قلت ليهو طيب جيب أكويهو ! قال لي لا خلاص خليهو ، لمن علاء جا داخل عمر قال ليهو أنا مش قلت ليك ناديها لي ! علاء قال ليهو والله دخلت غرفه كدا و لقيت شيالة حلاوه نستني انا جاي لـ شنو ذاتو ! قلت لـ عمر الغلط غلط علاء عشان ما تزعل مني ساي و تقول ما سمعت كلامك ، قال لي ماف شي بزعل !
علاء خت يدو على جبيني و قال لي حرارتك عاديه ! ما عرفتك والله ، من متين انتي بتشيلي هم زعل الناس ! قلت ليهو أنا بشيل هم زعل كل الناس إلا أنت ، قال لي ايوه عشان أنا ولد ضرة أمك مش ! قلت ليهو لأنك لئيم ! قال لي بس انا عارف ليه بتتعاملي معاي كدا يا غيوووره و خت اصبعو على أنفي و قعد يضحك ، زحيت اصبعو و قلت ليهو اغير من شنو انت واحد ما عندك موضوع بس ، إتلفت على عمر و قال ليهو ما تصدقها ، والله هي بتغير لمن تشوفني بتكلم مع بت أو بمدح فيها ، هي عايزا علاء دا بـ سبب و بدون سبب يقعد يمدح فيها هي و بس العمر كلو ، قلت ليهو جنك كذب !...
علاء إتلفت على عمر و قال ليهو بالمناسبه يا عمر ، انت البيت دا ملياااان بنات ليه شابكنا نادوا لي مها ، نادوا لي مها ! ما تخلي وحده من بنات اعمامك ديل تكوي ليك أو من بنات الجيران !
عمر قال ليهو لأنو دي بت البيت و ديلك ضيوف و أنا البنات ديل ما محتك بيهم كتير و اساميهم ذاتا ما بعرفها ، قال ليهو يا زول معقوله ما بتعرف أسامي بنات عماتك و أعمامك ! لو كان قلت لأي وحده يا فلانه هاك أكوي لي الملابس ديل كانت حتكويهم ليك !
قلت لـ عمر ما تشتغل بيهو ، أصلاً هو زعلااان لأنو قبيل قعد يحنسني عشان أكوي ليهو بس ما رضيت ، علاء قال لي البيت ملياااان بنات و الحمدلله في الآخر ملابسي إنكوت ، أنا والله ما واقف عليك انتي ! قلت ليهو طيب لييه من البدايه قعدت تحنسني عشان أكوي ليك ! كان تطلب من وحده من البنات الكتاااار ديل ! ابتسم و قال لي مش قلت ليك بتغيري ! المهم ما قلت ليهم عشان بحب اتعبك انتي ، يعني معقوله بنات سمحات و ناعمات كدا اتعبهم بـ غسيل أو المكوه ؟؟ لا لا التعب دا ما بناسب بت غيرك ، قصدي ما بناسب ولد غيرك ، قلت ليهو غياااااظ و طوالي طلعت خليتهم ، جا لاحقني و قال لي زعلتي ؟ قلت ليهو ما عارفه غور من وشي ، فجأه عمو النور راجل عمتي جا داخل مع أبوي و قال أمرقونا يا ناس ، الباصات دي وصلت ! أطلعوا بعد دا ، طبعاً في اليوم داك أمي ذاتا جات ، جابت معاها بناتها الصغار ، طبعاً هي عندها 4 ، ولدين و بنتين و البنات أصغر من الأولاد ، طبعاً أخواتي البنات شفتهم اكتر من الأولاد لأنو أمي كانت لمن تجي تزورني بتجيبهم معاها ، رهف عمرها 6 سنوات و ريل 4 سنوات ، لمن طلعت الحوش برا أمي نادتني ، لمن مشيت ليها عاينت لي للحظات و قالت لي عليك الله شوفي لي رهف أختك دي مشت وين ، قبل شويه كانت جنبي و مع الزحمه دي ما لقيتها ، هزيت ليها راسي بس و مشيت فتشت ليها بتها لحد ما لقيتها ، لمن جبتها ليها قالت لي ما شاء الله طالعه سمحه ، ما رديت عليها ، قالت لي أقعدي عايزا اتونس معاك ، قلت ليها ما فاضيه و طوالي إتحركت من جنبها و كنت حـ ادخل جوه بس عمتي نادتني من المظله ، كانت مليانه نسوان ، لمن مشيت ليها قالت لي أمك نادتك لـ شنو ؟؟
قلت ليها بتها ضاعت و قالت أمشي افتشها ليها ، قالت لي هي بتها وقت ما قادره عليهم جايباها معاها ليه ؟ و بعدين انا ذاتي مستغربه هي الخلاها تجي شنو !؟ زمان قالت رجلها دي ما بتختها في بيتي فـ هسي الجابها شنو ؟؟... قالت لي المهم تاني لو نادتك ما تمشي ليها ، دي حركات منها ساي عايزا تكسبك بيها ، لمن شافتك عايشه حياتك مرتاحه و وجودها ما فارق معاك قلبها وجعها عشان كدا جايه كايسه دربك !
