نمت و ما صحيت إلا على صوت خبيت على الباب ، نزلت من السرير و مشيت فتحت الباب ، طبعاً من شدة النعاس نسيت الحصل و نسيت إني زعلانه و ما مفروض افتح الباب! لمن عمتي قالت لي أرح اتسحري يااااداب جمعت ، كنت عايزا اقفل الباب بس قبل ما أعمل كدا عمتي مسكتني من يدي و طلعتني من الغرفه ، قالت لي لو زعلانه من عمر ليه بتعاقبي نفسك ؟ بطنك ذنبها شنو و أنا ذنبي شنو عشان ما تردي علي و ما تفتحي لي الباب !
سكت سااااي ، ساقتني من يدي للهول ، طبعاً عمر كان قاااعد خالف رجل على رجل و بحضر بمزاج ، عاين لي و رجع عاين للشاشه ، عمتي قعدتني جنبها و هي ماسكاني من يدي عشان ما أقوم و ارجع جوه ، قالت لي تاكلي ولا اأكلك ؟؟
فجأه كدا سمعنا صوت الجرس ، عمتي قالت أكيد ديل الكلاب ديلك ! عمر قال ليها حقو الزول ما يفتح ليهم و أخليهم يبيتوا في الشارع ... طبعاً قاصدين فاروق و علاء ، أصلاً دي بقت عادتهم ، أحياناً كتيره بطلعوا من بعد الإفطار و ما بجوا راجعين إلا مع زمن السحور و مرات بعد صلاة الصبح !
المهم عمر مشى فتح ليهم و جوا التلاته داخلين ، عمتي قالت ليهم بقيتوا مسحراتيه ولا شنو !؟
فاروق قال ليها شبه كدا ، علاء عاين لي و قال ليهم دي مالا ماده بوزها كدا ؟😂
قلت ليهو ما عندك بي شغله ! قال لي بسأل عشان أشمت ما عشان سواااد عيونك ، قلت ليهو برضو ما تسأل ، قال لي بعد ردة فعلك دي جاااني فضول كبير أعرف الحصل شنو ، فاروق قال لي بالجد يعني مالك ؟ منظرك منظر الزول الداقنوا و شايلين حقو !
عمتي قالت ليهم عمر شاكلها فـ زعلت لدرجة انها ما اتعشت ، كانت قافله الباب عليها و ما راضيه تفتح ، والله إلا طلعتها بالغصب عشان تتسحر ، علاء ضحك و قال لـ عمر تاني الحـ يكوي ليك ملابسك منو !؟ فاروق قال ليهو شاكلت الزول الغلط يا مان ، بت خالك دي خطين حمر و الحجه ما بترضى فيها 🤣 يعني لو شاكلت علاء معليش و لو شاكلتني أنا ذاااتي برضو معليش بس بت وزير الدفاع دي ماف زول يسألها ... قال كدا و قعد يضحك مع علاء ، عمتي قالت ليهم هي بت و انتوا أولاد و ذاااتا ما قدركم ، عمر قال ليها ما اختلفنا يا أمي لكن هي كمان عندها تصرفات كدا كلها غلط !
قلت ليهو ياخ أنا ما اتصنت على مكالمتك !... قال لي وطي صوتك و إياك و الكذب يا مها ! انتي وقفتي و اتصنتي على كلامي و لأنك عارفه تصرفك غلط بتكذبي !
علاء قال ليهو مكالمتك دي كانت مع رئيس ولا مع هيئة المخابرات !؟ ورونا معاكم !
عمر قال ليهو ما مهم كنت بتكلم مع منو ، الأهم إنها ما تقيف تتصنت على كلام الناس ، دي أكتر حركه بايخه و مستفزه !
