباني ، قال ليها لا لا أنا كويس و هسي باخد لي بندول و الصداع بروح.....
المهم جهزت نفسي و طلعت مع عمر ، لمن ركبنا قلت ليهو رجلك بقت كيف ؟؟ قال لي شوفة عينك بقت أحسن ، و كمان مشكوووره لأنك ما جبتي سيره لزول ، صراحة ما كنت واثق فيك لأنو خشمك خفيف بس طلعتي عكس توقعي ، قلت ليهو حقو بعد كلامك دا انزل و أمشي أكلم عمتي ، ضحك و قال لي لا لا خلاص ، المهم مشينا السوق و إشتريت كل مستلزماتي المدرسيه ، لمن رجعنا علاء قال لي ما خليتي حاجه في السوق ! فلستي بـ عمر ، قلت ليهو جا شكى ليك !؟ قال لي الأيام الفاتت ديك ارتحت من لئامتك و وجع الراس البتعمليهو لي ، فاروق قال ليهو كضاب والله ، كل دقيقتين بتجيب سيرتها و تقول لو كان مها قاعده كانت حتقول كدا أو تعمل كدا ، قلت ليهو أصلاً أنا غيابي عن البيت بفرق لأني و زي ما بتقول عمتي شمعة البيت دا ، علاء ضحك و قال لي الشمعه بتحرق نفسها عشان تضوي لغيرها بس انتي بتحرقي غيرك عشان تضوي لنفسك ! قلت ليهو عليك الله أنا ما فاضيه لكلامك الخارم بارم دا ، قال لي لمن يغلبك الرد بتقولي كلامي خارم بارم ! فاروق قال لي هو عايز ليهو فرصه بس عشان يتناقر معاك ، لمن مشيتي مع أمك فرقتي معاهو و ما لقى ليهو زول يتجادل معاهو ، عمتي قالت ليهو مها و علاء ديل عاملين زي توم و جيري اليوم كلو شكل و مناقره ، أنا عايزاكم يوم وااحد بس تتفقوا و تقعدوا بهدوء ، عمر قال ليها بت أخوك شليقه و لسانها طويل ، علاء قال ليهو مش عليك الله ! إتلفت على عمر و قلت ليهو و انت ما شايف علاء الحقار دا ! بس كلكم عندكم مشكله معاي ، اصبروا لي بس ، نشوف منو الحـيكوي ليكم تاني ، قلت كدا و إتحركت من جنبهم بس وقفت لمن عمر ناداني ، لمن إتلفت عليهو قال لي اتصل ليك على أمك تجي تسوقك ولا بتمشي براك ؟!... طبعاً قعدوا يضحكوا علي ضحك ، دخلت جوه و خليتهم ...
المهم اليوم البعدو كان يوم الأحد ، أول يوم دراسي لي ، وصلني عمر المدرسه ، لمن نزلت قال لي يوم دراسي موفق ، و حاجه تانيه ، البت ديك الله يرضى عليك يا مها خليك بعيده منها لأنها ما شبهك ، قلت ليهو عمر انت مالك معاها ، قال لي البت دي ما راكبه لي في راسي و أنا شاكي إنو عنادك و لئامتك الظهرت في الفتره الاخيره دي اتعلمتيها منها ، قلت ليهو بري اتعلمتها منك انت دا ، ضحك و قال لي أنا لئيم ؟ قلت ليهو مراااات ، قال لي طيب ليه ما بتتعلمي مني إلا الحاجات الما كويسه ؟! قلت ليهو لأنك ما بتظهر لي إلا الحاجات الما كويسه !... عاين لي كدااا بعدها قال دا شنو الكلام العميق دا ، بتحيريني لمن تقولي كلام منطقي ، قلت ليهو ليه شايفني غبيه ولا ما عندي عقل ! قال لي مها امشي امشي عليك الله عشان ما تتأخري على مدرستك ، أول إتحركت كدا قلت واااي دا شنو دا !! طبعاً ياداب انتبهت إني لابسه الجزمه من دون رباط ! عمر كان حـ يتحرك بس لمن شافني واقفه نزل القزاز و قال لي في شنو ؟؟
