المهم عدت فتره بتاعة شهرين كدا أو أكتر فيها علاقتي بـ عمر باظت على الآخر و في نفس الوقت حسيت إنو علاقة عمر بـ ماريا ماشه تطور ، غيتو انا ما متأكده إذا عمر بحب ماريا أو لا بس هي كانت كل مره جايه ناطه لينا في المحل ، ما بتجي إلا لمن عمر يكون قاعد .... ما غباء مني بس انا بالجد ما كنت عارفه هو مالو معاي ، ما عارفه أنا غلطت معاهو في شنو عشان يتغير فجأه كدا ، لو كان بسبب المكالمه القلت ليهو فيها روج و فاونديشن...كان حـ يزعل يوم يومين و يرجع تاني بس تعاملو دا انا متأكدة إنو ما بسبب القلتو ليهو في المكالمه ! عمر واحد غتيت و غامض و ما مفهوم عشان كدا ما قدرت اسألو و اقول ليهو في شنو ، حتى مرات لمن يوصلني البيت بنكون ساكتين لحد ما نصل ، كنت محتاره شديد و بسأل نفسي أنا عملت ليهو شنو ! في الآخر وصلت لـ فهم معين و هو إنو عمر بتعامل معاي كدا بسبب ماريا ، يعني أنا قبل كدا غلطت كتييير مع ماريا و أكبر غلطه عملتها في حقها و يلي لحد الآن بلوم نفسي عليها هي لمن باريت سهى و فتحت الباب لـ راجل غريب عشان عمر يشك في ماريا ... عمر عارف بكل عمايلي دي و أكيد ماريا ما قصرت و حكت ليهو و يمكن زادت حاجات من عندها ، لحد الآن ما متأكده إذا دي ماريا أو سهى الرسلت لـ عمر و حكت ليهو و إتهمتني بـ قصة عنود بس الأكيد إنو الإتنين ديل ما عايزين لي الخير ، ماف وحده فيهم حـ تقصر لمن تلقى فرقه فيني ، ماريا أنا عارفه هي بتعمل كدا ليه و ليييه لاصقه في عمر بس هو ليه مديها فرصه !؟ أيوه هو بعد معرفتو لـ حقيقتي اتضايقت مني و لمن اختفيت و لقانا خت كل حاجه على جنب و إتعامل معاي عادي كأنو ما حصل شي و فجأه كدا اتغير ، ما أكذب و أقول إنو تغير عمر و وجود ماريا ما أثروا علي و ما وجعوا قلبي ، كنت بتوجع لمن أشوفهم مع بعض و بزعل شديد بس بكتم جواي و ما بظهر ليهم الحاجه دي ، يوم غشتني معزه في المحل بعد ما خلصت محاضراتها ، و نحنا بنتونس قالت لي عمر مالو معاك ؟! ما قاعده اشوفكم بتتكلموا مع بعض ولا بتعاينوا لبعض ! قلت ليها ولا شي و أصلاً نعاين لبعض ليه ! يا بت نحنا جاين هنا عشان نشتغل و بعدين هو قاعد يجينا في البيت و لو ما بتصل على أمي ... قالت لي ماريا هي السبب صح !؟ من بقت تجي كتير في بيت ناس خالتو سميره و هنا شكيت في الموضوع !
