مسكتني من يدي و جرتني معاها ، طوالي وقفت و فكيت يدي منها ، إتلفتت علي و قالت لي تاني دقيقه واحده ما حـ أخليك تقعديها في البيت دا ، قلت ليها أنا ما ماشه معاك ، عايزا أقعد مع عمتي ، جاطت فيني و قالت لي تبدلي أمك الولدتك بـ عمتك بتاعة الفتن دي !! أصلاً هي الملت ليك راسك و كرهتك فيني ، أنا عاااارفه انها قبيل قالت ليك ما تدي أمك وش و لو نادتك ما تمشي ليها ، مفروض تفهمي و تعرفي إنو عمتك دي عايزاك تكرهيني بأي طريقه ... أبوي جا و قال ليها أماني إحترمي نفسك !! قالت ليهو الكلام دا قولو لأختك و على فكره يا سميره أنا ياداااب فهمتك و ياداااب عرفت ليه لمن كنت اتصل عليك و اقول ليك عايزا اتكلم مع مها يا قلتي لي نايمه يا قلتي لي برا البيت يا قلتي زهجانه و ما عايزا تتكلم مع زول و لمن أجي البيت بلقاها ماف و هسي اتأكدت انك بتخارجيها قبل ما أنا اجي لأني كنت بتصل و بكلمك إني جايه أو يمكن بتكون قاااعده بس انتي محرشاها و موصياها ما تطلع قدامي ! شناااة قلبك دي هي الطفشت ولدك منك و سبحااان الله كما تدين تدان ، شلتي بتي مني و قعدتي تحرشي فيها عشان تقلبيها ضدي و حرقتي قلبي و ربنا حرق قلبك لمن ولدك كرهك و مشى قعد مع ضرتك و..... أبوي نهرها و قال ليها أماااني قفلي خشمك دا و اتحركي قدامي ، في باقي الليل دا ترجعي بيتك ، قالت ليهو ما برجع بدون بتي ، قلت ليها و أنا ما ماااشه معاك ! عايزا راجلك داخل و طالع يسمعني كلام !! و عشان أوريك عمتي ما قاعده تحرشني أنا الكنت بقول ليها ما عايزا اتكلم معاك ..
عمتي قالت ليها أظن الجواب وصلك !! بتك ما عايزا تمشي معاك و هي الما كانت عايزا تتواصل معاك !! بعد دا اتوكلي و أمشي من هنا ، أمي طوالي مسكتني من يدي و قالت لي غصباً عنك حـ تمشي معاي ، عمتي و أبوي قربوا منها الإتنين في نفس اللحظه ، أبوي فكاني منها و عمتي وقفتني وراها ، كنت زي اللعبه و أنا بيناتهم هم التلاته ! محمد أتدخل و قال يا جماعه ماف داعي لـ دا كلو !! عمتي قالت ليهو لا في داعي ، لـمن وحده تجي و في نص بيتي تقل أدبها علي و أنا أصلاً ما عزمتها معناها في داااعي و ستين داعي لـ دا كلو ، محمد قال ليها أنا العزمتها يا أمي و أنا الأصريت عليها عشان تجي ، أمي قالت ليها و أنا جيت عشااان بتي ...