قلت ليها أصلاً أنا ما شغاله بيها ، لمن قالت لي أقعدي عايزا اتونس معاك قلت ليها ما فاضيه ، قالت لي ايوه نهاي ما تديها وش ، هي لمن مشت عرست أمومتها و حنيتها دي كانت وين ؟ مالا ما فكرت فيك الوقت داك ؟؟
فجأه كدا جا فاروق و بقى يقول يخوانا خلااااص أمرقوا نحنا اتأخرنا ، فعلاً كل الناس قامت و طلعت الشارع و جزو ركب طوالي ، كان في باصات و عربات ، الباصات كانت للناس الكبار و الأطفال ، و العربات للشباب ناس الهجيج ، طبعاً نحنا البنات كنا واقفين عشان نشوف حـ نركب مع منو ، ماريا قالت غيتو أنا حـ اركب في العربيه الحـ يكون فيها ربه و هجيج شديد ، عاينت يمين شمال بعدها مشت ركبت في عربيه دبل قبين ، ركبت ورا في الصندوق و قالت أدوني الدلوكه و أي زول بحب الكواريك و الهجيج يجي لاحقني ، طبعاً وزعوا الدلاليك على الباصات و العربات الصغار ، في عربية محمد كان راكب هو و أبوي و عمتي و راجلها و معاهم عمتو ، اتحركوا قدامنا و وراهم الباصات و نحنا لسه كنا بنتجادل حـ نركب مع منو ، كانوا في زي 8 عربات لسه واقفين ، عمر نزل من عربيه و قال لينا انتوا منتظرين شنو ؟! 3 منكم يجوا و يركبوا معانا ! عاين لي و قال لي مها أنا بتكلم معاكم ! قلت ليهو طيب و بالغصب مشيت و ركبت معاهم ، معزه ذاتا ركبت معاي بس سهى قالت ماشه مع ناس الهجيج ، جات وحده بت عمة عمر اسمها منهل ركبت معانا و كدا العربيه قفلت و إتحركنا ، طبعاً ناس الـ 7 عربات كانوا عاملين هجيج شديد و طالعين بالشبابيك ، و القاعدين في الصناديق عاملين فوضى و كواريك شديده ! نحنا العربيه الوحيده الكانت هاديه ، السايق كان صاحب عمر ، منهل طلعت بالقزاز و وقفت على حيلها و بقت تكوريك معاهم و أنا و معزه بنعاين لبعض ، قلت لـ معزه رايك شنو نحنا ذاااتنا نطلع بالشباك ! قالت لي ما حـ يطلعنا الإتنين ! قلت ليها بطلع أو ممكن دور عليك و دور علي ، عمر قال لي حـ تقعوا ، قلت ليهو البوقعنا شنو !؟ طوالي طلعنا بالشباك و بقينا نكورك معاهم و الباصات شغاله تصفر و الناس الفي الشارع ببشروا لينا ساااااي ، طبعاً عمر كان بتكلم معانا بس ما كنا سامعين مع الكواريك دي و الهواء الشديد لدرجة إنو طرحتي قربت تطير ، في عربيه كانت كلها شباب ، علاء و فاروق كانوا راكبين معاهم و طبعاً عاملين جنس شغب و فوضى ، أنا بس قعدت اضحك فيهم ، فاروق دا براهو ما طبيعي فـ ما بالكم لمن يكون معاهو علاء !!... فجأه كدا أحس ليك العربيه الراكبين فيها وقفت ! عمر رفع صوتو و قال لينا بقيتوا طرش انتوا ! أنا مش بتكلم معاكم ! منهل نزلت راسها و قالت ليهو نسمعك كيف يا عمر مع الجوطه و الكواريك دي ! قال لينا انزلوا و ماف داعي لـ دا كلو ، قلت ليهو لييييه ياخ الناس دي كلها هايجه و عامله فوضى ما نحنا بس !! قال لي مها اسمعي الكلام !