قلت ليها معزه عايني الموضوع كالآتي عشان تاني ما تسأليني :
عمر عارف بكل حاجه أنا عملتها لـ ماريا و عااارف بحكاية الراجل الغريب الأنا فتحت ليهو الباب عشان يدخل و بقصة عنود و متهمني بيها هنا ، انتِ عارفه إنو ماريا و سهى هم الكانوا برسلوا لـ عنود بأرقام مجهوله عشان يخربوا علاقتها بـ عمر و يشككوها فيهو ، المهم في الآخر المصايب دي كلها وقعت في راسي أنا ، ماريا أو سهى أو الإتنين سوا اتفقوا و رسلوا لـ عمر و قالوا أنا الكنت برسل لـ عنود عشان أخرب علاقتهم و شاكلني رغم إنو عارف أنا عملت كدا ليه و أنا هسي ما بلومو لأني عرفت و فهمت إنو العملتو بالجد تافه و حقير شديد و حبي لـ عمر ما مبرر لـ دا كلو ، المهم عمر شاكلني و أهاني بعد ما عرف و حصلت فجوه بيناتنا المهم باقي الموضوع داك ، بعد مشيت مع أمي و عمر لقانا بعد فتره طويله ، أتعامل مع عادي و أداني إحساس إنو اتناسى أغلاطي و عايز يفتح صفحه جديده بس شكلو ماريا لمن ظهرت تاني اتذكر العملتو معاها و اتذكر إنو زعلان و متضايق مني عشان كدا رجع لـ موقفو .... دقيقه ظهور ماريا كان مفاجئ بالنسبه لي أنا لأني كنت غايبه بس أكيد ما مفاجئ بالنسبه لـ عمر ! أنا و ماريا اختفينا من حياة بعض بس أكيد ماريا ما حتكون مختفيه من حياة عمر خاصة و انها بتحبو و غير كدا هي بت عمو و أكيد متواصله معاهو و بتجي بيتهم !... المهم يا معزه الإتنين ديل لو بحبوا بعض أو حبهم من طرف واحد انا تعبت و قنعت لا عايزا اعمل شي لا عايزا اتكلم في الموضوع دا ، بعد دا أي زول حر في حياتو و أي زول ياكل نارو 💔
معزه سكتت مسافه بعدها قالت لي مبالغه ! ليه ما حكيتي لي قبل كدا !... يعني يمكن عمر... قاطعتها و قلت ليها أنا ما عايزاك تواسيني و ما عايزاك تقولي لي كلام خارم بارم و تدافعي عن عمر ، عليك الله لـ مره وحده قولي الحق و ما تحاولي تلمعي عمر و تبرري ليهو !
بعد مسااافه قالت لي فعلاً عمر دا ما مفهوم !.... شكلو الشي دا عندهم وراثه ، غيتو أولاد خالتو سميره ديل كلهم غتيتين و غياظين !
قلت ليها نعم !! لا لا يختي كلهم كويسين و ما فيهم كلام إلا الإسمو عمر دا ، واحد غيااااظ و بارد و غتيت !.... قالت لي صدقيني ما هو بس ، أولاد عمتك ديل كلهم غياظين !
قلت ليها دقيقه انتِ ليه بتقولي كدا !!؟
قالت لي ما بسبب موقف أو شي معين بس بحسهم غياظين ، قلت ليها ياخ ما تتكلمي ساي ، لا محمد لا فاروق لا سليم بشبهو عمر في تصرفاتو ، ديلك في كفه و دا في كفه تااانيه خالص ، فجأه رفعت صوتها و قالت لي كذابه والله سليم غياظ !... لمن انتبهت على نفسها ختت يدها على خشمها و بقت تتلفت عشان تتأكد إنو ماف زول سمعها ... طبعاً بقيت أعاين ليها و أنا مستغربه ! قلت ليها سليم !! مالو سليم و أصلاً انتِ لقيتيهو وين لمن تقولي عنو غياظ !
قالت لي أنسي أنسي ، قلت ليها بتسلي روحي عشان تعرفي أخباري و أي حاجه داساها عنك و لمن أجي اسألك عن شي يخصك تقولي لي أنسي !؟ المهم ماف مشكله يا زوله على راحتك 😊
سكتت مسااافه بعدها قالت لي لا ما كدا يا مها بس أنا أصلاً ما عارفه اقول ليك شنو أبدا ليك من وين ... إتلفتت حولينها و قالت ان شاء الله مازن ما يسمعني... المهم مش كان قلت ليك إني زمااان كنت حابه واحد و هو حابي وحده غيري ؟!.... ضيقت عيوني و قلت ليها ايوه !.... بتردد قالت لي أنا كنت بتكلم عن سليم !
