مع نهرتو لي دي عمتي جات داخله ، قالت ليهو كيف يعني تنهرها و ترفع صوتك عليها !! قال ليها يا أمي انا لي ساعه بتكلم معاها و هي عامله نفسها طرشه ! قالت ليهو ما تسألها ! بتي دي ماف زول يزعلها لي !
طبعاً أنا رغم زهجي بس من جواي اتكيفت ، كلام عمتي دائماً برفع لي معنوياتي و بحسسني إني مميزه ، إني أميرتها البتستحق كل الدلع و الدلال !
قال ليها ليه ماف زول يسألها ؟ يا أمي أوعك تشجعيها على الغلط و ما تقيفي معاها في الغلط و تبرري ليها كل تصرف غلط تعملو ! أنا شايفك و ملاحظ انك مدلعاها زياده عن اللزوم !
طبعاً كلامو غاظني ، أصلاً أنا ما ناسيه ليهو موقف أمبارح ، قلت ليهو خليها تدلعني انت مالك !!...عاين لي بإستنكار و قال لـ أمو شايفه !
قالت ليهو عااادي كلامها ما فيهو شي ! و بعدين وين المشكله إذا دلعتها !؟ دي بتي و أصغر وحده في البيت دا !
قال ليها ما اختلفنا لكن كل شي ليهو حد و بالمناسبه يا أمي أنا عايز اتكلم معاك على إنفراد ، فجأه كدا محمد جا داخل ، طبعاً عمتي زعلانه منو من أمبارح عشان كسر كلمتها و مشى وصل أمي ، جا قعد و مسح وشو بيدينو و قال لي انتي يا مها أمك دي ما قاعده تمشي ليها ؟؟ قلت ليهو لا ، قال لي ليه ؟؟
عمتي قالت ليهو كيف يعني لييييه ؟؟ راجل أمها ما كان باقي ليهو إلا يطردها و جاي تسألها ليه ما بتمشي هناك !؟... اتجاهل كلام أمو و قال لي جاوبي ! قلت ليهو جوابي هو نفس جواب عمتي ! قال لي راجل أمك مستحيل يمنعك تزوريها ، في زول بقاطع أمو ؟؟
عمتي قالت ليهو السؤال الأصح : في أم بتجدع جناها ؟؟ قال ليها بما انك يا أمي بتردي على كل سؤال نيابة عنها جاوبيني ليه كنتي بتحرشيها على أمها و ليه لمن أمها تجي بتقولي ليها انها ما موجوده أو تطلعيها من البيت عشان ما تقابل أمها ؟و بعدين متين أمها جدعتها ؟
قالت ليهو الظاهر إنو أماني أمبارح ملت ليك راسك على الآخر ! قلت ليهو أنا الما كنت برضى أشوفها أو اتكلم معاها ، قال لي ليه طيب ؟؟
قلت ليهو لأنها عشان راجلها و مصلحتها خلتني و هسي جايه تعمل نفسها حنينه علي !... أنا ما عايزا أمشي ليها و ما عايزا اسكن معاها بس لو قعادي معاكم مضايقكم قول لي ، قال لي ما تفهمي غلط ، أنا أكيد ما قاصد كدا !! الموضوع دا لازم يتحل اليوم قبل بكرا ، عمتي قالت ليهو الموضوع محلول ، البت قالت ما عايزا تمشي لأمها و انتهينا ، قال ليها ماف حاجه اسمها ما تمشي لأمها و ما عايزا تشوفها ! عاين لي و قال لي ما تنسي إنو دي أمك ، معقوله تقاطعيها ؟؟ قلت ليهو يا محمد أنا والله ما عايزا أمشي ليها و ذاتي ما فاضيه عشان أمشي ليها لغاية أمدرمان البعيده ديك !! عمتي قالت ليهو دا جواب ولا ما جواب ؟!! قال ليها كويس ، ماف مشكله إذا هي ما عايزا تمشي بس الأكيد إنو أمها بتقدر تجي هنا في أي وقت عشان تشوفها و ماف أي زول حـ يمنعها و على فكره أنا وعدتها إنو مها تجيها خلال اليوم دا ، عمتي قالت ليهو شنووو ، والله ما تمشي ليها إلا على جنازتي ، عمر قال ليها انتي مشكلتك شنو يا أمي انا عايز أفهم ! من أمبارح شايف و سامع كلامك بس ما حبيت أغلطك قدام الناس أو اتجادل معاك ! قالت ليهم بتشوفوا غلط أمكم لكن ما بتشوفوا غلط الناس التانيين ! أماني دي وقت قعدت تقل أدبها علي في نص بيتي و تسمعني كلام فارغ ماف واحد فيكم فتح خشمو و جاين هسي ترموا اللوم علي !!