أنا و معزه نزلنا و قعدنا عن سكات و منهل ذاتا قعدت بس أول ما العربيه اتحركت تااااني طلعت راسها و وقفت ، قلت ليهو عمر شايف منهل ولا لا ؟ ليه هي تخليها و نحنا تمنعنا ؟ رفع صوتو و قال ليها منهل عليك الله أنزلي ، أصلاً انتي راس الهوس ، نزلت و قالت ليهو ياريتني ما ركبت معاكم !! قعدت و بقت تكوريك معاهم بالشباك و هي قاعده ، قلت لـ معزه بصوت واطي بعدين لمن نكون راجعين عربيه فيها عمر نهاي ما نركب فيها ، قالت لي ما عمر بس كمان مازن أخوي ، الإتنين ديل حقو نركبهم في عربيه براااهم و نخليهم يمشوا في شارع براااهم ، قلت ليها عمر خرب علي فرحتنا ! حيييا أنا منو ياخ !... فجأه عمر إتلفت علينا و قال لينا بتنبذوا فيني ولا شنو ؟؟ معزه هي الردت عليهو ، قالت ليهو لا لا أكيد ما بننبذ فيك ! صاحبو قال ليهو معناها كانوا بنبذوا فيك !🤣
قلت ليهو لأنو ما معقوله يا عمر كل الناس طالعه بالشبابيك و فرحانه و نحنا قاعدين و مربعين يدينا كأنو ماشين عزاء ! معزه قالت ليهو يا عمر عليك الله خلينا نطلع بالشباك ! قال ليها على فكره أخوك مازن لو شافك ما حـ يريحك لمن ترجعوا البيت !!
تاني لحد ما وصلنا ماف وحده فينا إتكلمت ، عمر و صاحبو هم الكانوا بتونسوا و نحنا ساكتين !
المهم وصلنا بحري و أهل العروس طلعوا و إستقبلونا بـ الغنى و الزغاريد ، بعد الضيافه عملوا حفله بسيطه كدا ، طبعاً كانوا مزينين البيت كلوا بـ ورود صناعيه و إضاءه مختلفة الألوان ، قعدنا معاهم لحد الساعه 11 م بعدها الناس بدت تطلع و تركب الباصات طوالي ، طبعاً أنا و معزه المره دي كنا حريصين إنو ما نركب مع عمر في نفس العربيه ، شفنا ماريا ركبت وين و مشينا ركبنا معاها ، لقينا سهى ذاااتا معاهم ، قلت ليها يا معفنه تمشي و تخليني ! قعدت تضحك و قالت لي أنا بحب أي مكان فيهو هجيج و كواريك ، قلت ليها ما شفتي عمر كتم نفسنا كيف ، منعنا نطلع بالشباك ! قالت لي ما عجبني ليك والله لكن كويس انك جيتي و ركبتي معانا هنا ، قلت ليها صحي اتذكرت ! سهى انتي ناس بيتكم ما حـ يشاكلوك عشان اتأخرتي !! قالت لي قبل شويه كنت بتكلم معاهم و وريتهم اننا متحركين ، المهم لمن نصل حـ يجوا يسوقوني ، معزه لفتتني و قالت لي شوفي مازن و عمر ، مش كأنهم بفتشوا علينا !!... لمن شفتهم قلت ليها شكلهم كدا ، يلا سريييع نزلي راسك لأنهم جاين بإتجاهنا ، قعدنا تحت و اتضارينا وسط الناس الراكبه في صندوق البوكسي ، جوا مارين جنبنا بس ما شافونا ، شكلهم اتفقدوا كل العربات و لمن ما لقونا إفتكرونا ركبنا مع ناس الباصات الإتحركوا قدامنا ، المهم بعدها كل العربات إتحركت و تعالوا شوووفوا الكواريك و الصفافير ! طبعاً العربيه الراكب فيها عمر كانت قدامنا يعني ما حـ يكون شايفنا ، ياخ عملنا جنس عمايل ، بنقيف على حيلنا نكورك و نقعد و طبعاً ماريا هي البتغني و بتدق الدلوكه ، قاعده في النص ، و أنا و معزه قاعدين في باب صندوق البوكسي و سهى قاعده قدامنا ، طبعاً انطربنا طرب ما عادي ، في مره من المرات كنت واقفه على حيلي و مهججه و منطربه على الآخر ، العربيه كانت جااااريه بسرعه و فجأه السرعه دي إنخفضت فـ عملت لينا عدم توازن و فجأه كدا كل الناس الكانوا واقفين على حيلهم جوا واقعين في الناس القاعدين ، و الأكعب إنو باب صندوق العربيه الكنا قاعدين فيهو مع الدفره دي إتفتح ، فـ أنا جيت واقعه في معزه و مع فتحة الباب الإتنين جينا واقعين في الظلط و معانا بت تالته !...