طبعاً نططت عيوني و قلت ليها شنووو ! سليم ! واااي يا معزه ! قالت لي هوووس وطي صوتك عايزا مازن يسمعنا ولا شنو !
قلت ليها أصلو ما بصدق ! سليييم ! سليم دا أصلاً قعد في بيتهم متين يا بت عشان تحبيهو !
قالت لي ياااخ من زمان قبل ما يزعل من أمو و يمشي يسكن في بيت مرت أبوهو !
قلت ليها وااي ياخ يا حليلك ! بس انتِ ذاااتك البوديك تحبي سليم دا شنو ، كان تحبي فاروق مثلاً ، ظريف و متواجد في بيتهم و الحي لو فتحتي الباب ساي حـ تشوفيهو 😂 ما زي سليم البجي البيت في السنه مره ، قالت لي نفس السؤال دا تسأليهو لـ نفسك ليييه حبيتي عمر و ما حبيتي فاروق أو أي واحد من أخوانو ؟!... قلت ليها هوووس وطي صوتك ! خلاص فهمت شكلي نسيت نفسي ، بس اتخيلي لو كان حبيت واحد تاني من أخوان عمر ، سليم مثلاً !😈
قالت لي و اتخيلي لو كان أنا ما حبيت سليم و حبيت واااحد من أخوانو المتواجدين ديل ، عمر مثلاً !😈
قلت ليها حبييهو ساااي ما فارقه معاي ، أصلاً هي كدا كدا خربانه ، قالت لي أنا ما قادره اتخيل عمر مع غيرك ولا قادره اتخيلك انتِ مع واحد غير عمر ، بحس إنو انتوا الإتنين بأي طريقه لازم تكونوا لبعض !... قلت ليها إجباري هو ! و على فكره انا بعد دا لا عايزا عمر لا غيرو و عليك الله تاني ما تجيبي لي سيرتو ، أنسيناااا منو !
قالت لي رغم إني الكنت قعد أنصحك بس هسي عايزاك تنصحيني ، عايزاك تقولي لي كيف أتجاوز سليم و ما أركز معاهو... كنت مفتكره إني لو جا يوم و رجع فيهو سليم بيتهم مشاعري تجاهو حـ تموت بس صدقيني أول ما شفتو حسيت إنو حب ليهو بدا من أول و جديد ، شوفتو أحيت لي مشاعري المدفونه .... قلت ليها معزه !! أجي شفتيهو وين انتِ سليم دا ؟؟
قالت لي ما عارفه يعني ؟! سليم رجع بيتهم ! قلت ليها بالجددد ! غريبه نحنا قبل أيام كنا معاهم بس ما شفناهو في البيت و ماف زول جاب لينا سيرتو !
قالت لي من جا ليهو أسبوع ، يمكن جا بعد ما انتوا جيتو ، قلت ليها أخيراً عقلو رجع ليهو ! سبحان الله عمتي سميره و أخوانو من زمااان كانوا بحنسوا فيهو عشان يرجع و هو مقوي راسو و هسي لمن سكتوا و خلوهو و ماف زول بقى شغال بيهو جا راجع !