محمد قال بنبره حازمه : عمر حـ يسوقها و يجيبها راجعه و من بعدها أمها حـ تجي كل مره تشوفها و تمشي ، ما عايز أي زول يتعرض ليها أو يمنعها تشوفها و انتي يا مها أوعك لمن أمك تجيك هنا تدسي منها أو تخلي أمي تقول ليها انك ما موجوده ، و الموضوع دا انا ما عايز فيهو أي نقاش ، شاورت أبوي و خالي و دا الإتوصلنا ليهو ، امها حـ تجي هنا متى ما حبت لا هي تسألك لا انتي تسأليها يا أمي و انتهينا و هسي يا مها بدون كلام كتير قومي جهزي نفسك عشان تمشي مع عمر !
طبعاً عمتي زعلت ، عاينت ليهو مسااافه و مشت ، قلت ليهو أنا ... قاطعني و قال لي ما قلت ليك أسكني معاها ، حـ تمشي ليها و تجي راجعه لأني وعدتها ! جدع لـ عمر المفاتيح و قال ليهو أنا تعبان و عايز آخد لي راحه عشان كدا وصلها انت ، عمر قال ليهو تمام ... قمت بإستسلام و مشيت جهزت نفسي و أنا زهجاااانه ، دخلت على عمتي و قلت ليها محمد عايزني أمشي مع عمر بالغصب ، حـ أمشي معاهو و أشوف الإسمها أمي دي و اسمعها الكلام المفروض تسمعو ، حـ اقول ليها أنا غير عمتي ما عايزا أي زول و إنو عمتي ماليه كل الخانات و هي بتغنيني عن كل الناس ، عمتي قالت لي هسي لو قلتي ليها كدا حـ تقول انا حرشتك و مليتك الكلام دا ! قلت ليها خليها التقول سااااي ، قالت لي خايفاها بكلامها المعسول داك تأثر عليك و تغشك ، قلت ليها أنا ما شافعه عشان اتغشى ليها ، قالت لي خلاص أمشوا و ما تتأخروا ، لمن مشيت الهول لقيت عمر قاعد ، لمن شافني قام و مشى قدامي و أنا وراهو ، ناس فاروق لمن شافونا قالوا لينا ماشين وين ؟؟ عمر قال ليهم مشوار ، ماريا قالت ليهو سوقوني معاكم ، منهل قالت و أنا كمان ! قال ليهم نحنا ما ماشين نتفسح ، ماشي أوديها لأمها و أجيبها راجعه ، قال كدا و اتحرك و أنا وراهو ، طلعنا و ركبنا و طول الطريق كنا ساكتين ، حسيت إنو زعلان مني بسبب تصرفي !
المهم بعد مساااافه طويله وصلنا بيت أمي و أنا طبعاً زعلاااانه عشان جايه بالغصب ، لمن فتحت لينا الباب ما صدقت إني واقفه قدامها ، اظنها قايله محمد بمشي فيها ساي لمن قال ليها بجيبها ليك أو قايله عمتي حـ تمنعني من الجيه ، سلمت علي بالأحضان و فضلتنا جوه ، طبعاً بيتها غرفتين و مطبخ مربوطات بـ برنده و قدامهم مظلة زنكي ، عمر ما قعد دقيقه ، قال لينا طالع مشوار و ما حـ أطول و فعلاً مشى و خلاني معاها ، للحظات حسيت إنو عمر و محمد متفقين إنو يخلوني أقعد مع أمي للأبد !