طبعاً حسيت تصرفي دا زعلو شديد مني ! عمتي قالت ليهو خلاااص يا عمر ! ما تقوم تزعلها لي تاني ، انت مش قبيل نبهتها !؟
المهم بعد أسبوع من الكلام دا يوم بليل كنت بقلب في الفيس ، بعدها دخلت الواتس و بقيت أشوف في الحالات ، لقيت سهى خاته صورة ماريا و كاتبه عليها Happy Birthday يا أحلى ماريا في الدنيا كلها ♥️
الـ Stories حقتها كلها كانت عباره عن صور و فيديوهات لـ ماريا ! طبعاً استغربت فيها ! ديل من متين بقوا صحبات للدرجه دي و من وراي كمان !
طبعاً اتمليت و اتغظت غيظ ما عادي بس نهاااي ما رسلت لـ سهى و نهاي ما عاتبتها أو لمتها أو قلت ليها ماريا صحبتك من متين عشان تحتفلي بيها و تختي صورها !
رجعت الفيس و بديت أفتش عن نصوص أو إقتباسات لحد ما لقيت نص صغير كدا و عجبني فـ جيت الواتس و نسختو في الإستوري حقي :
" لا أعرف شيئاً
عن شعوري نحوه
سِوى أنني معه
أشعر بأنّي في المكان الصحيح
المكان الذي وجدت به ما أُحب
و ما أرغب "
طبعاً زي ما إتوقعت ، الإستوري ما تم دقيقه و سهى جاتني ناطه ، كاتبه لي يا بت دا كلام شنو دا ! تعالي هنا سرررعه و أحكي لي ، طبعاً قريت رسالتها من فوق ، من دون ما افتح دردشتها ، بقت ترسل لي في الرسايل و أنا مطنشه ، لمن حسيت بالجوع قررت أمشي آكل و أجي أسوقها بالخلا ، فعلاً مشيت المطبخ و قعدت آكل و عمتي نايمه في الهول ، المهم رجعت غرفتي و مسكت تلفوني ، طبعاً استغربت لمن لقيت رسائل من محمد و فاروق و علاء ! قلت ديل مالهم كلهم فجأه كدا مرسلين لي ! طق اتذكرت الإستوري ! نسيت و ما عملت استثناء للجماعه ديل ! لمن مشيت شفت الإستوري لقيت إنو كل أولاد عمتي شافوهو بالإضافه لـ علاء ، طبعاً محمد كان كاتب لي : دا كلام شنو يا بتنا !
سليم و عمر شافوا الإستوري بس ما علقوا
فاروق كاتب : عملتي ليك ريش عايز ليهو قص 😂
علاء كاتب : دا منو ؟؟
كلهم رديت ليهم بنفس الرساله يلي هي : "والله عدم موضوع ساااي مني ، لقيت النص دا و عجبني فـ ختيتو إستوري 🤣"
بعدها بقيت ادردش مره مع دا و مره مع داك و كلهم اقتنعوا إنو النص دا عدم موضوع مني إلا علاء ! أصر يعرف أنا قاصده منو ، قلت ليهو والله يا علاء ما قاصده زول ! زي ما قلت ليك دا عدم موضوع مني !
قال لي لا أنا متأكد انك قاصده زول ! يعني من بين كل النصوص و الإقتباسات ما يعجبك إلا النص دا !! قلت ليهو خلاص قول لي أنا قاصده منو !؟
_ أنا البسأل فيك
= و ردي كان إنو دا عدم موضوع مني !
_ قال لي ما علي أنا !... عادي قولي لي ، ماف أسرار بيناتنا صح ؟
= والله احترت معاك يا علاء ! ياخ مالك عبيط و لايوق كدا !🤣
_ تمام طيب صدقتك ، اها جديدك شنو ؟
= قاعد معاي في نفس البيت ، لو في جديد كان عرفتو ، انت الليله شكلك ساطل !
_ ايوه صح
= يعني ساطل ؟
_ لا يا غبيه ، ايوه دي قاصد بيها إنو لو كان عندك جديد كنت حـ أعرفو بما اننا قاعدين في نفس البيت
= خلاص أقطع وشك
_ ليه عايزا تتكلمي مع زول غيري ولا شنو
= و بعدين مع عدم الموضوع حقك دا !
_ المهم اتعشيتوا بـ شنو ؟