قالت لي عمتك قالت إنو تعامل مرت أبوهو معاهو اتغير ، اتضايقت من قعادو معاهم و بقت تطاعنو بالكلام عشان كدا شال حاجاتو و جا راجع بيتهم ، قلت ليها سليم دا قاعد مع مرت أبوهو دي قريب الـ 7 سنوات ياداااب حتى اتضايقت منو ! و هو ذاتو يستاهل لأنو خلى أمو و مشى لـ مرت أبوهو ، الواحد مهما لف و دار مصيرو يرجع بيتو و ماف زوجة أب بتاخد مكانة الأم ، ماف أم زي أمك و ماف بيت زي بيتكم ، هسي شوفي أنا لفيت كدااا لحد ما في الآخر رجعت لـ أمي و حالياً ساكنه معاها ، عمتي ما قصرت مني و كذلك أولادها بس الواحد مهما بعد مصيرو يرحع و مهما لف مصيرو يرجع لـ مكانو الأصلي اللازم يكون قاعد فيهو ... المهم إتونسنا شويه كدا بعدها معزه مشت ، بعد شويه كدا وحده من البنات الشغالين معانا كانت بتتناقش مع واحد من الزباين ، هي كانت بتتكلم معاهو بكل إحترام و هو رافع صوتو عليها و بقل في أدبو ، ما عارفه عمر و مازن كانوا وين ، مشيت عليهم و قلت للبت خير في شنو ؟؟ قالت لي دا قبل 3 أيام اشترى مننا تيشيرت و كم حاجه كدا ، المهم هسي جاي عشان يرجع التيشيرت و قدر ما حاولت أفهمو إنو البتباع ما برجع تاني خاصة بعد ما تمر عليهو أيام رافض يفهم و حالف انو يرجع التيشيرت و أرجع ليهو قروشو و المشكله يا مها إنو مرجع لينا التيشيرت مشروط !... طوالي الولد جاااط و قال ليها انتوا البعتوهو لي كدا ، لو كان انتبهت ما كان اشتريتو منكم ، انتوا ناس خداعين و محتالين ، ما بعرف بس رجعوا لي قروشي دي بأي طريقه عشان ما استخدم أسلوب تاني ، قلت ليهو بتهددنا كمان ! قال لي أفهميها زي ما عايزا المهم قروشي ترجع لي ، قلت ليها طييب بس رجع لينا التيشيرت زي ما شلتو عشان تاخد قروشك 😊
طبعاً كل الزباين الكانوا موجودين ركزوا معانا ...
الولد صرخ فيني و قال لي انتِ هبله ولا شنو أقول ليك انتوا البعتوا لي تيشيرت مشروط تقولي لي رجعوا لينا زي ماهو !... رمى التيشيرت في وشي و قال لي اها رجعتوا ليكم زي ما شلتو !.... طبعاً أنا خلااااص أعصابي باظت و حسيت بالإهانه قدام الناس دي كلها ! بالجد الموقف كان بايخ و الولد لسه شغال يكورك ، فجأه كدا جا عمر ، طبعاً مشت وحده من البنات نادتو و جات معاهو ، قال ليهو خير يا شاب مالك مصدع بينا ؟!.... قال ليهو ياخ أنا ما ببغاء عشان أقعد اكرر ليكم الكلام كل مره ... إتلفت عاين لي و رفع لي أصبعو و قال لي رجعت ليك التيشيرت فـ رجعي لي قروشي ، عمر طواالي جا وقف في نصنا و نزل ليهو أصبعو و قال ليهو أحسن تحترم نفسك عشان ما تطلع من هنا و يدك فيها 4 أصابع !.... قال ليهو ما طااالع قبل ما آخد حقي و محلكم الزفت دا تاني لو بقى المحل الوحيد في العالم دا كلو ما حـ أجي ليهو ، عمر قال ليهو اتفضل أطلع برا عشان ما استخدم معاك أسلوب تاني ... البت الكانت بتتناقش مع الولد أول حاجه حكت لـ عمر الحصل من البدايه ، لمن قالت ليهو إنو الولد رمى التيشيرت على وشي إتلفت عاين لي و طوالي أدى الولد كف و قال ليهو حيوان انت ولا شنو ، طبعاً الولد هاااج زياده و اشتبك مع عمر و أنا ما عارفه اعمل شنو و البنات يصرخن ! كنت ماسكه التيشيرت و شغاله لـ عمر خلاص خليهو و يضرب فيهو زياده ، شال مني التيشيرت و قال ليهو انت رميتو على وشها و أنا حـ أضوقك طعمو ، طبعاً الولد كان بنبذ و بقول كلام ماف داعي ليهو ، طوالي عمر حشر ليهو جزو من التيشيرت في خشمو و ضربو كف و جراهو و طلعو برا المحل و الناس تتفرج و جزو يضحك !... طبعاً أنا كنت خايفه إنو الولد يكون معاهو آله حاده و يقوم يغدر بيها عمر ، طبعاً لحقناهم و طلعنا برا و أنا كنت أول وحده ، قلت ليهو عمرر كفايه خليهو ! طبعاً ولا كأني بتكلم معاهو و الزاعجو إنو الولد لسه بقل في أدبو ، فجأه جا مازن و حجزهم و بقى يقول لـ عمر خلااااص خلاص يا عمر خليهو و طوالي فك الولد من عمر و ساق عمر دخلو جوه و نحنا وراهو ، مازن قال ليهو هدي نفسك و ما كان تتصرف بالطريقه دي !