أمي كانت عايزا تتكلم بس أبوي قاطعها و قال لـ فاروق عليك الله وصلها بيتها ! ما ناقصين وجع راس ياخ !!... طبعاً عمتي دقت جرس و قالت ليهو مااااف واحد من أولادي حـ يوصلها ، الدرب الجابها خليهو يرجعها ! عمو النور قال يخوانا كدي قولوا بسم الله ! انتوا الصابكم شنو فجأه كدا !؟ أمي قالت ليهو ما فجأه يا النور ، سميره دي من بدري حاقده علي ، زمان خربت بيت أخوها و هسي بتحرش في بتي و ما مدياني فرصه عشان أشوفها و الليله لمن بتي عملت حاااادث و جيت عشان اتطمن عليها و أعرف تفاصيل الحصل سميره دقت جرس و حلفت ثانيه وحده ما أقيفها مع بتي ، ساقتها و أنا بتكلم معاها ، دخلتها جوه الغرفه و كانت حـ تقفل الباب في وشي و هسي الجوطه دي كلها بسبب إني سألت بتي عن الحادث الحصل معاها !! أبوي عاين لي و قال لي حادث شنو !؟؟ ليه ماف زول كلمني !؟ طوالي عمر حكى ليهو الحصل و في الآخر قال ليهو ما جاتها حاجه ، الحمدلله هي كويسه ، عمو النور قال لـ عمتي النصيحه انتي هنا غلطانه ! ما تنسي إنو دي أمها و ليها حق عليها ، طبعاً عمتي ما بتشتغل بكلامو ، قالت لـ أمي خلي عندك كرامه ! أنا طردتك من بيتي أكتر من مره ، عمر قال ليها يا أمي ، قاطعتو و قالت ليهو خليك ساكت !! أبوي قال لـ أمي خلاص أمشي نومي هسي و الصباح رباح ! عمتي قالت ليهو والله إلا تنوم في الشارع !! عمر قال ليها يا أمي تمشي ليك وين آخر الليل دا ، قالت ليهو في زول عزمها ولا في زول قال ليها أقعدي للزمن دا !! عمو النور قال عليكم الله أنهوا الحاصل دا كلو و خلوا الناس تنوم !! فاروق قال ليهم عن إذنكم يا جماعه انا ماشي أنوم ، علاء قال ليهو انتظرني أنا كمان ماشي معاك ، طبعاً هم ماخدين الموضوع كوميدي و درامي ، بعدهم مباشرة سليم مشى و الأهل الكانوا قاعدين معانا في البيت من قبيل احترموا نفسهم شويه و مشوا رقدوا و خلونا بنتناقش برانا ! عمتي و أمي لسه كانوا مدورين الشكله و عمو النور غلبو اليسويهو ، قال لـ عمر و محمد عليكم الله اتكلموا مع أمكم دي و دخلوها جوه !!
أبوي أخد نفس و قال لـ أمي عليك الله يا أماني مـ.... قاطعتو و قالت ليهو انت خليك ساااكت أصلاً دا كلو بسببك انت و بسببي أنا لأني سمعت كلامك ! في البدايه لمن كنت اجي بيتك عشان أسوق بتي كنت تمنعني و تقول لي ما بخليها تقعد في بيت راجلك ، بعدها قلت لي إنو عمتها ساقتها معاها و حـ تقعد فتره و تجي راجعه و قلت لي إنو نفسياتها تعبانه ، وافقت و قلت ليك كويس بس لمن تجي راجعه حـ أجي ليها ، بعد فتره لمن جيتك قلت لي عمتها سجلتها في مدرسه عشان كدا خليها تقرا هناك و تقعد مع عمتها شويه ، أبوي قال ليها و انتي بلسانك قلتي لي ما عندي مشكله تقعد مع عمتها و قلتي لي إنو قعادها في بيت عمتها بالنسبه ليك أفضل من قعادها في بيتي و أنا من البدايه كنت واضح و صريح معاك لمن قلت ليك ما حـ أخلي بتي تقعد في بيت راجلك ، اتذكري اننا اتفقنا انها لا تقعد مع مرتي لا تقعد مع راجلك ، مع إنو بيتي كان أفضل ليها و طول ما أنا معاها ماف زول حـ يسألها بس عشان إصرارك انها ما تقعد مع مره غريبه بالنسبه ليك أنا وافقت على كلامك و هسي جايه بكل عين قويه تقولي إنو سميره شالت بتك منك ؟؟ هنا مرت أبوي جات بإندفاع و قالت لأمي يعني كنت حـ اعمل شنو لـ بتك مثلاً و.... عمو النور رفع ليها يدو و قال ليها ما تعملي لينا مشكله تانيه ، خليك ساكته ، طوالي سكتت !