طبعاً كنا قاعدين في المظله ، أمي بعد ما عملت لي عصير قالت لي كنت قايله إنو عمتك ما حـ تخليك تجي ، قلت ليها عمتي ما قاعده تمنعني أو تغصبني على حاجه ، هي بس بتعمل الأنا عايزاه ، مدت يدها و صلحت لي اللصقه العلى جبيني و قالت لي بقيتي كيف ؟ قلت ليها كويسه ، فجأه كدا ولدها أحمد جا داخل و هو بتكلم و بقول ليها أمي الغدا بشنو ، طبعاً هو تقريباً عمرو 11 سنه و هو أكبر ولد ليها ، قالت ليهو اول شي تعال سلم على أختك ، طوالي جا سلم علي ، قالت ليهو أخوك وين ؟؟ قال ليها بلعب في الشارع ، قالت ليهو أمشي ناديهو لي سرعه ، قالت لي أمجد دا جنو لعب في الشارع ! أول ما يرجع من المدرسه بجدع شنطتو و يجري الشارع طوالي ! فطور ما بفطر ، حيرني معاهو !!
طبعاً هي كانت بتحاول تلطف الجو و تخليني اتكلم و اتعامل معاها بتلقائيه و بكل أريحيه ! بس انا حرف ما كنت قادره أنطقو ، لأني جيت بالغصب و لأني حاسه انها بتعمل كدا عشان تكسبني و تخليني أجي هنا و اسكن معاها ، كلام عمتي كان معشعش لي في راسي !
فجأه كدا بتها رهف جات طالعه و هي بتبكي ، طوالي جات لأمها و بقت تقول ليها ماما و تبكي ! أمي ضمتها عليها و قالت ليها راسك ما خلاك ؟؟ قعدت تبكي بس ، أمي ختت يدها على جبينها و قالت الحراره نزلت شويه ، عاينت لي و قالت لي من أمبارح محمومه إلا بعدين أوديها الدكتور ، هنا رهف طوالي عاينت لي ، ياداب انتبهت لي لأنو لمن جات ما شافتني ، أمي قالت ليها أختك جات أمشي سلمي عليها ، قالت ليها دي ما أختي ، أختي ريل نايمه جوهـ ، كلامها ما فرق معاي ، بالي كلو كان مع عمر المشى و خلاني دا ! كنت كل مره أعاين للباب عشان أشوفو لو جا راجع ، أمي شالت رهف و رقدتها في رجلينها و بقت تهز فيها و رهف تبكي و تجر لأمي في شعرها ، واضحه إنها مدلعه شديد ، أمي قالت ليها خلااااص هوووس ، البكي بصدع بيك زياده ! قالت ليها مااام ماااام ، أمي قالت ليها خلاص فكي لي شعري دا ... واااي انا منك يا رهف ، لمن تمرضي بتمرضيني معاك و بتعذبيني جنس عذاااب يا بتي !
طبعاً أنا بس كنت بعاين ليهم و للحظات اتذكرت لمن أكون عيانه و أمي تكون شايلاني ! حتى و أنا في عمر الـ 7 ، 8 سنوات كانت بتشيلني عادي و تلوليني !
قطع سرحتي صوت شافع بقول أميييي يا أميييي و الصوت جاي علينا ، أمي قالت ليهو في شنو يا أمجد ! جا داخل و هو بلقط أنفاسو بصعوبه ، قال ليها أمي ناس منتصر بدقو في أحمد و فلقوا بطوبه لمن جابت دم !.. طبعاً أمي إنهجمت ، نزّلت رهف بسرعه و لفحت توبها و قامت جاريه و أمجد و رهف وراها و أنا ما عارفه أعمل شنو !! طوالي اتصلت على عمر ، لمن فتح الخط قلت ليهو كنت تقول لي انك عايز تخليني هنا للأبد و اظن دا اتفاقك مع محمد ، ياريتك كلمتني بدل ما تغشني بالطريقه دي ... قلت ليهو كدا و طوالي قفلت الخط ، رجع لي مره واااحده بس لمن ما رديت ما اشتغل بي تاني !!