يعني فجأه كدا من السما حسيت نفسي في الأرض ، كنت مخلوعه لدرجة اني في البدايه ما حسيت بأي ألم ، كنت سامعه أصوات الصريخ و جملة : اقيف اقيف ديل وقعوا اترددت كتير على مسامعي ، حسيت إنو في أي لحظه حـ تجي عربيه و تمر بـ فوقنا ، حسيت إنو دي النهايه و للحظات شكيت إني مُت و ما عرفت نفسي وين ... دا كلو حصل في ثوااااني بس !
أقرب 3 عربات لينا جونا راجعين لمن شافوا بتاع العربيه الكنا راكبين فيها وقف و الناس الكانوا راكبين نزلوا ، عمر كان راكب في وحده من التلات عربات الجونا راجعين ، لمن نزل و جا الوقت داك قومونا على حيلنا و نحنا مخلوعين و ما قادرين نتكلم ، كان في إصابه في يدي و جبيني نازف ، طبعاً عمر ما كان عارف إنو الحادث حصل معاي أنا و معزه ، اتفاجأ لمن جا و شافنا قدامو في الحاله ديك ! بقى يقول الحصل شنو و وقعتوا كيف انتوا و أنا مش كلمتكم و نبهتكم و و و جاط شديد ! ماريا قالت ليهو الباب شكلو ما كان مقفول كويس عشان كدا انفتح و هم كانوا قاعدين فيهو !!... الولد الكان سايق قال لينا معليش حقكم علي ، لكن انتوا ليه بتقيفوا على حيلكم ! مازن جا و اتفقد معزه أختو و اتطمن عليها ، قال ليها اتحركي قدامي ، ما حـ تركبي معاهم تاني ، عمر قال ليهو خلينا نوديهم الدكتور أول ، طبعاً أنا الوقت داك ياداب بديت أحس بالألم ، خلوا الباقين يمشوا و نبهوهم ما يكلموا زول عشان ما يقلقوا و ساقونا أنا و معزه و البت التالته الإسمها وجدان للمستشفى في ليلنا داك ، بس الحمدلله ما كان في اصابة خطيره ، كانت رضوخ و جروح سطحيه عشان احتكينا بالظلط ، لمن طلعنا من المستشفى عمر قال لي تمشي معانا ولا اتصل ليك على ناس الهجيج و الكواريك عشان يجوا يسوقوك معاهم !!... سكته سااااي و ما قلت حاجه ، قال لي دي نهاية أي زول ما بسمع الكلام ، هسي اتخيلي لو الظلط دا كان فيهو عربات ! زي وقعتك الهسي دي متخيله الكارثه الكانت حـ تحصل ؟؟ لو كان مشيتي ركبتي مع ناس أمي أو معاي ما كان دا كلو حصل !! طبعاً كان بشاكل فيني عديل ، مازن قال ليهو خلاص يا عمر دا قضاء و قدر و الحمدلله جات سليمه !! بعدها مشينا و ركبنا ، مازن هو الكان سايق ، ما بعرف العربيه حقت منو ، عمر راكب معاهو قدام و نحنا التلاته ورا ، لمن إتحركنا أنا كنت ببكي سااااي و بمسح في دموعي ، طبعاً بكى من دون صوت ، معزه ذاتا كانت بتقشقش في دميعاتها 🤣
ما عارفه كنت ببكي عشان شنو تحديداً ، عشان انخلعت ولا عشان وقعت قدام الخلق كلهم ولا عشان وجع الوقعه ولا عشان عمر جاط فيني !