قال ليهو بنبرة زهج عايزني اتصرف معاهو كيف يعني الحيوان دا ، عشان لاقيها بت براها عايز يقل أدبو عليها ، عاين لي و قال لي بنهره و انتِ لييه ما ناديتيني ! هسي لو كان اتمادى اكتر أو ضربك ! قايله نفسك حـ تقدري عليهو مثلاً و بعدين دا ما شغلك ، ما عندك أي شغله بالوباين و البيع و الشراء ، خليك بس قاعده في مكانك .... طبعاً كنت بعاين ليهو بس ! ديك كانت أول مره يعاين لي و يتكلم معاي مسافه طويله من يوم اتغير علي !
طبعاً ما قلت ليهو حاجه و بعدها كل واحد مشى على شغلو و أنا رجعت قعدت مكاني ، اتنهدت و شلت قلم و بديت ارسم على الورقه القدامي ، كنت مركزه شديد و لمن رفعت راسي لقيت عمر قاعد في الكرسي المقاصدني ، إنخلعت طبعاً لأني ما حسيت بيهو لمن جا و قعد !
عاين للورقه و قال لي دا شغلك ، تاني ما تدخلي في المواضيع التانيه ، نحنا موجودين ، هزيت ليهو راسي بس و واصلت رسم رغم إني كنت متوتره شديد و حاسه بنظراتو علي ، بعد مسافه قال لي ناس البيت كيف ؟؟
من دون ما أرفع راسي قلت ليهو كويسين ، هز لي راسو و قبل ما يقوم قال لي ما كنت عايز أرفع صوتي عليك قدام الناس بس كنت منفعل ... طبعاً بقيت أعاين ليهو بس ، أول ما إتحرك قلت ليهو عمر !
إتلفت و قال لي ايوه !
كنت عايزا أقول ليهو أنا لو غلطت صارحني بغلطي ما تعمل رايح ، كنت عايزا اقول ليهو ليه اتغيرت علي و ليه شغال معاي صامت بس اتراجعت في الدقايق الآخيره و قلت في نفسي ليييه اسألو ، ليييه اظهر ليهو ضعفي ، ليييه احسسو إنو تجاهلو لي و عدم كلامو معاي مؤثرين علي !؟
قال لي نعمم !
قلت ليهو خلاص ماف شي ، قال لي لا في شي !.... في حاجه مفروض أعرفها ؟! ... قلت ليهو لا فـ طوالي مشى ، قعدت و انا مستغربه فيهو ، مره يكون كويس و فجأه يتغير بس موقفو القبل شويه دا حسسني بالإطمئنان ، جاني شعور ما عادي ، اتطمنت عشان عرفت إنو عمر ما برضى فيني ، حتى لو زعلان مني و مخاصمني ما برضى زول يقل أدبو علي ، للحظات إبتسمت بس لمن اتذكرت ماريا و لصقتها فيهو و برودو معاي قلت هو اتصرف كدا مع الولد عشان أنا بت خالو و يمكن كان حـ يتصرف كدا مع أي بت تانيه !