قلت ليهو شوف جزمتي ! قال لي دا من الإستعجال ! قلت ليهو بسببك انت لأنك شغال لي لو ما طلعتي سريع حـ أمشي أخليك ، قال لي طيب هسي الحل شنو ! قلت ليهو رباط الجزمه معاي في الشنطه ، قلت لمن أركب العربيه حـ اربطهم و نسيتهم ، قال لي يا بشر ! طيب من قبيل مالك ، تعالي اركبي و أربطيهم ، ركبت ورا و طلعت الرباط من الشنطه ، قلت ليهو بالله شوفو طويل كيف ، ياخ بسببو حـ اتأخر ، مد يدو شال مني الرباط و قال لي مدي لي رجلك دي جاي ، بقى يربط لي في الجزمه و أنا أعاين ليهو ساااي لحد ما خلّص ، قال لي يلا اتفضلي انزلي ، أول ما نزلت و اتحركت قال لي دقيقه اتأكدي ما تكوني ناسيه قروشك كمان ! قلت ليهو لا لا ما نسيتهم ، دخل يدو في جيبو و طلع قروش و مداهم لي ، قلت ليهو عندي ما عايزاهم ، قال لي تمام و كان حـ يرجعهم بس استعجلت و قلت ليهو خلاص جيبهم ، قال لي هسي مش قلتي ما عايزاهم ، قلت ليهو غيرت رأيي ، البحر ما بيأبى الزياده ، ضحك و قال لي يلا يا طالبه على مدرستك ، ودعتو و مشيت دخلت المدرسه و انا مبسوطه ، طبعاً اليوم داك سهى ما جات عشان كدا حسيت نفسي وحيده في المدرسه ، ايوه انا عارفه إنو هي وحده تصرفاتها غلط و شخصيتها ما بتعجب ناس كتار و منهم عمر بس انا ما عندي صحبه غيرها ، هي أول وحده صاحبتها في سادس و هي الدائماً بتدافع عني في المدرسه و بتاخد لي حقي ، علاقتي بيها ليها 4 سنوات و داخله الخامسه ...
لمن رجعت البيت لقيت عمتي بتتونس مع خالتو إعتزاز ، سلمت عليهم و دخلت ، بدلت ملابسي و طلعت عشان أمشي المطبخ ، لمن سمعتهم ذكروا اسم عمر طوالي رجعت خطوات لـ ورا ، وقفت جنب باب المطبخ و بقيت اسمع كلامهم ، عمتي قالت ليها والله البت سمحه و ما فيها كلام يا إعتزاز و اتمنيتها تبقى لي مرت ولد بس الله ما أراد
_ يمكن لقدام يتفقوا ما معروف
= لا لا ما اظن ، عمر قال خلاص خلاها و قنع منها و هو لمن يقنع من حاجه ما بتلفت عليها تاني
_ هو ما قال ليك خلاها ليه !؟
= ما قال شي غير انو ما اتفق معاها ، والله قدر ما حنستو عشان يحكي لي ما حكى لي
_ يمكن حس انها ما جاده معاهو عشان كدا قنع منها
= جايز والله ، لكن ماااف أي مشكله بكرا بعرس ليهو الأحسن منها
_ والله أحسن ليهو بنات أهلو و بنات بلدو و ما شاء الله بنات أعمامو و عماتو راقدااات يأشر بس و يعرس
= بري والله ، أولادي كان يقعدوا عمرهم كلو من دون عرس ما بعرس ليهم من أهل أبوهم ، يوم النور دا قرر يعرس فيني نسوان أخوانو شجعنوا و فتشن ليهو العروس و جابنها ليهو و وقفن ليهو في عرسو ، دايراني بعد عمايلهن دي كلها أعرس بناتهن لـ أولادي !! بتحلمي والله
_ ههههه ، اها لو أولادك براااهم قالوا عايزين بنات أعمامهم حـ تسوي ليهم شنو ؟
= تفي من خشمك يختي ، والله ما أخليهم إلا يسمعوا كلامي
_ يعني نسوان أولادك كلهم حيكونوا غريبات ؟
= و ليه يكونوا غريبات ! بتي مها دي ما شايفاها !