بعد مسافه لمن وقفت على حيلي عشان أمشي أشوف الحصل شنو أمي جات داخله و هي ماسكه احمد من يدو و هو جبينو نازف و يمينها رهف و شمالها أمجد ، كانت جايطه و شغاله ليهو أنا مش قلت ليك أولاد أعمامك ديل أبعد عنهم و هظار ذاتو ما تهظر معاهم ! شوف هسي ضاربنك كيف ، عذبوني ياخ هم و أمهاتهم الله يعذبهم ، جات داخله بيهم و طوالي دخلت جوه جابت قطن نضفت بيهو جبين أحمد و هي بتجوط ساااي ، قالت ليهو اتشاكلت معاهم في شنو ؟؟ قال ليها شالوا من أمجد البلي حقو و لمن شلتو منهم شاكلوني ، قالت لـ امجد أنا مش نبهتك منهم ؟؟ تاني ذاتو من البيت دا ما تطلع لو حـ تقعد تلعب لي معاهم ، ديل غير المشاكل ما عندهم شي ، إتلفتت على أحمد و قالت ليهو شفت قميصك دا أوعك تقلعو ولا تنضف الدم الفيهو ، خلي أبوك و أعمامك يجوا يشوفوا الدم دا ، عشان يعرفوا أولادهم المناعيل ديل بعملوا في شنو في غيابهم ، فجأه كدا جا صوت مره بتصرخ و بتقول أماااني ، يا أماني !!
المره توووش جات داخله و هي ماسكه ولدها ، قالت لأمي اسمعي هنا يا أماني لمن أولادنا ديل يتشاكلوا مع بعض أنا ما قاعده أتدخل ، بقول أولاد اعمام و ماف داعي اتدخل بيناتهم عشان ما أكبر المشكله رغم إنو منتصر ولدي دا كل يوم بجيني مضروب و شاكي من أولادك بس خشمي دا ما قاعده أفتحو لكن لمن تجي انتي الكبيره دي ذاااتك و تمدي يدك على ولدي والله ما اسكت ليك و الرهيفه التنقد !
أمي ولاااا فتحت خشمها معاها ! طبعاً المره دي ما غريبه علي ، بعرفها من زمن كنت ساكنه مع أمي ، دي زوجة حمى أمي ، شويه كدا جات نسيبة أمي و تمت الناقصه ، بقت هي و مرت ولدها ينبحوا في أمي و هي ساكته سااااي و بتشوف في جرح أحمد و بتعمل فيهو بن ، نسيبتها قالت ليها ساااكته مالك كما عرفتي نفسك غلطانه ! ولدك يدق و تجي انتي كمان تدقي ! اتاريك انتي البتحرشيهم على أولاد أعمامهم و بتمشي تشتكي لـ أولادي عشان تعملي فتن و مشاكل بيناتهم ، زوجة حماها قالت ليها اقسم بالله تاني تمدي يدك على منتصر دا إلا أكسرها ليك و الليله إلا ما أبوهو يجي .... هنا أمي فتحت خشمها و قالت ليها تمام يا زوله ، بعدين لمن كل واحد أبوهو يجي جيبي ولدك و تعالي ، و انتي ذاااتك يا عمتي تعالي و قولي لـ ولدك مرتك ضربت ولد أخوك عشان هو فلق ولدك لمن جاب دم و على فكره انا ما ضربتو بس ولدكم دا الكذب بجري في عروقو و دا العلمتو ليهو أمو ... طبعاً أم الولد هاجت و ماجت و لمن حبوبتو كانت عايزا تتكلم أمي قاطعتها و قالت ليها ما ناقصه وجع راس ، أي زول عندو كلام يمسكو لـ بعدين ، قالت ليها كماااان بتقاطعيني و بتطرديني من بيت ولدي !! والله ياهو الفضل ، قالت كدا و طوالي رفعت يدها عشان تضرب أمي ، هي شكلها أصلاً مغيوظه منها و عايزا ليها فرصه بس عشان تتشاكل معاها و تمد يدها عليها ، ما عارفه الحصل لي شنو فجأه كدا ، ما لقيت نفسي إلا و أنا واقفه بينها و بين أمي و ماسكه ليها يدها ، قلت ليها لو مديتيها تاااني بكسرها ليك والله فاهمه ولا لا ، هسي انتي حبوبه عليك الله !؟ الإتنين أولاد أولادك فـ ليه تشوفي غلط واحد و ما تشوفي غلط التاني !! هسي المتعوق منو الولد دا ولا أحمد ! ما شايفه قميصو ولا عميانه !!... قالت لي هوووي احترمي نفسك و انتي منو أساساً عشان تجي في نص بيت ولدي و تقلي أدبك علي ! بالله زحي كدا ولا كدا و طوالي لزتني و كنت حـ أقع بس في زول ثبتني ! لمن رفعت راسي لقيتو عمر !