أمي واصلت كلامها مع أبوي و قالت ليهو الوقت داك أفضل مكان ليها كان بيت عمتها و بعترف إنو ما كان عندي شي أقدمو ليها بس الأكيد إني ما كنت مفكره اخليها تقعد معاها للأبد و انت عااارف الحاجه دي ، أنا رغم خلافاتي مع أختك إلا إني رضيت إنو بتي تقعد معاها و ما قلت حاجه ، بس كونها تبدا تحرش بتي و تحاول تقلبها ضدي و تمنعني منها دي الحاجه الوحيده الما حـ أسكت عليها ، و بتي حـ أسوقها معاي ! عمتي قالت ليها لمن تطلقي من راجلك و تعملي ليك بيت براااك تعالي قولي عايزا تسوقيها ، أبوي قال ليها بتي ما حـ تعتب عتبة البيت داااك ، مستحيل أخليها تقعد في بيت راجلك ! قالت ليهو و أنا مستحيل أخليها تقعد في بيت أختك ... طبعاً تااااني جاطوا ، عمر ساقني و دخلني غرفة عمتي و قال لي نومي نومك ، ديل نقاشهم طويل بس ما تركزي مع كلامهم ، اعتبري نفسك ما سمعتي شي ، بعد ما مشى بقيت فاتحه جزو من الباب و بشوف فيهم ، عمر ذاااتو مشى خلاهم ، عمو النور قال ليهم شكلكم عايزين تتناقشوا للصباح ! المهم أنا تعبت و ماشي أنوم ، عاين لـ أبوي و قال ليهو بنصحك تمشي و تخليهم ، نشوفهم حـ يتشاكلوا كدا لـ متين ، أمي من مكانها داك طلعت الحوش و مشت صحت بناتها الكانوا نايمين ، حلفت إلا ترجع في الليل داك ، كانت مقهوره شديد ، كنت سامعه أصواتهم لأنو محمد و عمو النور و أبوي طلعوا ليها برا و بقوا يتكلموا معاها و عمتي شغاله ليهم خلوها تمشي كان صحي ماشه ، طوالي طلعت و بقيت واقفه في باب الهول و بعاين ليهم من بعيد ، لمن أمي أصرت تمشي محمد قال ليها خلاص انا حـ أوصلك و مشى وصلها رغم إعتراض عمتي ، أنا طوالي رجعت و دخلت الغرفه و قفلت الباب علي ، مشاعري كانت مبعثره و أفكاري جايطه شديد و حاسه إني عايزا أبكي ، بس الحاجه الوحيده الكنت متأكده منها هي إني ما عايزا اسكن في بيت راجل أمي أو مع مرت أبوي ، بيت عمتي دا أفضل لي من البيتين ديلك و أولاد عمتي أفضل لي من أولاد ابوي و من أولاد أمي ، و أنا قاعده كدا جات عمتي داخله ، ضمتني عليها و قالت لي والله ما حـ أخليها تسوقك ، أمك دي وحده أنانيه ، لمن شافتني بريدك و متعلقه فيك قلبها وجعها و اتغاظت عشان كدا دايره تسوقك معاها ، أنا متأكده والله إنو حتى لو كان خليناك تمشي معاها راجلها ما حـ يخليك تقعدي في بيتو دقيقه وحده ! أنا ما بهمني شي غير مصلحتك ، صدقيني لو مشيتي و قعدتي مع أمك في بيت راجلها حياتك كلها حـ تتبشتن ، دا في حال إنو راجلها سمح ليك تقعدي ، مسحت لي دموعي و قالت لي طول ما أنا عايشه ماف زول حـ يسوقك من البيت دا ، انتي بتي و حته من قلبي و ما حـ أفرط فيك ... ضمتني مساااافه و قعدت تتكلم معاي ، بعدها زحت مني شويه و قالت لي انتي زعلانه مني ؟؟
طبعاً الوقت داك دموعي كانت نازله عشره عشره ، قالت لي ما قاصده اقول القلتو لـ أمك لكن هي كمان ما سكتت و اتطاولت علي في نص بيتي !!... مسحت لي دموعي و قالت لي أمك كمان سمعتني كلام قاسي ! يعني انتي زعلانه مني عـ.... قاطعتها و قلت ليها أنا ما زعلانه منك يا عمتي و أنا هنا مرتاحه ، ما عايزا أمشي معاها ، عايزا أقعد معاك انتي ، تاني ضمتني و قالت لي كلامك ريحني ، خفت أمك تأثر عليك و تخليك تصدقيها و تمشي معاها ...