المهم بعدها مرت الأيام و الوضع بيني و بين عمر زي ما هو ، طبعاً كنت متواصله مع معزه و بندردش مع بعض في الواتس و هي تحكي لي عن سليم ، يوم قلت ليها انتِ حـ تقعدي تحبي فيهو كدا لـ متين و هو ما عارف ! قالت لي ما عارفه بس أكيد ما حـ أمشي اقول ليهو سليم أنا بحبك ... قلت ليها غيتو يا معزه من دخلتي الجامعه بقيتي جريئه شويه و مصطلحاتك قويه 😂
قالت لي خلاص أكيد ما حـ أمشي و أقول ليهو سليم أنا بريدك !.. طبعاً ضحكت عليها ضحك ، رسلت لي ريكورد و قالت لي والله يا مها انتِ ما عارفه أنا قلبي واجعني قدر شنو ، الحب البكون من طرف دا صعب و موجع شديد ، على الأقل انتِ عمر عارف انكِ بتحبيهو ، بس انا سليم يمكن ذاتو ما عارف إنو أنا مولوده و عايشه في الحياة دي !
قلت ليها يعني أنتِ شايفه إنو معرفة عمر بـ مشاعري حاجه كويسه و بتخفف وجع القلب !... قالت لي ايوه على الأقل طلعتي الجواك و ما عندك حاجه تدسيها تاني ، أما سليم دا لو قعدت أحب فيهو عمري كلو ما حيعرف و ما حـ يحس بي ، خايفه إنو يجي يوم يعرس فيهو سليم و يكون عندو أولاد و أنا لسه أحب فيهو !
قلت ليها عليك الله أمشي قولي ليهو و ريحي نفسك ، قالت لي يا بت انتِ مجنونه ! والله لو أقعد عمري كلو أعاين ليهو من بعيد ما أمشي أقول ليهو كدا !
المهم في يوم عمتي جاتنا في البيت و جوا معاها فاروق و سليم ، طبعاً هو قبل كدا جانا في البيت و سلم علينا ، المهم طوالي رسلت لـ معزه و قلت ليها سليم معانا في البيت ، قالت لي قووولي والله !! قلت ليها والله العظيم ، جا مع عمتي و فاروق ، قالت لي قلبي شغال زي الدلوكه التقول شايفاهو قاعد قدامي !... قلت ليها حالتك بقت صعبه ، البشوفك زمان ما يقول إنو الهسي دي إنتِ 😂
قالت لي ماف أي فراق ، زمان كنت صغيره بس عارفه إنو دا حب بس ما ينفع أتكلم و كنت خايفه و دا شي طبيعي و أصلاً اتكلم أقول شنو و لـ منو ، أما هسي الوضع إختلف و أنا ما صغيره و عارفه مفروض أكون واضحه قدام منو و غامضه قدام منو !... قلت ليها معزه أنا بهظر معاك ! قالت لي خلاص معليش ! طبعاً استغربت فيها بقت قاعده على الهبشه !
قبل ما أقفل الشبكه قالت لي مها أنا بالجد آسفه والله ، كلامك ما فيهو شي بس براي منفعله و زهجانه ، انتِ ما قصدك شي بس براي فسرت كلامك بطريقتي و حسيت إنك بتقولي لي : زمان كنتِ مؤدبه و هسي لا ، قلت ليها أبداً والله ، معزه انتِ صحبتي الوحيده و أنا مستحيل اجرحك و اقول ليك كلام زي دا ، كنتِ مؤدبه و هسي مؤدبه و حتفصلي مؤدبه و أنا عارفه أخلاقك و مستحيل أشكك فيك ، قالت لي حبيبيتي والله ، بالجد خجلانه منك يا مها فـ عليك الله أعفي لي و لو زعلتي ما تمشيني ساي ، قلت ليها والله العظيم ما زعلت !