طبعاً كان بعاين ليهم بنظرات حاده ! قال ليهم بنبره غليظه : في شنو ؟!!
أمي طوالي قالت لـ نسيبتها لحدي هنا و كفايه يا عمتي ، أنا اتحملتك بما فيه الكفايه ، الغلط ما غلطك ، الغلط غلطي أنا الإستحملتكم و استحملت قرفكم و مشاكلكم الما بتخلص ، الغلط غلطي أنا الكنت بحترمك و مهما يحصل منك بقول معليش يا أماني دي نسيبتك و أكبر منك و حبوبة أولادك ! بس انتي دا كلو ما قدرتيهو لي ، عليك الله قولي لي منو من نسوان أولادك قاعده تحترمك و ما بترفع صوتها عليك ؟! الجيتي تحامي ليها دي ذاااتا ما قاعده تقصر منك بس صحي الكلب بريد خااانقو !! لكن صدقيني من الليله حتشوفي الوش التاني خاصة بعد ما اتأكدت أنك ما عندك حاجه لأولادي و ما بهمك إذا اتعوقوا أو ماتوا ذاتو ! و الغريبه انك بعد دا كلو أول ما تمرضي بتقولي ليهم نادوا لي أماني !! أماني الكرهتيها عيشتها ، النجضتيها و نجضتي أولادها ! و الأغرب إني بمشي ليك و بمارضك بعد عمايلك دي كلها !! ياخ أنا ذاتي كما شقيه ما كان وقعت في نسابه زيكم ، الله أكبر عليكم ، و الله ينعل اليوم العرفت فيهو مأمون و اليوم الجيت فيهو البيت و العيشه الزفته دي !
طبعاً بقوا ساكتين و أمي بتتكلم ، سمعتهم كلام زي السم و هم بس بعاينوا ليها مصدومين ! حسيتها مقهوره شديد و كاتمه جواها ، نسيبتها و زوجة حماها برااااحه لملموا نفسهم و مشوا ! بعدها أمي قعدت على السرير و ضمت أولادها التلاته و بقت تبكي ، بكى زول مكسور و مقهور ، بكى زول الدنيا ضاقت بيهو و ضوقتو الويل ، بكى زول تعب من صراع الحياة ، عمر مشى عليها و بقى يحاول يواسي فيها ، في نهاية كلامو قال ليها عادي مشاكل زي دي بتحصل مع النسابه ، الواحد بس يطول بالو و يتصرف بحكمه ... طبعاً من شدة البكى ما قدرت تقول حاجه ، بعدها بمسافه استأذنا و مشينا ، عمر سألني الحصل شنو من البدايه فـ طوالي حكيت ليهو ، و في النهايه قلت ليهو دا البيت العايزني اسكن فيهو و ديل الناس العايزني أقعد معاهم ، قال لي أفهمي ياخ ، ماف زول قال ليك أسكني معاهم ! و شنو الخلاك تفتكري إنو أنا و محمد متفقين نخليك معاهم وهنا ! مجنونه انتي ولا شنو ؟!
قلت ليهو ما عارفه لكن انتوا بتعملوها ، سكت ما اتكلم معاي و أنا كمان سكته و سرحت بعيد لحد ما وصلنا البيت ، وصلنا مع صلاة المغرب ، طبعاً عمتي كانت منتظراني بفااارق الصبر عشان تعرف أنا قلت شنو لـ أمي بس ما كان عندي مزاج للكلام فـ بس دخلت و قفلت الباب علي ....
"لعلنا نلتقي بالأشياء التي نحب فـي وقت آخر
تكون مستحقة لنا و نكون أهلاً لها..
لعل وجودها الحالي فيه هلاكنا ..و فيه ضياعها
ربما هي مسألة وقت لنفهم كيف نقدر قيمة الأشياء ، و كيف تقدر هي وجودنا...!!
لا النهايات أبدية ولا الطرق كانت جسوراً
ربما لنا لقاء آخر مع كل ما فقد..!! 🖤
يتبع.....