طبعاً عمر كان بعاين لينا بـ مرآية العربيه ساااي بس ما قال حاجه ، مازن إتلفت عاين لينا و ضحك ، قال لينا انتوا لمن وقعتوا و مشيتوا المستشفى ما نزلتوا دموع قدر دي جاين تتباكوا هسي ! عمر قال ليهو يمكن ياداب حسوا بالوقعه و استوعبوا الحصل معاهم !
طبعاً بقى هو و مازن يتكلموا عننا و يقولوا عشان قوينا راسنا و عملنا الفي بالنا و ما اشتغلنا بزول ، طبعاً هم يتكلموا و انا دموعي تزيد زياده ، حسيت إنو عمر دا ما باقي ليهو إلا يقول لي تستاهلي الحصل معاك ، بالجد زعلت ، تكلت راسي في الكرسي القدامي و تعالوا شوفوا البكى ، طبعاً أنا قاعده ورا مازن مباشرة و معزه في النص و وجدان ورا عمر ، معزه خلت نفسها و بقت تحنس فيني ، قالت ليهم البت بكت بالجد !!
عمر إتلفت و قال لي الببكيك شنو هسي !! ما رديت عليهو ، قال لي ارفعي راسك أنا بتكلم معاك !! مازن قال ليهو عمر خلاص أسكت خليها و بعدين يمكن بكاها دا بسبب انها عرفت غلطها ، قال ليهو ياريت والله !
بعدها كلهم سكتوا و أنا ما رفعت راسي ، ما عارفه منو فيهم سأل بس سمعت معزه قالت : لسه بتبكي ، عمر قال لي في حاجه واجعاك ؟؟
ما لقى رد مني ، قال لي يا بت الناس أنا بتكلم معاك ! لو في شي قولي لي !.. قلت ليهو انت بس قفل مني !! قال لي الكلام دا لي أنا ؟!
ما رديت و هو تاني ما سألني بس حسيتو زعل و حسيت اني ما كان استخدم جملة "قفّل مني " دي !
طبعاً لمن وصلنا البيت لقينا معظم الناس مشت ، البيوتهم بعيده هم القعدوا عشان يبيتوا و أمي و أبوي و مرتو برضو كانوا قاعدين ، عمو النور ذاااتو كان قاعد بـ مرتو و أولادو ، طبعاً هم ما كانوا عارفين بالحادثه الحصلت معانا ، مازن ساق أختو و دخلوا بيتهم ، لمن دخلنا عمتي جات علينا و شافت اللصقه الفي جبيني ! قالت وووبعلي دا شنو دا و جات علينا !! عمر قال ليها حادثه بسيطه يا أمي ماف شي ، قالت ليهو شنووو ؟؟ متين حصل دا و كيف و ليه ماف زول كلمني ! قلبي كان حاسيني والله!... قبل ما زول يرد عليها ، جانا صوت بقول حاااادث شنو !!؟ لمن إتلفتنا لقيناها أمي ، جاتني و بقت تتحسس وشي و جروحي و هي بتسألني كيف الحادث دا حصل ! قالت لـ عمر ليه ما كلمتني ! عمتي قالت لينا أدخلوا جوه و طوالي ساقتني من يدي و أمي ماشه ورانا لحد ما دخلنا جوه ، لمن وصلنا غرفة عمتي أمي كانت حـ تدخل و في نفس اللحظه عمتي كانت حـ تقفل الباب ، أمي لزت الباب و جات داخله جرتني من يدي و طلعتني برا الغرفه ، قالت لي كنت حاسه عشان كدا قعدت و انتظرتك تجي ، ما قدرت أمشي قبل ما أشوفك ، عمتي جات وقفت في وشها و قالت ليها عايزا منها شنو ؟ أمي قالت ليها كيف يعني عايزا منها شنو ؟؟ دي بتي و عايزا اتطمن عليها
= ياداب عرفتيها بتك ؟؟ من زمان كنتي وين ؟ لمن مشيتي و عرستي ليه ما فكرتي فيها ؟
_ البسمعك بقول أول ما عرست سقتها من يدها و جبتها ليك! شايفه عرسي دا واجعك شديد !