المهم اتكلمنا شويه و بعدها طلعت من الدردشه ، انتبهت إنو عمر رافع إستوري ، لمن فتحتها لقيتو خاتي صورتو و هو لابس جلابيه و نظاره و كاتب : الواحد خجلان يقول إنو داخل على الـ 32 و لسه أعزب 🙆 أرح يخوانا رشحوا لي عايز أعرس من طرف "
طبعاً حسيت بوخزه في قلبي ، من غبائي رديت عليهو و قلت ليهو عندي ليك عروس منااااسبه ، طبعاً لمن استوعبت الكتبتو طوالي حذفت الرساله و قلبي كان شغال دق دق ، كنت حـ اقفل الشبكه بس فجأه جات رساله منو ، شفتها من فوق كانت إستفهامات ، قفلت الشبكه و مشيت قعدت مع ناس أمي ، المهم ناس عمتي ما طولوا معانا جوا يسلموا علي و يمشوا ، طبعاً رغم إنو أنا و عمتي بنجي نزور بعض عادي بس علاقتنا اتغيرت و أنا رغم إني اعتذرت منها على الكلام القلتو ليها قبل كدا بس في حاجات لمن تنكسر ما بتتصلح و الإعتذار ما كفايه ، الكلمه زي السهم لو طلعت ما بترجع تاني ، أحياناً كتيره الكلام البنقال في لحظات زعل و غضب بهدم علاقات ليها سنين 💔
المهم بعد ما مشوا ، بليل مسكت تلفوني و فتحت الشبكه ، طبعاً لقيت عمر مرسل لي تاني ، أول رساله كانت استفهامات على الكتبتو فـ عرفتو مستخدم الواتس الخسيس و تاني رساله كاتب لي : آي عليك الله اختاري لي أي عروس و ألحقي بيها ولد عمتك دا ... طبعاً دائماً كلامو بوجعني ، قلت ليهو طوااالي حـ أفتش ليك ... كان داخل فـ رد علي و قال لي مش قلتي عندك عروس جاهزه ؟
قلت ليهو فعلاً بس حسيتها ما حـ تناسبك ، قال لي خليني أشوفها و أجرب حظي معاها ما عايز أضيع وقت ، قلت ليهو خلاص بعد أكلمها ، قال لي إستعجلي لي في الموضوع دا ، قلت ليهو ما عندك أي مشكله ، بساعدك و بقيف معاك و بعدين انت ذاااتك ساعدني و ألقى لي عريس و كدا نكون إتعادلنا 🙊
قال لي ابشررري .... في نفسي قلت ليهو تبشر في التجاني الماحي ان شاء الله ، ياخ واحد غياظ و براي هارده فشفاشي معاهو ، عنو خليهو يعرس عشان أرتاح منو ، قفلت الشبكه و أول ما ختيت راسي على المخده دموعي جات نازله ، بقيت أمسح فيها و هي تنزل ، قلبي كان واجعني شديد و كنت حاسه إني بلف في حلقه ، في متاهه ، في نقطه بمشي و برجع ليها مره تانيه ، عمر دا أنا ما قادره انزعو من جواي ، ما قادره أقتلع جذور حبو المتكوم جواي ، مسحت دموعي و تاني فتحت الشبكه و رسلت ليهو ، قلت حـ اقول العندي و يحصل الحيحصل ، عارفه إنو ما من حقي أقول كدا و ما من حقي أخطي الخطوه دي ، فكرت أكتر من مره قبل ما أكتب حرف واحد بس في الآخر اتهورت و كتبت ليهو :
_سليم كيفك
_ عايزا اقول ليك حاجه مهمه بس ما عايزاك تكلم زول
_ عارفه انك حـ تتفاجأ و تنخلع من الحـ اقولو و حـ تستغرب فيني بس خلاص قررت اتكلم و يحصل الحيحصل
_ معزه يا سليم بتحبك من زماااان من قبل ما أنا اجي و أقعد معاكم في البيت ، صدقني هي لحد اللحظه دي بتحبك و انت ما جايب خبر ، عارفه إنو يمكن الموضوع يفاجأه بس كمان يمكن ما يفرق معاك و عارفه إنو ممكن تضحك علي و تقول حركات مراهقين أو هباله مني ، بس دا الحسيت إني لازم أقول