المهم في صباح اليوم البعدو لمن كنت قاعده جوه الغرفه عمتي نادتني من الهول ، كان ملياااان بكل الأهل الكانوا بايتين معانا ، طبعاً متلمين عشان يشربوا شاي الصباح ، لمن طلعت ليها قالت لي تعالي أقعدي جنبي ، مشيت قعدت جنبها و أنا ساكته ، بت خالة عمتي يلي هي عمتي بـ اللفه قالت لي ولا تزعلي نفسك و عمتك دي ما تفرطي فيها ، العملتو ليك سميره أمك ما كان حـ تعملو ليك ، سميره دي أنا متأكده لو كان عندها بت ما كان رادتها قدر ريدتها ليك ، ماريا كبت لي شاي و مدت لي الكبايه ، فجأه كدا فاروق جا طالع ، ماريا نادتو و قالت ليهو تعال اشرب شاي يا فاروق و علاء وين ؟؟ علاء طوالي جا ناااطي و قال ليها أنا هنا كبي لي ساااي ، بعدهم عمر و عمو النور و أبوي جوا قعدوا و شربوا الشاي معانا و ماف أي زول جاب سيرة الحصل أمبارح ، أبوي قال لي أصبحتي كيف ان شاء الله ماف شي واجعك بسبب وقعة أمبارح ، قلت ليهو لا لا كويسه ، بعد شراب الشاي مباشرة الناس بدت تلملم حاجاتها عشان تمشي بيوتها ، أبوي ساق مرتو و أولادو و مشوا و كذلك عمو النور و الباقين ، قعدوا معانا ماريا و منهل عشان يساعدوا عمتي في ترتيب البيت ، مع العصريه كدا ناس فاروق كانوا بلعبوا بالورق في الحوش ، كنت سامعاهم بس ما عندي مزاج أطلع ألعب معاهم ، كنت ماسكه الريموت و بقلب في القنوات بزهج ، فجأه عمر جا داخل و قعد قصادي ، نهاي ما عاينت ليهو ، قال لي هسي الريموت دا ذنبو شنو ؟؟
ما رديت عليهو !
قال لي حـ تطقي لو كتمتي أكتر ، رأيك شنو تضربي بالريموت دا الحيطه ! أو تكسري الكبايه القدامك دي ، يمكن غضبك و زعلك دا يخف شويه !... برضو ما اتكلمت معاهو ، قال لي انتي زعلانه من شنو و من منو تحديداً ؟؟
يعني كنتي عايزا تمشي مع أمك ؟؟... عشان لو بالجد عايزا أمك طوالي حـ أوديك ليها لأنو في الأول و في الآخر دي أمك و ماف زول بقدر يمنعك منها و.... قاطعتو و قلت ليهو بزهج : عمر اسكت مني !
قال لي لا لا عادي ياخ كان تقولي لي قفّل مني !! تقريباً انتي بديتي تشوفيني قدرك أو قايلاني علاء عشان كدا بتقللي احترام معاي و لمن اتكلم معاك بتعملي نفسك ما سامعه !
برضو لا عاينت ليهو لا اتكلمت معاهو ، قال لي بنهره أنا بتكلم مع الحيطه !!
طبعاً خلعني خلعه ما عاديه !! أول مره ينهرني و اول مره يتكلم بالنبره العاليه دي !!
"ماذا يحدث لي . . .!!
ما الذي يدفعني نحوك بلا هوادة ، دون تردد أتقدم اليك ، لم أعد قادرة على أن أميز نفسي ماذا فعلت بي يا رجل ، أتقدم نحوك و أنا أدرك جيداً بأني سأنال صفعة على وجهي ، تلك الصفعة لن تؤذي خدي بل ستحرق روحي ، ستجعلني أشتعل دون انطفاء . .!! "
يتبع.....