= ما عندي بيك شغله تعرسي أو تطلقي بس ما تقعدي تمثلي و تستهبلي علينا ، بتك دي ياتو يوم جيتي شفتي الناقصها شنو و عرفتي البيها و العليها ، هسي لو سألتك جابت كم في تامن و مستواها كيف ما حـ تعرفي تجاوبي
_ شوفي مهما حصل البت دي أنا أمها ، كونك جبتيها و سكنتيها معاك دا ما معناه انك بقيتي أمها ، مهما عملتي ليها ما بتبقي ليها أم و ما حتكوني حنينه عليها أكتر مني ! و منو القال إني ما قاعده اسأل منها و ما قاعده أجي أشوفها !
_ حنيتك دي كانت وين من زماااان يختي ! وحده بتجدع جناها زيك عشان مصلحتها ما تستاهل ينقال عليها أم و ايي أنا أحن عليها منك و أنا أمهاااا كان رضيتي كان أبيتي
= جدعتها ؟؟ جدعتها وين و لمنو ؟؟ اذكرك إنو أبوها هو الجا و ساقها مني بالغصب ، ولا اذكرك إنك جيتي و سقتيها من أبوها بدون علمي ؟!! و بعدين انتي اول شي أبقي أم لـ ولدك الساكن مع ضرتك داك و بعد داك تعالي اتكلمي و قابضي في أولاد الناس ، لو صحي حنينه ما كان ولدك فضل مرت أبوهو عليك و خلى ليك البيت و مشى ليها !!
طبعاً هنا عمتي هااااجت و جاطت في أمي و أمي ما سكتت ليها ، و كل وحده بقت تسمع التانيه كلام ، طبعاً كنا واقفين في الهول ، على حس أصواتهم أبوي و عمو النور و عمر و فاروق و علاء و سليم و الباقين جوا جاريين ، النايم صحى و الكان حـ ينوم النوم طار ليهو ، أبوي قال خير في شنو يخوانا !! الوقت داك عمتي كانت بتقول لـ أمي : انتي وحده شدة ما رخيصه حنستي راجلك دا تحانيس عشان يعرسك و هسي لو عايزا تدخلي الحمام بتستأذني منو و اكبر مخاوفك إنو يطلقك !
أمي رفعت ليها أصبعها و قالت ليها إحترمي نفسك و عليك الله جيبي لي الزول القال ليك إني حنست راجلي عشان يعرسني لأني زهجت و مليت من السيره المسيخه دي ، و بعدين إذا بستأذن من راجلي أو لا دي حاجه ما بتخصك والله ، على الأقل أنا بالحار و بالبارد محافظه على بيتي ، ما زيك معلقه لا لامه مع المطلقات لا لامه مع المتزوجات ، انتي فشلتي في انك تكوني أم ، و في انك تكوني زوجه ! انتي بس فااالحه للفتن و السواطه و التحاريش !
طوالي عمتي رفعت يدها و كانت حـ تضرب أمي بس عمو النور مسك يدها و نهرهم الإتنين و قال ليهم ما تعملوا لينا فضايح آخر الليل و أساساً المشكله دي سببها شنو ؟؟... عمتي اتجاهلتو و قالت لـ أمي هسي دي تشيلي نفسك و تتخارجي من هنا و رجلك دي تاني ما تختيها لي في البيت دا ، أمي قالت ليها ولا بتشرف أقعد في بيتك ذاتو ، حـ أمشي لكن بتي حـ تمشي معاااي و أشوف منو فيكم الحـ يمنعني ، قالت كدا و طوالي جرتني من يدي !!
"تعالي
وإن كنتِ
متعبّة
يائسة
حزينة
خُلِق هذا الفؤاد
من أجل أن يحتويكِ
من أجل أن يحميكِ " 🖤
يتبع....
